Home Blog Page 65

रामप्रसाद अधिकारी अभिनन्दित

0
शिक्षासेवी रामप्रसाद अधिकारीलाई शब्दयात्रा प्रकाशनद्वारा गठित नौ सदस्यीय अभिनन्दन समितिले हिजो २०७९ साल कार्तिक २५ गते शुक्रबार शब्दयात्रा प्रकाशनको सभाकक्षमा आयोजित विशेष कार्यक्रममा सार्वजनिक रूपमा अभिनन्दन गरेको छ । उहाँलाई समितिका संयोजक तथा सदस्यहरूले संयुक्त रूपमा अभिवन्दनापत्र समर्पण गर्नुभएको थियो ।
उक्त कार्यक्रममा ग्रन्थसम्पादक हरि मञ्जुश्रीद्वारा सम्पादित ‘आदर्श शिक्षक रामप्रसाद अधिकारी अभिनन्दनग्रन्थ’ लाई प्रा. डा. देवमणि भट्टराई, विशेष अतिथि गायत्रीकुमार चापागाईं र ग्रन्थसम्पादक हरि मञ्जुश्रीले संयुक्त रूपमा सार्वजनिक गर्नुभएको थियो । त्यसपछि उक्त अभिनन्दनग्रन्थ हरि मञ्जुश्रीले रामप्रसाद अधिकारी दम्पतीमा समर्पण गर्नुभएको थियो । अभिनन्दनग्रन्थका सामग्री सङ्कलन शिव बन्जाराले, आवरणकला सफ्टवेयर इन्जिनियर रोशन मञ्जुश्री अधिकारीले र अक्षराङ्कन सङ्गीता केसीले गर्नुभएको थियो । यो अभिनन्दनग्रन्थ शब्दयात्रा प्रकाशनको १ सय ९० औँ प्रकाशनपुष्प र हरि मञ्जुश्रीको १ सय ३७ औँ पुस्तक हो । अभिनन्दनग्रन्थमा रामप्रसाद अधिकारीका विषयमा लिखित डा. सुरेशराज शर्मा, डा. भोला थापा, हरि मञ्जुश्री, मच्छेश्वर सापकोटा, शारदाप्रसाद शर्मा, टीपी शर्मा तिमिल्सिना, डा. बलराम तिमल्सिना, डा. अनन्त अधिकारी, चन्द्रबहादुर खड्का, पदम दाहाल, दामोदर घिमिरे, विजय सापकोटा लगायत ३६ जनाका जीवनीपरक र मूल्याङ्कनपरक लेख तथा संस्मरण र कविता रहेका छन् ।
रामप्रसाद अधिकारीमा समर्पित अभिवन्दनापत्रमा काभ्रेपलान्चोक जिल्लामा शिक्षासेवा र सामाजिक जागरणका लागि सुपरिचित रहनुभएका रामप्रसाद अधिकारीले आफू आबद्ध रहेका शिक्षालयहरूको भौतिक संरचनाको निर्माण र विस्तारमा, शैक्षिक गुणस्तरको अभिबृद्धिमा, महिला शिक्षामा जोड दिँदै विद्यालयमा छात्राको भर्नादर उच्च बनाउनमा, शिक्षालयभित्र जातीय र वर्गीय विभेदको अन्त्य गराउनमा तथा ग्रामीण समुदायमा सामूहिक चेतनाको जागरण र विस्तार गराउनमा अतुल्य भूमिका निर्वाह गरी आफूलाई उदाहरणीय व्यक्तित्वका रूपमा स्थापित गराउनुभएको र उहाँका यिनै सत्प्रयास, सत्कर्म र सत्मार्गदर्शनका कारणले उहाँभन्दा पछिका पुस्ताहरू सचेत, स्वाभिमानी, विचारवान्, सुदृढ र सङ्कल्पशक्तियुक्त बन्न थालेका हुनाले उहाँलाई नागरिक समाजका अनुकरणीय आदर्शका रूपमा स्वीकार गर्दै अभिवन्दनापत्र समर्पण गरिएको कुरा उल्लेख छ ।

