शब्दयात्रा प्रकाशनले २०८० वैशाखदेखि माघसम्मको १० महिनामा प्रकाशन गरेका १६ वटा पुस्तकहरू — १. एक दिन, २. साथीको माया, ३. चौध भुवन, ४. ठूले, ५. कुसुमाक्षर, ६. कथाकुथुङ्ग्री, ७. अग्रजले कोरेको गोरेटोमा हिँड्दा, ८. उनैको सम्झनामा, ९. मुक्तक शारदीय, १०. कर्मसाधक भोलामानसिंह थापा, ११. कालो सूर्य, १२. द ब्ल्याक सन, १३. युगपुरुष, १४. तोपको आवाज, १५. तीस कथा, १६. मानबहादुर कर्माचार्य र गुर्जन ठाकुर । चार कथासङ्ग्रह, दुई लघुकाव्य, दुई उपन्यास, दुई बालसाहित्य, एक महाकाव्य, एक कवितासङ्ग्रह, एक निबन्धसङ्ग्रह, एक मुक्तकसङ्ग्रह, एक स्मृतिग्रन्थ, एक व्यक्तिपरिचय ।
कल्पना अधिकारीलाई १० हजार रुपियाँ सहयोग
साहित्यकार कल्पना अधिकारी (२०२२, चितवन) स्तन क्यान्सरको उपचारमा हुनुहुन्छ र उहाँलाई आर्थिक सङ्कट परेको छ भन्ने जानकारी पाएपछि शब्दयात्रा प्रकाशनले उहाँको उपचारमा थोरै भए पनि सहयोग पुगोस् भन्ने उद्देश्य लिई उहाँलाई अक्षरसेवी सहयोग कोषबाट १० हजार रुपियाँ पठाएको छ । ग्लोबल आईएमई बैङ्क कान्तिपथ काठमाडौँमा कल्पनाकुमारी उपाध्याय अधिकारीको नाउँमा रहेको खाता नम्बर ०१०७०१००११००५ मा उक्त रकम पठाइएको हो । उहाँको उपचारका लागि आर्थिक सहयोग गर्न वाङ्मयिक क्षेत्रका अन्य संस्थाहरूलाई पनि अनुरोध छ । उहाँका ‘प्रेमदीप’, ‘जीवनधारा’, ‘आमा’, ‘उत्ताउलो’ जस्ता कृतिहरू प्रकाशित छन् । विभिन्न साहित्यिक संस्थाहरूमा आबद्ध कथाकार, गीतकार, ध्यान प्रशिक्षक तथा महिला ज्योतिष कल्पना अधिकारीलाई स्तन क्यान्सरबाट मुक्त गराइदिनुहोस् भनी शब्दयात्रा प्रकाशन परिवार शब्दसाधक तीर्थ नीलकण्ठेश्वर धाममा विराजित सम्पूर्ण देवीदेवता र पितृहरूसँग प्रार्थना गर्दछ ।
सुरेश भट्टबाट पुस्तक उपहार
कवि सुरेश भट्टले शब्दयात्रा प्रकाशन पुस्तकालयका लागि आफ्ना साहित्यिक कृतिहरू उपलब्ध गराउनुभएको छ । पुस्तकालयका लागि पुस्तक उपलब्ध गराउनुभएकोमा सुरेश भट्टप्रति शब्दयात्रा प्रकाशन हार्दिक आभार व्यक्त गर्दछ ।
दिवाकर जङ्गमबाट पुस्तक उपहार
योगप्रशिक्षक दिवाकर जङ्गमले शब्दयात्रा प्रकाशन पुस्तकालयका लागि योगसम्बन्धी पुस्तक उपलब्ध गराउनुभएको छ । उक्त पुस्तक शब्दयात्रा प्रकाशनका आजीवन सदस्य हरिगोपाल प्रधानले ग्रहण गर्नुभएको छ । पुस्तकालयका लागि पुस्तक उपलब्ध गराउनुभएकोमा दिवाकर जङ्गमप्रति शब्दयात्रा प्रकाशन हार्दिक आभार व्यक्त गर्दछ ।
विष्णुप्रसाद शर्मा पराजुलीबाट पुस्तक उपहार
लेखक विष्णुप्रसाद शर्मा पराजुलीले शब्दयात्रा प्रकाशनको अवलोकन गर्ने क्रममा शब्दयात्रा प्रकाशन पुस्तकालयका लागि आफ्ना पुस्तकहरूका साथै अन्य लेखकका पुस्तकहरू पनि उपहारस्वरूप प्रदान गर्नुभएको छ । यस सहयोगका लागि शब्दयात्रा प्रकाशन परिवार विष्णुप्रसाद शर्मा पराजुलीप्रति हार्दिक आभार व्यक्त गर्दछ ।
प्रतीक घिमिरेबाट पुस्तक उपहार
