शब्दयात्रा प्रकाशनले २०७९ सालको ‘शब्दयात्रा सूर्यप्रसाद श्रेष्ठ कर्मशीलता पुरस्कार’ समाजसेवी कृष्णमणि कुइँकेललाई प्रदान गरेको छ । आज २०७९ साल जेठ १४ गते बनेपामा स्थित शब्दयात्रा प्रकाशनको सभाकक्षमा आयोजित विशेष कार्यक्रममा उहाँलाई पुरस्कार प्रदान गरिएको हो । त्यस क्रममा चूडाप्रसाद चौलागाईंले पुरस्कारको प्रमाणपत्र वाचन तथा रुद्राक्षमाला प्रजापति तिमिल्सिनाले, उपहार साधुराम गिरीले, रकम वेदप्रसाद गौतमले, दोसल्ला हरिगोपाल प्रधानले, शब्दयात्रा पट्ट प्रकृति प्याकुरेलले र प्रमाणपत्र रामप्रसाद अधिकारीले प्रदान गर्नुभएको थियो । कार्यक्रमको समुद्घाटन शिक्षासेवी माधवप्रसाद आचार्यले, स्वागत भाषण लेखक दामोदर घिमिरेले र स्वस्तिवाचन लेखक केदारनाथ तिमिल्सिनाले गर्नुभएको थियो । गीतिभास्कर मच्छेश्वर सापकोटा र सरस्वती सापकोटाले युगल गीत गाउनुभएको उक्त कार्यक्रममा कवि पदम दाहालले कविता वाचन गर्नुभएको थियो । कार्यक्रममा पुरस्कृत व्यक्तित्व कृष्णमणि कुइँकेलले पुरस्कारमा प्राप्त गरेको रकम शब्दयात्रा प्रकाशनको निर्माण समितिमा रहने गरी शब्दयात्रा प्रकाशनका संस्थापक अध्यक्ष हरि मञ्जुश्रीलाई हस्तान्तरण गर्नुभएको थियो । कार्यक्रम हरि मञ्जुश्रीको फेसबुकबाट सफ्टवेयर इन्जिनियर रोशन अधिकारीले प्रत्यक्ष प्रसारण गराउनुभएको थियो । दस हजार रुपियाँ राशीको यस पुरस्कारको आर्थिक व्यवस्थापन पूर्व प्रमुख निर्वाचन आयुक्त सूर्यप्रसाद श्रेष्ठले गर्नुभएको हो ।
शब्दयात्रा प्रकाशनका दुई पुस्तक सार्वजनिक
शब्दयात्रा प्रकाशनद्वारा प्रकाशित तथा साहित्यकार माधवप्रसाद चापागाईंद्वारा लिखित दुई साहित्यिक पुस्तक ‘कथा र कविता’ (कथा र कविताको सङ्ग्रह) तथा ‘सङ्घर्ष र जीवन’ (अनुभव र अनुभूति) लाई आज २०७९ साल जेठ १४ गते शनिबार सार्वजनिक गरियो । शब्दयात्रा प्रकाशनको सभाकक्षमा आयोजित पुस्तक सार्वजनिकीकरण कार्यक्रममा उपस्थित सम्पूर्ण सहभागीहरूले एकसाथ पुस्तक सार्वजनिक गर्नुभएको थियो । कार्यक्रममा ‘कथा र कविता’ माथि समीक्षक शारदाप्रसाद शर्माले र ‘सङ्घर्ष र जीवन’ माथि समीक्षक लोकेन्द्र ढकालले समीक्षात्मक टिप्पणी गर्नुभएको थियो । सञ्चारकर्मी शिव बन्जाराले सञ्चालन गर्नुभएको उक्त कार्यक्रममा शिक्षासेवी रामप्रसाद अधिकारी प्रमुख अतिथि र समाजसेवी चन्द्रबहादुर खड्का सभापति हुनुहुन्थ्यो । कृतिकार माधवप्रसाद चापागाईंको चिनारी शब्दयात्रा प्रकाशनका सञ्चालक सदस्य अमृत अधिकारीले गराउनुभएको थियो भने कृतिकारले पनि मन्तव्य व्यक्त गर्नुभएको थियो । कार्यक्रमको व्यवस्थापन सङ्गीता केसी र सहदीप पलान्चोकेले गर्नुभएको थियो ।
