२१०. चौध भुवन

कथाकार सपूत कार्कीको दोस्रो कथासङ्ग्रह ‘चौध भुवन’ उहाँको पहिलो पुस्तक ‘पागल’ कथासङ्ग्रह प्रकाशन भएको ३५ औँ वर्षमा प्रस्तुत भएको दोस्रो पुस्तक हो । यस सङ्ग्रहमा १४ वटा कथा राखिएकाले पुस्तकको नाउँ नै ‘चौध भुवन’ राखिएको छ । पूर्वप्रकाशित कथाहरूको यस सङ्ग्रहले सपूत कार्कीको कथालेखन शिल्पका बारेमा स्पष्ट जानकारी दिनेछ । पारिवारिक, सामाजिक र राजनीतिक विषयवस्तुलाई लिएर लेखिएका यस सङ्ग्रहका कथाहरूले नेपालको विषम परिस्थिति, अमिल्दो परिवेश र विकृत मनोविज्ञानको चित्रण प्रभावकारी रूपबाट गरेका छन् । समाजले मसिना मानेका घटनाहरूले राष्ट्रिय जीवनमा दूरगामी रूपमा पार्ने नकारात्मक प्रभावको चित्रणले यस सङ्ग्रहलाई ओजपूर्ण बनाएको छ ।