शब्दयात्रा प्रकाशनले आज २०८० साल वैशाख २२ गते एघाह्रजना जग्गादातालाई २०८० सालको दानशीलता सम्मान समर्पण गरेको छ । लेखक, समाजसेवी, पर्यटन व्यवसायी तथा धुलिखेल नगरका संस्थापक नगरप्रमुख बेलप्रसाद श्रेष्ठले शब्दयात्रा प्रकाशनमा राख्नुभएको अक्षयकोषको ब्याजबाट हरेक वर्ष यो सम्मान समर्पण गरिन्छ । यस सम्मानको नाउँ ‘शब्दयात्रा बेलप्रसाद श्रेष्ठ दानशीलता सम्मान’ रहेको छ । अघिल्ला वर्षहरूमा एक–एकजनालाई यो सम्मान समर्पण गर्ने गरिएको थियो । यस वर्षको सम्मानचाहिँ बनेपाको शब्दसाधक तीर्थको निकट रहेको नीलकण्ठेश्वर महादेवको नाउँमा जग्गा दान गरेर नीलकण्ठेश्वर धामको परिसर निर्माण गर्ने जग्गादाताहरूलाई समर्पण गरिएको हो । सम्मानित हुने जग्गादाताहरू कृष्णमणि कुइकेल, देवकी कुइकेल, ईश्वरीप्रसाद कुइकेल, ठाकुरप्रसाद कुइकेल, शम्भुप्रसाद कुइकेल, हरिप्रसाद कुइकेल, रामहरि कुइकेल, राममणि कुइकेल, गायत्रीदेवी कुइकेल, राजेन्द्रप्रसाद कुइकेल र नवराज पराजुली हुनुहुन्छ । उहाँहरूलाई शब्दयात्रा प्रकाशनका तर्फबाट डा. बलराम तिमल्सिनाले माला, पार्वती शर्माले रुद्राक्षमाला, मोहनमणि दाहालले पुस्तक, पोष चापागाईंले शिवनामी र बेलप्रसाद श्रेष्ठले अभिवन्दनापत्र समर्पण गर्नुभएको थियो ।
