Shabdayatra Prakashan

शब्दयात्रा प्रकाशन काभ्रे जिल्लाबाट विभिन्न वाङ्मयिक गतिविधिहरू गरिरहेको छ । यस संस्थाले मुख्य रूपमा समाजसेवी तथा बनेपा नगरपालिका वडा नं. ६ का वडासदस्य कृष्णमणि कुइँकेलबाट हालको चलनचल्तीको मूल्यअनुसार करिब ५० लाख रुपियाँ बराबरको जग्गा दानमा प्राप्त गरेको छ । नीलकण्ठेश्वरधाम संरक्षण समितिबाट कार्यालय भवन निःशुल्क प्राप्त गरेको छ । रामचन्द्र हुमागाईंबाट ‘नेपालभूमि राष्ट्रिय साप्ताहिक’ पत्रिकाको स्वामित्व निःशुल्क प्राप्त गरेको छ र त्यो पत्रिका नियमित रूपमा प्रकाशन भइरहेको छ । सम्मानकोषका लागि उर्मिला श्रेष्ठ भोजपुरे, गोपाल पराजुली, योगेन्द्र खत्री, कृष्णहरि मैनाली, द्रोणप्रसाद श्रेष्ठ, कविप्रसाद प्याकुरेल, कल्याण लम्साल, निर्मलाकुमारी यगोल श्रेष्ठ, सुनील सापकोटा, सुदर्शन आचार्य, राजेन्द्र विरही र निर्मला श्रेष्ठले एक–एक लाख रुपियाँ राखिदिनुभएको छ । गीता मञ्जुश्री, आनन्दराज श्रेष्ठ, हरि गोपाल प्रधान र रमेश पौडेलले हरेक वर्ष सम्मानका लागि आर्थिक सहयोग गर्नुभएको छ । पत्रकारिता छात्रवृत्ति कोषका लागि द्रोणप्रसाद श्रेष्ठले १ लाख रुपियाँ अक्षयकोषमा राखिदिनुभएको छ । हरेक वर्ष १८ जना राष्ट्रिय व्यक्तित्वलाई प्रतिव्यक्ति ५ हजार रुपियाँसहित सम्मान समर्पण गरिरहेको छ । हरेक वर्ष काभ्रेली छात्रालाई १० हजार रुपियाँका दरले पत्रकारिता छात्रवृत्ति प्रदान गरिरहेको छ । हरेक वर्ष १० हजार रुपियाँको कर्मशीलता पुरस्कार प्रदान गरिरहेको छ । हरेक वर्ष २ जना काभ्रेली पत्रकारलाई कदरपत्र प्रदान गरिरहेको छ । विभिन्न लेखकहरूले लेखेका विभिन्न विधाका १२६ वटा पुस्तकको प्रकाशन गरिसकेको छ । सरस्वतीको मूर्ति राखी प्राणप्रतिष्ठा गरिसकेको छ । पुस्तकालयको स्थापना पनि भइसकेको छ । हरिगोपाल प्रधान, बुद्धरत्न मानन्धर, त्रिरत्न रन्जितकार, सुनील सापकोटा जस्ता विभिन्न व्यक्तिहरूबाट विभिन्न समयमा आर्थिक तथा भौतिक सहयोग प्राप्त गरेको छ । निजी क्षेत्रबाट पहिलोपटक संस्थागत विद्यालयको स्थापना गरेका शिक्षासेवी आबाल ब्रह्मचारी षडानन्द अधिकारी, लोकतान्त्रिक विचार प्रवाह गर्न पत्रिका प्रकाशन गरेका प्रथम लोकतान्त्रिक पत्रकार देवीप्रसाद सापकोटा, भाषा–साहित्य क्षेत्रमा लागेर सहिद बनेका प्रथम साहित्यिक सहिद कृष्णलाल अधिकारी, पहिलोपटक गीत रेकर्ड गरेकी गायिका मेलवादेवी गुरुङ र राष्ट्रिय पुरस्कार पाउने पहिलो वैज्ञानिक नरबहादुर भारती गरी नेपालका विशिष्ट व्यक्तित्व पाँचजनाको अर्धकदको सालिक बनेपामा स्थापना गरेको छ । धुलिखेलमा समाजसेवी बेलप्रसाद श्रेष्ठको प्रतिमा जीवित अवस्थामै स्थापना गरेको छ । वेभसाइट सञ्चालन गरेको छ । वृत्तचित्रको निर्माण पनि गरेको छ ।
यस संस्थाबाट आज पहिलोपटक काभ्रे जिल्लाका साङ्गीतिक कलाकार मच्छेश्वर सापकोटालाई नयाँ उपाधि समर्पण गरिँदैछ । उहाँलाई नयाँ उपाधि समर्पण गर्न निर्णय गर्ने काभ्रेको बौद्धिक वर्गप्रति धन्यवाद व्यक्त गर्दै यस संस्थाबाट प्रदान गर्न लागिएको उपाधि स्वीकार गरिदिनुभएकोमा मच्छेश्वर सापकोटाप्रति हार्दिक आभार व्यक्त गर्दछु ।
काभ्रेका दुईजना सक्रिय सञ्चारकर्मी मोतिराम तिमल्सिना र शुकदेव थपलियालाई आजै कदरपत्र प्रदान गरिँदैछ । उहाँहरूलाई कदरपत्र प्रदान गर्न सिफारिस गर्ने शिव बन्जाराप्रति धन्यवाद व्यक्त गर्दै यस संस्थाबाट प्रदान गर्न लागिएको कदरपत्र स्वीकार गरिदिनुभएकोमा उहाँहरूप्रति पनि हार्दिक आभार व्यक्त गर्दछु ।
आजको समारोहमा शब्दयात्रा प्रकाशनले प्रकाशन गरेको तुतुकाजी प्रणामी श्रेष्ठद्वारा लिखित ‘तारतमरस’ नामक आध्यात्मिक पुस्तकलाई सार्वजनिक गरिँदैछ । तुतुकाजी प्रणामी श्रेष्ठको धामगमन भइसकेकाले उहाँप्रति हार्दिक श्रद्धाञ्जली अर्पण गर्दछु । यस कृतिको प्रकाशनका लागि आर्थिक भार बहन गरिदिनुभएकोमा उहाँकी अर्धाङ्गिनी चन्द्रप्रभा प्रणामी श्रेष्ठप्रति हार्दिक आभार व्यक्त गर्दछु ।
(कार्यक्रममा व्यक्त गरिएको स्वागत मन्तव्यको मुख्य अंश)

