शब्दयात्रा प्रकाशनको भक्तपुर सम्पर्क केन्द्र र कुतः प्रकाशन भक्तपुरको संयुक्त आयोजनामा आगामी फागुन ८ गते शनिबार दिउँसो भक्तपुरको वाराही पीठमा अन्तक्र्रिया कार्यक्रम गरिने भएको छ ।
नवीना श्रेष्ठद्वारा सङ्गलित तथा अनूदित र शब्दयात्रा प्रकाशनद्वारा प्रकाशित ‘श्रीस्वस्थानी व्रतकथा’ एवं पशुपतिमान पःमाँद्वारा लिखित तथा सम्पादित र कुतः प्रकाशनद्वारा प्रकाशित ‘श्रीस्वस्थानी व्रतकथा’ का विषयमा उक्त कार्यक्रममा अन्तक्र्रिया गर्न लागिएको हो ।

शब्दयात्रा प्रकाशन र नीलकण्ठेश्वर धामका विषयमा एउटा विशेष कार्यक्रममा प्रवचन गरिएको छ । कीर्तिपुरमा अवस्थित भागवत धामले जुमद्वारा सञ्चालन गरेको आध्यात्मिक कार्यक्रममा अग्रज अक्षरसेवी भरत जङ्गमले शब्दयात्रा प्रकाशन र नीलकण्ठेश्वर धामका विषयमा करिब आधा घन्टा प्रवचन गर्नुभएको हो । प्रवचनका क्रममा उहाँले शब्दसाधक तीर्थ र नीलकण्ठेश्वर धामलाई एकपटक अवलोकन गर्नैपर्ने ठाउँका रूपमा चित्रण गर्नुभएको थियो ।
त्यस कार्यक्रममा आध्यात्मिक क्षेत्रका विभिन्न गुरुहरू, लेखक, पत्रकार, ज्योतिष, प्रवाचक आदिको उपस्थिति रहेको थियो ।

शब्दयात्रा प्रकाशनका संस्थापक अध्यक्ष हरि मञ्जुश्रीलाई ‘साहित्यिक चौतारी नेपाल’ नामक साहित्यिक संस्थाले सल्लाहकारका रूपमा चयन गरेको छ । चारै वेदका नेपाली अनुवादक तिलकप्रसाद लुइँटेल र ज्योति साहित्य प्रतिष्ठानका अध्यक्ष मणिराज सिंहलाई पनि सल्लाहकारमा चयन गरिएको छ ।
‘साहित्यिक चौतारी नेपाल’ नामक संस्थाले नेपाल तथा विदेशमा धेरैवटा शाखाहरू खोलिसकेको छ ।

सहिद शुक्रराज शास्त्रीको गीति व्यक्तित्व, मेलवादेवी गुरुङको प्रेमकथा, यदुनाथ खनाल र डा. हर्क गुरुङको अध्ययन सन्दर्भ, डा. सुरेशराज शर्माको मातृप्रेम, गणेश रसिकको सङ्घर्षगाथा, सावित्री थापाको भित्री कथा, सूर्यप्रसाद श्रेष्ठको पदोन्नति प्रसङ्ग, फोटो कन्सर्नको कथा, शब्दयात्रा प्रकाशन र नीलकण्ठेश्वर धामको चर्चा तथा राजा ज्ञानेन्द्र, डा. इन्दुल केसी, मनका श्रेष्ठ र धर्मदेवी श्रेष्ठसँगको संस्मरण आदि समेटिएको पुस्तक शब्दयात्रा प्रकाशनबाट छाप्ने तयारी भइरहेको छ ।
पुस्तकका लेखक द्रोणप्रसाद श्रेष्ठ हुनुहुन्छ । यसअघि पनि शब्दयात्रा प्रकाशनबाट उहाँको पुस्तक ‘केही दृष्टि केही दृष्टिकोण’ प्रकाशन भइसकेको छ । उहाँले शब्दयात्रा प्रकाशनबाट हरेक वर्ष प्रदान गरिने महिला प्रतिभा सम्मानका लागि आफ्नी धर्मपत्नी मनका श्रेष्ठको स्मृतिमा सम्मानको आर्थिक व्यवस्थापन गरिदिनुभएको छ भने उहाँले राखिदिनुभएको कोषबाट शब्दयात्रा प्रकाशनले हरेक वर्ष पत्रकारिता विषय पढ्ने काभ्रेली छात्रालाई पत्रकारिता छात्रवृत्ति प्रदान गर्ने गरेको छ ।

