शब्दयात्रा प्रकाशनले कवयित्री शारदा घिमिरे भैलको जन्मदिवस आज २०७९ साल मङ्सिर २५ गते आइतबार आफ्नै सभाकक्षमा आयोजित साहित्यिक समारोहमा भव्यतापूर्वक मनायो । कार्यक्रममा उहाँलाई शब्दयात्रा प्रकाशनका तर्फबाट कवितात्मक शुभकामनापत्र समर्पण गरियो । कविताको लेखन हरि मञ्जुश्रीले, वाचन शारदाप्रसाद शर्माले र हस्तान्तरण केदारनाथ तिमल्सिनाले गर्नुभयो । कार्यक्रममा उपस्थित सहभागीका तर्फबाट पूर्णबहादुर कर्माचार्य र प्रदीप केसीले शुभकामनापत्र हस्तान्तरण गर्नुभयो भने उर्मिला श्रेष्ठ भोजपुरे र डा. साहेब खन्दारेले दोसल्ला ओढाइदिनुभयो । त्यसपछि कवयित्री शारदा घिमिरे भैलले तीनवटा मुक्तक र एउटा कविता वाचन गरेर आफ्नो पूर्वप्रकाशित कृति शब्दयात्रा प्रकाशन पुस्तकालयलाई उपहारस्वरूप प्रदान गर्नुभयो । पुस्तकालयका तर्फबाट त्यो उपहार साधुराम गिरीले ग्रहण गर्नुभयो ।

शब्दयात्रा प्रकाशनले आज २०७९ साल मङ्सिर २५ गते भोजपुर जिल्लाका प्रतिभा पुरुषोत्तम भट्टराई र भक्तपुर जिल्लाका प्रतिभा पशुपतिमान प्रधानलाई पुरस्कृत गरेको छ । प्राच्यविधाका विज्ञ तथा न्याय, ज्योतिष र वेदान्त दर्शनका प्रकाण्ड विद्वानका रूपमा सुपरिचित व्यक्तित्व तथा पिण्डेश्वर धरानमा ४० वर्षअघिदेखि निरन्तर गुरुकुल सञ्चालन गरी ९५ वर्षको उमेरमा पनि अध्यापन गरिरहनुभएका र अहिले पनि ७० जना विद्यार्थीलाई निःशुल्क आवास, भोजन र शिक्षा दिइरहनुभएका पुरुषोत्तम भट्टराईलाई ‘शब्दयात्रा कृष्ण जोशी भोजपुर प्रतिभा पुरस्कार, २०७९’ समर्पण गरिएको छ । उहाँ धरानमा हुनुभएकाले उहाँका तर्फबाट उहाँका नाति पुष्कर अधिकारीले पुरस्कार ग्रहण गर्नुभयो । पुरस्कार समर्पण गर्दा पुरस्कारको रकम गीता अधिकारीले समर्पण गर्नुभएको थियो । यसै गरी ठ्यासफूमा रहेको मौलिक स्वस्थानी व्रतकथालाई पहिलोपटक नेवारी भाषामा उतारेर प्रकाशित गराउनुभएको हुँदा पशुपतिमान पःमाँ (प्रधान) लाई ‘शब्दयात्रा भरत जङ्गम भक्तपुर प्रतिभा पुरस्कार, २०७९’ समर्पण गरिएको छ । पुरस्कार समर्पण गर्दा पुरस्कारको रकम शारदाप्रसाद शर्माले समर्पण गर्नुभएको थियो । पुरस्कृत व्यक्तित्व दुवैजनाका लागि उपहार पदम दाहालले, शब्दयात्रा पट्ट हरि मञ्जुश्रीले, रुद्राक्षको माला हिरण्य भोजपुरेले र अभिवन्दनापत्र उर्मिला श्रेष्ठले समर्पण गर्नुभएको थियो भने दुवै अभिवन्दनापत्रको वाचन प्रजापति तिमिल्सिनाले गर्नुभएको थियो ।

