आफूले लेखन तथा सम्पादन गरेका दुई कृति ‘इतिहासमा सिम्रौनगढ’ र ‘गुप्त भूमि हेलम्बू’ सञ्चारकर्मी तथा लेखक परशु घिमिरेले शब्दयात्रा प्रकाशन पुस्तकालयका लागि उपलब्ध गराउनुभएको छ । दुवै कृतिमा सम्बन्धित स्थानको इतिहास, पुरातत्त्व, संस्कृति, सामाजिक लोकजीवन आदिका विवरण अभिलेखबद्ध गरिएका छन् । गहन अनुसन्धान गरेर तयार पारिएका यस्ता महत्त्वपूर्ण कृतिहरू उपलब्ध गराउनुभएकोमा सञ्चारकर्मी तथा लेखक परशु घिमिरेप्रति शब्दयात्रा प्रकाशन परिवार हार्दिक आभार व्यक्त गर्दछ ।

‘शब्दयात्रा बेलप्रसाद श्रेष्ठ दानशीलता सम्मान’ का आर्थिक व्यवस्थापक, लेखक तथा धुलिखेलका सारथिका रूपमा सुपरिचित व्यक्तित्व बेलप्रसाद श्रेष्ठले शब्दयात्रा प्रकाशन पुस्तकालयका लागि नेपाली र अङ्ग्रेजी भाषाका ५७ थान पुस्तक–पत्रिका उपहारस्वरूप प्रदान गर्नुभएको छ । यस सहयोगका लागि शब्दयात्रा प्रकाशन परिवार उहाँप्रति हार्दिकतापूर्वक आभार व्यक्त गर्दछ । 

शब्दयात्रा प्रकाशनद्वारा संस्थापित ‘शब्दयात्रा जीवनचन्द्र कोइराला सिन्धुली प्रतिभा पुरस्कार’ को अक्षयकोषमा थप गर्नका लागि ज्योत्स्ना कोइरालाले १५ हजार रुपियाँ उपलब्ध गराउनुभएको छ । यस सहयोगका लागि शब्दयात्रा प्रकाशन परिवार उहाँप्रति हार्दिकतापूर्वक आभार व्यक्त गर्दछ । 

पुस्तक बिक्रीबाट आएको रकम अक्षरसेवी सहयोग कोषमा राखिने भएकाले स्वेच्छिक मूल्य कायम गरेर पुस्तक किनिदिन शब्दयात्रा प्रकाशनमा आयोजित कार्यक्रममा आग्रह गरिएपछि करिब १५ मिनेटभित्र १० हजार ६५ रुपियाँको पुस्तक बिक्री भएको छ । पुस्तक किनिदिने सम्पूर्ण महानुभावहरूप्रति शब्दयात्रा प्रकाशन हार्दिक आभार व्यक्त गर्दछ । 

‘ज्ञानगुनका कुरा’ का संस्थापक सम्पादक, साहित्यिक पत्रकार, साहित्यकार तथा उच्च अदालतका पूर्व मुख्य न्यायाधीश शेषराज शिवाकोटीले शब्दयात्रा प्रकाशन पुस्तकालयका लागि केही पुस्तक–पत्रिकाहरू उपहारस्वरूप प्रदान गर्नुभएको छ । शब्दयात्रा प्रकाशन परिवार उहाँप्रति हार्दिक आभार व्यक्त गर्दछ ।

कवि, कथाकार तथा निबन्धकार हरि अधिकारीले शब्दयात्रा प्रकाशनद्वारा संस्थापित अक्षरसेवी सहयोग कोषको सहायतार्थ आफ्नो पछिल्लो पुस्तक ‘सङ्कलित गद्यरचना’ १५ थान प्रदान गर्नुभएको छ । मूल्य ३५० रुपियाँ रहेको उक्त पुस्तकको बिक्रीबाट प्राप्त भएको रकम अक्षरसेवी सहयोग कोषमा राखिदिने गरी उहाँले ती पुस्तकहरू प्रदान गर्नुभएको हो । यस सहयोगका लागि शब्दयात्रा प्रकाशन उहाँप्रति हार्दिक आभार व्यक्त गर्दछ ।

शब्दयात्रा प्रकाशनले हरेक कार्यक्रममा स्वस्तिवाचन गराउँछ र स्वस्तिवाचन गर्ने व्यक्तिलाई दक्षिणा दिन्छ । २०७९ असोज ८ गते सम्पन्न कार्यक्रममा प्रजापति तिमिल्सिनाले स्वस्तिवाचन गर्नुभयो । उहाँलाई शब्दयात्रा प्रकाशनका तर्फबाट पुण्यवती घलेले टीका लगाइदिनुभयो भने पदम दाहालले दक्षिणा दिनुभयो । आफूले पाएको दक्षिणा प्रजापति तिमिल्सिनाले शब्दयात्रा प्रकाशनको अक्षरसेवी सहयोग कोषमा राखिदिने गरी शिव बन्जारालाई प्रदान गर्नुभयो । शब्दयात्रा प्रकाशन प्रजापति तिमिल्सिनाप्रति आभारी छ ।