गत २०७६ साल असोज ४ गते शनिबार बिहान कृष्णमणि कुइँकेलको सौजन्यबाट बनेपा नीलकण्ठेश्वरधामस्थित नीलकण्ठेश्वरधाम संरक्षण समितिले निःशुल्क उपलब्ध गराएको शब्दयात्रा प्रकाशनको सभाकक्षमा विशेष कार्यक्रमको आयोजना गरी गायक, सङ्गीतकार तथा गीतकार मच्छेश्वर सापकोटालाई जनस्तरबाट ‘गीतिभास्कर’ नामक उपाधि समर्पण गर्नुका साथै काभ्रेपलान्चोक जिल्लाका सक्रिय पत्रकारद्वय मोतिराम तिमल्सिना र शुकदेव थपलियालाई ‘शब्दयात्रा प्रकाशन हरिगोपाल प्रधान कदरपत्र, २०७६’ प्रदान गरिएको छ । उक्त कार्यक्रममा आध्यात्मिक लेखक तुतुकाजी प्रणामी श्रेष्ठद्वारा लिखित तथा शब्दयात्रा प्रकाशनबाट १२६ औँ प्रकाशनपुष्पका रूपमा प्रकाशित ‘तारतमरस’ नामक ४१६ पृष्ठको पुस्तकलाई सार्वजनिक पनि गरिएको छ ।
शब्दयात्रा प्रकाशनका अध्यक्ष हरि मञ्जुश्रीको सभापतित्व र सञ्चालनमा सम्पन्न उक्त कार्यक्रममा चन्द्रप्रभा प्रणामी श्रेष्ठ र सरस्वती सापकोटालगायतले आतित्य ग्रहण गर्नुभएको थियो । कार्यक्रममा स्वस्तिवाचन ज्यो. पं. रमेश अधिकारीले, ब्राह्मणपूजन सोमकाजी शाक्य र सरस्वती सापकोटाले, स्वागत मन्तव्य शब्दयात्रा प्रकाशन सञ्चालक समितिका सदस्य हरिगोपाल प्रधानले गर्नुभएको उक्त कार्यक्रममा मच्छेश्वर सापकोटालाई उपाधि समर्पण गर्नुको औचित्य हरि मञ्जुश्रीले, मङ्गलाचरण र ‘गीतिभास्कर’ उपाधिको प्रमाणपत्र वाचन शब्दयात्रा प्रकाशनका महाप्रबन्धक शारदाप्रसाद शर्माले गर्नुभएको थियो । कार्यक्रममा जलपानको खर्च ज्यो. पं. रमेश अधिकारीले बेहोर्नुभएको थियो । समाजसेवी पूर्णबहादुर कर्माचार्यले कार्यक्रमको समीक्षा गर्दै सभाविसर्जन गर्नुभएको थियो ।
कार्यक्रममा शब्दयात्रा प्रकाशनले स्थापना गरेका प्रथम शब्दसाधकहरूको सालिकमा माल्यार्पण गरिएको थियो । त्यस क्रममा प्रथम शिक्षासेवी षडानन्द अधिकारीको सालिकमा चन्द्रप्रभा प्रणामी श्रेष्ठले, प्रथम लोकतान्त्रिक पत्रकार देवीप्रसाद सापकोटाको सालिकमा मोतिराम तिमल्सिनाले, राष्ट्रिय पुरस्कार पाउने प्रथम वैज्ञानिक नरबहादुर भारतीको सालिकमा हरिप्रसाद चौलागाईंले, प्रथम साहित्यिक सहिद कृष्णलाल अधिकारीको सालिकमा शुकदेव थपलियाले र गीत स्वराङ्कन गर्ने प्रथम गायिका मेलवादेवी गुरुङको सालिकमा मच्छेश्वर सापकोटाले माल्यार्पण गर्नुभएको थियो ।

