विदुर विष्टको आर्थिक व्यवस्थापनमा संस्थापित राधा विष्ट केसी प्रह्लाद केसी काभ्रेपलान्चोक अनुसन्धान विद्वतवृत्ति शब्दयात्रा प्रकाशनले यही वर्षदेखि समर्पण गर्ने भएको छ । यो विद्वतवृत्ति काभ्रेपलान्चोक जिल्लासँग सम्बन्धित रहेर शब्दयात्रा प्रकाशनले तोकेको कुनै पनि विषयमा अनुसन्धानात्मक सामग्री तयार गर्ने अनुसन्धातालाई समर्पण गरिनेछ । विद्वतवृत्तिका लागि उहाँले शब्दयात्रा प्रकाशनमा अक्षयकोष राखिदिनुभएको छ । यस वर्षको विद्वतवृत्तिका लागि विदुर विष्टले थप १० हजार रुपियाँ पनि उपलब्ध गराउनुभएको छ ।
डायस्पोराको पहिलो कवितासङ्ग्रह प्रकाशन गर्नुभएका र बेलायतबाट छन्दोबद्ध कृति प्रकाशन गर्ने पहिलो कवि डा. गोपाल पौड्याल ‘मन्डने’ का २७ वटा कृतिहरूध्ये शब्दयात्रा प्रकाशनबाट प्रकाशन भएको यो दोस्रो कृति हो । यसअघि उहाँको खण्डकाव्य ‘अमरज्योति’ २०७९ सालमा यस संस्थाबाट प्रकाशनमा आएको थियो । डा. गोपाल पौड्याल ‘मन्डने’ को ‘ठुले’ नामक प्रस्तुत खण्डकाव्यमा दुई सर्ग र १९५ श्लोक छन्् । शार्दूलविक्रीडित छन्दमा लेखिएको यो खण्डकाव्य सामाजिक विषयवस्तुमा आधारित छ । विभिन्न पारिवारिक घटना, कोरोनाले ल्याएको दुष्प्रभाव, सामाजिक विकृति–विसङ्गति, आर्थिक दुरवस्था र आधुनिक नेपाली जीवनशैलीको चित्रण यसमा गरिएको छ ।
