व्यवस्थापनविद् प्रा. सुवास केसीले अङ्ग्रेजी भाषामा लेख्नुभएको पुस्तक Impressions and Expressions शब्दयात्रा प्रकाशनबाट प्रकाशन हुन लागेको छ । योसमेत शब्दयात्रा प्रकाशनको प्रकाशकत्व रहेका पुस्तकको सङ्ख्या १ सय ८४ पुगेको छ ।
पुस्तकसङ्ख्या १ सय ८४
दस हजार रुपियाँ प्राप्त
‘शब्दयात्रा जीवनचन्द्र कोइराला सिन्धुली प्रतिभा पुरस्कार’ को अक्षयकोषका लागि समालोचक प्रा. डा. कुलप्रसाद कोइरालाले १० हजार रुपियाँ पठाउनुभएको छ । शब्दयात्रा प्रकाशन उहाँप्रति हार्दिक आभार व्यक्त गर्दछ ।
सम्मान समर्पण गरिने व्यक्तित्वको सूची
शब्दयात्रा प्रकाशनबाट २०७९ सालको प्रथम चरणमा सम्मान समर्पण गरिने व्यक्तित्वको सूची यस्तो छ — १. राष्ट्रझङ्कार सम्मान — डा. शास्त्रदत्त पन्त (बागलुङ), २. शिक्षा सम्मान — डा. उत्तमकृष्ण कर्माचार्य (भक्तपुर), ३. सामाजिक जागरण सम्मान — दुर्गा घिमिरे (रामेछाप), ४. विज्ञान–प्रविधि सम्मान — प्रदीप उपाध्याय (बारा), ५. शिक्षक सम्मान — प्रा. केदारनाथ श्रेष्ठ (भोजपुर), ६. आयुर्वेद सम्मान — विश्वनाथ कर्माचार्य (काभ्रेपलान्चोक), ७. प्रशासनिक महिला प्रतिभा सम्मान — लक्ष्मी खतिवडा हुमागाईं (इलाम), ८. स्तम्भकार सम्मान — चन्द्रमणि गौतम (सुनसरी), ९. नन्दिकेश्वर अधिकारी शोध सम्मान — शारदाप्रसाद शर्मा (काभ्रेपलान्चोक), १०. दानशीलता सम्मान — देवीमाया खड्का (खोटाङ) ।
‘मध्यदीप’ को ‘शब्दयात्रा प्रकाशन विशेषाङ्क’
शब्दयात्रा प्रकाशनका आजीवन सदस्य प्रदीप केसीले उहाँको सम्पादन–प्रकाशनमा प्रकाशित ‘मध्यदीप मासिक’ लाई ‘हरि मञ्जुश्री तथा शब्दयात्रा प्रकाशन विशेषाङ्क’ का रूपमा प्रकाशित गर्नुभएको छ । यस सौजन्यका लागि आजीवन सदस्य प्रदीप केसीप्रति शब्दयात्रा प्रकाशन हार्दिक आभार व्यक्त गर्दछ ।
हार्दिक बधाई
शब्दयात्रा प्रकाशनका आजीवन सदस्य श्री भरत जङ्गमले नेपाली भाषामा लेख्नुभएको ‘भ्रष्टताविरोधी विज्ञान’ अङ्ग्रेजी भाषामा अनूदित भई ‘एन्टिकरप्टोलोजी’ नाममा प्रकाशित भएपछि कन्नड भाषामा पनि अनूदित भई प्रकाशित भएको छ । त्यस पुस्तकलाई भारतको बेङलोरमा आयोजित कार्यक्रममा सार्वजनिक गरिएको छ । उहाँलाई हार्दिक बधाई छ ।
सिन्धुली प्रतिभा पुरस्कारका लागि नाउँ पठाइदिन अनुरोध
शब्दयात्रा प्रकाशनले आगामी असोज महिनामा १५ हजार रुपियाँ, अभिवन्दनापत्र, शब्दयात्रा पट्ट, उपहार र रुद्राक्षमाला रहेको ‘शब्दयात्रा जीवनचन्द्र कोइराला सिन्धुली प्रतिभा पुरस्कार’ समर्पण गर्नेछ । ग्रन्थसम्पादक जीवनचन्द्र कोइरालाको जन्ममिति २०१७ साल असार १६ गतेभन्दा पछि सिन्धुली जिल्लामा जन्मेर नेपाली वाङ्मयको कुनै पनि विधाबाट राष्ट्रिय स्तरको योगदान गर्ने व्यक्तिलाई यो पुरस्कार प्रदान गरिनेछ । सबै वाङ्मयसेवीको विवरण शब्दयात्रा प्रकाशनमा नहुन सक्छ । तसर्थ सत्पात्रलाई पुरस्कृत गर्न सकियोस् भन्ने उद्देश्यले उपयुक्त वाङ्मयसेवीको नाउँ र योगदानको विवरण [email protected] मा यही साउन १५ गतेभित्र उपलब्ध गराइदिन सबैमा हार्दिक अनुरोध छ ।
