Shabdayatra Prakashan

शब्दयात्रा प्रकाशनले काभ्रेपलान्चोक जिल्लामा सक्रिय रहेका पत्रकारहरूमध्ये हरेक वर्ष दुईजना पत्रकारलाई कदर गर्ने गरेकोमा यस वर्षदेखि एकजना फोटो पत्रकार समेत थप गरी तीनजनालाई कदर गर्ने भएको छ । कदरपत्र प्रदान गर्नुपर्ने पत्रकारहरूको चयन गर्न कृष्णमणि कुइकेललाई संयोजक तोकिएको हुँदा उहाँले सकुल थापा र पदमनाथ ढुङ्गानालाई सदस्य मनोनयन गरी तीन सदस्यीय चयन समिति बनाउनुभएको छ । काभ्रेपलान्चोक जिल्लामा पत्रकारिता विषय अध्ययन गरिरहेकी तर पढाइमा उत्तम भएर पनि आर्थिक अवस्था कमजोर भएकी काभ्रेपलान्चोक जिल्लाकै एउटी छात्रालाई शब्दयात्रा प्रकाशनले हरेक वर्ष ‘शब्दयात्रा द्रोणपुष्प पत्रकारिता छात्रवृत्ति’ प्रदान गर्ने गरेको छ । उक्त छात्रवृत्ति प्रदान गर्नुपर्ने छात्राको नाउँ सिफारिस गर्ने जिम्मा पनि उक्त समितिलाई नै दिइएको छ । शब्दयात्रा प्रकाशनले उक्त समितिबाट सिफारिस गरिएका पत्रकारहरूलाई कदरपत्र र छात्रालाई छात्रवृत्ति आगामी मङ्सिर महिनाको पहिलो साता प्रदान गर्नेछ । कदरपत्रको आर्थिक व्यवस्थापन श्री हरिगोपाल प्रधानले र छात्रवृत्तिको आर्थिक व्यवस्थापन श्री द्रोणप्रसाद श्रेष्ठले गर्नुभएको हो ।

आफूले लेखन तथा सम्पादन गरेका दुई कृति ‘इतिहासमा सिम्रौनगढ’ र ‘गुप्त भूमि हेलम्बू’ सञ्चारकर्मी तथा लेखक परशु घिमिरेले शब्दयात्रा प्रकाशन पुस्तकालयका लागि उपलब्ध गराउनुभएको छ । दुवै कृतिमा सम्बन्धित स्थानको इतिहास, पुरातत्त्व, संस्कृति, सामाजिक लोकजीवन आदिका विवरण अभिलेखबद्ध गरिएका छन् । गहन अनुसन्धान गरेर तयार पारिएका यस्ता महत्त्वपूर्ण कृतिहरू उपलब्ध गराउनुभएकोमा सञ्चारकर्मी तथा लेखक परशु घिमिरेप्रति शब्दयात्रा प्रकाशन परिवार हार्दिक आभार व्यक्त गर्दछ ।

‘शब्दयात्रा बेलप्रसाद श्रेष्ठ दानशीलता सम्मान’ का आर्थिक व्यवस्थापक, लेखक तथा धुलिखेलका सारथिका रूपमा सुपरिचित व्यक्तित्व बेलप्रसाद श्रेष्ठले शब्दयात्रा प्रकाशन पुस्तकालयका लागि नेपाली र अङ्ग्रेजी भाषाका ५७ थान पुस्तक–पत्रिका उपहारस्वरूप प्रदान गर्नुभएको छ । यस सहयोगका लागि शब्दयात्रा प्रकाशन परिवार उहाँप्रति हार्दिकतापूर्वक आभार व्यक्त गर्दछ । 

शब्दयात्रा प्रकाशनद्वारा संस्थापित ‘शब्दयात्रा जीवनचन्द्र कोइराला सिन्धुली प्रतिभा पुरस्कार’ को अक्षयकोषमा थप गर्नका लागि ज्योत्स्ना कोइरालाले १५ हजार रुपियाँ उपलब्ध गराउनुभएको छ । यस सहयोगका लागि शब्दयात्रा प्रकाशन परिवार उहाँप्रति हार्दिकतापूर्वक आभार व्यक्त गर्दछ । 

पुस्तक बिक्रीबाट आएको रकम अक्षरसेवी सहयोग कोषमा राखिने भएकाले स्वेच्छिक मूल्य कायम गरेर पुस्तक किनिदिन शब्दयात्रा प्रकाशनमा आयोजित कार्यक्रममा आग्रह गरिएपछि करिब १५ मिनेटभित्र १० हजार ६५ रुपियाँको पुस्तक बिक्री भएको छ । पुस्तक किनिदिने सम्पूर्ण महानुभावहरूप्रति शब्दयात्रा प्रकाशन हार्दिक आभार व्यक्त गर्दछ ।