शब्दयात्रा प्रकाशनले बनेपाको शब्दसाधक तीर्थमा निर्माण गरेको राधाकृृष्ण मन्दिरलाई हिजो २०७९ साल मङ्सिर १८ गते आइतबार अनावरण गरिएको छ । मन्दिरको नामकरण गरी ‘अक्षराधीश मन्दिर (राधाकृष्ण देवालय)’ लेखिएको छ । मन्दिरसँग सम्बन्धित केही संरचनाहरूको निर्माणकार्य बाँकी छ, मन्दिर निर्माणमा सहयोग गर्ने भक्तजनको अभिलेख दुई पत्र बनाएर राखिएको छ र सहयोग गर्न वचनबद्ध भक्तजनबाट सहयोग प्राप्त भएपछि उहाँहरूको विवरण तेस्रो अभिलेखपत्रमा राख्न पनि बाँकी छ । तर राधाकृष्ण मन्दिरको अनावरण गर्न अत्यन्त उपयुक्त दिन गीताजयन्ती नै हो भन्ने सुझाव प्राप्त भएकाले निर्माणको सबै कार्य नसकिए पनि गीताजयन्ती र मोक्षदा एकादशीको पावन अवसर पारी हिजो मन्दिरको अनावरण गरिएको हो । संस्थापक अध्यक्ष तथा मन्दिर निर्माणका योजनाकार एवं निर्देशक हरि मञ्जुश्रीले मन्दिरको अनावरण गर्नुभएको हो ।

शब्दयात्रा प्रकाशनले आध्यात्मिक व्यक्तित्व श्री पुरुषोत्तम भट्टराईलाई ‘शब्दयात्रा कृष्ण जोशी भोजपुर प्रतिभा पुरस्कार, २०७९’ समर्पण गर्ने भएको छ । शब्दयात्रा प्रकाशनद्वारा गठित पुरस्कृत व्यक्तित्व चयन समितिको बैठकले उहाँलाई पुरस्कृत गर्ने निर्णय गरेको हो । चयन समितिमा आध्यात्मिक लेखक ढुण्डिराज पोखरेल संयोजक तथा कवि पदम दाहाल र आख्यानकार प्रजापति तिमिल्सिना सदस्य हुनुहुन्छ । यसअघि भोजपुर प्रतिभा पुरस्कारका लागि उपयुक्त व्यक्तिको नाउँ सिफारिस गर्न सार्वजनिक आह्वान गरिएको थियो । सिफारिसमा प्राप्त भएका नाउँहरूमध्येबाट चयन समितिले भोजपुरको भुल्के घर भई हाल धरान निवासी पुरुषोत्तम भट्टराईलाई पुरस्कृत गर्ने निर्णय गरेको हो । प्राच्यविधाका विज्ञ तथा न्याय, ज्योतिष र वेदान्त दर्शनका प्रकाण्ड विद्वानका रूपमा सुपरिचित उहाँले पिण्डेश्वर धरानमा ४० वर्षअघिदेखि निरन्तर गुरुकुल सञ्चालन गरी साढे नौ दशकको उमेरमा पनि अध्यापन गरिरहनुभएको छ । अहिले पनि त्यस गुरुकुलमा ७० जना विद्यार्थी निःशुल्क आवास, भोजन र शिक्षा प्राप्त गरिरहेका छन् । त्यस्ता व्यक्तित्वलाई पुरस्कृत गर्न पाउँदा शब्दयात्रा प्रकाशन स्वयं गौरवान्वित बनेको छ । पुरस्कार यही मङ्सिर महिनामा समर्पण गरिनेछ । भोजपुर जिल्लाका प्रतिभालाई हरेक वर्ष समर्पण गर्ने गरी कवि कृष्ण जोशीले यस पुरस्कारका लागि अक्षयकोषको व्यवस्था गरिदिनुभएको हो । 