दुईमहिने साहित्यिक पत्रिका ‘रचना’ का सम्पादक प्रतीक घिमिरेले शब्दयात्रा प्रकाशन पुस्तकालयका लागि ‘रचना’ लगायत विभिन्न पुस्तकहरू उपहारस्वरूप प्रदान गर्नुभएको छ । यस सहयोगका लागि प्रतीक घिमिरेप्रति शब्दयात्रा प्रकाशन परिवार हार्दिक आभार व्यक्त गर्दछ ।
सुदर्शन कट्टेलबाट पुस्तक उपहार
महाकाव्यकार सोमराज अभयद्वारा लिखित ‘विद्रोही काले’ (महाकाव्य) लगायतका विभिन्न पुस्तकहरू उहाँका सुपुत्र सुदर्शन कट्टेलले शब्दयात्रा प्रकाशन पुस्तकालयका लागि उपलब्ध गराउनुभएको छ । यस सहयोगका लागि शब्दयात्रा प्रकाशन सुदर्शन कट्टेलप्रति हार्दिक आभार व्यक्त गर्दछ ।
खाजाखर्च लीला श्रेष्ठबाट
साहित्यकार तथा समाजसेवी लीलादेवी श्रेष्ठले शब्दयात्रा प्रकाशनमा सङ्खुवासभा प्रतिभा पुरस्कारका लागि अक्षयकोष राखिदिनुभएको छ, शब्दयात्रा सभाकक्षका लागि कुर्सीहरू किनिदिनुभएको छ, शब्दवाटिका र शिवलिङ्गको निर्माण आदि कार्यका लागि पटक–पटक आर्थिक सहयोग गर्नुभएको छ । शब्दयात्रा प्रकाशनद्वारा यही २०८० साल माघ १३ गते शनिबार आयोजित पुरस्कार समर्पण तथा पुस्तक सार्वजनिकीकरण समारोेहमा समुपस्थित सबैलाई उहाँले आफ्ना तर्फबाट खाजा पनि खुवाउनुभयो । आफ्ना पति प्रा. केदारनाथ श्रेष्ठको ८४ औँ जन्मदिवस मनाउन पाएको खुसियालीमा उहाँले खाजाका लागि १० हजार रुपियाँभन्दा बढी नै खर्च गर्नुभयो । यस्तो उदार सहयोगप्रति शब्दयात्रा प्रकाशन उहाँप्रति कृतज्ञ छ ।
चौरासीऔँ जन्मदिवसमा मङ्गलकामनापत्र
शब्दयात्रा प्रकाशनका आजीवन सदस्य, भोजपुर अनुसन्धान विद्वतवृत्तिका कोष व्यवस्थापक, सङ्खुवासभा प्रतिभा पुरस्कारकी संस्थापिका एवं लेखिका र शब्दयात्रा प्रकाशनकै सञ्चालक सदस्य लीलादेवी श्रेष्ठका श्रीमान् प्रा. केदारनाथ श्रेष्ठको ८४ औँ जन्मदिवसका अवसरमा शब्दयात्रा प्रकाशनले मङ्गलकामनापत्र समर्पण गरेको छ । शब्दयात्रा प्रकाशनका आजीवन सदस्य कवि पदम दाहालले सो अभिवन्दनापत्र वाचन गरी हस्तान्तरण गर्नुभएको हो ।
कोषमा २२ हजार रुपियाँ थप
शब्दयात्रा प्रकाशनले विपत्तिपीडित लेखक, कलाकार र पत्रकारलाई आर्थिक सहयोग गर्न अक्षरसेवी सहयोग कोषको सञ्चालन गरेको छ । त्यस कोषबाट समस्यामा परेका धेरैजनालाई आर्थिक सहयोग पनि गरेको छ । त्यस कोषको मुद्दती खातामा हाल ३ लाख रुपियाँ छ । चल्ती खातामा चाहिँ विभिन्न व्यक्तिहरूले रकम जम्मा गरिदिने गर्नुभएको छ । कोषका लागि नियमित आर्थिक सहयोग गर्नेहरू पनि हुनुहुन्छ । त्यस्ता व्यक्तिमा खोटाङ जलेश्वरीका मेदनिप्रसाद र दुर्गादेवीका छोराहरू दामोदर घिमिरे र लीलानाथ घिमिरे पनि पर्नुहुन्छ । हाल दामोदर घिमिरे धुलिखेलमा र लीलानाथ घिमिरे कतारमा बस्नुहुन्छ । दामोदर घिमिरेले विगत ७ वर्षदेखि र लीलानाथ घिमिरेले विगत ३ वर्षदेखि मुठीदानका रूपमा दैनिक १० रुपियाँका दरले त्यस कोषमा सहयोग गर्नुभएको छ । दुवैजनाले २०८० साल साउन १ गतेदेखि ३ वर्षका लागि एकैचोटि आर्थिक सहयोग गरी त्यस सहयोगमा पनि १–१ सय रुपियाँ थपेर २२ हजार १ सय रुपियाँको चेक शब्दयात्रा प्रकाशनलाई उपलब्ध गराउनुभएको छ । शब्दयात्रा प्रकाशन उहाँहरूको यो उदार सहयोगप्रति हार्दिक आभार व्यक्त गर्दछ ।