शब्दयात्रा प्रकाशनले २०८० सालको विष्णुमाया–टीकाप्रसाद बालसाहित्य सम्मान नुवाकोट जिल्लामा जन्मनुभएका राष्ट्रिय प्रतिभा बालसाहित्यकार ध्रुव घिमिरेमा समर्पण गर्ने भएको छ । उहाँका ‘जीत कसको हुँदैछ ?’, ‘चमेराको चुच्चो किन बुच्चो ?’, ‘पेटमा भूत कसरी पस्यो ?’, ‘अनौठा–अनौठा प्राणी र वनस्पति’, ‘के ? किन ? कसरी ?’, ‘कोइलीको घर’, ‘टुटिलो र धनेश’, ‘खुट्टे गन्ने खेल’, ‘अघिअघि रोटो पछिपछि केटो’ जस्ता बालसाहित्यिक कृतिहरू प्रकाशित छन् । सम्मान ग्रहण गर्न स्वीकृति दिनुभएकोमा बालसाहित्यकार ध्रुव घिमिरेप्रति शब्दयात्रा प्रकाशन हार्दिक आभार व्यक्त गर्दछ । हरेक वर्ष समर्पण गरिने यस सम्मानको कोष व्यवस्थापन काभ्रेपलान्चोकका बालसाहित्यकार गोपाल पराजुलीले आफ्ना मातापिताको स्मृतिमा गर्नुभएको हो । सम्मान चैत महिनामा समर्पण गरिनेछ ।

गत शुक्रबार बनेपामा एकै दिन एकैपटक छवटा कार्यक्रम सम्पन्न गरिएका छन् ।
शब्दयात्रा प्रकाशन र नीलकण्ठेश्वर धाम संरक्षण समितिको संयुक्त आयोजनामा भएको उक्त कार्यक्रममा ती दुवै संस्थाको सहकार्यमा बनेपामा संस्थापित १०८ शिवलिङ्गको समुद्घाटन शब्दयात्रा प्रकाशनका संस्थापक अध्यक्ष हरि मञ्जुश्री र नीलकण्ठेश्वर धाम संरक्षण समितिका अध्यक्ष कृष्णमणि कुइकेलले संयुक्त रूपमा गर्नुभयो । यो त्यस दिनको पहिलो कार्यक्रम थियो । त्यस कार्यक्रममा १०८ शिवलिङ्गको स्थापना गर्न भक्तजनबाट प्राप्त भएको आर्थिक सहयोगको विवरण हरि मञ्जुश्रीले प्रस्तुत गर्नुभएको थियो ।
दोस्रो कार्यक्रमका रूपमा नीलकण्ठेश्वर धाम परिसरमा नवनिर्मित शिवपाञ्चायन मन्दिरको समुद्घाटन गरियो । उक्त मन्दिर काठमाडौँको चोभारनिवासी विजयानन्द धिताल र दुर्गा धिताल दम्पतीले आफ्नै खर्चमा निर्माण गरी हस्तान्तरण गर्नुभएको थियो । उहाँहरूलाई शब्दयात्रा प्रकाशन र नीलकण्ठेश्वर धाम संरक्षण समितिका तर्फबाट हरि मञ्जुश्री र कृष्णमणि कुइकेलले संयुक्त रूपमा सम्मान गर्नुभएको थियो ।
तेस्रो कार्यक्रमका रूपमा नीलकण्ठेश्वर महादेवको आरतीलाई सार्वजनिक गरिएको थियो । आरतीका लेखक तथा सङ्गीतकार हरि मञ्जुश्री हुनुहुन्छ भने त्यसमा हरि मञ्जुश्री, इ. रोशन मञ्जुश्री अधिकारी, कृष्णमणि कुइकेल, बबिता प्याकुरेल, कालिका त्रिपाठी पन्त र बालकृष्ण सेवाचार्यको स्वर रहेको छ ।
