Shabdayatra Prakashan | Banepa – Akshyardham

मोक्ष प्राप्त होस्

Activities

admin

-

October 2, 2018

शब्दयात्रा प्रकाशन सम्मानित व्यक्तित्व चयन समिति (दसौँ) तथा शब्दयात्रा लेखक समाजका सदस्य डा. हेमराज काफ्लेकी ममतामयी माता यशोदादेवी काफ्लेको २०७५ असोज ६ गते शनिबार निधन भएको छ । यो प्रकाशन गतात्मालाई मोक्ष प्राप्त होस् र शोकग्रस्त परिवारजनमा शोकलाई सहन गर्न सक्ने शक्ति प्राप्त होस् भन्ने कामना गर्दछ ।

शब्दयात्रा प्रकाशन परिवार

जनसहयोगबाट साहित्यसेवा

Activities

admin

-

October 2, 2018

0

नेपालका विशिष्ट व्यक्तित्वहरूलाई सम्मान समर्पण गर्ने गरिमामय समारोहमा शब्दयात्रा प्रकाशनले हामी ६ जना शब्दसाधकहरू दामोदर घिमिरे, प्रकाश उज्ज्वल बनेपा, जगन्नाथ गिरी, केदारनाथ तिमल्सिना, सहदीप पलान्चोके र टेकलाल भारतीलाई पनि मञ्चमा उपस्थित गराएको छ । हामीमध्ये तीनजनाले सम्पादन गरेका र तीनजनाले लेखेका गरी जम्मा ६ वटा पुस्तकहरू शब्दयात्रा प्रकाशनले प्रकाशन गरिदिएको छ र आजको कार्यक्रममा सार्वजनिक पनि गराइदिएको छ ।
शब्दयात्रा प्रकाशन अहिले ७ वर्षको भएको छ । यस अवधिमा यस संस्थाले १ सय ११ जना राष्ट्रिय व्यक्तित्वहरूलाई सम्मान गरिसकेको छ भने १ सय ९ वटा पुस्तक प्रकाशन गरिसकेको छ । यस संस्थाले बनेपामा ३ आना जग्गा दानमा प्राप्त गरेको छ र नेपाली वाङ्मयका ५ जना शीर्ष व्यक्तित्वको सालिक निर्माण गरिसकेको छ । १० लाख रुपियाँभन्दा बढीको अक्षयकोष स्थापना गर्न सकेको छ । सरकारी निकायबाट अलिकति पनि आर्थिक सहयोग नलिईकन जनस्तरको सहयोगबाट मात्रै यति काम गर्न सक्नु ठूलो कुरा हो । एकलौटी ढङ्गले साहित्यिक संस्था नचलाई समुदायको विश्वास जितेर काम गर्ने हो भने साहित्यिक संस्थाले धेरै काम गर्न सक्छ भन्ने उदाहरण यस संस्थाले देखाउन सकेको छ । त्यसैले यस संस्थाप्रति साहित्यकार, पत्रकार, शिक्षासेवी, समाजसेवी सबैले आस्था र विश्वास राख्ने गरेका छन् । समारोहमा हुने गरेको उपस्थितिले पनि यस कुरालाई पुष्टि गरेको छ । (कृतिकारका तर्फबाट अभिव्यक्त मन्तव्यको मुख्यांश)

