शब्दयात्रा प्रकाशनका आजीवन सदस्य श्री भरत जङ्गमले नेपाली भाषामा लेख्नुभएको ‘भ्रष्टताविरोधी विज्ञान’ अङ्ग्रेजी भाषामा अनूदित भई ‘एन्टिकरप्टोलोजी’ नाममा प्रकाशित भएपछि कन्नड भाषामा पनि अनूदित भई प्रकाशित भएको छ । त्यस पुस्तकलाई भारतको बेङलोरमा आयोजित कार्यक्रममा सार्वजनिक गरिएको छ । उहाँलाई हार्दिक बधाई छ ।
सिन्धुली प्रतिभा पुरस्कारका लागि नाउँ पठाइदिन अनुरोध
शब्दयात्रा प्रकाशनले आगामी असोज महिनामा १५ हजार रुपियाँ, अभिवन्दनापत्र, शब्दयात्रा पट्ट, उपहार र रुद्राक्षमाला रहेको ‘शब्दयात्रा जीवनचन्द्र कोइराला सिन्धुली प्रतिभा पुरस्कार’ समर्पण गर्नेछ । ग्रन्थसम्पादक जीवनचन्द्र कोइरालाको जन्ममिति २०१७ साल असार १६ गतेभन्दा पछि सिन्धुली जिल्लामा जन्मेर नेपाली वाङ्मयको कुनै पनि विधाबाट राष्ट्रिय स्तरको योगदान गर्ने व्यक्तिलाई यो पुरस्कार प्रदान गरिनेछ । सबै वाङ्मयसेवीको विवरण शब्दयात्रा प्रकाशनमा नहुन सक्छ । तसर्थ सत्पात्रलाई पुरस्कृत गर्न सकियोस् भन्ने उद्देश्यले उपयुक्त वाङ्मयसेवीको नाउँ र योगदानको विवरण [email protected] मा यही साउन १५ गतेभित्र उपलब्ध गराइदिन सबैमा हार्दिक अनुरोध छ ।
‘कन्याकुमारी’ महाकाव्य छापिने
महाकाव्यकार यज्ञप्रसाद त्रिपाठीद्वारा लिखित ‘कन्याकुमारी’ नामक महाकाव्य शब्दयात्रा प्रकाशनको प्रकाशकत्वमा प्रकाशित हुन लागेको छ । आउँदो साउन महिनाभित्र प्रकाशित भइसक्ने यो महाकाव्य चार सयभन्दा बढी पृष्ठको हुनेछ । उहाँको ‘राधाचरणामृत’ नामक महाकाव्यको मुद्रणकार्य सकिएको हुनाले उहाँकै अर्को महाकाव्य ‘कन्याकुमारी’ प्रकाशन गर्ने तयारी भइरहेको हो । काभ्रेपलान्चोक जिल्लाका साहित्यिक प्रतिभा महाकाव्यकार यज्ञप्रसाद त्रिपाठीद्वारा लिखित चारवटा महाकाव्य शब्दयात्रा प्रकाशनको प्रकाशकत्वमा प्रकाशित हुँदैछन् ।
पुस्तक उपहार
जीवन एउटा थोत्रो स्क्रिन, लाक्षागृह, खुसीको पीरो धूवाँ र लिगलिगकोट । यी चारैवटा पुस्तकमा देखिन्छ निबन्धकार माधव काफ्लेको आफ्नै प्रकारको अतुल्य लेखनशिल्प । पाठकको मनलाई करप्प पारेर समाई लेखकले चाहेको विषयबाहेक अरूतिर हलचल गर्नै नदिने तागत छ उहाँको प्रस्तुतिमा । यी चारैवटा पुस्तक उहाँबाट उपहार पाएको छ शब्दयात्रा प्रकाशन पुस्तकालयले । उहाँप्रति हार्दिक आभार ।
जीवनचन्द्र कोइरालाको नाउँमा पुरस्कार
शब्दयात्रा प्रकाशनद्वारा सम्मानित ग्रन्थसम्पादक जीवनचन्द्र कोइरालाको स्मृतिमा उहाँको जन्मजिल्ला सिन्धुलीका प्रतिभाशाली व्यक्तिलाई उहाँको नाउँबाट हरेक वर्ष पुरस्कृत गर्नका लागि शब्दयात्रा प्रकाशनमा अक्षयकोष राखिने भएको छ । यस विषयमा हरि मञ्जुश्रीले उहाँकी अर्धाङ्गिनी मनिका शर्माका साथै समालोचक डा. कुलप्रसाद कोइरालासँग कुरा गर्नुभयो । उहाँहरूले पुरस्कार यसै वर्षदेखि समर्पण गर्न र अक्षयकोषको व्यवस्था गर्न स्वीकृति दिनुभयो । हरि मञ्जुश्रीले यस वर्षका लागि पुरस्कार, अभिवन्दनापत्र र शब्दयात्रा पट्टका लागि आवश्यक रकम आफ्ना तर्फबाट उपलब्ध गराउने र पुरस्कारको अक्षयकोषका लागि प्रारम्भमा पन्ध्र हजार रुपियाँ पनि राखिदिने हुनुभयो । त्यसपछि निबन्धकार माधव काफ्लेले अक्षयकोषमा राख्न आफ्ना तर्फबाट दस हजार रुपियाँ दिनुभयो । अब जीवनचन्द्र कोइरालाको नाउँमा अक्षयकोष खडा भएर उहाँको नाउँबाट हरेक वर्ष सिन्धुलीका प्रतिभाशाली व्यक्तिलाई पुरस्कृत गरिने भएको छ ।