त्यसै गरी सोही चौथो कार्यक्रमका रूपमा शब्दयात्रा प्रकाशनको कार्यक्रम समापन गानलाई पनि सार्वजनिक गरिएको थियो । गीतकार तथा सङ्गीतकार हरि मञ्जुश्री रहनुभएको उक्त गीत इ. रोशन मञ्जुश्री अधिकारी, मच्छेश्वर सापकोटा, सरस्वती सापकोटा, शिव बन्जारा, कृष्णमणि कुइकेल, कालिका त्रिपाठी पन्त र पुण्यवती घलेको स्वर रहेको छ । दुवै गीतको स्वराङ्कन बनेपामा अवस्थित फ्लुटर स्टुडियोमा गरिएको थियो ।
पाँचौँ कार्यक्रमका रूपमा नीलकण्ठेश्वर आरतीको र छैटौँ कार्यक्रमका रूपमा शब्दयात्रा प्रकाशनको कार्यक्रम समापन गानको छायाङ्कन गरिएको थियो । दुवै गीतको छायाङ्कन बालकृष्ण सेवाचार्यले गर्नुभएको थियो ।
कार्यक्रमको सञ्चालन सञ्चारकर्मी शिव बन्जाराले गर्नुभएको थियो । कार्यक्रममा प्रदीप केसी, डा. इन्दुल केसी, जयनारायण नेपाल, पदम दाहाल, ढुण्डिराज पोखरेल, डा. छत्रपति दाहाल, दामोदर घिमिरे लगायत सयौँ भक्तजनको उपस्थिति रहेको थियो ।

शब्दयात्रा प्रकाशनले २०८० सालको देवीप्रसाद सापकोटा आमसञ्चार सम्मान काठमाडौँ जिल्लामा जन्मनुभएकी राष्ट्रिय प्रतिभा रेडियोकर्मी लक्ष्मी भुसालमा समर्पण गर्ने भएको छ । उहाँलाई कृषि कार्यक्रमकी हरिःशरणम् आमा भनेर चिन्ने गरिन्छ । आमसञ्चार माध्यमको उपयोग गर्दै उहाँले रेडियो नेपालको कृषि कार्यक्रमबाट साढे पाँच दशक अघिदेखि नेपाली कृषकहरूलाई आफ्नो विशिष्ट आवाजमा उपयोगी ज्ञान दिइरहनुभएको छ । सम्मान ग्रहण गर्न स्वीकृति दिनुभएकोमा रेडियोकर्मी लक्ष्मी भुसालप्रति शब्दयात्रा प्रकाशन हार्दिक आभार व्यक्त गर्दछ । हरेक वर्ष समर्पण गरिने यस सम्मानको कोष व्यवस्थापन मोरङका साहित्यकार सुनील सापकोटाले प्रथम लोकतान्त्रिक पत्रकार आफ्ना बुढाहजुरबुबा देवीप्रसाद सापकोटाको स्मृतिमा गर्नुभएको हो । सम्मान चैत महिनामा समर्पण गरिनेछ ।

शब्दयात्रा प्रकाशनले २०८० सालको वसन्त शर्मा कविताकाव्य सम्मान बागलुङ जिल्लामा जन्मनुभएका राष्ट्रिय प्रतिभा कवि मुकुन्द शर्मा चालिसेमा समर्पण गर्ने भएको छ । उहाँका ‘मातृत्व यस्तो हुन्छ’ र ‘हिमबाला’ (दुईवटै खण्डकाव्य), ‘रामायण चम्पू’ र ‘महाभारत चम्पू’ (दुईवटै चम्पूकाव्य), ‘पावनपथ’, ‘अपराजिता’ र ‘विश्वरूप’ (तीनैवटा महाकाव्य), ‘शुक्लयजुर्वेद’, ‘सामवेद’ र ‘सौन्दर्यलहरी’ (तीनैवटा पद्यानुवाद) आदिजस्ता काव्यकृति र कवितासङ्ग्रहहरू प्रकाशित छन् । सम्मान ग्रहण गर्न स्वीकृति दिनुभएकोमा कवि मुकुन्द शर्मा चालिसेप्रति शब्दयात्रा प्रकाशन हार्दिक आभार व्यक्त गर्दछ । हरेक वर्ष समर्पण गरिने यस सम्मानको कोष व्यवस्थापन काभ्रेपलान्चोकका कवि कविप्रसाद प्याकुरेलले प्रथम खण्डकाव्यकार वसन्त शर्माको स्मृतिमा गर्नुभएको हो । सम्मान चैत महिनामा समर्पण गरिनेछ ।