पञ्चमाता, भजनमाला र स्वार्थी मान्छे

Activities

admin

-

October 2, 2018

0

शब्दयात्रा प्रकाशनबाट दोस्रो चरणमा सार्वजनिक गरिएका पुस्तकहरूका बारेमा चिनारी गराइदिन मलाई आग्रह गरिएको छ । यसका लागि म शब्दयात्रा प्रकाशन परिवारप्रति आभार व्यक्त गर्दछु ।
मलाई चिनारी गराइदिन जिम्मा दिइएको पहिलो पुस्तक ‘पञ्चमाता’ हो । केदारनाथ तिमल्सिनाले लेख्नुभएको यो लेखसङ्ग्रह मातासँग सम्बन्धित रहेको विचारप्रधान पुस्तक हो । सुरुमा गद्य विधामा र परिशिष्टमा पद्य विधामा गरी दुवै विधामा लेखिएको यो पुस्तकले आजको युवा पुस्तालाई र भविष्यको पुस्तालाई समेत चिन्तनशील बनाउने सामथ्र्य राखेको छ । यस कृतिका कृतिकारको बौद्धिक परिचय कस्तो छ र लेखनमा कति शक्ति छ भन्ने कुरा पनि देखाएको छ । यस पुस्तकको मूल्य १०० रुपियाँ राखिएको छ ।
चिनारी गराइदिन मलाई जिम्मा दिइएको दोस्रो पुस्तक ‘धनेश्वर भजनमाला’ हो । सहदीप पलान्चोकेले यी भजनहरूको सङ्कलन गर्नुभएको हो । नेपाली, नेवारी र हिन्दी भाषामा लेखिएका र गाउने गरिएका एक सय आठवटा चर्चित भजन तथा आरतीहरू यस पुस्तकमा सङ्कलन गरिएका छन् । भजनहरू पुराना र नयाँ दुवै प्रकारका छन् र विभिन्न मन्दिरहरूमा गाउने गरिएका छन् । यस सङ्ग्रहको मूल्य २०० रुपियाँ राखिएको छ ।
तेस्रो पुस्तक टेकलाल भारतीको ‘स्वार्थी मान्छे’ गजलसङ्ग्रह हो । आफ्नो मनका वेदनाहरू, आस्था र विचारका कुराहरू, सामाजिक र राजनीतिक प्रसङ्गहरू ‘स्वार्थी मान्छे’ भित्रका रचनामा परेका छन् । २०७१ सालदेखि हालसम्म प्रत्येक वर्ष उहाँको एउटा पुस्तक शब्दयात्रा प्रकाशनबाट प्रकाशन हुने गरेको छ । त्यसै क्रममा २०७५ सालमा यो पुस्तक प्रकाशनमा आएको हो । यस पुस्तकको मूल्य १०० रुपियाँ रहेको छ ।
यी तीनैवटा पुस्तकहरूले आ–आफ्नै प्रकारको स्थान राख्नेछन् भन्ने विश्वास व्यक्त गर्दछु । (पुस्तकहरूमाथि गरिएको टिप्पणीको मुख्यांश)

पुष्प सौगात, मन र सम्झना बुबाको

Activities

admin

-

October 2, 2018

0

सार्वजनिक गरिएका पुस्तकहरूमध्ये तीनवटा पुस्तकका बारेमा चिनारी गराइदिन मलाई आग्रह गरिएको हुनाले म पुस्तककै विषयमा प्रवेश गर्न चाहन्छु ।
पहिलो पुस्तक दामोदर घिमिरेद्वारा सम्पादित स्मृतिसङ्ग्रह ‘पुष्प सौगात’ हो । काभ्रेली लेखक, पत्रकार तथा समाजसेवी पुष्पदास स्याउलाको निधनपछि शब्दयात्रा प्रकाशनबाट उहाँको स्मृतिमा पुस्तक प्रकाशन गर्ने कुरा उठ्यो । शब्दयात्रा पाठक समाजका संयोजक दामोदर घिमिरे पुस्तक सम्पादनका लागि तत्पर हुनुभयो । दामोदर घिमिरेलाई पुष्पदास स्याउलाकी अर्धाङ्गिनी शर्मिला स्याउलाले सहयोग पु¥याउनुभयो । त्यसपछि यो पुस्तक निस्केको हो । यो पुस्तक पुष्पदास स्याउलाका सहकर्मी–सहधर्मीहरूले उहाँका बारेमा लेख्नुभएका संस्मरणहरूको सङ्ग्रह हो । यस पुस्तकले उहाँको जीवनयात्रा, कृतित्व, व्यक्तित्व र योगदानका बारेमा थोरै भए पनि जानकारी दिने प्रयत्न गरेको छ । पुष्पदास स्याउलाका बालबच्चाको शिक्षादीक्षाका लागि सहयोगार्थ यसपुस्तकको मूल्य १०० रुपियाँ राखिएको छ ।
दोस्रो पुस्तक प्रकाश उज्ज्वल बनेपा अर्थात् प्रकाशबहादुर कायस्थद्वारा लिखित लेखसङ्ग्रह ‘मन’ हो । ‘मन’ मा एघाह«वटा मानसिक खुराकहरू रहेका छन् । शारीरिक स्वस्थताका लागि मानसिक स्वस्थता र सकारात्मकताले अहम् भूमिका खेल्ने कुरा विभिन्न दृष्टान्तहरूबाट पुष्टि गर्दै यही विषयवस्तुमा केन्द्रित रहेर लेखिएका रचनाहरूको यो सङ्ग्रह पाठकहरूका निम्ति उत्तम पठन–सामग्री बनेको छ । आत्मपरक शैलीसमेत प्रयोग गरिएका यसभित्रका हरेक रचना एक–अर्कासँग अन्तर्सम्बन्धित रहेका हुनाले एकै बसाइमा पढ्न सकिन्छ र पढिसकेपछि यिनले पाठकको मनलाई उद्वेलित बनाएर सकारात्मक मनोविज्ञानको निर्माण गर्ने दिशामा महàवपूर्ण भूमिकासमेत निर्वाह गर्नेछन् । यस पुस्तकको मूल्य ६० रुपियाँ राखिएको छ ।
तेस्रो पुस्तक जगन्नाथ गिरीको सङ्कलनमा आएको ‘सम्झना बुबाको’ बिरौंलासङ्ग्रह हो । यो पुस्तक यस पुस्तकका सङ्कलक जगन्नाथ गिरीले आफ्ना बुबा तिलकबहादुर गिरीको स्मृतिमा तयार पार्नुभएको हो । ऐतिहासिक पृष्ठभूमि र वंशविवरणका अतिरिक्त शोकावस्थामा भेट गर्न आउने व्यक्तिहरूको सूची, शोकसन्देशहरू, समवेदना विज्ञापनहरू, क्रियाकर्मका लागि आवश्यक सामग्रीहरूको सूची र केही तस्बिरहरू समावेश गरिएको यो कृति हरेक परिवारका लागि यस्तै खालको अभिलेख राख्नुपर्ने रहेछ भन्ने सन्देश दिन सफल बनेको छ । यो कृति तयार पारेर जगन्नाथ गिरीले पितृऋणको केही अंश भए पनि तिर्ने प्रयत्न गर्नुभएको छ । यसको मूल्य पनि १०० रुपियाँ नै राखिएको छ ।
यी पुस्तकहरूले नेपाली समाजमा सकारात्मक छाप छोड्नेछन् भन्ने आशा गर्दछु । (पुस्तकहरूमाथि गरिएको टिप्पणीको मुख्यांश)

