शब्दयात्रा प्रकाशनद्वारा प्रकाशित दुई कृति यही मङ्सिर २७ गते सार्वजनिकीकरण गरिएका छन् । डा. इन्दुल केसीद्वारा लिखित तथा सम्पादित र शब्दयात्रा प्रकाशनद्वारा प्रकाशित ‘भूस्वर्गको सुवास’ कृतिकार डा. इन्दुल केसी र लेखक रत्नकुमार श्रेष्ठले सार्वजनिक गर्नुभएको थियो । यसै गरी केदारनाथ तिमल्सिनाद्वारा सङ्कलित तथा शब्दयात्रा प्रकाशनद्वारा प्रकाशित ‘भागवत एक परिचय’ कृतिकार केदारनाथ तिमल्सिना र गायक प्रताप रानाले सार्वजनिक गर्नुभएको थियो । दुवै कृतिको परिचय नवराज दाहाल ‘उत्साही’ ले गराउनुभएको थियो । यीसमेत शब्दयात्रा प्रकाशनद्वारा प्रकाशित कृतिको सङ्ख्या २६५ पुगेको छ ।
लता केसीमा लघुकथा पुरस्कार समर्पण
शब्दयात्रा प्रकाशनले लघुकथाकार लता केसी (भोजपुर) लाई २०८२ सालको ‘शब्दयात्रा डण्डपाणि–मानकुमारी धिताल लघुकथा पुरस्कार’ समर्पण गरेको छ । शिक्षण पेशामा आबद्ध रहँदारहँदै पनि नेपाली वाङ्मयको उत्थान गर्ने क्रममा ‘चोटदेखि मृत्युसम्म’, ‘दृश्य’, ‘सफलता’, ‘पाहुर’ जस्ता लघुकथासङ्ग्रहहरूका माध्यमबाट लघुकथा विधामा योगदान दिनुभएकोमा उहाँलाई पुष्पमाला, रुद्राक्षमाला, उपहार, शब्दयात्रा पट्ट, अभिवन्दनापत्र र ५ हजार ५ रुपियाँ भेटीसहितको उक्त पुरस्कार समर्पण गरिएको हो ।
साहित्यकार अम्बिका धितालद्वारा पितामाताको स्मृति र सम्मानमा व्यवस्थापित यो पुरस्कार मङ्सिर २७ गते शनिबार पहिलोपटक समर्पण गरिएको हो ।
पुरस्कार समर्पण गर्न आयोजित समारोहमा समुपस्थित सम्पूर्ण सहभागीहरूका तर्फबाट पुरस्कृत व्यक्तित्व लता केसीको वाङ्मयिक कीर्तिपताका निरन्तर फैलिरहोस् भनी शब्दसाधक तीर्थ नीलकण्ठेश्वर धाममा विराजित सम्पूर्ण देवीदेवता र पितृहरूसँग प्रार्थना गरिएको बेहोरा अभिवन्दनापत्रमा उल्लेख छ । अभिवन्दनापत्रमा पुरस्कार कोषका व्यवस्थापक अम्बिका धिताल, चयन समितिका सदस्य निर्मला श्रेष्ठ र शब्दयात्रा प्रकाशनका संस्थापक अध्यक्ष हरि मञ्जुश्रीको हस्तखत रहेको छ ।
पुरस्कार समर्पण गर्ने क्रममा कृष्णमणि कुइकेलले माला, निर्मला श्रेष्ठले उपहार, कालिका त्रिपाठी पन्तले शब्दयात्रा पट्ट, अम्बिका धितालले भेटी र हरि मञ्जुश्रीले अभिवन्दनापत्र समर्पण गर्नुभएको थियो ।
मार्टिन चौतारीमा शब्दयात्रा प्रकाशनको चर्चा
मार्टिन चौतारीको आयोजनामा २०८२ मङ्सिर २१ गते ‘संस्था निर्माणको पृथक् अभ्यास शब्दयात्रा प्रकाशनको डेढ दशक’ विषयमा प्रवचन तथा अन्तर्संवाद कार्यक्रम सम्पन्न भयो । कार्यक्रममा शब्दयात्रा प्रकाशनका तर्फबाट हरि मञ्जुश्री, लोकेन्द्र ढकाल, डा. इन्दुल केसी र शङ्करप्रसाद मानन्धर सहभागी हुनुहुन्थ्यो । संस्थापक अध्यक्षका रूपबाट हरि मञ्जुश्रीले त्यस कार्यक्रममा शब्दयात्रा प्रकाशनका विषयमा ४५ मिनेटसम्म बोल्नुभयो । त्यसपछि प्रश्नोत्तर गरिएको थियो । सहभागीहरूले शब्दयात्रा प्रकाशनप्रति धेरै रुचि देखाउनुभएको थियो । कार्यक्रमको सहजीकरण देवराज हुमागाईंले गर्नुभएको थियो ।
