यही २०७९ साल असोज ८ गते शनिबार शब्दयात्रा प्रकाशनले चारवटा पुरस्कार समर्पण गरेको छ । कार्यक्रममा डा. शालिग्राम शर्मा रौतहट प्रतिभा पुरस्कारबाट माधव काफ्ले (चन्द्रनिगाहपुर, रौतहट), जीवनचन्द्र कोइराला सिन्धुली प्रतिभा पुरस्कारबाट विश्वम्भर लामिछाने (कमलामाई, सिन्धुली), रणलक्ष्मी राष्ट्रिय प्रतिभा पुरस्कारबाट ‘मनकली’ उपन्यासका लागि विमला अधिकारी देवकोटा (भरतपुर, चितवन) र हरि मञ्जुश्री दूरदृष्टि नेतृत्व पुरस्कारबाट दृष्टि फाउन्डेसन नेपालकी सञ्चालिका कल्पना भट्ट (धनगढी, कैलाली) लाई पुरस्कृत गरियो । पुरस्कृत व्यक्तित्वहरूलाई प्रमुख अतिथि डा. सुरेशराज शर्माले अभिवन्दनापत्र, संस्थापक अध्यक्ष हरि मञ्जुश्रीले शब्दयात्रा पट्ट, आजीवन सदस्य केदारनाथ तिमल्सिनाले रुद्राक्षमाला, चयन समितिका सदस्य अञ्जनि कोइरालाले पुष्पमाला, पुरस्कार संस्थापकका तर्फबाट डा. शालिग्राम शर्मा, मनिका शर्मा कोइराला, माधवप्रसाद आचार्य र इ. रोशन अधिकारीले रकम तथा मुकुन्दप्रसाद उपाध्याय, चन्द्रबहादुर खड्का, दण्डपाणि अधिकारी र मच्छेश्वर सापकोटाले उपहार समर्पण गर्नुभयो । डा. शालिग्राम शर्मा रौतहट प्रतिभा पुरस्कारको भेटी २५ हजार रुपियाँ र जीवनचन्द्र कोइराला सिन्धुली प्रतिभा पुरस्कार, रणलक्ष्मी राष्ट्रिय प्रतिभा पुरस्कार र हरि मञ्जुश्री दूरदृष्टि नेतृत्व पुरस्कारको भेटी १५–१५ हजार रुपियाँ रहेको छ ।
‘आत्मानुभूति’ (कवितासङ्ग्रह) आध्यात्मिक साहित्यकारका रूपमा सुपरिचित व्यक्तित्व ढुण्डिराज पोखरेलको चिन्तन र त्यसलाई कवितामा प्रस्तुत गर्ने शिल्पको परिणति हो । साहित्यसाधनामा रहेको उहाँको सह्राहनीय र प्रशंसनीय प्रयासस्वरूप प्रस्तुत यस सङ्ग्रहका कविताहरू देश, समाज, प्रकृति र अध्यात्मसँग सम्बन्धित छन् । अधिकांश कविताहरू सूक्तिमय छन् । छन्द र व्याकरणको द्वन्द्वमा कहीँ छन्दको र कहीँ व्याकरणको पक्षमा कवि देखिनुभएको छ । उहाँको यो नवौँ कृतिले नेपाली पाठकलाई नैतिक आदर्श र मानवीय चेतना दिएर आत्मिक जागरण गराउनेछ ।