हाम्रो छनोट, सबैको स्वीकृति

admin

-

October 2, 2018

0

शब्दयात्रा प्रकाशनले हरेक वर्षको असोज महिनामा समर्पण गर्नुपर्ने शब्दयात्रा होम–तोत्र शिक्षा सम्मान, शब्दयात्रा देवीप्रसाद सापकोटा आमसञ्चार सम्मान, शब्दयात्रा फोटो पत्रकारिता सम्मान, शब्दयात्रा नेपालभूमि स्तम्भकार सम्मान, शब्दयात्रा साहित्यिक पत्रिका सम्मान र शब्दयात्रा आध्यात्मिक पत्रकारिता सम्मानका लागि उपयुक्त व्यक्ति अथवा संस्थाको नाउँ प्रस्ताव गरी पठाउन ‘नेपालभूमि राष्ट्रिय साप्ताहिक’ पत्रिकामार्फत सार्वजनिक रूपमा आह्वान गरेको थियो । त्यो आह्वानपछि संस्थाका सदस्यहरू र संस्थाबाहिरका व्यक्तिहरूले पनि केही नाउँहरू शब्दयात्रा प्रकाशनलाई उपलब्ध गराउनुभएको थियो ।
त्यसपछि शब्दयात्रा प्रकाशनले ध्रुवराज नेपाललाई संयोजक एवं राजाराम कार्की र मीरा चापागाईलाई सदस्य तोकेर सम्मानित व्यक्तित्व चयन समिति बनायो । चयन समितिमा मनोनयन गरेकोमा हामी तीनैजना शब्दयात्रा प्रकाशनलाई धन्यवाद दिन चाहन्छौँ ।
सम्मानका लागि सिफारिस गरिएका नाउँहरूमध्ये सम्बन्धित विधाका प्रतिभाहरू र संस्थाहरूको नाउँ शब्दयात्रा प्रकाशनले हाम्रो समितिलाई उपलब्ध गराएको थियो । हामीलाई प्राप्त भएका नाउँहरूमध्येबाट समितिको बैठकले निर्धारण गरेको कार्यविधिअनुसार हामीले हरेक विधाका लागि एक–एकजनाको नाउँ चयन गरी सम्बन्धित सम्मान समर्पण गर्नका लागि सिफारिस ग¥यौँ । त्यसपछि संस्थाले उहाँहरूलाई सम्मान गर्ने घोषणा गरेको थियो । आज उहाँहरू सम्मानित हुन लाग्नुभएको छ । हाम्रो निर्णयअनुसार सम्मान ग्रहण गर्न स्वीकृति दिनुभएकोमा शिक्षाविद् प्रा. डा. विद्यानाथ कोइराला, अग्रज पत्रकार राजेश्वर नेपाली, अग्रज फोटो पत्रकार वैकुण्ठकृष्ण श्रेष्ठ, स्तम्भकार मुकुन्दप्रसाद उपाध्याय, ‘कौशिकी’ साहित्यिक द्वैमासिक पत्रिका र आध्यात्मिक पत्रकार अच्युत सुवेदीप्रति चयन समिति आभार व्यक्त गर्दछ र सम्मानित हुन लाग्नुभएकोमा हार्दिक बधाई अर्पण गर्दछ ।
सम्मानित हुने महानुभावहरूका विशेष जानकारी ‘नेपालभूमि साप्ताहिक’ को अतिरिक्त विशेषाङ्कमा दिइएको छ ।
सार्वजनिक हुन लागेका छवटा कृतिका कृतिकारहरू दामोदर घिमिरे, प्रकाश उज्ज्वल बनेपा, जगन्नाथ गिरी, केदारनाथ तिमल्सिना, सहदीप पलान्चोके र टेकलाल भारतीलाई तथा कदरपत्र पाउन लाग्नुभएका काभ्रेली सञ्चारकर्मीद्वय कविराज ढकाल र सजना आचार्यलाई हाम्रो समिति हार्दिक बधाई ज्ञापन गर्दछ । (चयन समितिको संयोजकका रूपबाट अभिव्यक्त मन्तव्यको मुख्यांश)