गीतिभास्कर उपाधि समर्पण

शब्दयात्रा प्रकाशनको आयोजनामा गायक, सङ्गीतकार तथा गीतकार मच्छेश्वर सापकोटालाई ‘गीतिभास्कर’ नामक उपाधि समर्पण गरिएको छ । कार्यक्रममा शब्दयात्रा प्रकाशनका तर्फबाट उपाधिपत्र शब्दयात्रा प्रकाशनका अध्यक्ष हरि मञ्जुश्रीले, किरीट डा. इन्दुल केसीले, रुद्राक्षको माला कृष्णमणि कुइँकेलले र उपहार शिव बन्जाराले समर्पण गर्नुभएको थियो ।
कार्यक्रममा श्री सापकोटालाई खोटाङ्गेहरूको संस्था देम्लिटार काठमाडौँ सेवा समाजका तर्फबाट सचिव दामोदर घिमिरे, रुद्र स्मृति अक्षयकोषका तर्फबाट अध्यक्ष लक्ष्मीप्रसाद शर्मा र सहदीप पलान्चोकेले प्रशस्तिपत्र तथा बधाईपत्रहरू प्रदान गर्नुभएको थियो भने ‘गीतिभास्कर’ उपाधि प्राप्त गर्नुभएको बधाईस्वरूप नीलकण्ठेश्वरधाम संरक्षण समितिका तर्फबाट अध्यक्ष कृष्णमणि कुइँकेल, समाजसेवी शकुन्तला बन्जारा, कवि केदारनाथ तिमल्सिना, कवि पदम दाहाल (सङ्खुवासभा), कवयित्री भवानी पाण्डे, कलाकार चन्द्रमान सुवाल, नेपाल रेडक्रस सोसाइटी सेतीदेवी उपशाखाका तर्फबाट पुण्यवती घले, स्वतन्त्र पत्रकार सङ्घ भक्तपुरका तर्फबाट डा. इन्दुल केसी, नेवाः पत्रकार राष्ट्रिय दबूका तर्फबाट उपाध्यक्ष सोमकाजी शाक्य र लेखक चूडाप्रसाद चौलागाईंले उपहारहरू प्रदान गर्नुभएको थियो ।
कार्यक्रममा मच्छेश्वर सापकोटाले ‘गीतिभास्कर’ उपाधि पाएपछि आफूलाई थप जिम्मेवार बनाएको अनूभूति भएको बताउनुभयो भने मच्छेश्वर सापकोटा र सरस्वती सापकोटाको युगल स्वरमा गीत पनि प्रस्तुत गरिएको थियो ।

