शब्दयात्रा प्रकाशनले साहित्यकार नवीना श्रेष्ठद्वारा लिखित दुई कृति प्रकाशन गर्ने भएको छ । उहाँको कथासङ्ग्रह ‘नमारिएका सहिदहरू’ र कवितासङ्ग्रह ‘मेरो हराएको कविता’ एकसाथ प्रकाशन गर्न लागिएको हो ।
उल्लिखित दुवै कृति आगामी माघ १५ गते सार्वजनिक गरिने भएको छ । यसअघि उहाँको कृति ‘नेपाल कम्पन’ पनि शब्दयात्रा प्रकाशनले नै प्रकाशन गरेको थियो ।

शब्दयात्रा प्रकाशनले २०७५ सालका लागि विभिन्न ६ विधाका सम्मानहरू विभिन्न साधकहरूलाई समर्पण गर्ने भएको छ ।
त्यसअनुसार शब्दयात्रा समालोचना सम्मानबाट समालोचक डा. वासुदेव त्रिपाठीलाई, शब्दयात्रा कविताकाव्य सम्मानबाट कवि तथा गीतकार कालीप्रसाद रिजाललाई, शब्दयात्रा अनुसन्धान सम्मानबाट अनुसन्धाता डा. राजेश गौतमलाई, शब्दयात्रा विज्ञान–प्रविधि सम्मानबाट वैज्ञानिक प्रा. सुरेशराज चालिसेलाई, शब्दयात्रा बालसाहित्य सम्मानबाट बालसाहित्यकार विश्वम्भर चञ्चललाई र शब्दयात्रा महिला प्रतिभा सम्मानबाट चलचित्र अभिनेत्री वसुन्धरा भुसाललाई सम्मानित गरिने भएको छ ।
शब्दयात्रा प्रकाशनले डा. इन्दुल केसीको संयोजकत्वमा रमेश अधिकारी र निर्मला श्रेष्ठ सदस्य रहने गरी गठन गरेको सम्मानित व्यक्तित्व चयन समितिले उहाँहरूलाई सम्मानित गर्ने निर्णय गरेको हो ।
यसअघि उल्लिखित विधाहरूमा सम्मान गर्न योग्य व्यक्तिहरूको नाउँ सिफारिस पठाउन ‘नेपालभूमि’ नामक राष्ट्रिय साप्ताहिक पत्रिकाबाट सार्वजनिक आह्वान गरिएको थियो । त्यही आह्वानपछि विभिन्न पाठकहरूबाट सिफारिसहरू प्राप्त भएका थिए ।
उल्लिखित सम्मानहरूको आर्थिक व्यवस्थापन हरिगोपाल प्रधान, कविप्रसाद प्याकु¥याल, राजेन्द्र विरही, निर्मला श्रेष्ठ, गोपाल पराजुली र द्रोणप्रसाद श्रेष्ठले गर्नुभएको हो । गत वर्ष यी सम्मानहरूबाट डा. दयाराम श्रेष्ठ ‘सम्भव’, किरण खरेल, प्रा. चेतोनाथ गौतम, मुनिबहादुर शाक्य, कल्पना प्रधान र नूपुर भट्टाचार्यलाई सम्मानित गरिएको थियो ।

शब्दयात्रा प्रकाशनद्वारा प्रकाशित ‘नेपालभूमि राष्ट्रिय साप्ताहिक’ पत्रिकाका बजार व्यवस्थापक माधवप्रसाद शर्मा तिवारी युनियन लाइफ इन्स्योरेन्स कम्पनीबाट सम्मानित हुनुभएकोमा हार्दिक बधाई ज्ञापन गर्दछौं ।

शब्दयात्रा प्रकाशन परिवार

शब्दयात्रा प्रकाशनको नियमित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को ७१ औँ शृङ्खला गत २०७५ पुस २० गते शुक्रबार शब्दयात्रा प्रकाशनको सभाकक्षमा सम्पन्न भयो । उक्त कार्यक्रमको प्रमुख वक्ताका रूपमा कान्तिपुर टेलिभिजनसँग आबद्ध पत्रकार रमा दाहाल प्रस्तुत हुनुभयो । उहाँले आफ्नो जीवन–सङ्घर्षका बारेमा उल्लेख गर्दै परिवारमा बालबालिकालाई दिन सकिने व्यावहारिक शिक्षाका विषयमा प्रवचन गर्नुभएको थियो । शब्दयात्रा लेखक समाजका संयोजक ओतबहादुर खड्काको सभापतित्व र समाजसेवी छविलाल कुइँकेलको प्रमुख आतिथ्यमा सञ्चालित उक्त कार्यक्रमको सञ्चालन शब्दयात्रा पाठक समाजका संयोजक दामोदर घिमिरेले गर्नुभएको थियो ।
उक्त कार्यक्रममा शब्दयात्रा प्रकाशनका अध्यक्ष हरि मञ्जुश्री, महाप्रबन्धक शारदाप्रसाद शर्मा, शब्दयात्रा कलाकार समाजका सल्लाहकार मच्छेश्वर सापकोटा, ‘नेपालभूमि राष्ट्रिय साप्ताहिक’ पत्रिकाका कार्यकारी सम्पादक चूडाप्रसाद चौलागाईं, व्यवस्थापनविद् श्री शर्मा मूर्ख, कवि रोजनाथ लुइँटेल तथा नानुदेवी कुइँकेल, नवराज पराजुली, पुरुषोत्तम हुमागाईं, दण्डपाणि अधिकारी, मदन स्याङ्तान, रमेश सापकोटा, मञ्जु सापकोटा, रीक्षा घिमिरे आदिको समुपस्थिति रहेको थियो ।