अक्षयकोष थप्न १ लाख ११ हजार

Activities

admin

-

October 2, 2018

0

शब्दयात्रा प्रकाशनका गतिविधिहरूसँग म थोरै भए पनि परिचित छु । यस संस्थाका अध्यक्षज्यूले मलाई ‘नेपालभूमि साप्ताहिक’ सँग आबद्ध गराइदिनुभएको हुनाले म यस संस्थासँग जोडिएको छु । ‘कर्मयोद्धासँग शब्दसंवाद’ कार्यक्रममा पनि म उपस्थित हुने गरेको छु ।
म सामाजिक क्षेत्रमा रुचि राख्ने व्यक्ति भएको र पत्रकारिता पनि मन पर्ने क्षेत्र भएकाले शब्दयात्रा प्रकाशनले हरेक वर्ष समर्पण गर्ने गरेको ‘स्तम्भकार सम्मान’ प्रति मेरो विशेष चासो रहेको छ । यस्तो सम्मानले पत्रकार र स्तम्भकारहरूलाई ऊर्जा मिल्नेछ । सम्मानित व्यक्तित्व चयन समितिमा बस्ने व्यक्तिहरूलाई पनि सम्बन्धित विषयको अध्ययन र अनुसन्धान गर्न कर लाग्नेछ ।
त्यसैले शब्दयात्रा प्रकाशनद्वारा हरेक वर्ष समर्पण गर्ने गरी स्थापित १८ विधाका सम्मानहरूमध्ये ‘स्तम्भकार सम्मान’ का लागि हाम्रा पारिवारिक सदस्यहरूका तर्फबाट १ लाख ११ हजार १ सय ११ रुपियाँको अक्षयकोष खडा गरिदिने निधो गरेका छौँ । २००७ सालको क्रान्तिमा सुन्दरराज चालिसेको सहयोगी बनेर योगदान गर्ने मेरा हजुरबुबा भवानीशङ्कर तिवारीको स्मृतिमा हामीले उक्त सम्मानका लागि अक्षयकोषको व्यवस्था गर्न खोजेका हौँ ।
हामीले छुट्याएको रकमले शब्दयात्रा प्रकाशनको अक्षयकोषका लागि थोरै भए पनि सहयोग पुग्ला भन्ने हामीले आशा गरेका छौँ । (सभापतिका रूपबाट गरिएको घोषणा)

