शब्दयात्रा प्रकाशनले कवि कृष्णहरि मैनालीको कवितासङ्ग्रह ‘यथार्थता’ प्रकाशन गर्ने भएको छ । उहाँका थुप्रै पुस्तकहरू प्रकाशित भए पनि शब्दयात्रा प्रकाशनले पहिलोपटक उहाँको पुस्तक प्रकाशन गर्न लागेको हो ।
कृष्णहरि मैनालीले ‘शब्दयात्रा राष्ट्रझङ्कार सम्मान’ का लागि आर्थिक व्यवस्थापन गरिदिनुभएको छ ।

शब्दयात्रा प्रकाशनद्वारा संस्थापित अनुसन्धान सम्मानबाट सम्मानित अनुसन्धाता प्रा. दिनेशराज पन्त भानु–भवानी पत्रकारिता पुरस्कारबाट पुरस्कृत हुनुभएकोमा हार्दिक बधाई ज्ञापन गर्दछौं ।

शब्दयात्रा प्रकाशन परिवार

शब्दयात्रा लेखक समाजका सदस्य आध्यात्मिक लेखक तुतुकाजी प्रणामी श्रेष्ठकी अर्धाङ्गिनी सूर्यकुमारी पलाञ्चोके श्रेष्ठ (धराधाममा आगमन ः १ साउन २००१ ÷ परमधामतर्फ प्रस्थान ः १९ भदौ २०७५) यो निस्सार संसारलाई परित्याग गरी परमधामगमन गर्नुभएको हुँदा उहाँको ईश्वरी आत्मा श्रीराजजीमा विलयन होस् भन्ने प्रार्थना गर्दै वियोगव्यथाबाट पीडित सम्पूर्ण परिवारजनप्रति हार्दिक समवेदना अभिव्यक्त गर्दछौँ ।

शब्दयात्रा प्रकाशन परिवार

शब्दयात्रा प्रकाशनको शब्दयात्रा लेखक समाजसँग आबद्ध आध्यात्मिक लेखक तुतुकाजी प्रणामी श्रेष्ठलाई पत्नीशोक परेको छ । उहाँकी अर्धाङ्गिनी सूर्यकुमारी पलाञ्चोके श्रेष्ठले गत २०७५ भदौ १९ गते मङ्गलबार ५ः४५ बजे ७५ वर्षको उमेरमा धामगमन गर्नुभएको हो । सूर्यकुमारीले वि. सं. २००१ साउन १ गते यस धराधाममा पदार्पण गर्नुभएको थियो ।

शब्दयात्रा प्रकाशनले केदारनाथ तिमल्सिनाद्वारा लिखित लेखसङ्ग्रह ‘पञ्चमाता’ प्रकाशन गर्ने भएको छ । यो पुस्तक शब्दयात्रा प्रकाशनको १०७ औँ प्रकाशनपुष्प हुनेछ ।
शब्दयात्रा प्रकाशनले यसअघि केदारनाथ तिमल्सिनाद्वारा लिखित ‘भावनाका भुल्का’ नामक कृति प्रकाशित गरिसकेको छ ।

शब्दयात्रा प्रकाशनद्वारा काभ्रेपलाञ्चोक जिल्लाको बनेपामा स्थापना गरिने पाँचजना प्रथम साधकहरूको सालिकको निर्माण र स्थापनाका लागि काभ्रेपलाञ्चोक बनेपा — १० का केदारनाथ तिमल्सिनाले पाँच हजार एक सय पचपन्न रुपियाँ आर्थिक सहयोग गर्नुभएको छ ।
अन्य व्यक्तिहरूले पनि आर्थिक सहयोग गर्ने आश्वासन दिनुभएको छ ।

शब्दयात्रा प्रकाशनले काभ्रेपलाञ्चोक जिल्लाको धुलिखेल नगरपालिका क्षेत्रमा अवस्थित श्रीखण्डपुर माध्यमिक विद्यालयमा आयोजना गरेको ‘मैले देख्न चाहेको नेपाल’ विषयक निबन्ध प्रतियोगितामा उच्च स्थान ल्याएका ७ जना विद्यार्थीहरूलाई पुरस्कार प्रदान गर्नुका साथै सहभागी अन्य ३७ जना विद्यार्थीहरूलाई उपहार प्रदान गरेको छ ।
श्रीखण्डपुर माध्यमिक विद्यालयमा गत २०७५ भदौ २२ गते शुक्रबार आयोजना गरिएको विशेष कार्यक्रममा प्रमुख अतिथिका रूपबाट शब्दयात्रा प्रकाशनका अध्यक्ष हरि मञ्जुश्रीले पुरस्कृत ७ जना विद्यार्थीहरूलाई पुरस्कार प्रदान गर्नुभयो भने विद्यालयको पुस्तकालयलाई शब्दयात्रा प्रकाशनका तर्फबाट उपहारस्वरूप प्रदान गरिएका पुस्तकहरू कार्यक्रमको सभापतित्व गर्नुभएका विद्यालय व्यवस्थापन समितिका अध्यक्ष अशोकचन्द्र धुँजू श्रेष्ठलाई हस्तान्तरण गर्नुभयो । उहाँले विद्यार्थीहरूमा कल्पनाशीलता बढाउन यस्तो कार्यक्रम आयोजना गरिएको बताउँदै पुरस्कृत निबन्धहरू ‘नेपालभूमि साप्ताहिक’ मा प्रकाशन गरिने जानकारी दिनुभयो ।
विशेष अतिथिका रूपबाट ‘नेपालभूमि साप्ताहिक’ का कार्यकारी सम्पादक चूडाप्रसाद चौलागाईंले प्राप्त भएका ४४ वटा निबन्धहरूमध्ये उत्कृष्ट ७ वटा निबन्ध छान्दाका आधारहरूका बारेमा चर्चा गरी पुरस्कृत भएबाहेकका सहभागी अन्य ३७ जना विद्यार्थीहरूलाई प्रोत्साहनस्वरूप शब्दयात्रा प्रकाशनका तर्फबाट उपहार प्रदान गर्नुभएको थियो ।
कार्यक्रमका संयोजक शिव बन्जाराबाट सञ्चालन गरिएको उक्त कार्यक्रममा प्रधानाध्यापक जयराम श्रेष्ठले स्वागत मन्तव्य व्यक्त गर्नुभएको थियो । कार्यक्रममा शिक्षक, विद्यार्थी र विद्यालय व्यवस्थापन समितिका पदाधिकारीहरूको उपस्थिति रहेको थियो ।