Shabdayatra Prakashan

शब्दयात्रा प्रकाशनले हरेक वर्ष १३ जना विद्यार्थीलाई छात्रवृत्ति समर्पण गर्ने गरेको छ । त्यसमध्ये एउटा छात्रवृत्ति ‘शब्दयात्रा भूप–मुक्ति विकलाङ्ग छात्रवृत्ति’ पनि हो । शारीरिक रूपमा विकलाङ्ग छात्रछात्राहरू शैक्षिक, बौद्धिक र मनोवैज्ञानिक रूपमा सबल बन्न सकून् भन्ने उद्देश्यले यस छात्रवृत्तिको व्यवस्था गरिएको हो । यस वर्ष २०८० सालमा यो छात्रवृत्ति बनेपाको ज्ञानकुञ्ज माध्यमिक विद्यालयमा कक्षा १२ मा अध्ययन गरिरहेका धुलिखेलका छात्र अनुग्रह प्रजापतिलाई समर्पण गरिने भएको छ । शब्दयात्रा प्रकाशनद्वारा सकुल थापाको संयोजकत्वमा गठित प्रदीप केसी बन्जारा र अमृत अधिकारी सदस्य रहेको चयन समितिको निर्णयका आधारमा उहाँलाई छात्रवृत्ति प्रदान गर्न लागिएको हो । छात्रवृत्तिको रकम र प्रमाणपत्र यही मङ्सिर महिनामा समर्पण गरिनेछ । यसअघि यो छात्रवृत्ति तीनजना छात्रले पाइसकेका छन् । यस छात्रवृत्तिका लागि लेखक तथा सहप्राध्यापक डा. रूपनारायण श्रेष्ठले आफ्ना पितामाताको स्मृति र सम्मानस्वरूप शब्दयात्रा प्रकाशनमा अक्षयकोषको व्यवस्था गरिदिनुभएको छ । छात्रवृत्ति प्राप्त गर्न लाग्नुभएकोमा अनुग्रह प्रजापतिलाई शब्दयात्रा प्रकाशन अग्रिम बधाई ज्ञापन गर्दछ ।

शब्दयात्रा प्रकाशनले हरेक वर्ष काभ्रेपलान्चोक जिल्लाका तीनजना पत्रकारलाई कदरपत्र समर्पण गर्ने गरेको छ । २०८० सालको कदरपत्र यही मङ्सिर महिनामा समर्पण गरिने भएको छ । कदर गरिने तीनजना पत्रकारमध्ये एकजना भुवन भोछिभोया हुनुहुन्छ । उहाँ फोटो पत्रकार हुनुहुन्छ । सकुल थापा संयोजक तथा प्रदीप केसी बन्जारा र अमृत अधिकारी सदस्य रहेको चयन समितिले उहाँलाई कदरपत्र समर्पण गर्ने निर्णय गरेको हो । कदरपत्रको व्यवस्थापन विश्वकीर्तिमान कायम गर्नुभएका अग्रज पत्रकार हरिगोपाल प्रधानले गर्ने गर्नुभएको छ । कदरपत्र प्राप्त गर्न लाग्नुभएकोमा फोटो पत्रकार भुवन भोछिभोयामा शब्दयात्रा प्रकाशन परिवार अग्रिम बधाई ज्ञापन गर्दछ ।

शब्दयात्रा प्रकाशनले हरेक वर्ष काभ्रेपलान्चोक जिल्लाका तीनजना पत्रकारलाई कदरपत्र समर्पण गर्ने गरेको छ । २०८० सालको कदरपत्र यही मङ्सिर महिनामा समर्पण गरिने भएको छ । यस वर्ष कदर गरिने तीनजना पत्रकारमध्ये एकजना शङ्कर अधिकारी हुनुहुन्छ । काभ्रेपलान्चोक जिल्लाका चर्चित पत्रकार उहाँ अरनिको टेलिभिजनका अध्यक्ष हुनुहुन्छ । सकुल थापा संयोजक तथा प्रदीप केसी बन्जारा र अमृत अधिकारी सदस्य रहेको चयन समितिले उहाँलाई कदरपत्र समर्पण गर्ने निर्णय गरेको हो । कदरपत्रको व्यवस्थापन विश्वकीर्तिमान कायम गर्नुभएका अग्रज पत्रकार हरिगोपाल प्रधानले गर्ने गर्नुभएको छ । कदरपत्र प्राप्त गर्न लाग्नुभएकोमा पत्रकार शङ्कर अधिकारीमा शब्दयात्रा प्रकाशन परिवार अग्रिम बधाई ज्ञापन गर्दछ ।