१११ लाई सम्मान, १०९ पुस्तक

Activities

admin

-

October 2, 2018

0

शब्दयात्रा प्रकाशनबाट हरेक वर्षको जेठ, असोज र माघ महिनामा ६–६ विधाका दरले सम्मान समर्पण गरिन्छ । असोज महिनामा समर्पण गर्ने विभिन्न ६ विधाका सम्मानहरूमध्ये २०७५ सालका लागि रमेश पौड्यालद्वारा व्यवस्थापित शब्दयात्रा होम–तोत्र शिक्षा सम्मान शिक्षाविद् डा. विद्यानाथ कोइरालालाई, सुनील सापकोटाद्वारा व्यवस्थापित शब्दयात्रा देवीप्रसाद सापकोटा आमसञ्चार सम्मान अग्रज पत्रकार राजेश्वर नेपालीलाई, हरि गोपाल प्रधानद्वारा व्यवस्थापित शब्दयात्रा फोटो पत्रकारिता सम्मान अग्रज फोटो पत्रकार वैकुण्ठकृष्ण श्रेष्ठलाई, नेपालभूमि साप्ताहिकद्वारा व्यवस्थापित शब्दयात्रा नेपालभूमि स्तम्भकार सम्मान स्तम्भकार मुकुन्दप्रसाद उपाध्यायलाई, योगेन्द्र खत्रीद्वारा व्यवस्थापित शब्दयात्रा साहित्यिक पत्रिका सम्मान साहित्यिक द्वैमासिक पत्रिका ‘कौशिकी’ लाई र सुदर्शन आचार्यद्वारा व्यवस्थापित शब्दयात्रा आध्यात्मिक पत्रकारिता सम्मान आध्यात्मिक पत्रकार अच्युत सुवेदीलाई समर्पण गर्ने निर्णय भएको छ । ७ वर्षभित्रमा १११ जना राष्ट्रिय प्रतिभाहरूलाई यस संस्थाले सम्मानित गरिसकेको छ ।
दामोदर घिमिरेद्वारा सम्पादित ‘पुष्प सौगात’ स्मृतिसङ्ग्रह, प्रकाश उज्ज्वल बनेपाद्वारा लिखित ‘मन’ लेखसङ्ग्रह, जगन्नाथ गिरीद्वारा सङ्कलित ‘सम्झना बुबाको’ बिरौंलासङ्ग्रह, केदारनाथ तिमल्सिनाद्वारा लिखित ‘पञ्चमाता’ लेखसङ्ग्रह, सहदीप पलान्चोकेद्वारा सङ्कलित ‘धनेश्वर भजनमाला’ भजनसङ्ग्रह र टेकलाल भारतीद्वारा लिखित ‘स्वार्थी मान्छे’ गजलसङ्ग्रह गरी ६ वटा पुस्तकलाई पनि सार्वजनिक गरिँदैछ । यी सबै पुस्तकहरू शब्दयात्रा प्रकाशनबाट प्रकाशित भएका हुन् । यी पुस्तकसमेत गरी यस संस्थाले ७ वर्षभित्रमा १०९ वटा पुस्तकको प्रकाशन गरिसकेको छ ।
हरेक वर्षको असोज महिनामा काभ्रे जिल्लाका सञ्चारकर्मीहरूलाई शब्दयात्रा प्रकाशनले प्रदान गर्ने गरेको ‘शब्दयात्रा प्रकाशन हरिगोपाल प्रधान कदरपत्र’ कविराज ढकाल र सजना आचार्यलाई प्रदान गर्ने निर्णय भएको छ । यसअघि यो कदरपत्र दसजना काभ्रेली सञ्चारकर्मीहरूलाई प्रदान गरिसकिएको छ । (स्वागत मन्तव्यको मुख्यांश)

सम्मान समर्पण तथा पुस्तक सार्वजनिकीकरण विशेष

admin

-

October 2, 2018

0

यस्तो थियो कार्यक्रम

शब्दयात्रा प्रकाशनको आयोजनामा गत २०७५ साल असोज १२ गते शुक्रबार काभ्रे बनेपाको होटल सत्यम्को सभाकक्षमा सम्मान समर्पण तथा पुस्तक सार्वजनिकीकरण समारोहको आयोजना गरियो । शब्दयात्रा प्रकाशनका अध्यक्ष हरि मञ्जुश्रीले सञ्चालन गर्नुभएको उक्त कार्यक्रममा पुण्यवती घले र पूर्णबहादुर कार्कीले ब्याच तथा नानुदेवी कुइँकेल र त्रिरत्न रन्जितकारले माला अर्पण गर्नुभएको थियो भने निर्धारित आसन चिनाउने कार्य सकुल थापाबाट भएको थियो ।
समारोहका सभापति माधवप्रसाद तिवारी, प्रमुख अतिथि अग्रज साहित्यकार, पूर्वमन्त्री तथा प्रखर बौद्धिक व्यक्तित्व मोदनाथ प्रश्रित र विशेष अतिथि अग्रज साहित्यकार कृष्णप्रसाद पौड्याल हुनुहुन्थ्यो ।
‘नेपालभूमि’ को अतिरिक्त विशेषाङ्क रीक्षा घिमिरेले र पुस्तक राजु लामाले वितरण गर्नुभएको र उपस्थिति पुस्तिकामा दस्तखत गराउने कार्य दीपक तिमल्सिनाले गर्नुभएको उक्त कार्यक्रममा पानसमा दीपप्रज्ज्वलन गरी कार्यक्रमको शुभारम्भ प्रमुख अतिथिबाट गरिएको थियो । समारोहमा ज्यो. पं. रमेश अधिकारीले स्वस्तिवाचन गर्नुभएपछि ब्राह्मणपूजन गर्ने क्रममा टीका लगाइदिने काम शिव बन्जाराले र दक्षिणा प्रदान गर्ने काम नवीना श्रेष्ठले गर्नुभएको थियो । शब्दयात्रा प्रकाशन संरक्षण समितिका सदस्य हरिगोपाल प्रधानले स्वागत मन्तव्य व्यक्त गर्नुभएको थियो ।
समारोहमा शब्दयात्रा प्रकाशनका तर्फबाट कृष्णमणि कुइँकेलले प्रमुख अतिथिलाई र द्रोणप्रसाद श्रेष्ठले विशेष अतिथिलाई उपहार समर्पण गर्नुभएको थियो ।

