Shabdayatra Prakashan

बनेपा । शब्दयात्रा प्रकाशनका संस्थापक अध्यक्ष तथा भाषासेवी हरि मञ्जुश्रीले आफूले सम्मानमा पाएको एक लाख चौरासी रुपियाँ सरकारी निकायबाट आर्थिक सहयोग नलिई सञ्चालन गरिएको वाङ्मयिक संस्था शब्दयात्रा प्रकाशनलाई समर्पण गर्नुभएको छ । समाजसेवी चेतनाथ चौलागाईंले एक लाख चौरासी रुपियाँ सहित उहाँलाई सम्मान गर्नुभएको थियो । हरि मञ्जुश्रीले अनवरत रूपमा गर्नुभएको असल कामको कदर गर्ने क्रममा बनेपास्थित मञ्जुश्री निवास अक्षरधाममा सपरिवार पुगेर उहाँले सम्मान गर्नुभएको हो ।

त्यस बखत सम्मानित व्यक्तित्व हरि मञ्जुश्रीले उक्त रकम शब्दयात्रा प्रकाशनको अक्षरसेवी सहयोग कोषमा राखिदिने बताउनुभयो । उहाँले भन्नुभयो — “यो एक लाख चौरासी रुपियाँ मलाई भन्दा दैवी वा प्राकृतिक विपत्तिमा परेका र पर्ने लेखक, पत्रकार र कलाकारहरूलाई बढी आवश्यक पर्छ । त्यसैले लेखक, पत्रकार र कलाकारहरूलाई कुनै पनि प्रकारको विपत्ति परेर आर्थिक सङ्कट आइलागेको थाहा पाएपछि त्यस्ता व्यक्तिलाई आर्थिक सहयोग गर्ने कार्यमा म यस रकमको उपयोग गर्ने व्यवस्था मिलाउनेछु । यसबाट वास्तविक पीडितले सहायता पाउनेछन् ।”

सम्मान गर्ने व्यक्तित्व चेतनाथ चौलागाईं सिन्धुपाल्चोक जिल्लाका प्रतिभा हुनुहुन्छ । सेवानिवृत्त जीवन बिताइरहनुभएका उहाँ हाल ललितपुरको धोबीघाटमा बस्नुहुन्छ ।

आगामी माघ महिनामा शब्दयात्रा प्रकाशनबाट छवटा पुरस्कार समर्पण गर्नुपर्नेछ — (१) शब्दयात्रा नारायणी–शङ्कर राष्ट्रिय योगप्रतिभा पुरस्कार, (२) शब्दयात्रा प्रा. केदारनाथ–लीला श्रेष्ठ सङ्खुवासभा प्रतिभा पुरस्कार, (३) शब्दयात्रा कृष्ण जोशी भोजपुर प्रतिभा पुरस्कार, (४) शब्दयात्रा भरत जङ्गम भक्तपुर प्रतिभा पुरस्कार, (५) शब्दयात्रा लीला–मध्यमार्ग काभ्रेपलान्चोक प्रतिभा पुरस्कार, (६) शब्दयात्रा सूर्यप्रसाद श्रेष्ठ कर्मशीलता पुरस्कार ।

शब्दयात्रा प्रकाशनले यसै वर्षदेखि हरेक माघ महिनामा ‘राष्ट्रिय योगप्रतिभा पुरस्कार’ समर्पण गर्ने भएको छ । पुरस्कारमा २५ हजार रुपियाँ, शब्दयात्रा पट्ट, अभिवन्दनापत्र र उपहार समर्पण गरिनेछ । यसका लागि शब्दयात्रा प्रकाशनका आजीवन सदस्य, लेखक तथा पूर्वप्रशासक शङ्कर मानन्धरले आवश्यक रकम उपलब्ध गराउनुभएको छ । स्वामी कल्याणमित्र र इन्जिनियर तथा अधिवक्ता दिनेश चौधरीको समुपस्थितिमा उहाँले शब्दयात्रा प्रकाशनको नाउँमा बनाइएको चेक शब्दयात्रा प्रकाशनको संस्थापक अध्यक्षका रूपमा हरि मञ्जुश्रीलाई हस्तान्तरण गर्नुभएको छ ।