शब्दयात्रा प्रकाशनले पत्रकारिता विषय अध्ययनरत विपन्न तर जेहेन्दार काभ्रेली छात्रालाई हरेक वर्ष १० हजार रुपियाँ राशीको पत्रकारिता छात्रवृत्ति प्रदान गर्ने गरेको छ । २०७७ सालका लागि उक्त छात्रवृत्ति दिइने भएकाले उपयुक्त छात्राको नाउँ एक हप्ताभित्र उपलब्ध गराइदिन शैक्षिक संस्था तथा सम्बन्धित व्यक्तिलाई हार्दिक अनुरोध छ । छात्रवृत्तिका लागि पत्रकारिता विषय अध्ययनरत विपन्न तर जेहेन्दार काभ्रेली छात्राको नाउँ उपलब्ध गराउने ठेगाना शब्दयात्रा प्रकाशन, नीलकण्ठेश्वर धाम, बनेपा, काभ्रे, दूरभाषाङ्क ०११–४१५२१५ रहेको छ अथवा [email protected] मा इमेल पनि गर्न सक्नुहुनेछ ।

नेपाल बोर्डर अनलाइन टीभीले शब्दयात्रा प्रकाशनका विषयमा ‘शब्दचौतारी’ नामक कार्यक्रम निर्माण गरेको छ । शब्दयात्रा प्रकाशनका संस्थापक अध्यक्ष हरि मञ्जुश्रीसँग अन्तर्वार्ता लिएर तयार पारिएको उक्त कार्यक्रमका सञ्चालक रेणुका भट्टराई हुनुहुन्छ ।
शब्दयात्रा प्रकाशनद्वारा सञ्चालित विभिन्न कार्यक्रमहरूलाई केन्द्रविन्दुमा राखेर तयार पारिएको यो कार्यक्रम नेपाल बोर्डर अनलाइन टीभीको यु–ट्युब च्यानलबाट हेर्न सकिनेछ ।
शब्दयात्रा प्रकाशनबाट अर्को कवितासङ्ग्रह आउँदै
शब्दयात्रा प्रकाशनले ‘कुँडिएका मनहरू’ नामको कवितासङ्ग्रह प्रकाशन गर्ने भएको छ । कवयित्री किरण त्रिपाठी पन्तको दोस्रो पुस्तकका रूपमा यो कवितासङ्ग्रह प्रकाशन हुन लागेको हो । यस सङ्ग्रहमा गद्यकविताहरू सङ्कलित छन् ।
यसअघि उहाँको कथासङ्ग्रह ‘सुनकोसी सुसाइरहेछ’ २०६१ सालमा प्रकाशित भएको थियो । सङ्गीत, अभिनय, साहित्य र उद्घोषणमा रुचि राख्ने किरण त्रिपाठी पन्त हाल शिक्षण पेसामा आबद्ध हुनुहुन्छ ।

शब्दयात्रा प्रकाशनले बनेपामा स्थापना गरेको शब्दसाधक तीर्थका विषयमा साङराङ टीभीले वृत्तचित्र निर्माण गरेर बजारमा पठाएको छ । ‘नेपालमा पहिलोपटक एकै ठाउँमा पाँचजना स्रष्टाहरूको सालिक काभ्रेमा’ शीर्षक दिइएको उक्त वृत्तचित्रमा शब्दयात्रा प्रकाशनका तर्फबाट संस्थापक अध्यक्ष हरि मञ्जुश्रीलाई र टिप्पणीकारका रूपमा गीतिभास्कर मच्छेश्वर सापकोटालाई प्रस्तुत गरिएको छ ।
वृत्तचित्रको निर्माणपछि शब्दसाधक तीर्थमा आवतजावत गर्नेहरूको सङ्ख्या फेरि बढ्न थालेको छ । वृत्तचित्रका प्रस्तोता तथा छायाकार सुमनदेव चापागाईं हुनुहुन्छ । यो वृत्तचित्र साङराङ टीभीको यु–ट्युब च्यानलबाट हेर्न सकिनेछ ।

शब्दयात्रा प्रकाशनद्वारा प्रकाशित तथा नवीना श्रेष्ठद्वारा सम्पादित तथा अनूदित ‘श्रीस्वस्थानी व्रतकथा’ वाचन गरिएको अडियो शब्दयात्रा प्रकाशनले हरेक दिन आफ्ना पाठक तथा श्रोताका लागि सामाजिक सन्जालबाट उपहारस्वरूप पठाउने गरेको छ । अहिले स्वस्थानी व्रतको अवधि भएकाले हरेक दिन सम्बन्धित अध्याय पठाउने व्यवस्था गरिएको हो ।
ज्योतिष पण्डित रमेश अधिकारीले वाचन गर्नुभएको श्रीस्वस्थानी व्रतकथा अब यु–ट्युबमा उपलब्ध हुन थालेको छ ।