शब्दयात्रा प्रकाशनद्वारा संस्थापित ‘शब्दयात्रा — गोपाल पराजुली बालसाहित्य सम्मान’ बाट २०७२ सालमा सम्मानित प्रसिद्ध बालसाहित्यकार कृष्णप्रसाद दुवालको देहावसान भएकोमा हार्दिक श्रद्धाञ्जली व्यक्त गर्दै शोकसन्तप्त परिवारप्रति समवेदना प्रकट गर्दछौं ।
हार्दिक बधाई
यस संस्थाका शुभचिन्तक एवं साहित्य–सङ्गीत विधाका अग्रज स्रष्टा गणेश रसिक ‘भोजपुर प्रतिभा सम्मान’ बाट सम्मानित हुनुभएकोमा हार्दिक बधाई ज्ञापन गर्दछौं ।
शब्दयात्रा प्रकाशन परिवार
हार्दिक बधाई
नन्दिकेश्वर अधिकारी शोध सम्मान २०६८ बाट सम्मानित अन्वेषक ज्ञानमणि नेपाल पिनाकल स्रष्टा सम्मान २०७४ बाट सम्मानित हुनुभएकोमा हार्दिक बधाई ज्ञापन गर्दछौँ ।
शब्दयात्रा प्रकाशन परिवार
हार्दिक बधाई
यस संस्थाका सहयोगी मित्र तथा सम्मानित व्यक्तित्व चयन समिति (पहिलो) का सदस्य जीवनचन्द्र कोइराला साझा प्रकाशनबाट प्रकाशन हुने ‘गरिमा’ (साहित्यिक पत्रिका) को प्रधान सम्पादक बन्नुभएकोमा हार्दिक बधाई ज्ञापन गर्दछाँै ।
शब्दयात्रा प्रकाशन परिवार
‘शब्दसंवाद’ मा सुधा सिलवाल
शब्दयात्रा प्रकाशनद्वारा सञ्चालित नियमित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को ५१ औँ शृङ्खलामा कर्मयोद्धा सुधा सिलवाल प्रमुख वक्ताका रूपमा प्रस्तुत हुनुभयो । अग्रज लोकगायक मच्छेश्वर सापकोटाको सभापतित्वमा सम्पन्न उक्त प्रवचन कार्यक्रम गत २०७४ साल फागुन ११ गते शुक्रबार शब्दयात्रा प्रकाशनको सभाकक्षमा सम्पन्न भएको थियो ।
पदमनाथ ढुङ्गानाले सञ्चालन गर्नुभएको उक्त कार्यक्रममा शारदाप्रसाद शर्मा, श्री शर्मा मूर्ख, पुण्यवती घले, छविलाल कुइँकेल, विष्णुहरि तिमल्सिना, अनु थापा, शकुन्तला बन्जारा, छविलाल कुइँकेल, शम्भुप्रसाद कुइँकेल आदिको समुपस्थिति रहेको थियो ।
सालिकका लागि आर्थिक सहयोग
शब्दयात्रा प्रकाशनले काभ्रेको बनेपामा पाँच विधाका नेपालका शीर्ष व्यक्तित्वहरूको सालिक स्थापना गर्न लागेकोमा त्यसका लागि ओमबहादुर राउतले ५ हजार १ सय ५९ रुपियाँ आर्थिक सहयोग उपलब्ध गराउनुभएको छ ।
उदयपुर घर भई हाल काठमाडौँको कपनमा बसोवास गर्ने श्री राउत पेसाले इन्जिनियर हुनुहुन्छ ।
पूरा श्रेष्ठको ‘पुनर्जन्म’
शारीरिक रूपमा अत्यन्त अस्वस्थ भएर पनि मनोबल र लगनका कारण साहित्यिक क्षेत्रमा प्रवेश गरेकी काभ्रेली महिला प्रतिभा पूरा श्रेष्ठको दोस्रो पुस्तक कवितासङ्ग्रहका रूपमा ‘पुनर्जन्म’ को प्रकाशन हुने भएको छ । उहाँको पहिलो कृति ‘नयाँ सोच’ लघु–उपन्यासको सार्वजनिकीकरण समारोहमा प्रमुख अतिथि डा. चिन्तामणि योगीले घोषणा गर्नुभएअनुसार शान्ति सेवा आश्रम र गोसाइँस्थान नैमिषारण्य क्षेत्र विकास समितिको आर्थिक सौजन्यमा शब्दयात्रा प्रकाशनको १०० औँ प्रकाशनपुष्पका रूपमा ‘पुनर्जन्म’ को प्रकाशन हुन लागेको हो ।
यही फागुन महिनामा आयोजना गरिने सम्मान समर्पण तथा पुस्तक सार्वजनिकीकरण समारोहमा ‘पुनर्जन्म’ लाई सार्वजनिक गरिने भएको छ ।
‘शाहवंशका चर्तिकला’ छापिँदै
शब्दयात्रा प्रकाशनको ९९ औँ प्रकाशनपुष्पका रूपमा ‘शाहवंशका चर्तिकला’ नामक पुस्तिका प्रकाशित हुने भएको छ ।