शब्दयात्रा प्रकाशनले यही २०८० साल मङ्सिर ८ गते शुक्रबार ४ जनालाई विद्वतवृत्ति, ३ जनालाई कदरपत्र र २ जनालाई छात्रवृत्ति समर्पण गरेको छ । संस्थापक अध्यक्ष हरि मञ्जुश्रीको सभापतित्व र विश्व हिन्दू महासङ्घ नेपाल राष्ट्रिय समितिका केन्द्रीय अध्यक्ष डा. रामचन्द्र अधिकारीको प्रमुख आतिथ्य र विश्वकीर्तिमानी महिला डा. सरिशा श्रेष्ठको विशेष आतिथ्यमा कार्यक्रम सम्पन्न भएको थियो ।
विद्वतवृत्ति पाउनेहरूमा कालिका त्रिपाठी पन्त, उद्धवप्रसाद नेपाल, अमृका ताम्राकार र समीर आचार्य हुनुहुन्थ्यो । उहाँहरूलाई क्रमशः शब्दयात्रा सुभाष खड्का अनुसन्धान विद्वतवृत्ति, शब्दयात्रा राधा विष्ट प्रह्लाद केसी काभ्रेपलान्चोक अनुसन्धान विद्वतवृत्ति, शब्दयात्रा प्रा. केदारनाथ–लीला श्रेष्ठ भोजपुर अनुसन्धान विद्वतवृत्ति र शब्दयात्रा सावित्री जङ्गम थापा अनुसन्धान विद्वतवृत्ति समर्पण गरिएको थियो ।
यसै गरी कदरपत्र पाउनेहरूमा शङ्कर अधिकारी, सुनीता सापकोटा र भुवन भोछिभोया हुनुहुन्थ्यो । उहाँहरूलाई शब्दयात्रा प्रकाशन हरिगोपाल प्रधान कदरपत्र समर्पण गरिएको थियो । उहाँहरूका साथमा विपासना शाक्य र अनुग्रह प्रजापतिलाई शब्दयात्रा द्रोणपुष्प पत्रकारिता छात्रवृत्ति र शब्दयात्रा भूप–मुक्ति विकलाङ्ग छात्रवृत्ति समर्पण गरिएको थियो ।
मच्छेश्वर सापकोटाले पानसमा दीप प्रज्ज्वलन गरेर कार्यक्रमको समुद्घाटन, शारदाप्रसाद शर्माले उद्घोषण, शिवप्रसाद बन्जाराले स्वागत भाषण तथा प्रदीप केसी र अमृत अधिकारीले प्रमाणपत्र वाचन गर्नुभएको उक्त कार्यक्रममा सकुल थापाले विद्वतवृत्ति, कदरपत्र र छात्रवृत्ति पाउनेहरूको चिनारी गराउनुभएको थियो । कार्यक्रममा हरिगोपाल प्रधान, मोहनमणि दाहाल, जयनारायण नेपाल, गीता अधिकारी, प्रकाशबहादुर कायस्थ, सिद्धिबहादुर कर्माचार्य, पूर्णबहादुर कार्की, पूर्णबहादुर कर्माचार्य, रामप्रसाद अधिकारी, चन्द्रबहादुर खड्का, सङ्गीता केसी, पुण्यवती घले आदिले विभिन्न भूमिका निर्वाह गर्नुभएको थियो ।

शब्दयात्रा प्रकाशनले लघु अनुसन्धान परियोजनाका रूपमा हरेक वर्ष चारजना अनुसन्धातालाई विद्वतवृत्ति समर्पण गर्ने गरेको छ । तीमध्ये एउटा विद्वतवृत्ति ‘शब्दयात्रा प्रा. केदारनाथ–लीला श्रेष्ठ भोजपुर अनुसन्धान विद्वतवृत्ति’ पनि हो । भोजपुर जिल्लाको शैक्षिक इतिहाससँग सम्बन्धित प्रकाशनयोग्य अनुसन्धानात्मक सामग्री तयार पार्नका लागि यो विद्वतवृत्ति समर्पण गरिन्छ । यस वर्ष २०८० सालका लागि यो विद्वतवृत्ति भोजपुरको टक्सार बजार निवासी अनुसन्धाता अमृका ताम्राकारमा समर्पण गरिने भएको छ । शब्दयात्रा प्रकाशनद्वारा सकुल थापाको संयोजकत्वमा गठित प्रदीप केसी बन्जारा र अमृत अधिकारी सदस्य रहेको चयन समितिको निर्णयका आधारमा उहाँलाई यो विद्वतवृत्ति समर्पण गर्न लागिएको हो । विद्वतवृत्ति अन्तर्गत उहाँले भोजपुर टक्सारको यशोधरा माध्यमिक विद्यालयको साङ्गोपाङ्ग इतिहास र त्यससँग सम्बन्धित अभिलेखहरूको विवरणसहित प्रकाशनयोग्य अनुसन्धानात्मक सामग्री तयार पार्नुहुनेछ । विद्वतवृत्तिको रकम र प्रमाणपत्र यही मङ्सिर महिनामा समर्पण गरिनेछ । यस विद्वतवृत्तिका लागि भोजपुरका शिक्षासेवी प्रा. केदारनाथ श्रेष्ठले शब्दयात्रा प्रकाशनमा अक्षयकोषको व्यवस्था गरिदिनुभएको छ । विद्वतवृत्ति प्राप्त गर्न लाग्नुभएकोमा अमृका ताम्राकारलाई शब्दयात्रा प्रकाशन अग्रिम बधाई ज्ञापन गर्दछ ।

