शब्दयात्रा प्रकाशनले आध्यात्मिक लेखक ओतबहाद्ुर खड्कालाई ‘शब्दयात्रा लीला–मध्यमार्ग काभ्रेपलान्चोक प्रतिभा पुरस्कार, २०७९’ समर्पण गर्ने भएको छ । शब्दयात्रा प्रकाशनद्वारा गठित पुरस्कृत व्यक्तित्व चयन समितिको बैठकले उहाँलाई पुरस्कृत गर्ने निर्णय गरेको हो । चयन समितिमा आध्यात्मिक लेखक ढुण्डिराज पोखरेल संयोजक तथा कवि पदम दाहाल र आख्यानकार प्रजापति तिमिल्सिना सदस्य हुनुहुन्छ । यसअघि काभ्रेपलान्चोक प्रतिभा पुरस्कारका लागि उपयुक्त व्यक्तिको नाउँ सिफारिस गर्न सार्वजनिक आह्वान गरिएको थियो । सिफारिसमा प्राप्त भएका नाउँहरूमध्येबाट चयन समितिले पनौती निवासी ओतबहादुर खड्कालाई पुरस्कृत गर्ने निर्णय गरेको हो । विभिन्न आध्यात्मिक पुस्तकहरूको लेखन र अनुवाद गरी समाजमा नैतिक र आध्यात्मिक चेतनाको विस्तार गराउन अहम् भूमिका निर्वाह गर्नुभएकोमा उहाँलाई पुरस्कृत गर्ने निर्णय गरिएको हो । पुरस्कार यही मङ्सिर महिनामा समर्पण गरिनेछ । काभ्रेपलान्चोक जिल्लाका प्रतिभालाई हरेक वर्ष समर्पण गर्ने गरी ललितपुर जिल्ला महालक्ष्मी नगरपालिका वडा नं. ७ चाँगाथलीमा जन्मेर हाल अस्ट्रेलियामा बसोवास गर्ने निरोज थापाले यस पुरस्कारका लागि अक्षयकोषको व्यवस्था गरिदिनुभएको हो ।
भरतमणि जङ्गमका विषयमा ‘कालजयी व्यक्तित्व भरत जङ्गम’ नाउँको पहिलो अभिनन्दनग्रन्थ २०६३ साल मङ्सिर १० गते हरि मञ्जुश्रीको सम्पादनमा प्रकाशन भएको थियो । त्यस बेला भरत जङ्गमको नाउँबाट मोती महोत्सव समारोह समिति गठन गरिएको थियो र मोती महोत्सव नेपालमै पहिलोपल्ट भरतमणि जङ्गमको ६० औँ वर्षमा मनाइएको थियो । त्यही समितिबाट प्रकाशित ९ सय ४४ पृष्ठको विशालकाय ग्रन्थको आधारभूमिमा त्यो ग्रन्थ प्रकाशन भएको १६ औँ वर्षमा प्रजापति तिमिल्सिनाले ‘शिरोवर्ती भरत जङ्गम’ नामक प्रस्तुत पुस्तक लेख्नुभएको हो । यस पुस्तकमा ‘कालजयी व्यक्तित्व भरत जङ्गम’ भित्रका पाठ्यसामग्रीहरूको गुणवत्ताका विषयमा प्रभावपरक विवेचना गरिएको छ ।
