कविता, मुक्तक, गीत, गजल र हाइकु विधामा आफ्नो उपस्थिति देखाउनुभएका ज्ञान उदास अब ‘तोपको आवाज’ नामक कथासङ्ग्रहका माध्यमबाट कथाकारका रूपमा पनि प्रस्तुत हुनुभएको छ । यस सङ्ग्रहबाट उहाँमा रहेको कथाकार व्यक्तित्व पनि प्रकट भएको छ । पूर्वप्रकाशित कथाहरूको यस सङ्ग्रहले आजभन्दा चार दशकअघिको नेपालको सामाजिक जीवनको झलक देखाएको छ । तत्कालीन लोकव्यवहार, भाषाशैली, चेतनास्तर आदिका विषयमा अध्येताहरूलाई यस सङ्ग्रहले राम्रो जानकारी दिनेछ ।