दुई पुस्तक सार्वजनिक गरिने
साहित्यकार माधवप्रसाद चापागाईंद्वारा लिखित एवम् शब्दयात्रा प्रकाशनद्वारा प्रकाशित दुई पुस्तकलाई आगामी जेठ १४ गते शनिबार सार्वजनिक गरिने भएको छ । सार्वजनिक गर्न लागिएका कृतिहरू ‘कथा र कविता’ (कथा र कविताको सङ्ग्रह) तथा ‘सङ्घर्ष र जीवन’ (अनुभव र अनुभूति) रहेका छन् । शब्दयात्रा प्रकाशनको सभाकक्ष नीलकण्ठेश्वर बनेपामा आयोजना गरिने विशेष कार्यक्रममा दुवै कृतिहरू सार्वजनिक गरिनेछन् ।
हरि मञ्जुश्रीले सम्पादन गरेको १०१ औँ पुस्तक सार्वजनिक
शब्दयात्रा प्रकाशनका संस्थापक अध्यक्ष हरि मञ्जुश्रीले सम्पादन गरेको १०१ औँ पुस्तक यही २०७९ साल जेठ ८ गते आइतबार सार्वजनिक गरियो । पुस्तकको नाउँ ‘नेपालमा मस्टो परम्परा’ हो । यसको प्रकाशन काठमाडौँ विश्वविद्यालय अन्तर्गतको संस्था हिमालय एसियाली अध्ययन केन्द्र (हिकास) ले गरेको हो । यसमा काठमाडौँ विश्वविद्यालयका उपकुलपति प्रा. डा. भोला थापाले शुभकामना र हिकासका कार्यकारी निर्देशक प्रा. डा. सागरराज शर्माले प्रकाशकीय लेख्नुभएको छ । डा. सत्यमोहन जोशीको प्रेरणाबाट सुरुमा जीवनचन्द्र कोइरालाले यस पुस्तकको सम्पादन गर्न थाल्नुभएको थियो । करिब १३० पृष्ठ सामग्री पुगेपछि उहाँको देहावसान भयो । त्यसपछि डा. सत्यमोहन जोशीले पुस्तकको बाँकी सम्पादन गर्न हरि मञ्जुश्रीलाई जिम्मा दिनुभयो र उहाँले सम्पादन गर्नुभयो । पुस्तक ३१२ पृष्ठको छ । यो पुस्तक प्रमुख अतिथिका रूपबाट काठमाडौँ विश्वविद्यालयका उपकुलपति प्रा. डा. भोला थापाले सार्वजनिक गरिदिनुभयो । प्रकाशक हिकासका तर्फबाट सञ्चालक सदस्य मुकुन्दप्रसाद उपाध्यायले उक्त पुस्तक डा. सत्यमोहन जोशीमा समर्पण गर्नुभयो । पुस्तकमाथि डा. प्रयागराज शर्माले टिप्पणी गर्नुभयो । प्रा. सुरेशराज चालिसेको सभापतित्वमा आयोजित उक्त कार्यक्रममा किरण थापाले स्वागत भाषण गर्नुभयो । कार्यक्रममा कर्मयोगी बद्रीविक्रम थापा स्मृति सेवागुठी र सुन्दरराज चालिसे सुशीलादेवी चालिसे स्मृति प्रतिष्ठानका तर्फबाट डा. सत्यमोहन जोशीमा अभिवन्दनापत्र समर्पण गरियो । कार्यक्रमको सञ्चालन हरि मञ्जुश्रीले गर्नुभएको थियो । उक्त कार्यक्रम वाङ्मय शताब्दी पुरुष डा. सत्यमोहन जोशीको १०३ औँ जन्मदिवसको सन्दर्भ पारी ललितपुरस्थित लोकसाहित्य परिषदको सभाकक्षमा आयोजना गरिएको थियो । यो पुस्तकसमेत हरि मञ्जुश्रीले सम्पादन गरेका १०१, लेखेका ३२ र अनुवाद गरेको १ गरी उहाँका पुस्तकको सङ्ख्या १३४ पुगेको छ ।
बेलप्रसाद श्रेष्ठको नाउँमा पनि सम्मान
अग्रज समाजसेवी तथा लेखक बेलप्रसाद श्रेष्ठले शब्दयात्रा प्रकाशनको सम्मान कोषमा एक लाख पन्ध्र हजार रुपियाँ र यस वर्षको सम्मानका लागि थप दस हजार रुपियाँ गरी जम्मा एक लाख पच्चीस हजार रुपियाँ उपलब्ध गराउनुभएको छ । त्यसैले कोषको अभावमा अनियमित भइरहेको दानशीलता सम्मान यसै वर्षदेखि ‘शब्दयात्रा बेलप्रसाद श्रेष्ठ दानशीलता सम्मान’ नाउँले यही कोषबाट नियमित रूपमा हरेक वर्ष समर्पण गर्न सकिने भएको छ । शब्दयात्रा प्रकाशनका तर्फबाट गरिएको आग्रह स्वीकार गरी सम्मानको निरन्तरताका लागि रकम प्रदान गर्नुभएकोमा बेलप्रसाद श्रेष्ठप्रति शब्दयात्रा प्रकाशन परिवार हार्दिक आभार व्यक्त गर्दछ ।
शब्दयात्रा प्रकाशनको ‘केशरमहल’
साधारण व्यक्तिले दुःख गरेर कमाएको, छोराछोरीलाई हुर्काउन र पढाउन जोगाएको, बुढ्यौलीका लागि काम लाग्छ भनेर छुट्याएको पैसा संस्थामा आयो भने संस्थाले त्यस्ता व्यक्तिको अपनत्व पाउँछ, संस्था दिगो हुन्छ, कसैले संस्थालाई बिगार्न खोज्यो अथवा संस्थाको सम्पत्ति हिनामिना गर्न खोज्यो भने जनस्तरबाटै त्यसको प्रतिकार हुन्छ, समुदायले आफ्नो सम्झिएको संस्था टिकाउ हुन्छ भन्ने सोच बनाइयो । यस्तो सोच राखेर संस्थागत काम गर्दा संस्था सञ्चालन गर्न ज्यादै कठिन हुँदो रहेछ । अहिलेसम्म शब्दयात्रा प्रकाशन त्यही कठिन बाटोमा हिँडिरहेको छ । अनेकौँ कठिनाइहरू बेहोर्नुपरे पनि आफ्नो उद्देश्य र धारणाबाट विचलित नभई एकनिष्ठ बनेर काम गर्दै गइयो । बनेपामा उच्चस्तरको सार्वजनिक पुस्तकालय बनाउने सोचअनुरूप काम गर्दै जाँदा पुस्तकालयका लागि छुट्टै भवन बनाउनु आवश्यक देखियो । पुस्तकालय भवन तयार हुँदैछ। शब्दयात्रा प्रकाशनका सदस्यहरूका लागि पुस्तकालयको सानो संरचना पनि ‘केशरमहल’ बराबर नै हो ।
‘गाईजात्रा’ को पालो
