शब्दयात्रा प्रकाशन सम्मानित व्यक्तित्व चयन समिति (सत्रौं) का सदस्य शिवनाथ मैनालीका पिता फूलप्रसाद मैनालीको देहावसान भएको हुँदा दिवङ्गत आत्माको चिरशान्तिको कामना गर्दै शोकविह्वल परिवारजनमा हार्दिक समवेदना व्यक्त गर्दछौं ।

शब्दयात्रा प्रकाशन परिवार

शब्दयात्रा प्रकाशनद्वारा संस्थापित शब्दयात्रा बालसाहित्य सम्मानद्वारा सम्मानित अग्रज बालसाहित्यकार श्यामदास वैष्णव २०७५ साल असार २४ गते आइतबार साहित्यकार कृष्णप्रसाद पराजुलीको ८४ औँ जन्मजयन्तीको उपलक्ष्यमा सम्मानित हुनुभएकोमा हार्दिक बधाई ज्ञापन गर्दछौं ।

शब्दयात्रा प्रकाशन परिवार

शब्दयात्रा प्रकाशनको कार्यक्रम ‘कर्मयोद्धासँग शब्दसंवाद’ को दोस्रो चरणअन्तर्गत काभ्रेपलाञ्चोक जिल्लाका प्रतिभाशाली व्यक्तित्व काव्यकार, अन्वेषक तथा लेखक डा. गोपाल पौड्याल ‘मन्डने’ को एकल कविता वाचन हुने भएको छ । काभ्रेपलाञ्चोक जिल्लासँग सम्बन्धित कविताहरूको वाचन हुने र प्रबुद्ध वैचारिक चिन्तन पनि हुने उक्त कार्यक्रममा उपस्थित हुनका लागि इच्छुक समस्त महानुभावहरूलाई अनुरोध छ ।
स्थान : शब्दयात्रा प्रकाशनको सभाकक्ष, अक्षरधाम, नीलकण्ठेश्वर, २८ किलो, बनेपा — ६, काभ्रे
मिति : २०७५ साउन ४ गते शुक्रबार
समय : दिउँसो ठीक ३ बजे

शब्दयात्रा प्रकाशन

शब्दयात्रा प्रकाशनको आयोजनामा आगामी साउन महिनाको पहिलो सातादेखि नियमित रूपमा सञ्चालन हुने साप्ताहिक प्रवचन कार्यक्रमअन्तर्गत पहिलोपटक साउन ४ गते बुधबार कवि डा. गोपाल पौड्याल ‘मन्डने’ को एकल कविता वाचन हुने भएको छ । शब्दयात्रा प्रकाशनको सभाकक्षमा उक्त दिन दिउँसो ३ बजे कार्यक्रम प्रारम्भ हुनेछ ।
उक्त कार्यक्रममा उपस्थित हुनका लागि शब्दयात्रा प्रकाशनले सबै साहित्यकार तथा पत्रकार बन्धुहरूमा आग्रह गरेको छ ।

डा. हेमराज काफ्लेद्वारा लिखित र शब्दयात्रा प्रकाशनबाट प्रकाशित कवितासङ्ग्रह ‘अक्षरहरूको बिस्कुन’ माथि छलफल कार्यक्रमको आयोजना गरियो । काठमाडौँ विश्वविद्यालय केन्द्रीय क्याम्पसमा विश्वविद्यालयको मानविकी तथा व्यवस्थापन एकाइद्वारा आयोजित उक्त कार्यक्रममा कवि तथा अनुवादक हरीश अधिकारीले पुस्तकमा सङ्ग्रहित कविताहरूका विषयमा टिप्पणी गर्नुभएको थियो। उक्त अवसरमा कवि डा. काफ्लेले आफ्ना रचनाहरू वाचन गर्नुभएको थियो।
छलफल कार्यक्रममा काठमाडौँ विश्वविद्यालयका प्राध्यापक तथा कर्मचारीहरूको उपस्थिति थियो ।

शब्दयात्रा प्रकाशनका शुभचिन्तक तथा यस संस्थाको कार्यक्रममा विशिष्ट अतिथिका रूपमा समुपस्थित डा. विष्णुराज आत्रेय ‘लाटो साथी’ २०७५ सालको ‘जयतु संस्कृतम् पुरस्कार’ बाट पुरस्कृत हुनुभएकोमा हार्दिक बधाई ज्ञापन गर्दछौं ।