शब्दयात्रा प्रकाशनले आज २०८० साल असोज २६ गते शुक्रबार सम्मान समर्पण समारोहको आयोजना गरी सात विधाका सम्मान समर्पण गरेको छ । कार्यक्रममा शब्दयात्रा कालु वैद्य आयुर्वेद सम्मान भोजपुरका डा. ठाकुरराज अधिकारीलाई, शब्दयात्रा मेलवादेवी गुरुङ महिला प्रतिभा सम्मान पाल्पाकी बेटी बज्राचार्यलाई, शब्दयात्रा कृष्णलाल अधिकारी साहित्यिक पत्रिका सम्मान काठमाडौँको ‘शिवपुरी सन्देश’ लाई र शब्दयात्रा गोपाल प्रधान स्तम्भकार सम्मान सोलुखुम्बूका अनारसिंह कार्कीलाई समर्पण गरिएको थियो । यसै गरी शब्दयात्रा षडानन्द अधिकारी आध्यात्मिक पत्रकारिता सम्मान धादिङका कमल रिजाललाई, शब्दयात्रा रत्नदेवी प्रधान फोटो पत्रकारिता सम्मान तनहूँका जगदीश तिवारीलाई र शब्दयात्रा नीलकण्ठेश्वर कृष्णमणि आध्यात्मिक संस्था सम्मान सिन्धुपाल्चोकको कफेश्वर महादेवस्थान व्यवस्थापन समितिलाई समर्पण गरिएको थियो । शैक्षिक शिरोभूषण डा. सुरेशराज शर्माको प्रमुख आतिथ्य, भ्रष्टविरोधी शास्त्रका प्रणेता भरत जङ्गमको आतिथ्य र संस्थाका आजीवन सदस्य प्रा. केदारनाथ श्रेष्ठको सभापतित्वमा सम्पन्न आजको समारोहको सञ्चालन संस्थापक अध्यक्ष हरि मञ्जुश्रीबाट गरिएको थियो । कार्यक्रमको समुद्घाटन आजीवन सदस्य पदम दाहालले, अभिवन्दनापत्रको वाचन आजीवन सदस्य सकुल थापाले, स्वागत भाषण आजीवन सदस्य कृष्णमणि कुइकेलले, सम्मान सामग्रीको व्यवस्थापन आजीवन सदस्यद्वय हरिगोपाल प्रधान र शारदाप्रसाद शर्माले, माला अर्पण आजीवन सदस्य अमृत अधिकारीले, विविध सहयोग सङ्गीता केसीले र कविता वाचन गोविन्दबहादुर खड्काले गर्नुभएको थियो । चयन समितिका संयोजक जयराम श्रेष्ठले सम्मानित व्यक्ति तथा संस्थाको चिनारी गराउनुभएको उक्त कार्यक्रममा लालबहादुर भुजेलले जयराम श्रेष्ठलाई र केशव रूपाखेतीले चयन समितिका सदस्य उद्धवप्रसाद नेपाललाई शब्दयात्रा प्रकाशनका तर्फबाट उपहार प्रदान गर्नुभएको थियो । आजीवन सदस्य डा. इन्दुल केसीलाई पत्नीशोक परेकाले गतात्माको आत्मशान्तिका लागि मौन धारण गरिएको उक्त कार्यक्रममा आबाल ब्रह्मचारी षडानन्द अधिकारी र मनका श्रेष्ठको तस्बिरमा माल्यार्पण गरिएको थियो ।