विष्णुहरि तिमल्सिनाले विभिन्न सामग्रीहरू सङ्कलन गरेर तयार पार्नुभएको त्यस पुस्तिकालाई यही फागुन महिनामा आयोजना गरिने कार्यक्रममा सार्वजनिक गरिने भएको छ ।
सूर्यप्रसाद श्रेष्ठलाई पत्नीशोक
शब्दयात्रा प्रकाशनको कार्यक्रममा प्रमुख अतिथि बन्नुभएका पूर्व प्रमुख निर्वाचन आयुक्त तथा पूर्वराजदूत सूर्यप्रसाद श्रेष्ठलाई पत्नीशोक परेको छ । उहाँकी पत्नी गिन्नीबाबा श्रेष्ठको गत २०७४ फागुन ३ गते निधन भएको हो ।
शब्दयात्रा प्रकाशन परिवार शोकसन्तप्त परिवारजनप्रति हार्दिक समवेदना व्यक्त गर्दै गतात्माको चिरशान्तिका लागि भगवान्सँग प्रार्थना गर्दछ ।
हरि मञ्जुश्रीको ‘पच्चीस दृष्टि’ सार्वजनिक
सुभाष स्मृति प्रतिष्ठानको चौधौँ वार्षिक साधारण सभा तथा स्व. सुभाष खड्काको सोह«ौँ स्मृतिदिवस गत २०७४ साल फागुन ५ गते शनिबार काभ्रेको बनेपा नगरपालिकाको सभाकक्षमा सम्पन्न भयो । काठमाडौँ विश्वविद्यालयका संस्थापक उपकुलपति डा. सुरेशराज शर्माको प्रमुख आतिथ्यमा सम्पन्न उक्त कार्यक्रममा शब्दयात्रा प्रकाशनका अध्यक्ष साहित्यकार हरि मञ्जुश्रीद्वारा लिखित भूमिकासङ्ग्रह ‘पच्चीस दृष्टि’ लाई सार्वजनिक गरिएको थियो । काभ्रे जिल्लाका २५ जना लेखकका कृतिमाथि लेखिएका भूमिकाहरू सङ्कलित उक्त कृतिका बारेमा साहित्यकार शारदाप्रसाद शर्माले टिप्पणी गर्नुभएको थियो ।
उक्त कार्यक्रममा अग्रज गीतकार किरण खरेल, अग्रज समाचारवाचक कृष्णा ताम्राकार, नेपाल विद्युत प्राधिकरणका कार्यकारी निर्देशक कुलमान घिसिङ र शिक्षासेवी डा. अम्बुभवानी कार्कीलाई सुभाष स्मृति सम्मानबाट सम्मानित गरिएको थियो । सम्मानित व्यक्तित्वका तर्फबाट कुलमान घिसिङ र डा. अम्बुभवानी कार्कीले मन्तव्य राख्नुभएको थियो । किरण खरेल र कृष्णा ताम्राकार शारीरिक अस्वस्थताका कारण समारोहमा उपस्थित हुन नसक्नुभएकाले किरण खरेलको सम्मानपत्र शिव बन्जारालाई र कृष्णा ताम्राकारको सम्मानपत्र डा. भूषण श्रेष्ठलाई हस्तान्तरण गरिएको थियो ।
कार्यक्रममा स्व. सुभाष खड्काको देहावसान भएको स्थल सङ्खुवासभाको खाँदबारीमा अवस्थित हिमालय माध्यमिक विद्यालयको कक्षा ११ मा अध्ययनरत विपन्न वर्गका पाँचजना जेहेन्दार विद्यार्थीलाई प्रतिव्यक्ति ५ हजार रुपियाँका दरले छात्रवृत्ति उपलब्ध गराइएको जानकारी गराउँदै छात्रवृत्तिको प्रमाणपत्र सम्बन्धित विद्यालयमा पु¥याइदिन पदमनाथ ढुङ्गानालाई हस्तान्तरण गरिएको थियो ।
सुभाष स्मृति प्रतिष्ठानका अध्यक्ष चन्द्रबहादुर खड्काको सभापतित्वमा सम्पन्न उक्त कार्यक्रमको सञ्चालन केशव थापाले र वार्षिक कार्यक्रम तथा आर्थिक प्रतिवेदन राजन थापाले प्रस्तुत गर्नुभएको थियो भने अग्रज लोकगायक मच्छेश्वर सापकोटा र विजयराम कर्माचार्यले गीतहरू प्रस्तुत गर्नुभएको थियो ।
सभाले ११ सदस्यीय नयाँ कार्यसमितिको चयन गरेको छ । नयाँ कार्यसमितिमा चन्द्रबहादुर खड्का अध्यक्ष, केशव थापा उपाध्यक्ष, राजन थापा महासचिव, प्रदीप खड्का कोषाध्यक्ष तथा हरि मञ्जुश्री, पूर्णबहादुर कार्की, पुण्यवती घले, कुमाले मिजार, ओतबहादुर खड्का, विजयराम कर्माचार्य र रामशरण केसी सदस्य रहनुभएको छ ।