शब्दयात्रा प्रकाशनले ११३ औँ प्रकाशनपुष्पका रूपमा ‘चाणक्यनीति’ को काव्यानुवाद प्रस्तुत गर्ने भएको छ । आचार्य विष्णुगुप्त चाणक्यद्वारा संस्कृत भाषामा लिखित ‘चाणक्यनीति’ अत्यन्त प्रसिद्ध नीतिपुस्तक हो ।
संस्कृत भाषाबाट श्रीधर प्याकुरेलद्वारा अनुवाद गरिएको उक्त पुस्तकलाई आगामी माघ महिनामा आयोजना गरिने सम्मान समर्पण तथा पुस्तक सार्वजनिकीकरण समारोहमा सार्वजनिक गरिने भएको छ ।

शब्दयात्रा प्रकाशनद्वारा संस्थापित ‘प्रशासनिक महिला प्रतिभा सम्मान, २०७५’ बाट सम्मानित समाजसेवी श्रीमती सावित्री जङ्गम थापाले सुभाष स्मृति प्रतिष्ठानबाट ‘सुभाष स्मृति दानशीलता सम्मान, २०७५’ प्राप्त गर्नुभएकोमा हार्दिक बधाई ज्ञापन गर्दछौं ।

शब्दयात्रा प्रकाशन

शब्दयात्रा प्रकाशनलाई जग्गा दान गर्ने दाताका रूपमा सुभाष स्मृति प्रतिष्ठानले पूर्वमन्त्रिपरिषद्का सम्माननीय अध्यक्ष श्री खिलराज रेग्मीको हातबाट प्रदान गरेको ‘सुभाष स्मृति दानशीलता सम्मान, २०७५’ प्राप्त गर्नुभएकोमा श्री कृष्णमणि कुइँकेललाई हार्दिक बधाई ज्ञापन गर्दछौं ।

शब्दयात्रा प्रकाशन

शब्दयात्रा प्रकाशनबाट बनेपामा स्थापना गरिएका शब्दसाधकहरूको स्मारक अवलोकन गर्न विभिन्न क्षेत्रका व्यक्तित्वहरू बनेपा आउन थालेका छन् ।
यसै क्रममा काठमाडौँबाट गत २०७५ पुस १४ गते शनिबार भ्रष्टाचारविरोधी अभियन्ता अग्रज उपन्यासकार भरत जङ्गम र अग्रज समाजसेवी तथा साहित्यकार सावित्री थापालगायतको टोलीले सालिकहरूको अवलोकन ग¥यो । टोलीलाई शब्दयात्रा प्रकाशनका अध्यक्ष हरि मञ्जुश्री, सदस्य कृष्णमणि कुइँकेल र महाप्रबन्धक शारदाप्रसाद शर्माले स्वागत गर्नुभएको थियो ।
त्यस अवसरमा अध्यक्ष हरि मञ्जुश्रीले संस्थाका भावी योजनाहरू प्रस्तुत गर्नुभएको थियो ।

शब्दयात्रा प्रकाशनको नियमित साप्ताहिक प्रवचन कार्यक्रम ‘कर्मयोद्धासँग शब्दसंवाद’ को ७० औँ शृङ्खलामा समाजसेवी त्रिरत्न रन्जितकार प्रमुख वक्ताका रूपमा प्रस्तुत हुनुभयो । आध्यात्मिक लेखक ओतबहादुर खड्काको सभापतित्व र कवि केदारनाथ तिमल्सिनाको प्रमुख आतिथ्यमा सम्पन्न उक्त कार्यक्रमको सञ्चालन पत्रकार शिव बन्जाराले गर्नुभएको थियो ।
उक्त कार्यक्रममा शब्दयात्रा प्रकाशनका अध्यक्ष हरि मञ्जुश्री, सदस्य कृष्णमणि कुइँकेल, सकुल थापा, रमेश पौड्याल, महाप्रबन्धक शारदाप्रसाद शर्मा, ‘नेपालभूमि राष्ट्रिय साप्ताहिक’ पत्रिकाका कार्यकारी सम्पादक चूडाप्रसाद चौलागाईं, शब्दयात्रा नारी स्रष्टा समाजका संयोजक पुण्यवती घले, शब्दयात्रा पाठक समाजका संयोजक दामोदर घिमिरे, व्यवस्थापनविद् श्री शर्मा मूर्ख, कवि रोजनाथ लुइँटेल, दण्डपाणि अधिकारी, शकुन्तला बन्जारा, रीक्षा घिमिरे आदिको उपस्थिति रहेको थियो ।

शब्दयात्रा प्रकाशनले आगामी २०७५ माघ महिनामा समर्पण गरिने ६ विधाका सम्मानका लागि उपयुक्त व्यक्ति तथा संस्थाको चयन गर्न सम्मानित व्यक्तित्व चयन समितिको गठन गरेको छ । डा. इन्दुल केसी संयोजक रहेको उक्त समितिको सदस्यमा रमेश अधिकारी र निर्मला श्रेष्ठ सदस्य रहनुभएको छ ।
शब्दयात्रा प्रकाशनबाट हरेक माघ महिनामा कविता–काव्य, बालसाहित्य, समालोचना, महिला प्रतिभा, अनुसन्धान र विज्ञान–प्रविधि विधाका सम्मानहरू समर्पण गरिनेछन् । हरेक वर्ष १८ विधाका सम्मानहरू तीन चरणमा समर्पण गर्ने गरिएकोमा २०७५ सालका लागि यो तेस्रो चरण हो ।