शब्दयात्रा प्रकाशनले २०८० सालको शब्दयात्रा प्रशासनिक महिला प्रतिभा सम्मान वेदकुमारी न्यौपाने (गोरखा) मा समर्पण गर्ने भएको छ । लामो समयसम्म नेपाल सरकारको प्रशासनिक सेवामा संलग्न रही विभिन्न जिल्लाहरूमा कार्यरत रहेर पनि विविध विधामा सिर्जित आफ्ना डेढ दर्जन साहित्यिक कृति नेपाली वाङ्मयलाई उपहार दिनुभएकोमा उहाँमा उक्त सम्मान समर्पण गर्ने निर्णय गरिएको हो । यो सम्मान शब्दयात्रा प्रकाशनबाट हरेक वर्ष समर्पण गरिन्छ । शारदा घिमिरे भैल संयोजक तथा गीता अधिकारी र कालिका त्रिपाठी पन्त सदस्य रहने गरी शब्दयात्रा प्रकाशनले गठन गरेको सम्मान्य व्यक्तित्व चयन समितिले यसको निर्णय गरेको हो । यस सम्मानको आर्थिक व्यवस्थापन गायिका तथा पूर्वसचिव उर्मिला श्रेष्ठ भोजपुरेले गर्नुभएको हो । यो सम्मान ग्रहण गर्न स्वीकृति दिनुभएकोमा वेदकुमारी न्यौपानेप्रति शब्दयात्रा प्रकाशन हार्दिक आभार व्यक्त गर्दछ ।
डायस्पोराको पहिलो कवितासङ्ग्रह प्रकाशन गर्नुभएका र बेलायतबाट छन्दोबद्ध कृति प्रकाशन गर्ने पहिलो कवि डा. गोपाल पौड्याल ‘मन्डने’ का २७ वटा कृतिहरूध्ये शब्दयात्रा प्रकाशनबाट प्रकाशन भएको यो दोस्रो कृति हो । यसअघि उहाँको खण्डकाव्य ‘अमरज्योति’ २०७९ सालमा यस संस्थाबाट प्रकाशनमा आएको थियो । डा. गोपाल पौड्याल ‘मन्डने’ को ‘ठुले’ नामक प्रस्तुत खण्डकाव्यमा दुई सर्ग र १९५ श्लोक छन्् । शार्दूलविक्रीडित छन्दमा लेखिएको यो खण्डकाव्य सामाजिक विषयवस्तुमा आधारित छ । विभिन्न पारिवारिक घटना, कोरोनाले ल्याएको दुष्प्रभाव, सामाजिक विकृति–विसङ्गति, आर्थिक दुरवस्था र आधुनिक नेपाली जीवनशैलीको चित्रण यसमा गरिएको छ ।