शब्दयात्रा प्रकाशनले लघु अनुसन्धान परियोजनाका रूपमा हरेक वर्ष चारजना अनुसन्धातालाई विद्वतवृत्ति समर्पण गर्ने गरेको छ । तीमध्ये एउटा विद्वतवृत्ति ‘शब्दयात्रा सुभाष खड्का अनुसन्धान विद्वतवृत्ति’ पनि हो । काभ्रेपलान्चोक जिल्लाका प्रतिभा सुभाष खड्का र उहाँको स्मृतिमा स्थापित संस्था सुभाष स्मृति प्रतिष्ठानसँग सम्बन्धित विषयमा प्रकाशनयोग्य सामग्री तयार पार्नका लागि यो विद्वतवृत्ति समर्पण गरिन्छ । यस वर्ष २०८० सालका लागि यो विद्वतवृत्ति बनेपा — ६ निवासी लेखिका तथा शिक्षिका कालिका त्रिपाठी पन्तमा समर्पण गरिने भएको छ । शब्दयात्रा प्रकाशनद्वारा सकुल थापाको संयोजकत्वमा गठित प्रदीप केसी बन्जारा र अमृत अधिकारी सदस्य रहेको चयन समितिको निर्णयका आधारमा उहाँलाई यो विद्वतवृत्ति समर्पण गर्न लागिएको हो । विद्वतवृत्ति अन्तर्गत उहाँले सुभाष खड्काका विषयमा लेखिएका कविताहरू सङ्कलन र सम्पादन गरी ‘सुभाष खड्का’ नामक कवितासङ्ग्रह तयार पार्नुहुनेछ । विद्वतवृत्तिको रकम र प्रमाणपत्र यही मङ्सिर महिनामा समर्पण गरिनेछ । यस विद्वतवृत्तिका लागि लेखक तथा पूर्वप्रशासक चन्द्रबहादुर खड्काले सुभाष स्मृति प्रतिष्ठानका तर्फबाट शब्दयात्रा प्रकाशनमा अक्षयकोषको व्यवस्था गरिदिनुभएको छ । विद्वतवृत्ति प्राप्त गर्न लाग्नुभएकोमा कालिका त्रिपाठी पन्तलाई शब्दयात्रा प्रकाशन अग्रिम बधाई ज्ञापन गर्दछ ।

शब्दयात्रा प्रकाशनले लघु अनुसन्धान परियोजनाका रूपमा हरेक वर्ष चारजना अनुसन्धातालाई विद्वतवृत्ति समर्पण गर्ने गरेको छ । तीमध्ये एउटा विद्वतवृत्ति ‘शब्दयात्रा राधा विष्ट प्रह्लाद केसी काभ्रेपलान्चोक अनुसन्धान विद्वतवृत्ति’ पनि हो । काभ्रेपलान्चोक जिल्लासँग सम्बन्धित रहेर शब्दयात्रा प्रकाशनले तोकेको विषयमा प्रकाशनयोग्य सामग्री तयार पार्नका लागि यो विद्वतवृत्ति समर्पण गरिन्छ । यस वर्ष २०८० सालका लागि यो विद्वतवृत्ति बनेपा — ९ निवासी आध्यात्मिक लेखक उद्धवप्रसाद नेपालमा समर्पण गरिने भएको छ । शब्दयात्रा प्रकाशनद्वारा सकुल थापाको संयोजकत्वमा गठित प्रदीप केसी बन्जारा र अमृत अधिकारी सदस्य रहेको चयन समितिको निर्णयका आधारमा उहाँलाई यो विद्वतवृत्ति समर्पण गर्न लागिएको हो । विद्वतवृत्ति अन्तर्गत उहाँले काभ्रेपलान्चोक जिल्लासँग सम्बन्धित आध्यात्मिक लेखकहरूको परिचयात्मक पुस्तक तयार पार्नुहुनेछ । विद्वतवृत्तिको रकम र प्रमाणपत्र यही मङ्सिर महिनामा समर्पण गरिनेछ । यस विद्वतवृत्तिका लागि बनेपामा घर भई हाल अमेरिकामा बस्ने विदुर विष्टले आफ्ना दिदी–भिनाजुको स्मृति र सम्मानस्वरूप शब्दयात्रा प्रकाशनमा अक्षयकोषको व्यवस्था गरिदिनुभएको छ । विद्वतवृत्ति प्राप्त गर्न लाग्नुभएकोमा उद्धवप्रसाद नेपाललाई शब्दयात्रा प्रकाशन अग्रिम बधाई ज्ञापन गर्दछ ।