शब्दयात्रा प्रकाशन परिवार

शब्दयात्रा प्रकाशनको साप्ताहिक प्रवचन कार्यक्रम ‘कर्मयोद्धासँग शब्दसंवाद’ को दोस्रो चरण प्रारम्भ हुने भएको छ । आगामी साउनको पहिलो शुक्रबारदेखि उक्त कार्यक्रम प्रारम्भ हुने भएको हो । कार्यक्रम साविकझैँ हरेक शुक्रबार दिउँसो ३ बजे शब्दयात्रा प्रकाशनको सभाकक्षमा हुनेछ ।
प्रथम चरणमा ५० जना कर्मयोद्धाहरू कार्यक्रममा प्रस्तुत हुनुभएको थियो । त्यस चरणका वक्ता र वक्तृताका विषयमा पूर्वघोषणाअनुसार ‘कर्मयोद्धासँग शब्दसंवाद’ नामक पुस्तक प्रकाशन भई सार्वजनिक पनि भइसकेको छ ।

शब्दयात्रा प्रकाशनका कार्यक्रमहरू देखेर म अत्यन्त प्रभावित बनेको छु । यस संस्थाका कार्यक्रमहरू धेरै छन् । अधिकांश कार्यक्रममा मेरो पनि सहभागिता रहने गरेको छ । यस संस्थाले सुभाष स्मृति प्रतिष्ठानका कार्यक्रमहरूलाई पनि सघाइरहेको छ । २०७५ सालको सामाजिक जागरण सम्मान सुभाष स्मृति प्रतिष्ठानलाई प्रदान गरेकोमा संस्थाको अध्यक्षका नाताले सबै पदाधिकारी र सदस्यहरूका तर्फबाट म शब्दयात्रा प्रकाशनलाई हार्दिक आभार व्यक्त गर्दछु ।
शब्दयात्रा प्रकाशनले अनेक प्रकारका कार्यक्रमहरू सञ्चालन गरिरहेको छ । पछि पनि थपिँदै जालान् । कुनै दिन हाम्रा दुवै संस्थाले संयुक्त रूपमा कार्यक्रम सञ्चालन गर्ने अवसर पनि आउन सक्ला । त्यस्ता खालका कुनै पनि कार्यक्रम गर्न ठाउँ चाहिन्छ । हामीसँग पनौती बजारको नजिकै एक रोपनी जग्गा छ र त्यसभित्र दुईतले घर पनि बनेको छ । त्यहाँ कार्यक्रम गर्नका लागि पर्याप्त ठाउँ पुग्छ । शब्दयात्रा प्रकाशनका लागि त्यो जग्गा र घर कुनै पनि कार्यक्रम सञ्चालन गर्न आवश्यक पर्छ भने हामी निःशुल्क उपलब्ध गराउन तयार छौँ । शब्दयात्रा प्रकाशनले त्यो घरजग्गा आवश्यक परेको समयसम्म निःशुल्क भोग गर्न सक्छ । त्यसैले शब्दयात्रा प्रकाशनले पनौतीबाट पनि कुनै कार्यक्रम सञ्चालन गर्न थालोस् भन्ने आग्रह गर्दछु । (२०७५ जेठ ३१ गते सम्पन्न शब्दयात्रा प्रकाशनको कायक्रममा अभिव्यक्त मन्तव्य)

शब्दयात्रा प्रकाशनको सौजन्यमा विपन्न महिला इन्दिरा भुर्तेल नेपाललाई आर्थिक सहयोग जुटाइएको छ । उहाँलाई शब्दयात्रा प्रकाशनको कार्यक्रमको अवसरमा आर्थिक सहयोग जुटाई १७ हजार २ सय रुपियाँ हस्तान्तरण गरिएको छ । द्रोणप्रसाद श्रेष्ठ, चन्द्रबहादुर खड्का र नरेन्द्रकुमार अधिकारीबाट उक्त रकम सङ्कलन गरिएको हो ।
काभ्रेको मन्डन घर भएकी इन्दिरा भुर्तेल नेपाल भूकम्पले घर ढलेपछि बेघर भई डेरामा बस्नुभएको, उहाँका श्रीमान् मानसिक रोगी र छोरा सुस्त मनस्थितिको भएका कारणले उहाँहरूको जीवन धान्न नै कठिनाइपूर्ण अवस्था भएको जानकारी प्राप्त भएपछि मानवीय सहयोगस्वरूप शब्दयात्रा प्रकाशनले त्यसरी आर्थिक सहयोग गर्ने चाँजोपाँजो मिलाएको हो ।

शब्दयात्रा प्रकाशनले स्थापना गर्न लागेको पाँच विधाका पाँच शीर्ष व्यक्तित्वको सालिकका लागि झापाको विर्तामोडनिवासी नरेन्द्रकुमार अधिकारीले ५ हजार १ सय रुपियाँ आर्थिक सहयोग गर्नुभएको छ ।
काभ्रेको बनेपामा नेपालका प्रथम शिक्षासेवी, प्रथम लोकतान्त्रिक पत्रकार, प्रथम गायिका, प्रथम साहित्यिक सहिद र प्रथम वैज्ञानिकको सालिक स्थापना हुने समाचार पाएपछि अत्यन्त उत्साहित भएर यथासम्भव आर्थिक सहयोग गरेको उहाँको भनाइ रहेको छ ।