छ व्यक्तित्व सम्मानित

समारोहमा रमेश पौड्यालद्वारा व्यवस्थापित शब्दयात्रा होमतोत्र शिक्षा सम्मानद्वारा अग्रज शिक्षासेवी डा. विद्यानाथ कोइराला (सिन्धुली), सुनील सापकोटाद्वारा व्यवस्थापित शब्दयात्रा आमसञ्चार सम्मानद्वारा अग्रज पत्रकार राजेश्वर नेपाली (धनुषा) र हरिगोपाल प्रधानद्वारा व्यवस्थापित शब्दयात्रा फोटो पत्रकारिता सम्मानद्वारा अग्रज फोटो पत्रकार वैकुण्ठकृष्ण श्रेष्ठ (भक्तपुर) सम्मानित हुनुभयो । यसै गरी नेपालभूमि साप्ताहिकद्वारा व्यवस्थापित शब्दयात्रा नेपालभूमि स्तम्भकार सम्मान स्तम्भकार मुकुन्दप्रसाद उपाध्याय (काभ्रेपलाञ्चोक) लाई, योगेन्द्र खत्रीद्वारा व्यवस्थापित शब्दयात्रा साहित्यिक पत्रिका सम्मान ‘कौशिकी’ साहित्यिक पत्रिकाका लागि सम्पादक चेतनाथ धमला (ओखलढुङ्गा) लाई र सुदर्शन आचार्यद्वारा व्यवस्थापित शब्दयात्रा आध्यात्मिक पत्रकारिता सम्मान रेडियो कान्तिपुरको धार्मिक कार्यक्रमका सञ्चालक पं. अच्युत सुवेदी (धादिङ) लाई समर्पण गरियो ।
पहिलो चरणमा सम्मान समर्पण गर्दा सबै सम्मानित व्यक्तित्वलाई माधवप्रसाद तिवारीले रुद्राक्षको माला, मीरा चापागाईले उपहार, कृष्णप्रसाद पौड्यालले किरीट र मोदनाथ प्रश्रितले अभिवन्दनापत्र समर्पण गर्नुभएको थियो भने रकमचाहिँ आध्यात्मिक पत्रकार अच्युत सुवेदीलाई सम्मान व्यवस्थापक सुदर्शन आचार्यले, ‘कौशिकी’ पत्रिकाका सम्पादक चेतनाथ धमलालाई सम्मान व्यवस्थापक योगेन्द्र खत्रीका तर्फबाट गीता मञ्जुश्रीले र स्तम्भकार मुकुन्दप्रसाद उपाध्यायलाई सम्मान व्यवस्थापकका तर्फबाट डा. इन्दुल केसीले समर्पण गर्नुभएको थियो । दोस्रो चरणमा सम्मान समर्पण गर्दा सबै सम्मानित व्यक्तित्वलाई माधवप्रसाद तिवारीले रुद्राक्षको माला, ध्रुवराज नेपालले उपहार, कृष्णप्रसाद पौड्यालले किरीट र मोदनाथ प्रश्रितले अभिवन्दनापत्र समर्पण गर्नुभएको थियो भने रकमचाहिँ अग्रज पत्रकार राजेश्वर नेपालीलाई सम्मान व्यवस्थापक सुनील सापकोटाका तर्फबाट फणीन्द्रराज अधिकारीले तथा शिक्षाविद् डा. विद्यानाथ कोइरालालाई सम्मान व्यवस्थापक रमेश पौड्यालले समर्पण गर्नुभएको थियो । वैकुण्ठकृष्ण श्रेष्ठ शारीरिक अस्वस्थताका कारणले समारोहमा उपस्थित हुन नसक्नुभएकाले उहाँको सम्मान सामग्री फोटो पत्रकार पदमसागर कक्षपतिलाई हस्तान्तरण गरिएको थियो ।
शब्दयात्रा प्रकाशनका लागि सम्मानित व्यक्तित्वबाट संस्था सञ्चालनसम्बन्धी सुझावसहित आशीर्वचन अच्युत सुवेदी, चेतनाथ धमला, मुकुन्दप्रसाद उपाध्याय, राजेश्वर नेपाली र डा. विद्यानाथ कोइरालाले दिनुभएको थियो । सम्मानित व्यक्तित्वहरूको चयनसम्बन्धी जानकारी चयन समितिका संयोजक ध्रुवराज नेपालले दिनुभएको थियो भने तथा सम्मान सामग्रीको व्यवस्थापन सकुल थापा र शारदाप्रसाद शर्माले गर्नुभएको थियो । चयन समितिका संयोजक तथा सदस्यलाई पोष चापागाईले उपहार समर्पण गर्नुभएको थियो ।