कदरपत्र प्रदान

काभ्रेपलान्चोक जिल्लाका सक्रिय पत्रकारद्वय मोतिराम तिमल्सिना र शुकदेव थपलियालाई शब्दयात्रा प्रकाशनले ‘शब्दयात्रा प्रकाशन हरिगोपाल प्रधान कदरपत्र, २०७६’ प्रदान गरेको छ । हरेक वर्ष दुई–दुईजना काभ्रेली पत्रकारलाई कदरपत्र प्रदान गर्ने क्रममा २०७६ सालका लागि उहाँहरूको योगदानलाई कदर गरिएको हो । कदरपत्र पाउने सञ्चारकर्मीद्वयको चिनारी चयनकर्ता सञ्चारकर्मी शिव बन्जाराले गराउनुभएको उक्त कार्यक्रममा मोतिराम तिमल्सिनालाई देवीप्रसाद ढुङ्गानाले रुद्राक्षको माला, चूडाप्रसाद चौलागाईंले उपहार तथा हरिगोपाल प्रधानले कदरपत्र प्रदान गर्नुभएको थियो भने शुकदेव थपलियालाई नानुदेवी कुइँकेलले रुद्राक्षको माला, दण्डपाणि अधिकारीले उपहार र हरिगोपाल प्रधानले कदरपत्र प्रदान गर्नुभएको थियो ।
पत्रकारद्वय श्री तिमल्सिना र श्री थपलियाले कार्यक्रममा मन्तव्य व्यक्त गर्नुभएको थियो ।

पुस्तक सार्वजनिक

आध्यात्मिक लेखक तुतुकाजी प्रणामी श्रेष्ठद्वारा लिखित तथा शब्दयात्रा प्रकाशनबाट १२६ औँ प्रकाशनपुष्पका रूपमा प्रकाशित ‘तारतमरस’ नामक ४१६ पृष्ठको पुस्तकलाई सार्वजनिक गरिएको छ । लेखककी धर्मपत्नी चन्द्रप्रभा प्रणामी श्रेष्ठ र नारी जागरण बचत तथा ऋण सहकारी संस्था लिमिटेडका अध्यक्ष निर्मला श्रेष्ठले संयुक्त रूपमा उक्त पुस्तकलाई सार्वजनिक गर्नुभएको हो ।

शब्दयात्रा प्रकाशनद्वारा सञ्चालित साप्ताहिक कार्यक्रम ‘कर्मयोद्धासँग शब्दसंवाद’ को ९८ औँ शृङ्खलामा प्रतिलिपि अधिकारसम्बन्धी विषयलाई प्रवेश गराइएको छ । उक्त कार्यक्रम गत २०७६ साल भदौ २७ गते शुक्रबार शब्दयात्रा प्रकाशनको सभाकक्षमा सम्पन्न भएको थियो । लेखक चूडाप्रसाद चौलागाईंको सभापतित्व र लेखक दामोदर घिमिरेको प्रमुख आतिथ्यमा सम्पन्न उक्त कार्यक्रममा शब्दयात्रा प्रकाशनका अध्यक्ष हरि मञ्जुश्रीले बौद्धिक चोरी र प्रतिलिपि अधिकारसम्बन्धी नेपालको कानुनी व्यवस्था तथा बर्न महासन्धिका बारेमा जानकारी गराउनुभएको थियो । त्यसपछि त्यस विषयमा लेखक प्रकाश उज्ज्वल बनेपा, कवि पदम दाहाल, कवि डा. इन्दुल केसी, शब्दयात्रा प्रकाशनका महाप्रबन्धक शारदाप्रसाद शर्मा र सङ्गीतकर्मी मच्छेश्वर सापकोटाले टिप्पणी गर्दै नेपाली समाजमा बौद्धिक चोरी र प्रतिलिपि अधिकारका सम्बन्धमा भएका गतिविधिहरूका बारेमा बोल्नुभएको थियो ।
उक्त कार्यक्रममा सङ्गीता केसी, ज्यो. पं. रमेश अधिकारी, सहदीप पलान्चोके, चन्द्रमान सुवाल, केदानाथ तिमल्सिना, नवराज पराजुली, श्री शर्मा मूर्ख आदिको पनि उपस्थिति रहेको थियो ।