शब्दयात्रा प्रकाशनबाट अब ‘गाईजात्रा’ (लघुकथासङ्ग्रह) को छापिने पालो आएको छ । साहित्यकार गायत्रीकुमार चापागाईंले लेख्नुभएको यो किताब शब्दयात्रा प्रकाशनको १ सय ७५ औँ प्रकाशनपुष्प हो । यही जेठ महिनामा छापिसकिने ‘गाईजात्रा’ को विषयवस्तु राजनीतिक विकृति, सामाजिक विसङ्गति, मनोवैज्ञानिक अन्धावस्था र विविध शोषणको विद्रूपता रहेका छन् । विचार, शैली र भाषा–व्याकरणका आधारमा ‘गाईजात्रा’ उच्चस्तरको लघुकथासङ्ग्रह बनेको छ ।
झापामा शब्दयात्रा प्रकाशनको पुस्तक सार्वजनिक
शब्दयात्रा प्रकाशनद्वारा प्रकाशित, हरि मञ्जुश्री र डिल्लीराम निरौलाद्वारा सम्पादित तथा प्रेमदास उपाध्याय घिमिरेद्वारा लिखित पुस्तक ‘श्रीकृष्ण रहस्य’ हिजो २०७९ साल जेठ ११ गते बुधबार झापाको भद्रपुरमा आयोजित विशेष कार्यक्रममा सार्वजनिक गरिएको छ । गुरु जगतानन्द महाराज, भद्रपुर नगरपालिकाका प्रमुख गणेश पोखरेल र उपप्रमुख राधा कार्कीले संयुक्त रूपमा उक्त पुस्तक सार्वजनिक गर्नुभएको हो । गम्भीर घिमिरेको सभापतित्वमा खगेन्द्र चौलागाईंद्वारा सञ्चालित उक्त कार्यक्रममा देवु घिमिरेले स्वागत मन्तव्य तथा चरणप्रसाद ढुङ्गाना र वेणुप्रसाद सिटौलाले शुभकामना मन्तव्य व्यक्त गर्नुभएको थियो भने सम्पादकका तर्फबाट डिल्लीराम निरौलाले पुस्तकका बारेमा जानकारी गराउनुभएको थियो ।
‘शब्दसंवाद’ मा गौतम बुद्धको विषय
शब्दयात्रा प्रकाशन काभ्रेपलान्चोक सम्पर्क केन्द्रले बुद्धजयन्तीको अवसर पारेर २०७९ साल जेठ २ गते आयोजना गरेको ‘कर्मयोद्धासँग शब्दसंवाद’ कार्यक्रममा गौतम बुद्धका बारेमा अन्तर्संवाद गरियो । सञ्चारकर्मी शिव बन्जाराले सञ्चालन र सम्पर्क केन्द्रका संयोजक साधुराम गिरीले सभापतित्व गर्नुभएको उक्त कार्यक्रममा शब्दयात्रा प्रकाशनका संस्थापक अध्यक्ष हरि मञ्जुश्रीले गौतम बुद्धसँग सम्बन्धित विषयको समाजशास्त्रीय आधारलाई लिएर प्रवचन गर्नुभएको थियो । उहाँको प्रवचनमाथि प्रकाशबहादुर कायस्थ, केदारनाथ तिमल्सिना र सहदीप पलान्चोकेले टिप्पणी गर्नुभएको थियो भने कार्यक्रमको व्यवस्थापन शकुन्तला बन्जाराले गर्नुभएको थियो ।
अब ‘सङ्घर्ष र जीवन’
भोजपुरे साहित्यकार माधवप्रसाद चापागाईंद्वारा लिखित अनुभव र अनुभूतिको सङ्ग्रहका रूपमा ‘सङ्घर्ष र जीवन’ नामक पुस्तक प्रकाशन हुन लागेको छ । यो उहाँको चौथो पुस्तक हो । शब्दयात्रा प्रकाशनको प्रकाशकत्व रहेको यो पुस्तक उहाँको पहिलो पुस्तक ‘जीवन एक भोगाइ अनेक’ पुस्तकको दोस्रो भाग हो । पुस्तक १ सय ७६ पृष्ठको छ ।