शब्दयात्रा प्रकाशनद्वारा सञ्चालित नियमित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को ५१ औँ शृङ्खलामा कर्मयोद्धा सुधा सिलवाल प्रमुख वक्ताका रूपमा प्रस्तुत हुनुभयो । अग्रज लोकगायक मच्छेश्वर सापकोटाको सभापतित्वमा सम्पन्न उक्त प्रवचन कार्यक्रम गत २०७४ साल फागुन ११ गते शुक्रबार शब्दयात्रा प्रकाशनको सभाकक्षमा सम्पन्न भएको थियो ।
पदमनाथ ढुङ्गानाले सञ्चालन गर्नुभएको उक्त कार्यक्रममा शारदाप्रसाद शर्मा, श्री शर्मा मूर्ख, पुण्यवती घले, छविलाल कुइँकेल, विष्णुहरि तिमल्सिना, अनु थापा, शकुन्तला बन्जारा, छविलाल कुइँकेल, शम्भुप्रसाद कुइँकेल आदिको समुपस्थिति रहेको थियो ।

शब्दयात्रा प्रकाशनले काभ्रेको बनेपामा पाँच विधाका नेपालका शीर्ष व्यक्तित्वहरूको सालिक स्थापना गर्न लागेकोमा त्यसका लागि ओमबहादुर राउतले ५ हजार १ सय ५९ रुपियाँ आर्थिक सहयोग उपलब्ध गराउनुभएको छ ।
उदयपुर घर भई हाल काठमाडौँको कपनमा बसोवास गर्ने श्री राउत पेसाले इन्जिनियर हुनुहुन्छ ।

शारीरिक रूपमा अत्यन्त अस्वस्थ भएर पनि मनोबल र लगनका कारण साहित्यिक क्षेत्रमा प्रवेश गरेकी काभ्रेली महिला प्रतिभा पूरा श्रेष्ठको दोस्रो पुस्तक कवितासङ्ग्रहका रूपमा ‘पुनर्जन्म’ को प्रकाशन हुने भएको छ । उहाँको पहिलो कृति ‘नयाँ सोच’ लघु–उपन्यासको सार्वजनिकीकरण समारोहमा प्रमुख अतिथि डा. चिन्तामणि योगीले घोषणा गर्नुभएअनुसार शान्ति सेवा आश्रम र गोसाइँस्थान नैमिषारण्य क्षेत्र विकास समितिको आर्थिक सौजन्यमा शब्दयात्रा प्रकाशनको १०० औँ प्रकाशनपुष्पका रूपमा ‘पुनर्जन्म’ को प्रकाशन हुन लागेको हो ।
यही फागुन महिनामा आयोजना गरिने सम्मान समर्पण तथा पुस्तक सार्वजनिकीकरण समारोहमा ‘पुनर्जन्म’ लाई सार्वजनिक गरिने भएको छ ।

शब्दयात्रा प्रकाशनको ९९ औँ प्रकाशनपुष्पका रूपमा ‘शाहवंशका चर्तिकला’ नामक पुस्तिका प्रकाशित हुने भएको छ ।
विष्णुहरि तिमल्सिनाले विभिन्न सामग्रीहरू सङ्कलन गरेर तयार पार्नुभएको त्यस पुस्तिकालाई यही फागुन महिनामा आयोजना गरिने कार्यक्रममा सार्वजनिक गरिने भएको छ ।

शब्दयात्रा प्रकाशनको कार्यक्रममा प्रमुख अतिथि बन्नुभएका पूर्व प्रमुख निर्वाचन आयुक्त तथा पूर्वराजदूत सूर्यप्रसाद श्रेष्ठलाई पत्नीशोक परेको छ । उहाँकी पत्नी गिन्नीबाबा श्रेष्ठको गत २०७४ फागुन ३ गते निधन भएको हो ।
शब्दयात्रा प्रकाशन परिवार शोकसन्तप्त परिवारजनप्रति हार्दिक समवेदना व्यक्त गर्दै गतात्माको चिरशान्तिका लागि भगवान्सँग प्रार्थना गर्दछ ।