‘कन्याकुमारी’ महाकाव्य छापिने
महाकाव्यकार यज्ञप्रसाद त्रिपाठीद्वारा लिखित ‘कन्याकुमारी’ नामक महाकाव्य शब्दयात्रा प्रकाशनको प्रकाशकत्वमा प्रकाशित हुन लागेको छ । आउँदो साउन महिनाभित्र प्रकाशित भइसक्ने यो महाकाव्य चार सयभन्दा बढी पृष्ठको हुनेछ । उहाँको ‘राधाचरणामृत’ नामक महाकाव्यको मुद्रणकार्य सकिएको हुनाले उहाँकै अर्को महाकाव्य ‘कन्याकुमारी’ प्रकाशन गर्ने तयारी भइरहेको हो । काभ्रेपलान्चोक जिल्लाका साहित्यिक प्रतिभा महाकाव्यकार यज्ञप्रसाद त्रिपाठीद्वारा लिखित चारवटा महाकाव्य शब्दयात्रा प्रकाशनको प्रकाशकत्वमा प्रकाशित हुँदैछन् ।
पुस्तक उपहार
जीवन एउटा थोत्रो स्क्रिन, लाक्षागृह, खुसीको पीरो धूवाँ र लिगलिगकोट । यी चारैवटा पुस्तकमा देखिन्छ निबन्धकार माधव काफ्लेको आफ्नै प्रकारको अतुल्य लेखनशिल्प । पाठकको मनलाई करप्प पारेर समाई लेखकले चाहेको विषयबाहेक अरूतिर हलचल गर्नै नदिने तागत छ उहाँको प्रस्तुतिमा । यी चारैवटा पुस्तक उहाँबाट उपहार पाएको छ शब्दयात्रा प्रकाशन पुस्तकालयले । उहाँप्रति हार्दिक आभार ।
जीवनचन्द्र कोइरालाको नाउँमा पुरस्कार
शब्दयात्रा प्रकाशनद्वारा सम्मानित ग्रन्थसम्पादक जीवनचन्द्र कोइरालाको स्मृतिमा उहाँको जन्मजिल्ला सिन्धुलीका प्रतिभाशाली व्यक्तिलाई उहाँको नाउँबाट हरेक वर्ष पुरस्कृत गर्नका लागि शब्दयात्रा प्रकाशनमा अक्षयकोष राखिने भएको छ । यस विषयमा हरि मञ्जुश्रीले उहाँकी अर्धाङ्गिनी मनिका शर्माका साथै समालोचक डा. कुलप्रसाद कोइरालासँग कुरा गर्नुभयो । उहाँहरूले पुरस्कार यसै वर्षदेखि समर्पण गर्न र अक्षयकोषको व्यवस्था गर्न स्वीकृति दिनुभयो । हरि मञ्जुश्रीले यस वर्षका लागि पुरस्कार, अभिवन्दनापत्र र शब्दयात्रा पट्टका लागि आवश्यक रकम आफ्ना तर्फबाट उपलब्ध गराउने र पुरस्कारको अक्षयकोषका लागि प्रारम्भमा पन्ध्र हजार रुपियाँ पनि राखिदिने हुनुभयो । त्यसपछि निबन्धकार माधव काफ्लेले अक्षयकोषमा राख्न आफ्ना तर्फबाट दस हजार रुपियाँ दिनुभयो । अब जीवनचन्द्र कोइरालाको नाउँमा अक्षयकोष खडा भएर उहाँको नाउँबाट हरेक वर्ष सिन्धुलीका प्रतिभाशाली व्यक्तिलाई पुरस्कृत गरिने भएको छ ।
तीन महिनामा बाह्र पुस्तक
२०७९ सालको पहिलो तीन महिना वैशाख, जेठ र असारभित्र शब्दयात्रा प्रकाशनबाट बाह्रवटा पुस्तक छापिएछन् — (१) श्रीकृष्ण रहस्य, (२) कथा र कविता, (३) सङ्घर्ष र जीवन, (४) गाईजात्रा, (५) अठोट, (६) जिन्दगीका डोबहरू, (७) जून मामा, (८) धृतराष्ट्रको शुभकामना, (९) मनमा नअटेका कुरा, (१०) राधाचरणामृत, (११) समयको अन्तराल, (१२) अमरज्योति ।