गजलकार सुशीला विष्टद्वारा लिखित पहिलो गजलसङ्ग्रह ‘प्रसिद्धि’ शब्दयात्रा प्रकाशनको सभाकक्षमा आज चैत २४ गते आयोजित पुस्तक सार्वजनिकीकरण समारोहमा सार्वजनिक गरियो । अनुसन्धाता, लेखक तथा समालोचक डा. षडानन्द पौड्याल र कृतिकार सुशीला विष्टले संयुक्त रूपमा उक्त गजलसङ्ग्रहलाई थैलीबाट झिकेर सार्वजनिक गर्नुभएको थियो । उक्त कार्यक्रममा ‘प्रसिद्धि’ माथि अन्वेषक, समीक्षक, अनुवादक तथा कवि डा. छत्रपति दाहालले समीक्षात्मक मन्तव्य व्यक्त गर्नुभएको थियो भने कृतिकार सुशीला विष्टले ‘प्रसिद्धि’ मा रहेका गजलहरूमध्येबाट आफूलाई अत्यधिक मन परेको एउटा गजल वाचन गर्नुभएको थियो ।

शब्दयात्रा प्रकाशनले यही चैत २४ गते शनिबार ८ जना राष्ट्रिय व्यक्तित्वलाई सम्मान समर्पण गर्ने भएको छ । त्यस दिन राष्ट्रझङ्कार सम्मानबाट सूर्यप्रसाद श्रेष्ठ (ताप्लेजुङ), भाषासेवा सम्मानबाट प्रा. डा. योगेन्द्रप्रसाद यादव (सिराहा), समालोचना सम्मानबाट प्रा. डा. सुषमा आचार्य (काठमाडौँ), बालसाहित्य सम्मानबाट प्रा. डा. ध्रुव घिमिरे (नुवाकोट), अनुसन्धान सम्मानबाट डा. षडानन्द पौड्याल (पर्वत), कविता–काव्य सम्मानबाट मुकुन्द शर्मा चालिसे (बागलुङ), हास्यव्यङ्ग्य सम्मानबाट चट्याङ मास्टर (भक्तपुर) र आमसञ्चार सम्मानबाट हरिःशरणम् आमै भनी चिनिने लक्ष्मी भुसाल (काठमाडौँ) मा सम्मान समर्पण गरिनेछ । शब्दयात्रा प्रकाशनको सभाकक्ष बनेपामा हुने सम्मान समर्पण समारोह दिउँसो १ बजे प्रारम्भ हुनेछ ।

शब्दयात्रा प्रकाशनले २०८० सालको राष्ट्रझङ्कार सम्मान ताप्लेजुङ जिल्लामा जन्मनुभएका राष्ट्रिय प्रतिभा पूर्वप्रशासक तथा कूटनीतिज्ञ श्री सूर्यप्रसाद श्रेष्ठमा समर्पण गर्ने भएको छ । पूर्वअञ्चलाधीश, पूर्वसचिव, राष्ट्रिय योजना आयोगको पूर्वसहसदस्य, पूर्व प्रमुख निर्वाचन आयुक्त तथा पूर्वराजदूतका रूपमा प्रशासनिक र कूटनीतिक क्षेत्रबाट राष्ट्रका लागि विशिष्ट भूमिका निर्वाह गर्नुभएका उहाँ स्वच्छ र निष्कलङ्क व्यक्तिका रूपमा सुपरिचित हुनुहुन्छ । उहाँ उमेरको आठ दशकपछि पनि सामाजिक जीवनमा उत्तिकै सक्रिय हुनुहुन्छ । सम्मान ग्रहण गर्न स्वीकृति दिनुभएकोमा उहाँप्रति शब्दयात्रा प्रकाशन हार्दिक आभार व्यक्त गर्दछ । यस सम्मानको कोष व्यवस्थापन काभ्रेपलान्चोकका प्रतिभा साहित्यकार कृष्णहरि मैनालीले आफ्ना पितामाता काशीनाथ–मायादेवीको स्मृतिमा गर्नुभएको हो । सम्मान चैत महिनामा समर्पण गरिनेछ ।

शब्दयात्रा प्रकाशनद्वारा प्रकाशित २२५ पुस्तकमध्ये ५१ पुस्तक आध्यात्मिक क्षेत्रका रहेछन् । ती हुन् — नीति र रीति, चिरन्तन चिन्तन, प्रार्थनावली, गीता–माली, आध्यात्मिक क्षितिजमा टहल्दा, हिन्दूधर्मका केही आयाम, सावित्री सुगीता, कपिलवस्तुमा भगवान्, नीतिशास्त्रका अमृतवचन, अपरोक्ष अनुभूति, सावित्री चरित्र, वन्दे नेपाल मातरम्, नेपाल माहात्म्य, सत्यनारायण व्रतकथा, जागनीबोध, नागा बाबा रमेश गिरि, सत्यनारायण कथामृत, वेदान्तशिरोमणि एक संस्मरण, लक्ष्मीभक्तको कविता, भर्तृहरि शतक, पञ्चमाता, धनेश्वर भजनमाला, प्रेम प्रणाम, चण्डेश्वरी भजन सफू, चाणक्यनीति दर्पण, हनुमान चालीसा तथा वटुकभैरव स्तोत्र, श्रीस्वस्थानी व्रतकथा, ढुङ्गेलका गोत्रपुरुष अगस्त्य ऋषि, तारतमरस, वेद के भन्छ ?, श्रीस्वस्थानी व्रतकथा (अनुवाद), पाण्डवायन, पञ्चतन्त्र मित्रभेद, श्यामसुन्दर भजनमाला, शङ्खमूल माहात्म्य र कुम्भेश्वर महादेव, शकुनावली, आध्यात्मिक ज्ञानभण्डार, आस्था, श्रीकृष्ण रहस्य, राधा चरणामृत, कन्याकुमारी, आत्मबोध, आत्मानुभूति, भगवती चरणामृत, माच, श्रीकृष्ण चरणामृत, कृपालु चरणामृत, गोत्रदर्पण, तीस कथा, योगदर्शन र म को हुँ ?

शब्दयात्रा प्रकाशनले २०८० सालको पद्मकला–भीमप्रसाद भाषासेवा सम्मान सिराहा जिल्लामा जन्मनुभएका राष्ट्रिय प्रतिभा भाषावैज्ञानिक प्रा. डा. योगेन्द्रप्रसाद यादवमा समर्पण गर्ने भएको छ । भाषाविज्ञानसँग सँग सम्बन्धित उहाँका ‘इस्युज इन मैथिली सिन्टेक्स’, ‘लिङ्ग्विस्टिक्स अ बेसिक कोर्स’, ‘भाषाविज्ञान’, ‘थ्योरिज अफ ग्रामर’, ‘कन्टेम्पोररी इस्युज इन नेपालिज लिङ्ग्विस्टिक्स’ जस्ता कृतिहरू प्रकाशित छन् । सम्मान ग्रहण गर्न स्वीकृति दिनुभएकोमा भाषावैज्ञानिक प्रा. डा. योगेन्द्रप्रसाद यादवप्रति शब्दयात्रा प्रकाशन हार्दिक आभार व्यक्त गर्दछ । यसै वर्षदेखि हरेक वर्ष समर्पण गर्ने गरी व्यवस्था गरिएको यस सम्मानको कोष व्यवस्थापन भोजपुरका प्रतिभा लेखक प्रा. लालानाथ सुवेदी र उहाँका भाइहरूले आफ्ना मातापिताको स्मृतिमा गर्नुभएको हो । सम्मान चैत महिनामा समर्पण गरिनेछ ।