तीन पत्रकारलाई कदरपत्र समर्पण

0

शब्दयात्रा प्रकाशनले काभ्रेपलान्चोक जिल्लाका तीन पत्रकारलाई २०७९ सालको ‘शब्दयात्रा प्रकाशन हरिगोपाल प्रधान कदरपत्र’ समर्पण गरेको छ । रेडियो पत्रकारिताका क्षेत्रमा सुमधुर आवाज र कार्यक्रम सञ्चालनको कौशलबाट श्रोतावृन्दको मनमा आफ्नो अमिट छाप राख्न सफल हुनुभएका रेडियो पत्रकार शिव बन्जारालाई, छापा तथा अनलाइन पत्रकारिताका माध्यमबाट खोज तथा विकास पत्रकारिताका क्षेत्रमा आफ्नो अमिट छाप राख्न सफल हुनुभएका छापा तथा अनलाइन पत्रकार भीम गौतमलाई र फोटो पत्रकारिताका माध्यमबाट राष्ट्रिय स्तरमा आफ्नो र जन्मजिल्लाको विशिष्ट परिचय कायम गर्न सफल हुनुभएका फोटो पत्रकार प्रशान्त श्रेष्ठलाई कदरपत्र समर्पण गरिएको हो । तीनैजना पत्रकारलाई प्रा. डा. देवमणि भट्टराई र हरिगोपाल प्रधानले कदरपत्र, गायत्रीकुमार चापागाईंले रुद्राक्षमाला र पुष्पमाला तथा द्रोणप्रसाद श्रेष्ठले उपहार समर्पण गर्नुभएको थियो । शब्दयात्रा प्रकाशनद्वारा कृष्णमणि कुइकेलको संयोजकत्वमा गठित चयन समितिको सिफारिसका आधारमा उहाँहरूलाई कदरपत्र समर्पण गरिएको हो ।

कृतज्ञतापत्र प्रदान

0

नेपाली वाङ्मयको श्रीबृद्धिका निम्ति क्रियाशील संस्था शब्दयात्रा प्रकाशनले नीलकण्ठेश्वर धाम संरक्षण समितिलाई कृतज्ञतापत्र प्रदान गरेको छ । शब्दयात्रा प्रकाशनको सुदृढीकरण र स्थायीत्वका लागि पाँच वर्षसम्म आफ्नो भवनमा शब्दयात्रा प्रकाशनको कार्यालय सञ्चालन गर्न दिएकोमा हार्दिक आभार व्यक्त गर्दै समाजसेवी कृष्णमणि कुइकेलको अध्यक्षता रहेको नीलकण्ठेश्वर धाम संरक्षण समिति (बनेपा — ६, काभ्रेपलान्चोक) लाई कृतज्ञतापत्र प्रदान गरिएको हो । निकट छिमेकी रहेका शब्दयात्रा प्रकाशन र नीलकण्ठेश्वर धाम संरक्षण समितिले एक–अर्काका पूरकका रूपमा सहकार्य र सहयात्रा गर्दा दुवै संस्थाका माध्यमबाट नेपाली वाङ्मय प्रज्ज्वलित भइरहने विश्वास शब्दयात्रा प्रकाशनले व्यक्त गरेको छ । कृतज्ञतापत्र प्रा. डा. देवमणि भट्टराई र हरि मञ्जुश्रीले संयुक्त रूपमा प्रदान गर्नुभएको थियो भने कृष्णमणि कुइकेल र सङ्गीता केसीले संयुक्त रूपमा ग्रहण गर्नुभएको थियो ।

