२०५५ सालमा प्रकाशित ‘जीवनधारा’ सावित्री जङ्गम थापाको दोस्रो पुस्तकाकार कृति हो । कृतिकारको पचासवर्षे उमेरसम्मको सङ्घर्षशील जीवनयात्रालाई आत्मकथात्मक रूपमा काव्यमा ढाली झ्याउरे छन्दमा लिखित यस काव्यको पहिलो संस्करण समाप्त भएको हुँदा यसलाई पुनः प्रकाशन गर्ने इच्छा कृतिकारले व्यक्त गर्नुभएकाले यो पुस्तक शब्दयात्रा प्रकाशनको प्रकाशकत्वमा प्रकाशन गरिएको हो । यस संस्थामा ‘सावित्री जङ्गम थापा अध्ययन–अनुसन्धान कक्ष’ खुलेको हुनाले यस पुस्तकको बिक्रीबाट प्राप्त भएको सम्पूर्ण रकम त्यही अनुसन्धान कक्षको सञ्चालनका लागि खर्च गर्ने व्यवस्था मिलाइएको छ । यसबाट उहाँका विषयमा अध्ययन–अनुसन्धान गर्ने शोधार्थीहरू पनि लाभान्वित हुनेछन् ।