Shabdayatra Prakashan

शब्दयात्रा प्रकाशनबाट प्रकाशित तीन पुस्तकलाई सार्वजनिक गरिएको छ । साहित्यकार ज्ञान उदासद्वारा लिखित कथासङ्ग्रह ‘तोपको आवाज’, साहित्यकार केदारनाथ तिमल्सिनाद्वारा लिखित कथासङ्ग्रह ‘तीस कथा’ र प्रेमकुमार कर्माचार्यद्वारा लिखित ‘मानबहादुर कर्माचार्य र गुर्जन ठाकुर’ लाई सार्वजनिक गरिएको हो । ‘तोपको आवाज’ लाई प्रा. केदारनाथ श्रेष्ठ र डा. प्रेमकुमार खत्रीले, ‘तीस कथा’ लाई तिलक प्रकाश र डा. चिन्तामणि गौतमले र ‘मानबहादुर कर्माचार्य र गुर्जन ठाकुर’ लाई प्रा. केदारनाथ श्रेष्ठ र विश्व उलकले सार्वजनिक गर्नुभएको हो । यी तीन पुस्तकसहित शब्दयात्रा प्रकाशनबाट प्रकाशित पुस्तकहरूको सङ्ख्या २ सय २३ पुगेको छ । सार्वजनिक गरिएका कृतिहरूको चिनारी कालिका त्रिपाठी पन्तले गराउनुभएको थियो । शब्दयात्रा प्रकाशनले पुस्तक सार्वजनिक गर्दा थैलीबाट झिकेर सार्वजनिक गर्ने गरेको छ । विमोचन, लोकार्पण, घुम्टीखोली जस्ता शब्दहरूको शब्दयात्रा प्रकाशनले सार्वजनिकीकरण शब्द प्रयोग गर्ने गरेको छ ।

शब्दयात्रा प्रकाशनको अक्षयकोषमा न्यूनतम १ लाख रुपियाँदेखि अधिकतम ४ लाख रुपियाँसम्म राखिदिने दाताहरू २९ जना हुनुहुन्छ — उर्मिला श्रेष्ठ भोजपुरे, कल्याण लम्साल, कविप्रसाद प्याकुरेल, प्रा. केदारनाथ श्रेष्ठ, डा. केशवबहादुर खुलाल छेत्री, कृष्ण जोशी, कृष्णहरि मैनाली, गोपाल पराजुली, चेतनाथ चौलागाईं, द्रोणप्रसाद श्रेष्ठ, नारायणप्रसाद वैद्य, निर्मलाकुमारी यगोल श्रेष्ठ, प्रह्लाद प्याकुरेल, बेलप्रसाद श्रेष्ठ, भरत जङ्गम, योगेन्द्र खत्री, राजेन्द्र विरही अधिकारी, रामकृष्ण स्मृति प्रतिष्ठान, राम–रेवती प्रतिष्ठान, डा. रूपनारायण श्रेष्ठ, लालानाथ सुवेदी, लीलादेवी श्रेष्ठ, लीला–मध्यमार्ग सम्मानकोष, विदुर विष्ट, सावित्री जङ्गम थापा, सुदर्शन आचार्य, सुनील सापकोटा, सुभाष स्मृति प्रतिष्ठान र सूर्यप्रसाद श्रेष्ठ । शब्दयात्रा प्रकाशन उहाँहरूप्रति हार्दिक कृतज्ञता व्यक्त गर्दछ ।

शब्दयात्रा प्रकाशनले २०८० सालको ‘शब्दयात्रा सूर्यप्रसाद श्रेष्ठ कर्मशीलता पुरस्कार’ सुशीला ढकाल (स्याङ्जा) लाई समर्पण गर्ने भएको छ । दुवै हात नभए पनि लोकसेवा आयोगको परीक्षा उत्तीर्ण गरेर सरकारी सेवामा प्रवेश गर्नुभएकी सुशीला ढकाल हाल आन्तरिक राजस्व विभागमा राजस्व अधिकृत पदमा कार्यरत हुनुहुन्छ । सुशीला ढकाललाई नेपालको निजामती प्रशासनमा सङ्घर्षशील र प्रेरक महिलाका रूपमा चिनिन्छ । पुरस्कार ग्रहण गर्न स्वीकृति प्रदान गर्नुभएकोमा शब्दयात्रा प्रकाशन सुशीला ढकालप्रति हार्दिक आभार व्यक्त गर्दछ । पुरस्कार यही माघ १३ गते शनिबार समर्पण गरिनेछ । पुरस्कारको कोष व्यवस्थापन पूर्वप्रशासक तथा कूटनीतिज्ञ सूर्यप्रसाद श्रेष्ठले गर्नुभएको हो ।