साधारण सभा सम्पन्न

0

आज २०७९ साल कार्तिक १९ गते शनिबार शब्दयात्रा प्रकाशनको नवौँ वार्षिक साधारण सभा संस्थापक अध्यक्ष हरि मञ्जुश्रीको अध्यक्षतामा सम्पन्न भएको छ । सभाले हरि मञ्जुश्रीलाई सर्वसम्मत रूपमा सञ्चालक समितिको अध्यक्ष पदमा पुनः चयन गरेको छ । सदस्यमा हरिगोपाल प्रधान, कृष्णमणि कुइकेल, केदारनाथ तिमल्सिना र लीलादेवी श्रेष्ठ चयन हुनुभएको छ । यसै गरी सभाले भरतमणि जङ्गमको संयोजकत्वमा हरि मञ्जुश्री र सुनील सापकोटा सदस्य रहेको विधान संशोधन प्रस्ताव समिति गठन गर्नुका साथै सञ्चालक समितिको प्रतिवेदन, लेखापरीक्षण प्रतिवेदन र आगामी वर्षको अनुमानित आयव्यय विवरण पारित गरी लेखापरीक्षकको नियुक्तिसमेत गरेको छ । कार्यक्रमको उद्घाटन भरतमणि जङ्गमले र कार्यक्रम सञ्चालन शारदाप्रसाद शर्माले गर्नुभएको थियो । नयाँ सञ्चालक समितिको प्रस्तावक समितिमा सकुल थापा, पदम दाहाल र ढुण्डिराज पोखरेल हुनुहुन्थ्यो । नयाँ सञ्चालक समितिलाई प्रा. केदारनाथ श्रेष्ठले शपथग्रहण गराउनुभएको थियो ।

तीन पत्रकारलाई कदर गरिने

0
शब्दयात्रा प्रकाशनले २०७९ सालको ‘शब्दयात्रा प्रकाशन हरिगोपाल प्रधान कदरपत्र’ रेडियो पत्रकार शिव बन्जारा, अनलाइन पत्रकार भीम गौतम र फोटो पत्रकार प्रशान्त श्रेष्ठलाई प्रदान गर्ने भएको छ । शब्दयात्रा प्रकाशनका आजीवन सदस्य कृष्णमणि कुइकेलको संयोजकत्वमा गठित चयन समितिको सिफारिसका आधारमा उहाँहरूलाई कदर गर्ने निर्णय गरिएको हो । शब्दयात्रा प्रकाशनले हरेक वर्ष काभ्रेपलान्चोक जिल्लाका पत्रकारलाई कदर गर्ने गरेको छ ।

पत्रकारिता छात्रवृत्ति सुम्निमा मगरलाई

0
शब्दयात्रा प्रकाशनले २०७९ सालको ‘शब्दयात्रा द्रोणपुष्प पत्रकारिता छात्रवृत्ति’ काभ्रे बहुमुखी क्याम्पसमा स्नातक तह प्रथम वर्षमा पत्रकारिता विषय लिई अध्ययनरत छात्रा सुश्री सुम्निमा मगरलाई प्रदान गर्ने भएको छ । सुम्निमा मगर पनौती नगरपालिका वडा नं. ८ मा अवस्थित सामुदायिक चोक निवासी मेकेन्द्र दर्लामी मगर र विन्दुमाया थिङकी छोरी हुन् । उनलाई छात्रवृत्ति दिने निर्णय शब्दयात्रा प्रकाशनका आजीवन सदस्य कृष्णमणि कुइकेलको संयोजकत्वमा गठित तीन सदस्यीय चयन समितिको सिफारिसका आधारमा गरिएको हो । काभ्रेपलान्चोक जिल्लाको कलेजमा पत्रकारिता विषय लिई पढ्ने गरिब तथा जेहेन्दार यसै जिल्लाकी छात्रालाई शब्दयात्रा प्रकाशनमार्फत हरेक वर्ष प्रदान गर्ने गरी लेखक तथा पूर्वप्रशासक द्रोणप्रसाद श्रेष्ठले यस छात्रवृत्तिको आर्थिक व्यवस्थापन गर्नुभएको हो ।