छ पुस्तक सार्वजनिक

समारोहमा विभिन्न ६ पुस्तकलाई २ चरणमा सार्वजनिक गरियो । पुस्तकको सार्वजनिकीकरण गर्दा सकुल थापा र शारदाप्रसाद शर्माले प्रबन्ध गर्नुभएको थियो ।
पहिलो चरणमा दामोदर घिमिरेद्वारा सम्पादित ‘पुष्प सौगात’ (स्मृतिसङ्ग्रह) लाई शीला कतिलाले, प्रकाश उज्ज्वल बनेपाद्वारा लिखित ‘मन’ (लेखसङ्ग्रह) लाई डा. विद्यानाथ कोइरालाले र जगन्नाथ गिरीद्वारा सङ्कलित ‘सम्झना बुबाको’ लाई राजेश्वर नेपालीले सार्वजनिक गर्नुभएको थियो भने सार्वजनिक गरिएका ती तीन कृतिहरूको परिचय चूडाप्रसाद चौलागाईंले दिनुभएको थियो ।
दोस्रो चरणको पुस्तकको सार्वजनिकीकरण गर्दा केदारनाथ तिमल्सिनाद्वारा लिखित ‘पञ्चमाता’ (लेखसङ्ग्रह) लाईं मुकुन्दप्रसाद उपाध्यायले, सहदीप पलान्चोकेद्वारा सङ्कलित ‘धनेश्वर भजनमाला’ (भजनसङ्ग्रहलाई) अच्युत सुवेदीले र टेकलाल भारतीद्वारा लिखित ‘स्वार्थी मान्छे’ (गजलसङ्ग्रह) लाई चेतनाथ धमलाले सार्वजनिक गर्नुभएको थियो । सार्वजनिक गरिएका ती तीन कृतिहरूको परिचय मच्छेश्वर सापकोटाले गराउनुभएको थियो ।
सार्वजनिक गरिएका कृतिहरू मञ्चमा उपलब्ध गराउने कार्य सर्वश्री अधिकारी र शोभा तिवारीबाट गरिएको थियो भने कृतिकारका तर्फबाट दामोदर घिमिरेले मन्तव्य व्यक्त गर्नुभएको थियो ।

दुई सञ्चारकर्मीलाई कदरपत्र

समारोहमा काभ्रे जिल्लाका दुई सञ्चारकर्मी कविराज ढकाल र सजना आचार्यलाई ‘शब्दयात्रा प्रकाशन हरिगोपाल प्रधान कदरपत्र’ प्रदान गरिएको थियो ।
उहाँहरूलाई प्रमुख अतिथिबाट कदरपत्र प्रदान गरिएको थियो ।

अक्षयकोष राख्ने घोषणा

कार्यक्रम प्रारम्भ गर्न अनुमति प्रदान गर्ने क्रममा सभापतिका रूपबाट माधवप्रसाद तिवारीले २००७ सालको क्रान्तिमा सुन्दरराज चालिसेको सहयोगीका रूपमा योगदान गरेका आफ्ना हजुरबुबा भवानीशङ्कर तिवारीको सम्मानस्वरूप स्तम्भकार सम्मानका लागि १ लाख ११ हजार १ सय ११ रुपियाँ शब्दयात्रा प्रकाशनको अक्षयकोषमा थप गरिदिने घोषणा गर्नुभयो ।

बालवैज्ञानिकलाई १६ हजार आर्थिक सहयोग

समारोहमा काभ्रेको बन्खु घर भई बनेपामा बसेर श्रीखण्डपुर माध्यमिक विद्यालयमा कक्षा ९ मा अध्ययन गर्दै गरेका १५ वर्षीय बालक राजु वाइबा तामाङले आफूले बनाएको घाँस काट्ने मेसिन र रिमोटबाट चल्ने मोटरको प्रदर्शन गरे । त्यो देखेर राजु तामाङलाई कवि सोमकाजी शाक्यले व्यक्तिगत रूपबाट उपहार प्रदान गरे र राजु तामाङका शिक्षक शिव बन्जाराले राजु तामाङको प्रतिभाका विषयमा जानकारी दिए ।
राजु तामाङको आर्थिक अवस्था र उनको लक्ष्यका बारेमा जानकारी गराई हरि मञ्जुश्रीले सहयोगका लागि आह्वान गरेपछि डा. विद्यानाथ कोइरालाबाट ३०००, द्रोणप्रसाद श्रेष्ठबाट १०००, अच्युत सुवेदीबाट १०००, सर्वश्री अधिकारीबाट १०१०, शब्दयात्रा प्रकाशनबाट १०००, सोमकाजी शाक्यबाट १०००, पुण्यवती घलेबाट १०००, विदुर थापाबाट १०००, नवीना श्रेष्ठबाट १०००, सकुल थापाबाट १०००, मीरा चापागाईबाट १०००, शीला कतिलाबाट १०००, कृष्णमणि कुइँकेलबाट ५००, रेणु थापाबाट ५००, शोभा तिवारीबाट ५००, नानुदेवी कुइँकेलबाट २००, चरी तिमल्सिनाबाट ११० गरी जम्मा १५ हजार ८ सय २० रुपियाँ तत्कालै सङ्कलन भयो । सङ्कलित रकम प्रमुख अतिथिले राजु तामाङलाई हस्तान्तरण गर्नुभयो र त्यो रकमबाट सामान खरिद गर्दा बिल लिएर शब्दयात्रा प्रकाशनमा त्यो बिल बुझाउन निर्देशन दिनुभयो ।
समारोहमा बनेपा इलेक्ट्रिक र जयकाली टीभी पसलबाट ती बालवैज्ञानिकलाई आवश्यक विद्युतीय सामग्री उपलब्ध गराउने जानकारी गराइयो ।