तीन महिनामा बाह्र पुस्तक
२०७९ सालको पहिलो तीन महिना वैशाख, जेठ र असारभित्र शब्दयात्रा प्रकाशनबाट बाह्रवटा पुस्तक छापिएछन् — (१) श्रीकृष्ण रहस्य, (२) कथा र कविता, (३) सङ्घर्ष र जीवन, (४) गाईजात्रा, (५) अठोट, (६) जिन्दगीका डोबहरू, (७) जून मामा, (८) धृतराष्ट्रको शुभकामना, (९) मनमा नअटेका कुरा, (१०) राधाचरणामृत, (११) समयको अन्तराल, (१२) अमरज्योति ।
शब्दयात्रा प्रकाशनबाट ‘अमरज्योति’ खण्डकाव्य
शब्दयात्रा प्रकाशनबाट ‘अमरज्योति’ नामक खण्डकाव्य प्रकाशित हुन लागेको छ । डा. गोपाल पौड्याल ‘मन्डने’ द्वारा लिखित यो खण्डकाव्य शब्दयात्रा प्रकाशनको १ सय ८२ औँ प्रकाशनपुष्प हो ।
बाँकी तीन सम्मानको निर्णय
शब्दयात्रा प्रकाशनबाट २०७९ सालको पहिलो चरणमा समर्पण गरिने १० विधाका सम्मानमध्ये बाँकी रहेका ३ वटा सम्मानका लागि पनि सम्मान्य व्यक्तित्व चयन समितिले नाम उपलब्ध गराएको छ । त्यसअनुसार सामाजिक जागरण सम्मान समाजसेवी श्रीमती दुर्गा घिमिरे (रामेछाप) लाई, आयुर्वेद सम्मान विश्वनाथ कर्माचार्य (काभ्रेपलान्चोक) लाई र दानशीलता सम्मान श्रीमती देवीमाया खड्का (खोटाङ) लाई समर्पण गरिने भएको छ । यी सम्मानहरूको आर्थिक व्यवस्थापन आनन्दराज श्रेष्ठ, कालु वैद्य परिवार र बेलप्रसाद श्रेष्ठले गर्नुभएको छ । यसअघि ७ जनाको नाउँ घोषणा भइसकेको छ ।
नवीना श्रेष्ठको अर्को पुस्तक छापिने
शब्दयात्रा प्रकाशनको प्रकाशकत्वमा ‘शिवपुरी बाबाको स्वधर्म रूपान्तरणको मार्ग’ नामक पुस्तक प्रकाशन हुने भएको छ । नवीना श्रेष्ठले लेख्नुभएको यस पुस्तकमा शिवपुरी बाबाद्वारा निर्दिष्ट स्वधर्मको पालना गर्दा मानवको जीवन कसरी रूपान्तरित हुन्छ भन्ने कुरा स्पष्ट पारिएको छ । नवीना श्रेष्ठद्वारा लिखित यो नवौँ पुस्तक हो । उहाँलाई शब्दयात्रा प्रकाशनले प्रशासनिक महिला प्रतिभा सम्मानद्वारा सम्मानित गरेको थियो ।
‘रणलक्ष्मी राष्ट्रिय प्रतिभा पुरस्कार’ पनि शब्दयात्रा प्रकाशनबाट
कवि तथा शब्दयात्रा प्रकाशनका आजीवन सदस्य अमर त्यागी (ओखलढुङ्गा, हाल अमेरिका) ले पिता रणबहादुर श्रेष्ठ र माता लक्ष्मी श्रेष्ठको सम्मान र स्मृतिमा स्थापना गरी सञ्चालन गर्नुभएको ‘रणलक्ष्मी राष्ट्रिय प्रतिभा पुरस्कार’ यस वर्षदेखि शब्दयात्रा प्रकाशनबाट समर्पण गर्ने सहमति भएको छ । शब्दयात्रा प्रकाशनको कार्यविधिअनुसार छनोट भएका साहित्यकारलाई समर्पण गरिने उक्त पुरस्कार १५ हजार रुपियाँको हुनेछ । साथमा अभिवन्दनापत्र, शब्दयात्रा पट्ट, उपहार र रुद्राक्षमाला समर्पण गरिनेछ । यसअघि उक्त पुरस्कार निबन्धकार माधव काफ्ले (रौतहट) लाई समर्पण गरिएको थियो । ‘बाँसुरीमा आँसुको गीत’, ‘अक्षरहरूको देश’, ‘अनुभूतिको जुलुस’, ‘अभियुक्त ईश्वर’, ‘अन्धसत्ता’, ‘अदृश्य’, ‘अक्लान्त’ र ‘अमानव’ कवि अमर त्यागीद्वारा लिखित कृतिहरू हुन् । आफूले स्थापना गरी सञ्चालन गरेको पुरस्कारको व्यवस्थापन शब्दयात्रा प्रकाशनलाई सुम्पनुभएकोमा कवि अमर त्यागीप्रति शब्दयात्रा प्रकाशन हार्दिक आभार व्यक्त गर्दछ ।