लोकेन्द्रबहादुर चन्दलाई अभिनन्दन गरियो
अग्रज साहित्यकार लोकेन्द्रबहादुर चन्दलाई २०८२ मङ्सिर २२ गते विभिन्न साहित्यिक संस्थाहरूले सामूहिक रूपमा अभिनन्दन गरे । अभिनन्दन गर्ने संस्थाहरूमा शब्दयात्रा प्रकाशन पनि थियो । समारोहमा शब्दयात्रा प्रकाशनका तर्फबाट डा. इन्दुल केसी र लोकेन्द्र ढकाल सहभागी हुनुभएको थियो । उहाँहरूले अभिनन्दित व्यक्तित्वलाई शब्दयात्रा प्रकाशनका तर्फबाट अभिनन्दन गर्नुभएको थियो । लोकेन्द्रबहादुर चन्दले शब्दयात्रा प्रकाशनको समारोहमा दुईपटक प्रमुख आतिथ्य ग्रहण गर्नुभएको थियो ।
२६५. भागवत : एक परिचय
केदारनाथ तिमल्सिनाले तयार पार्नुभएको पुस्तिका ‘भागवत ः एक परिचय’ श्रीमद्भागवतको परिचय गराउन समर्थ छ । श्रीमद्भागवतमा कतिवटा स्कन्ध छन्, कुन–कुन स्कन्धमा कति–कति अध्याय छन्, कुन–कुन स्कन्धको कुन–कुन अध्यायमा कुन–कुन विषयवस्तुसँग सम्बन्धित कथा वा घटनाक्रम वा विवरणहरू छन् भन्ने कुराको जानकारी यस पुस्तिकाबाट पाठकवर्गले सजिलै पाउन सक्छन् । तसर्थ भागवतको परिचय पाउन चाहने हरेक पाठकका लागि यो पुस्तिका राम्रो स्रोतसामग्री बनेको छ ।
एक सय थान पुस्तक उपहार
मनकामना बचत तथा ऋण सहकारी संस्था लि. ले बनेपामा खोलेको पुस्तकालयलाई शब्दयात्रा प्रकाशनका तर्फबाट संस्थापक अध्यक्ष हरि मञ्जुश्रीले १ सय थान साहित्यिक पुस्तकहरू उपहारस्वरूप प्रदान गर्नुभएको छ । ती पुस्तकहरू नवस्थापित पुस्तकालयका तर्फबाट सहकारी संस्थाका प्रमुख कार्यकारी अधिकृत सीताराम तिमल्सिनाले गहण गर्नुभएको छ । शब्दयात्रा प्रकाशनले देशका विभिन्न जिल्लाका पुस्तकालयलाई हजारौँ पुस्तकहरू उपहार दिइसकेको छ ।
पदम दाहाल र चूडाप्रसाद चौलागाईंका पुस्तक सार्वजनिक
शब्दयात्रा प्रकाशनद्वारा प्रकाशित दुई पुस्तक सार्वजनिक गरिएका छन् । आख्यानकार तथा नवीन दर्शनका दार्शनिक भरत जङ्गमको व्यक्तित्वका बारेमा पदम दाहालले लेख्नुभएको ‘वरद नायक भरत जङ्गम’ नामक पुस्तक प्रमुख अतिथि सावित्री थापा, संस्थापक अध्यक्ष हरि मञ्जुश्री र कृतिकार पदम दाहालले संयुक्त रूपमा सार्वजनिक गर्नुभएको थियो भने भरत जङ्गमको कृतित्वका बारेमा चूडाप्रसाद चौलागाईंले लेख्नुभएको ‘भरत जङ्गमको निर्बन्ध बन्धन एक अध्ययन’ नामक पुस्तक सावित्री थापा, हरि मञ्जुश्री र कृतिकार चूडाप्रसाद चौलागाईंले संयुक्त रूपमा सार्वजनिक गर्नुभएको थियो ।
कृतिनायक भरत जङ्गम र कृतिकार पदम दाहाल शब्दयात्रा प्रकाशनका आजीवन सदस्य हुनुहुन्छ भने अर्का कृतिकार चूडाप्रसाद चौलागाईं शब्दयात्रा प्रकाशनद्वारा प्रकाशित राष्ट्रिय साप्ताहिक पत्रिका ‘नेपालभूमि’ का पूर्व कार्यकारी सम्पादक हुनुहुन्छ ।
