रामकुमार दाहाललाई विकलाङ्ग छात्रवृत्ति प्रदान गरिने

शब्दयात्रा प्रकाशनले २०७९ सालको ‘शब्दयात्रा भूप–मुक्ति विकलाङ्ग छात्रवृत्ति’ सङ्खुवासभा जिल्लाको खाँदबारी नगरपालिका वडा नं. ९ तुम्लिङटारमा अवस्थित श्री मनकामना रत्न अम्बिका माध्यमिक विद्यालयमा अध्ययनरत छात्र श्री रामकुमार दाहाललाई प्रदान गर्ने भएको छ । शब्दयात्रा प्रकाशन सङ्खुवासभा सम्पर्क केन्द्रका तर्फबाट संयोजक सुन्दरी घिमिरे खतिवडाले पठाउनुभएको सिफारिसका आधारमा उहाँलाई छात्रवृत्ति प्रदान गर्न लागिएको हो । आर्थिक अवस्था कमजोर भएका तर अध्ययनमा उत्तम रहेका रामकुमार दाहालले साहित्यिक क्षेत्रमा रुचि राखेर राम्रा कविताहरू सिर्जना गर्ने गर्नुभएको छ । छात्रवृत्तिको आर्थिक व्यवस्थापन भोजपुर दिङ्लामा जन्मेर हाल काठमाडौँमा बसोवास गर्नुभएका शिक्षासेवी तथा समाजसेवी डा. रूपनारायण श्रेष्ठले गर्नुभएको हो । उहाँले आफ्ना पितामाताको सम्मानस्वरूप शब्दयात्रा प्रकाशनमा छात्रवृत्तिका लागि अक्षयकोष राख्नुभएकाले त्यसैको ब्याजबाट शब्दयात्रा प्रकाशनले हरेक वर्ष विकलाङ्ग छात्रवृत्ति प्रदान गर्ने गरेको छ । छात्रवृत्तिको रकम र प्रमाणपत्र शब्दयात्रा प्रकाशन सङ्खुवासभा सम्पर्क केन्द्रमा पठाइनेछ र सम्पर्क केन्द्रले श्री रामकुमार दाहाललाई छात्रवृत्तिको रकम र प्रमाणपत्र प्रदान गर्नेछ ।