लेखक प्रकाश उज्ज्वल बनेपा (प्रकाशबहादुर कायस्थ) ले ‘नेपालभूमि साप्ताहिकमा प्रकाशित लेखहरू’ पुस्तकको टङ्कित प्रति शब्दयात्रा प्रकाशन पुस्तकालयका लागि हस्तान्तरण गर्नुभएको छ । उक्त टङ्कित प्रति पुस्तकालयका तर्फबाट आजीवन सदस्य कृष्णमणि कुइकेलले ग्रहण गर्नुभएको छ । शब्दयात्रा प्रकाशन प्रकाशक रहेको ‘नेपालभूमि राष्ट्रिय साप्ताहिक’ पत्रिकामा विभिन्न मितिमा प्रकाशबहादुर कायस्थले प्रकाश उज्ज्वल बनेपा नाउँबाट लेख्नुभएका समसामयिक लेखहरू यस सङ्ग्रहमा सङ्गृहीत छन् ।
भरत जङ्गमको जन्मदिवस मनाइयो
शब्दयात्रा प्रकाशनले आफ्ना आजीवन सदस्यहरूको जन्मदिवस विभिन्न कार्यक्रम गरी मनाउने गरेको छ । त्यसै क्रममा हिजो २०८२ मङ्सिर १० गते बुधबार शब्दयात्रा प्रकाशनको सभाकक्षमा विभिन्न कार्यक्रम गरी आख्यानकार तथा नवीन दर्शनका दार्शनिक भरत जङ्गमको ७९ औँ जन्मदिवस मनाइयो । शब्दयात्रा प्रकाशनका सल्लाहकार तथा अनुसन्धान विद्वतवृत्तिका कोष व्यवस्थापक सावित्री थापाको प्रमुख आतिथ्यमा सम्पन्न उक्त कार्यक्रमको सभापतित्व आजीवन सदस्य कृष्णमणि कुइकेलले र सञ्चालन आजीवन सदस्य शारदाप्रसाद शर्माले गर्नुभएको थियो । कार्यक्रमका बारेमा संस्थापक अध्यक्ष हरि मञ्जुश्रीले जानकारी गराउनुभएको थियो । शब्दयात्रा प्रकाशनका तर्फबाट कार्यक्रममा उपस्थित आजीवन सदस्यहरूले भरत जङ्गममा जन्मदिवसको शुभकामनापत्र तथा अन्य महानुभावहरूले खादा र उपहार समर्पण गर्नुभएको थियो ।
गणेशभजन सार्वजनिक
हरि मञ्जुश्रीको लेखन तथा सङ्गीतमा तयार भएको अर्को भजन सार्वजनिक गरिएको छ । शब्दयात्रा प्रकाशनको सभाकक्षमा आज २०८२ साल मङ्सिर १० गते बुधबार आयोजित समारोहमा गायक वसन्त कुइकेलले यस भजनको सार्वजनिकीकरण गर्नुभएको हो । यो भजन शब्दयात्रा प्रकाशनद्वारा उत्पादित २२ औँ साङ्गीतिक प्रस्तुति हो । भजनलाई ‘गणेशप्रार्थना’ भनिएको छ । यस भजनमा मच्छेश्वर सापकोटाको सुपरिवेक्षण र बालकृष्ण सेवाचार्यको बाद्यसंयोजन तथा रोशन मञ्जुश्री अधिकारीको सम्पादन र वसन्त कुइकेलको स्वर रहेको छ । वसन्त कुइकेलको मात्र स्वर रहेको यो पहिलो भजन हो । यसअघि उहाँले गायिका रश्मि हुमागाईंसँग ‘फूल हुँ भगवान्’ गाउनुभएको थियो ।
२६४. भूस्वर्गको सुवास
डा. इन्दुल केसीको नयाँ पुस्तक ‘भूस्वर्गको सुवास’ उहाँका विषयमा लेखिएका कविताहरू, उहाँको बानीबेहोराका बारेमा लेखिएका लेखहरू, उहाँबाट प्राप्त भएको सहयोगका बारेमा लेखिएका संस्मरणहरू, उहाँले लेख्नुभएका पुस्तकका बारेमा लेखिएका समीक्षाहरू, उहाँबाट नै लेखिएका लेख–संस्मरणहरू र उहाँका पुस्तकका आवरणहरू राखिएको सङ्ग्रह हो । यस शीर्षकको कविता, लेख, संस्मरण यसमा छैन । त्यसैले पुस्तकको नाउँ कसरी ‘भूस्वर्गको सुवास’ राखिएको होला