पुस्तक सार्वजनिक गरिएपछि ‘वरद नायक भरत जङ्गम’ का विषयमा प्रजापति तिमिल्सिनाले र ‘भरत जङ्गमको निर्बन्ध बन्धन एक अध्ययन’ का विषयमा पुण्यवती घलेले टिप्पणी गर्नुभएको थियो । त्यस अवसरमा प्रकाशन संस्थाका तर्फबाट आजीवन सदस्य डा. इन्दुल केसीले ‘वरद नायक भरत जङ्गम’ नामक पुस्तक र अर्का आजीवन सदस्य चन्द्रबहादुर खड्काले ‘भरत जङ्गमको निर्बन्ध बन्धन एक अध्ययन’ नामक पुस्तक कृतिनायक भरत जङ्गमलाई प्रदान गर्नुभएको थियो ।
कार्यक्रम यही मङ्सिर १० गते शब्दयात्रा प्रकाशनको आफ्नै सभाकक्ष बनेपामा भएको थियो ।
पुस्तक हस्तान्तरण
लेखक प्रकाश उज्ज्वल बनेपा (प्रकाशबहादुर कायस्थ) ले ‘नेपालभूमि साप्ताहिकमा प्रकाशित लेखहरू’ पुस्तकको टङ्कित प्रति शब्दयात्रा प्रकाशन पुस्तकालयका लागि हस्तान्तरण गर्नुभएको छ । उक्त टङ्कित प्रति पुस्तकालयका तर्फबाट आजीवन सदस्य कृष्णमणि कुइकेलले ग्रहण गर्नुभएको छ । शब्दयात्रा प्रकाशन प्रकाशक रहेको ‘नेपालभूमि राष्ट्रिय साप्ताहिक’ पत्रिकामा विभिन्न मितिमा प्रकाशबहादुर कायस्थले प्रकाश उज्ज्वल बनेपा नाउँबाट लेख्नुभएका समसामयिक लेखहरू यस सङ्ग्रहमा सङ्गृहीत छन् ।
भरत जङ्गमको जन्मदिवस मनाइयो
शब्दयात्रा प्रकाशनले आफ्ना आजीवन सदस्यहरूको जन्मदिवस विभिन्न कार्यक्रम गरी मनाउने गरेको छ । त्यसै क्रममा हिजो २०८२ मङ्सिर १० गते बुधबार शब्दयात्रा प्रकाशनको सभाकक्षमा विभिन्न कार्यक्रम गरी आख्यानकार तथा नवीन दर्शनका दार्शनिक भरत जङ्गमको ७९ औँ जन्मदिवस मनाइयो । शब्दयात्रा प्रकाशनका सल्लाहकार तथा अनुसन्धान विद्वतवृत्तिका कोष व्यवस्थापक सावित्री थापाको प्रमुख आतिथ्यमा सम्पन्न उक्त कार्यक्रमको सभापतित्व आजीवन सदस्य कृष्णमणि कुइकेलले र सञ्चालन आजीवन सदस्य शारदाप्रसाद शर्माले गर्नुभएको थियो । कार्यक्रमका बारेमा संस्थापक अध्यक्ष हरि मञ्जुश्रीले जानकारी गराउनुभएको थियो । शब्दयात्रा प्रकाशनका तर्फबाट कार्यक्रममा उपस्थित आजीवन सदस्यहरूले भरत जङ्गममा जन्मदिवसको शुभकामनापत्र तथा अन्य महानुभावहरूले खादा र उपहार समर्पण गर्नुभएको थियो ।
गणेशभजन सार्वजनिक
हरि मञ्जुश्रीको लेखन तथा सङ्गीतमा तयार भएको अर्को भजन सार्वजनिक गरिएको छ । शब्दयात्रा प्रकाशनको सभाकक्षमा आज २०८२ साल मङ्सिर १० गते बुधबार आयोजित समारोहमा गायक वसन्त कुइकेलले यस भजनको सार्वजनिकीकरण गर्नुभएको हो । यो भजन शब्दयात्रा प्रकाशनद्वारा उत्पादित २२ औँ साङ्गीतिक प्रस्तुति हो । भजनलाई ‘गणेशप्रार्थना’ भनिएको छ । यस भजनमा मच्छेश्वर सापकोटाको सुपरिवेक्षण र बालकृष्ण सेवाचार्यको बाद्यसंयोजन तथा रोशन मञ्जुश्री अधिकारीको सम्पादन र वसन्त कुइकेलको स्वर रहेको छ । वसन्त कुइकेलको मात्र स्वर रहेको यो पहिलो भजन हो । यसअघि उहाँले गायिका रश्मि हुमागाईंसँग ‘फूल हुँ भगवान्’ गाउनुभएको थियो ।