भावना थापा आजीवन सदस्य

0

काठमाडौँनिवासी समाजसेवी भावना थापा शब्दयात्रा प्रकाशनको आजीवन सदस्य बन्नुभएको छ । शब्दयात्रा प्रकाशन आफ्नो परिवारभित्र उहाँलाई हार्दिक स्वागत गर्दछ । 

राधाकृष्णको मन्दिर बनाइने

0

शब्दयात्रा प्रकाशनले राधा र कृष्णको युगल मूर्ति स्थापना गरी राधाकृष्ण मन्दिरको निर्माण गर्ने भएको छ । त्यसका लागि आर्थिक सहयोग गर्ने व्यक्तिहरूको नाउँ अभिलेखका रूपमा मन्दिरमै राखिने व्यवस्था गरिएको छ ।

भोजपुर अनुसन्धान विद्वतवृत्ति लालकुमार तामाङलाई

0

शब्दयात्रा प्रकाशनले २०७९ सालको ‘शब्दयात्रा प्रा. केदारनाथ–लीला श्रेष्ठ भोजपुर अनुसन्धान विद्वतवृत्ति’ लालकुमार तामाङलाई प्रदान गर्ने भएको छ । विद्वतवृत्तिको राशी १५ हजार रुपियाँ रहेको छ । शब्दयात्रा प्रकाशनको लघु अनुसन्धान परियोजना अन्तर्गत भोजपुरको विद्योदय माध्यमिक विद्यालयका विषयमा शोधप्रबन्ध लेखनका लागि उहाँलाई यो विद्वतवृत्ति प्रदान गर्न लागिएको हो । यो विद्वतवृत्ति भोजपुर जिल्लाका शैक्षिक तपस्वी प्रा. केदारनाथ श्रेष्ठको आर्थिक व्यवस्थापनमा शब्दयात्रा प्रकाशनमा खडा गरिएको हो भने साहित्यस्रष्टा भानुभक्त कुभिन्डेली शब्दयात्रा प्रकाशन र लालकुमार तामाङबीचको सम्बन्धसेतु बन्नुभएको हो । विद्वतवृत्ति प्राप्त गर्नुभएकोमा भोजपुरको विद्योदय माध्यमिक विद्यालयका शिक्षक लालकुमार तामाङलाई हार्दिक बधाई छ । 

सावित्री जङ्गम थापा आजीवन सदस्य

0
नेपालको पहिलो महिला महाप्रबन्धक, कुशल प्रशासक, साहित्यिक स्रष्टा, अग्रज समाजसेवी तथा ‘शब्दयात्रा प्रशासनिक महिला प्रतिभा सम्मान’ बाट सम्मानित व्यक्तित्व श्रीमती सावित्री जङ्गम थापा शब्दयात्रा प्रकाशनको आजीवन सदस्य बन्नुभएको छ । उहाँ शब्दयात्रा प्रकाशनका लागि घर बनाइदिने उदार दाता हुनुहुन्छ । शब्दयात्रा प्रकाशन पुस्तकालयको समुद्घाटन पनि उहाँबाटै भएको थियो । उहाँको नाउँबाट शब्दयात्रा प्रकाशनमा ‘श्रीमती सावित्री जङ्गम थापा अध्ययन–अनुसन्धान कक्ष’ खोलिएको छ । उहाँका धेरैवटा पुस्तक प्रकाशित छन् । उहाँको सम्मानस्वरूप हरि मञ्जुश्रीको सम्पादनमा अभिनन्दनग्रन्थ प्रकाशन गरिएको छ । उहाँजस्ती विदुषीलाई आजीवन सदस्यका रूपमा स्वागत गर्न पाएकोमा शब्दयात्रा प्रकाशन परिवारले हर्षको अनुभव गरेको छ ।