शब्दयात्रा प्रकाशनद्वारा आज २०८० साल वैशाख २२ गते आयोजित विशेष कार्यक्रममा शब्दयात्रा प्रकाशनद्वारा प्रकाशित दुईवटा पुस्तकलाई सार्वजनिक गरियो । एउटा पुस्तक कथाकार सपूत कार्कीद्वारा लिखित १४ वटा कथाहरूको सङ्ग्रह ‘चौध भुवन’ थियो भने अर्को पुस्तक काव्यकार डा. गोपाल पौड्याल ‘मन्डने’ द्वारा लिखित खण्डकाव्य ‘ठुले’ थियो । ‘चौध भुवन’ लाई लेखक, पर्यटन व्यवसायी तथा धुलिखेलका संस्थापक नगरप्रमुख बेलप्रसाद श्रेष्ठ र नियात्राकार पोष चापागाईंले संयुक्त रूपमा सार्वजनिक गर्नुभएको थियो भने ‘ठुले’ लाई लेखक तथा पूर्वन्यायाधीश मोहनमणि दाहाल र लेखिका पार्वती शर्माले संयुक्त रूपमा सार्वजनिक गर्नुभएको थियो । दुवै कृतिमाथि लेखक तथा शिक्षासेवी डा. बलराम तिमल्सिनाले समीक्षात्मक टिप्पणी गर्नुभएको थियो । कृतिकारका तर्फबाट सपूत कार्कीले मन्तव्य व्यक्त गर्नुभएको उक्त समारोहमा डा. गोपाल पौड्याल ‘मन्डने’ लन्डनमा हुनुभएकाले उपस्थित हुन सक्नुभएको थिएन ।