वेदकुमारी न्यौपानेको ‘कहिले घाम कहिले छाया’ नामक मुक्तकसङ्ग्रहमा २ सय ६ वटा मुक्तकहरू सङ्कलित छन्् । संयोगवश शब्दयात्रा प्रकाशनको २ सय ६ औँ प्रकाशनपुष्प पनि यही मुक्तकसङ्ग्रह बनेको छ । राष्ट्रप्रेम, व्यक्तिप्रेम, सामाजिक मनोविज्ञान, विश्वासघात, विसङ्गति, आशावादिता जस्ता विषयहरूमा लेखिएका यस सङ्ग्रहका मुक्तकहरू पाठकको मनलाई चस्स घोच्ने र लामो समयसम्म प्रभावमा पारिरहने खालका छन् ।

वेदकुमारी न्यौपानेको ‘कुल्चिएका फूलहरू’ नामक प्रस्तुत एकाङ्कीसङ्ग्रहमा १२ वटा एकाङ्की सङ्कलित छन्् । विभिन्न साहित्यिक पत्रिकाहरूमा प्रकाशन भइसकेका एकाङ्कीहरू सङ्कलन गरी यो सङ्ग्रह तयार पारिएको हो । यस सङ्ग्रहका एकाङ्कीहरू विभिन्न पारिवारिक घटना, जातीय विभेद, कोरोना, सामाजिक विकृति, आर्थिक दुरवस्था, आधुनिक प्रविधिको विकासले ल्याएको विसङ्गति र दुष्प्रभाव जस्ता विषयवस्तुहरू समेटिएर लेखिएका छन् । सङ्ग्रहमा आधुनिक नेपाली जीवनशैलीको चित्रण देखिएको छ ।

वेदकुमारी न्यौपानेको प्रस्तुत कवितासङ्ग्रह ‘शब्द’ मा १०० वटा गद्यकविता सङ्ग्रह गरिएका छन् । यी कविताहरू मार्मिक छन्, पाठकको हृदयमा तुरुन्तै प्रवेश गर्ने खालका छन् । समाजमा घटिरहेका कैयौँ घटनालाई हामीले साना–मसिना ठानेर बेवास्ता गरिरहेका हुन्छौँ, तर तिनले समाजलाई कता लगिरहेका छन् भन्ने कुरा सशक्त ढङ्गमा यी कविताहरूमा प्रस्तुत भएका छन् । यसबाहेक नारी मनोविज्ञान, देशको दुर्दशा, सामाजिक विसङ्गति पनि कवितामा आएका छन् । त्यसैले यस सङ्ग्रहले नेपाली समाजको मनोवैज्ञानिक चित्र समग्रतामा देखाउन सकेको छ ।

कवयित्री सिर्जना खनालले २०७५ सालदेखि लेखेका ७६ वटा छन्दोबद्ध कविता यस सङ्ग्रहमा परेका छन् । शार्दूलविक्रीडित, पञ्चचामर, अनुष्टुप,  मालिनी, स्रग्धरा, वसन्ततिलका, शिखरिणी, चम्पकमाला, भुजङ्गप्रयात, अनवसिता, स्रग्विणी, इन्दिरा, अनुकुला, चण्डी, शालिनी, मन्दाक्रान्ता, उपजाति, उल्लाक, इन्द्रवज्रा, तोटक र तूणक गरी २१ छन्दको प्रयोग गरिएको यो सङ्ग्रह काव्यदेवी सरस्वतीको आराधनाबाट सुरु भई पाठकलाई जीवनोपयोगी र समाजोपयोगी ज्ञान दिनका लागि प्रस्तुत गरिएका दृष्टान्तहरूमा पुगेर टुङ्गिएको छ । पाठकलाई रुचिकर र प्रीतिकर लाग्ने सामयिक र शाश्वत दुवै प्रकारका विषयवस्तु समेटिएको यस सङ्ग्रहमा पीडा र विद्रोहलाई पनि शिष्ट र कलात्मक ढङ्गले व्यक्त गरिएको छ । छन्द सिक्न चाहनेहरूका लागि पनि यो सङ्ग्रह उपयोगी छ ।

वेदकुमारी न्यौपानेको प्रस्तुत लघुएकाङ्कीसङ्ग्रह ‘प्लास्टिक सर्जरी’ मा १६ वटा लघुएकाङ्की सङ्ग्रह गरिएका छन् । यी लघुएकाङ्की मार्मिक छन्, पाठकको हृदयमा तुरुन्तै प्रवेश गर्ने खालका छन् । समाजमा घटिरहेका कैयौँ घटनालाई हामीले साना–मसिना ठानेर बेवास्ता गरिरहेका हुन्छौँ, तर तिनले समाजलाई कता लगिरहेका छन् भन्ने कुरा सशक्त ढङ्गमा यी लघुएकाङ्कीहरूमा प्रस्तुत भएका छन् । त्यसैले आकारमा सानो देखिएर पनि यो पुस्तक नाट्य विधाबाट समाजको सग्लो चित्र देखउन सक्ने ठूलो पुस्तक बनेको छ ।

वेदकुमारी न्यौपानेको प्रस्तुत गीतसङ्ग्रह ‘हराएको किनारा’ मा २०४० सालदेखि २०७७ सालसम्म लेखिएका गीतहरूमध्ये १ सय २७ वटा गीत सङ्कलन गरिएका छन् । ती गीतहरूलाई ६ भागमा बाँडिएको छ — ‘मधुरिमा’ अल्बममा सङ्कलित गीत, गाइएका फुटकर गीत, पत्रिकामा प्रकाशित गीत, राष्ट्रिय गीत, अन्य विषयका गीत र मिति नलेखिएका गीत । गीत लेखिँदाको कालक्रमका आधारमा गीतको क्रम मिलाइएको छ । यसबाट पाठक र समीक्षकलाई गीत र गीतकारका विषयमा बुझ्न सजिलो हुने आशा गरिएको छ ।

पूर्वन्यायाधीश मोहनमणि दाहालले ‘जनआस्था साप्ताहिक’ मा प्रकाशन गराएका आफ्ना पुराना लेख, संस्मरण र राजनीतिक टिप्पणीहरू सङ्कलन गरी तयार पार्नुभएको प्रस्तुत पुस्तक ‘विगतमाथि आलेख’ कृतिकारले जीवनमा भोग्नुपरेका अविस्मरणीय घटना र ती घटनाले राष्ट्रिय जीवनमा पारेको प्रभावको अभिलेखीकरण हो । नेपालको राजनीतिक, न्यायिक र प्रशासनिक क्षेत्रको ऐतिहासिक उत्खनन र अध्ययन गरी शोधप्रबन्ध तयार पार्ने अन्वेषकहरूका लागि यो पुस्तक अत्यन्त उपयोगी बन्नेछ ।

‘गोत्रदर्पण (प्रवरसहितको गोत्रावली)’ अक्षरकर्मी केदारनाथ तिमल्सिनाको छैटौँ कृति हो । यस कृतिमा उहाँले गोत्रहरूको जम्मा सङ्ख्या, ठकुरीको नौ गोत्र र एकतीस जाति, विभिन्न गोत्रका सगोत्री तथा प्रवरहरू, पाँच प्रवर पर्ने गोत्र र सगोत्रीहरू, तीन प्रवर पर्ने गोत्र र सगोत्रीहरू एवं सगोत्री थर–जाति नामावली प्रस्तुत गर्नुभएको छ । यस पुस्तकबाट उहाँले गोत्र र प्रवरसम्बन्धी जानकारी लिन चाहने पाठकलाई ठूलो गुन लगाउनुभएको छ ।