भन्ने कुरालाई तीन तरिकाले बुझौँ । पहिलो तरिका हो भक्तपुर बुझ्ने । डा. इन्दुल केसीको जन्मस्थल र कर्मस्थल भक्तपुर उहाँका लागि भूस्वर्ग हो । उहाँ जे कर्म गर्नुहुन्छ, त्यो कर्म भक्तपुरको सुवास बनेर परपरसम्म पुग्छ । त्यसैले उहाँको कर्मको एउटा अंश यो पुस्तक ‘भूस्वर्गको सुवास’ हो । दोस्रो तरिका हो विषयवस्तु बुझ्ने । यस पुस्तकका विषयवस्तु दुइटा छन् — (क) डा. इन्दुल केसीको व्यक्तित्व, र (ख) डा. इन्दुल केसीको कृतित्व । यी दुवै विषयवस्तुलाई डा. इन्दुल केसीले ‘भूस्वर्ग’ भन्न खोज्नुभएको छ र यी दुवैबाट योगदानका रूपमा विस्तारित सुवासले ‘भूस्वर्गको सुवास’ जनाउँछ । तेस्रो तरिका हो लेखकहरू बुझ्ने । डा. इन्दुल केसीका विषयमा र डा. इन्दुल केसीको कृतिका विषयमा लेख्ने लेखकहरू भूूस्वर्ग हुन् र ती सबैको लेखनले फिँजाएको सुवास नै ‘भूूस्वर्गको सुवास’ हो ।
सबिना योन्जनलाई माधवी अधिकारी छात्रवृत्ति समर्पण गरिने
शब्दयात्रा प्रकाशनले सबिना योन्जनलाई २०८२ सालको ‘शब्दयात्रा माधवी अधिकारी छात्रवृत्ति’ समर्पण गर्ने भएको छ । सिन्धुली जिल्लामा घर भएकी सबिना योन्जन हाल बनेपा नालाको शुभचामुण्डा माध्यमिक विद्यालयमा कक्षा ९ मा अध्ययनरत हुनुहुन्छ । उहाँलाई छात्रवृत्तिको रकम र प्रमाणपत्र मङ्सिर महिनामा समर्पण गरिनेछ । यस छात्रवृत्तिको कोष व्यवस्थापन आफ्नी धर्मपत्नी साहित्यकार तथा शिक्षासेवी माधवी अधिकारीको स्मृतिमा लेखक, वैज्ञानिक तथा काठमाडौँ विश्वविद्यालयका संस्थापक रजिस्ट्रार डा. सीताराम अधिकारी (काठमाडौँ) ले गर्नुभएको हो । यो छात्रवृत्ति हरेक वर्ष समर्पण गर्ने गरिन्छ ।
शारदा घिमिरे भैललाई सावित्री जङ्गम थापा अनुसन्धान विद्वतवृत्ति समर्पण गरिने
शब्दयात्रा प्रकाशनले लेखिका शारदा घिमिरे भैल (काभ्रेपलाञ्चोक) लाई ‘शब्दयात्रा सावित्री जङ्गम थापा अनुसन्धान विद्वतवृत्ति’ समर्पण गर्ने भएको छ । उहाँको लेखनको विषयवस्तु ‘सहकारी क्षेत्रमा सावित्री जङ्गम थापाको योगदान’ रहेको छ । हरेक वर्ष समर्पण गर्ने गरी संस्थापित यो विद्वतवृत्ति २०८२ सालका लागि आगामी मङ्सिर महिनामा समर्पण गरिनेछ । यस विद्वतवृत्तिका लागि लेखिका तथा समाजसेवी सावित्री जङ्गम थापाले शब्दयात्रा प्रकाशनमा कोषको व्यवस्था गर्नुभएको छ ।
२६३. भरत जङ्गमको ‘निर्बन्ध बन्धन’ एक अध्ययन
‘भरत जङ्गमको निर्बन्ध बन्धन एक अध्ययन’ भन्ने नाउँले नै यस पुस्तकका विषयमा जानकारी दिएको छ । भरत जङ्गम सुप्रसिद्ध आख्यानकार र नवीन दर्शनका दार्शनिकका रूपमा अन्तर्राष्ट्रिय क्षेत्रमा ख्याति आर्जन गर्नुभएका व्यक्तित्व हुनुका साथै शब्दयात्रा प्रकाशनका सल्लाहकार, आजीवन सदस्य र यस संस्थाबाट सम्मानित व्यक्तित्व पनि हुनुहुन्छ । उहाँको कथासङ्ग्रह ‘निर्बन्ध बन्धन’ नेपाली आवाज प्रकाशन प्रा. लि. बाट २०६९ साल मङ्सिर १० गते प्रकाशन गरिएको थियो । त्यही कथासङ्ग्रह अध्ययन गरेर लेखक तथा शिक्षासेवी चूडाप्रसाद चौलागाईंले आफ्ना अनुभूतिहरू लिपिबद्ध गर्नुभयो । चूडाप्रसाद चौलागाईं पनि शब्दयात्रा प्रकाशनद्वारा सम्मानित व्यक्तित्व तथा शब्दयात्रा प्रकाशनद्वारा प्रकाशित ‘नेपालभूमि राष्ट्रिय साप्ताहिक’ पत्रिकाका पूर्व कार्यकारी सम्पादक हुनुहुन्छ । यसरी दुवैजना लेखक शब्दयात्रा प्रकाशनसँग जोडिनुभएको हुँदा यस पुस्तकले शब्दयात्रा प्रकाशनको प्रकाशकत्वमा प्रकाशित हुने संयोग जुरेको हो ।
शब्दयात्रा प्रकाशनमा दोस्रोपटक स्वास्थ्यशिविर
शब्दयात्रा प्रकाशनको आयोजनामा २०८२ कार्तिक २८ गते शुक्रबार पनि दोस्रोपटकको स्वास्थ्यशिविर आयोजना गरियो । शिविरमा १० जनाले सम्पूर्ण स्वास्थ्यपरीक्षण (होलबडी चेकअप) गराउनुभयो । स्वास्थ्यपरीक्षण गराउनेहरूमा चन्द्रबहादुर खड्का, केदारनाथ तिमल्सिना, शारदाप्रसाद शर्मा, पुण्यवती घले, सहदीप पलाञ्चोके, मुरहरि रायमाझी, नवराज तिमल्सिना, हरिप्रसाद तिमल्सिना, रामगोपाल घले र देवकी दाहाल हुनुहुन्थ्यो । स्वास्थ्यशिविरको सञ्चालन प्रकाशबहादुर कायस्थले गर्नुभएको थियो ।
प्रभा अधिकारीलाई पत्रकारिता छात्रवृत्ति समर्पण गरिने
शब्दयात्रा प्रकाशनले प्रभा अधिकारीलाई २०८२ सालको ‘शब्दयात्रा द्रोणपुष्प पत्रकारिता छात्रवृत्ति’ समर्पण गर्ने भएको छ । काभ्रेपलाञ्चोक जिल्लाको बेथानचोक गाउँपालिका निवासी प्रभा अधिकारी बनेपाको काभ्रे बहुमुखी क्याम्पसमा पत्रकारितातर्फ स्नातक चौथो वर्षमा अध्ययनरत हुनुहुन्छ । उहाँलाई छात्रवृत्तिको रकम र प्रमाणपत्र मङ्सिर महिनामा समर्पण गरिनेछ । यस छात्रवृत्तिको कोष व्यवस्थापन आफ्नी धर्मपत्नी मनका श्रेष्ठको स्मृति र सम्मानमा लेखक तथा पूर्वप्रशासक द्रोणप्रसाद श्रेष्ठ (देउराली भोजपुर, हाल पेप्सिकोला काठमाडौँ) ले गर्नुभएको हो । यो छात्रवृत्ति हरेक वर्ष समर्पण गर्ने गरिन्छ ।
रोजिना बमजनलाई विकलाङ्ग छात्रवृत्ति समर्पण गरिने
शब्दयात्रा प्रकाशनले मकवानपुर जिल्लाको गढी गाउँपालिका वडा नं. १ मा घर भएकी रोजिना बमजनलाई २०८२ सालको ‘शब्दयात्रा भूप–मुक्ति विकलाङ्ग छात्रवृत्ति’ समर्पण गर्ने भएको छ । रोजिना बमजन बनेपाको काभ्रे बहिरा विद्यालयमा कक्षा ६ मा अध्ययनरत हुनुहुन्छ । उहाँलाई छात्रवृत्तिको रकम र प्रमाणपत्र मङ्सिर महिनामा समर्पण गरिनेछ । यस छात्रवृत्तिको कोष व्यवस्थापन आफ्ना मातापिता भूपलक्ष्मी श्रेष्ठ र मुक्तिबहादुर श्रेष्ठको स्मृति र सम्मानमा लेखक तथा सहप्राध्यापक डा. रूपनारायण श्रेष्ठ (दिङ्ला भोजपुर, हाल शङ्खमूल काठमाडौँ) ले गर्नुभएको हो । यो छात्रवृत्ति हरेक वर्ष समर्पण गर्ने गरिन्छ ।