शब्दयात्रा प्रकाशनले शिक्षासेवी तथा लेखक पशुपतिमान पःमाँ (प्रधान) लाई ‘शब्दयात्रा भरत जङ्गम भक्तपुर प्रतिभा पुरस्कार, २०७९’ समर्पण गर्ने भएको छ । शब्दयात्रा प्रकाशनद्वारा गठित पुरस्कृत व्यक्तित्व चयन समितिको बैठकले उहाँलाई पुरस्कृत गर्ने निर्णय गरेको हो । चयन समितिमा आध्यात्मिक लेखक ढुण्डिराज पोखरेल संयोजक तथा कवि पदम दाहाल र आख्यानकार प्रजापति तिमिल्सिना सदस्य हुनुहुन्छ । यसअघि भक्तपुर प्रतिभा पुरस्कारका लागि उपयुक्त व्यक्तिको नाउँ सिफारिस गर्न सार्वजनिक आह्वान गरिएको थियो । सिफारिसमा प्राप्त भएका नाउँहरूमध्येबाट चयन समितिले जगाती निवासी पशुपतिमान पःमाँलाई पुरस्कृत गर्ने निर्णय गरेको हो । ठ्यासफूमा रहेको मौलिक स्वस्थानी व्रतकथालाई पहिलोपटक नेवारी भाषामा उतारेर प्रकाशित गराउनुभएको हुँदा उहाँलाई पुरस्कृत गर्ने निर्णय गरिएको हो । पुरस्कार यही मङ्सिर महिनामा समर्पण गरिनेछ । भक्तपुर जिल्लाका प्रतिभालाई हरेक वर्ष समर्पण गर्ने गरी साहित्यकार भरत जङ्गमले यस पुरस्कारका लागि अक्षयकोषको व्यवस्था गरिदिनुभएको हो । गत वर्ष यो पुरस्कार श्रीमती कोमलवदन मल्ललाई समर्पण गरिएको थियो ।

शब्दयात्रा प्रकाशनले कलाकार पदमप्रसाद पौडेललाई ‘शब्दयात्रा प्रा. केदारनाथ — लीला श्रेष्ठ सङ्खुवासभा प्रतिभा पुरस्कार, २०७९’ समर्पण गर्ने भएको छ । शब्दयात्रा प्रकाशनद्वारा गठित पुरस्कृत व्यक्तित्व चयन समितिको बैठकले उहाँलाई पुरस्कृत गर्ने निर्णय गरेको हो । चयन समितिमा आध्यात्मिक लेखक ढुण्डिराज पोखरेल संयोजक तथा कवि पदम दाहाल र आख्यानकार प्रजापति तिमिल्सिना सदस्य हुनुहुन्छ । यसअघि सङ्खुवासभा प्रतिभा पुरस्कारका लागि उपयुक्त व्यक्तिको नाउँ सिफारिस गर्न सार्वजनिक आह्वान गरिएको थियो । सिफारिसमा प्राप्त भएका नाउँहरूमध्येबाट चयन समितिले चैनपुर निवासी पदमप्रसाद पौडेललाई पुरस्कृत गर्ने निर्णय गरेको हो । पत्रकारिता क्षेत्रमा २२ वर्ष र शिक्षणसेवामा ३० वर्ष सेवा गरेर पनि साना र ठूला गरी १ सयभन्दा बढी चलचित्रमा अभिनय गरेर विशिष्ट योगदान गर्नुभएकोमा उहाँलाई पुरस्कृत गर्ने निर्णय गरिएको हो । पुरस्कार यही मङ्सिर महिनामा समर्पण गरिनेछ । सङ्खुवासभा जिल्लाका प्रतिभालाई हरेक वर्ष समर्पण गर्ने गरी साहित्यकार लीला श्रेष्ठले यस पुरस्कारका लागि अक्षयकोषको व्यवस्था गरिदिनुभएको हो । गत वर्ष यो पुरस्कार श्री ज्ञान उदासलाई समर्पण गरिएको थियो ।