शब्दयात्रा प्रकाशनको नियमित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को उनन्चासौँ शृङ्खलाको प्रमुख वक्ताका रूपमा शिक्षासेवी डा. अम्बुभवानी कार्की र पचासौँ शृङ्खलाको प्रमुख वक्ताका रूपमा धुलिखेल नगरपालिकाका उपमेयर विमला शर्मा प्रस्तुत हुनुभयो ।
दुवै कार्यक्रममा शब्दयात्रा लेखक समाजका संयोजक ओतबहादुर खड्का सभापति हुनुहुन्थ्यो भने दुवै शृङ्खलाको सञ्चालन पदमनाथ ढुङ्गानाले गर्नुभएको थियो । एकै दिन दुईवटा शृङ्खलामा कार्यक्रम गरिएको यो पहिलोपटक हो ।
कार्यक्रममा पुण्यवती घले, दामोदर घिमिरे, छविलाल कुइँकेल, खाइबा लामा, नानुदेवी कुइँकेल, दण्डपाणि अधिकारी, शारदाप्रसाद शर्मा, श्री शर्मा मूर्ख, दीपक तिमल्सिना, अनु थापा आदिको समुपस्थिति रहेको थियो ।

शब्दयात्रा प्रकाशनका अध्यक्ष साहित्यकार तथा ग्रन्थसम्पादक हरि मञ्जुश्रीलाई २०७४ सालका लागि साहित्यतर्फको सिम्पल सम्मानबाट सम्मानित गरिएको छ । सिम्पल आर्टस नामक संस्थाको बीसौँ वार्षिकोत्सवका अवसरमा गत २०७४ फागुन ५ गते शनिबार काठमाडौँको बानेश्वरमा विशेष कार्यक्रमको आयोजना गरी उहाँलाई सम्मान गरिएको हो । उहाँका साथमा साहित्यिक पत्रकार चेतनाथ धमला, गायक अमर तन्डुकार, चलचित्र निर्देशक जनकदीप पराजुली र चलचित्र नायिका रविना थापालाई पनि सम्मान गरिएको थियो ।
उपन्यासकार शङ्कर भारतीको सभापतित्वमा आयोजित सम्मान कार्यक्रममा अग्रज चलचित्र निर्देशक लक्ष्मीनाथ शर्मा प्रमुख अतिथि र डा. पीताम्बर शर्मा अतिथि हुनुहुन्थ्यो ।
गायक पुष्कर जङ्गमले स्वागत मन्तव्य र गायक सीताराम पोखरेलले धन्यवाद ज्ञापन गर्नुभएको उक्त कार्यक्रममा साहित्यकार केशव सान्दाइले सम्मानित व्यक्तित्वहरूको परिचयात्मक विवरण प्रस्तुत गर्नुभएको थियो भने ‘कपन बानेश्वर’ साप्ताहिक पत्रिकाका सम्पादक निबन्ध आचार्यले कार्यक्रम सञ्चालन गर्नुभएको थियो ।

शब्दयात्रा प्रकाशनद्वारा सम्मानित समाजसेवी बेलप्रसाद श्रेष्ठ ‘धुलिखेल रत्न’ बाट र शब्दयात्रा सहयोगी समाजका सदस्य पूर्णबहादुर कर्माचार्य ‘धुलिखेल नक्षत्र ख’ बाट धुलिखेल नगरपालिकाद्वारा सम्मानित हुनुभएकोमा हार्दिक बधाई ज्ञापन गर्दछौं ।

शब्दयात्रा प्रकाशन परिवार

आगामी फागुन १५ गते मङ्गलबार दिउँसो १ बजे शब्दयात्रा प्रकाशनको परिसर बनेपा नीलकण्ठेश्वरधाममा उपस्थित भइदिन सबैमा अनुरोध छ । त्यस दिन आमसञ्चार सम्मानबाट अग्रज पत्रकार होमनाथ दाहाललाई, सामाजिक जागरण सम्मानबाट काभ्रेमा सक्रिय संस्था लभग्रीन नेपाललाई, शिक्षा सम्मानबाट नेपालको पहिलो विद्यालय षडानन्द माध्यमिक विद्यालयलाई र विज्ञान–प्रविधि सम्मानबाट नेपालका कम्प्युटर वैज्ञानिक मुनिबहादुर शाक्यलाई सम्मान गरिँदैछ । त्यसै समारोहमा श्रीधर प्याकु¥यालको ‘भर्तृहरि शतक’, बेलप्रसाद श्रेष्ठको ‘मी एन्ड माई धुलिखेल’, विष्णुहरि तिमल्सिनाको ‘शाहवंशका चर्तिकला’ र पूरा श्रेष्ठको ‘पुनर्जन्म’ पुस्तकलाई सार्वजनिक गरिनुका साथै केही लेखकहरूलाई स्मृतिचिह्न प्रदान गरिनेछ ।
शब्दयात्रा प्रकाशन