शब्दयात्रा प्रकाशनले काठमाडौँमा हालसालै खोलिएको केदारनाथ–लीलादेवी पुस्तकालयका लागि एक सय थान पुस्तक उपहारस्वरूप प्रदान गरेको छ । पुस्तकहरू पुस्तकालयका तर्फबाट लीलादेवी श्रेष्ठले ग्रहण गर्नुभएको छ । प्रदान गरिएका पुस्तकहरू यी हुन् — कृपालुचरणामृत, भगवतीचरणामृत, कन्याकुमारी, श्रीकृष्णचरणामृत, राधाचरणामृत, शब्द, कुल्चिएका फूलहरू, सत्यनारायण व्रतकथा, भर्तृहरि शतक, गीता–माली, माधुरी आचार्य, भोजप्रबन्ध, चाणक्यनीति दर्पण, शब्दयात्रा–शब्दकक्ष र शब्दध्वनि, जापानमा अलमलिँदा, शब्दयात्रा प्रकाशनको छ वर्ष, नेपाल माहात्म्य, देहात तापेर आयुर्वेद, हनुमान चालीसा तथा बटुकभैरव स्तोत्र, समयगाथा, चिरन्तन चिन्तन, कपिलवस्तुमा भगवान्, अपरोक्ष अनुभूति, गीतारसामृत, प्रायोजित, विचलित वर्तमान, म र ‘म’, आत्मबोध, जवाहरको दर्शन, विवरण पुस्तिका, ई हिलातुं च्वनी, धनेश्वर वन्दना, सुशीला कोइराला, यात्रा, युगपुरुष गोविन्दहरि जङ्गम, अपरितुष्टि, देश दुखेको बेला, करिआ सुरुज, रामदेवी माकजू स्मृतिपुष्प, निर्बन्ध बन्धन, पञ्चतन्त्रका रमाइला कथाहरू, बीपी कोइराला र प्रजातान्त्रिक समाजवाद, मैले रोजेको बाटो, काभ्रेपलान्चोक, मेरा पिता र म, अन्धो मान्छे र हात्ती, पुष्प सौगात, मनमनका मञ्जुश्री, समयको अभिलेख, किन पोल्यो हात, श्रीरामचरित मानस रामायण, मेरो सम्झनामा चन्द्रलाल श्रेष्ठ, देवीप्रसाद सापकोटा, धनेश्वर महादेव, दिल पौडेलका हाइकुको विश्लेषण र मूल्याङ्कन, वसन्तानन्द, मत, मूलदेवशशिदेवोपाख्यान, नेवाः संस्कृति छपुलु, राजनीतिक सिद्धान्त, बटुलबाटुल, बादलका तरेलीहरू, टिपनटापन, ःभ बलम ःथ म्जगष्पिजभ,ि पुर्खाका पाइलाहरू, बन्दकोठाको यौवन, चिन्ताकुल, धारादी, फालिकोटको फाली, श्वेताम्बरी, स्वर्गमा पैदल, आस्था, नमारिएका सहिदहरू, रचनापछिका विवेचना, काभ्रे जिल्लाका दमाईं जाति विगत र वर्तमान, घाउ नसम्झाऊ, सावित्री चरित्र, स्मृतिमा दुर्गाप्रसाद शास्त्री, साइनु, व्यक्तित्व र कृतित्व, अग्निजल, नेपाल साहित्य मन्दिर छगू म्हसिका, तोपको आवाज, मुक्तक शारदीय, पानी मनकी रानी, थोपाथोपामा समुद्र, समयको अन्तराल, हिरण्य भोजपुरे साहित्य र सङ्गीतका महारथि, मेरो दुःखी जीवन, मञ्जुश्री, सोमालिया चिन्तन, परेली, कवितामा सविता, सरुलता, कल्याणं भवन्तु, मित्रलहर, कल्पवृक्ष, माच, शिक्षा नेपालको सन्दर्भ ।