अतिरिक्त विशेषाङ्क प्रकाशन

कार्यक्रममा ‘नेपालभूमि राष्ट्रिय साप्ताहिक’ ले ४ पृष्ठको अतिरिक्त विशेषाङ्क प्रकाशन गरेको थियो । त्यस अङ्कमा शब्दयात्रा प्रकाशनको चिनारी, संस्थागत गान, संस्थागत गतिविधिहरू, सम्मानित व्यक्तिहरूको सूची, प्रकाशित पुस्तकहरूको सूची, २०७५ असोजमा सम्मानित व्यक्तिहरूको परिचय, प्रमुख अतिथिको परिचय, सम्मानित व्यक्तित्व चयन समितिका सदस्यहरूको परिचय, सम्मान व्यवस्थापकहरूको परिचय, कृतिकारहरूको तस्बिर र पुस्तकको नाउँ, संस्थाको योजना र सम्मानहरूको सूची राखिएका थिए ।
समारोहमा दसैँ, तिहार, छठ र नेपाल संवत्को शुभकामनापत्रका साथमा उक्त अङ्क सबैलाई निःशुल्क वितरण गरिएको थियो ।

आध्यात्मिक लेखक तुतुकाजी प्रणामी दिवङ्गत

Activities

admin

-

September 24, 2018

0

शब्दयात्रा लेखक समाजका सदस्य आध्यात्मिक लेखक तुतुकाजी प्रणामी श्रेष्ठ ७५ वर्षको उमेरमा दिवङ्गत हुनुभएको छ । गत २०७५ साल असोज ३ गते बुधबार बिहान उहाँ दिवङ्गत हुनुभएको हो । दुई हप्ताअघि मात्र उहाँकी अर्धाङ्गिनी सूर्यकुमारी श्रेष्ठ दिवङ्गत हुनुभएको थियो ।
तुतुकाजी प्रणामी श्रेष्ठको जन्म २००० साल माघ १० गते आइतबार भएको थियो । कक्षा ५ सम्मको औपचारिक अध्ययन गर्नुभएका उहाँले अध्यात्म विधाका २५ वटा पुस्तक लेख्नुभएको थियो । उहाँका फुटकर लेखहरू ‘नेपालभूमि साप्ताहिक’ मा प्रकाशित छन् । उहाँको पुस्तक ‘शब्दयात्रा, शब्दकक्ष र शब्दध्वनि’ शब्दयात्रा प्रकाशनबाट प्रकाशित भएको थियो भने केही पुस्तकहरू अझै अप्रकाशित अवस्थामा रहेका छन् ।
तुतुकाजी प्रणामी श्रेष्ठका बारेमा ‘नेपाली लेखककोश’, ‘काभ्रेका केही कर्मयोद्धा’, ‘कर्मयोद्धासँग शब्दसंवाद’ आदि पुस्तकहरूमा उल्लेख गरिएको छ ।

शब्दयात्राबाट ६ पुस्तक सार्वजनिक गरिने

Activities

admin

-

September 24, 2018

0

शब्दयात्रा प्रकाशनबाट आगामी असोज १२ गते विभिन्न ६ वटा पुस्तकलाई सार्वजनिक गरिने भएको छ । सार्वजनिक हुने पुस्तकहरूमा दामोदर घिमिरेद्वारा सम्पादित ‘पुष्प सौगात’, प्रकाश उज्ज्वल बनेपाद्वारा लिखित ‘मन’, जगन्नाथ गिरीद्वारा सङ्कलित ‘सम्झना बुबाको’, केदारनाथ तिमल्सिनाद्वारा लिखित ‘पञ्चमाता’, सहदीप पलान्चोकेद्वारा सम्पादित ‘धनेश्वर भजनमाला’ र टेकलाल भारतीद्वारा लिखित ‘स्वार्थी मान्छे’ हुनेछन् ।
काभ्रे जिल्लाको बनेपामा रहेको होटल सत्यम्मा आयोजना गरिने उक्त कार्यक्रममा विभिन्न ६ विधाका सम्मानहरू पनि समर्पण गरिनेछन् ।