हरि मञ्जुश्री मोती महोत्सव समारोह समितिका सचिव लेखिका तथा सहकारीकर्मी निर्मला श्रेष्ठ र हरि मञ्जुश्री तथा शब्दयात्रा प्रकाशन विशेषाङ्क प्रकाशन गरेको मध्यदीप मासिक पत्रिकालाई यही पुस महिनाको ७ गते शनिबार आयोजना गरिने कार्यक्रममा कदर गरिने जानकारी मैले प्राप्त गरेको छु । निर्मला श्रेष्ठ र ‘मध्यदीप मासिक’ प्रति अग्रिम बधाई ज्ञापन गर्दछु ।

शब्दयात्रा प्रकाशनमा संस्थापित ‘सावित्री जङ्गम थापा अनुसन्धान विद्वतवृत्ति’ को अक्षयकोषमा समाजसेवी तथा लेखिका सावित्री जङ्गम थापाले ७५ हजार रुपियाँ थपिदिनुभएको छ । यसअघि त्यस विद्वतवृत्तिको अक्षयकोषमा १ लाख २५ हजार रुपियाँ थियो । अब त्यस विद्वतवृत्तिको अक्षयकोषमा २ लाख रुपियाँ पुगेको छ । यस्तो उदार सहयोगका लागि शब्दयात्रा प्रकाशन परिवार समाजसेवी तथा लेखिका सावित्री जङ्गम थापाप्रति हार्दिक आभार व्यक्त गर्दछ ।

शब्दयात्रा प्रकाशनबाट आगामी माघमा समर्पण गरिने छवटा पुरस्कारका लागि पुरस्करणीय व्यक्ति वा संस्थाको चयन डा. छत्रपति दाहाल, भवानी पाण्डे र सोमकाजी शाक्यले गर्नुहुनेछ ।

शब्दयात्रा प्रकाशनका संस्थापक तथा अध्यक्ष हरि मञ्जुश्रीका विषयमा पुस्तक सम्पादन गर्ने सम्पादक, विशेषाङ्क प्रकाशन गर्ने पत्रिका र शोधप्रबन्ध लेख्ने शोधकर्ताहरूलाई दुई चरणमा कार्यक्रमको आयोजना गरी कदर गरिने र पहिलो चरणको कार्यक्रम आगामी पुस महिनाको पहिलो सातामा आयोजना गरिने भएको छ । यस कार्यको संंयोजन मध्यमार्ग साप्ताहिक पत्रिकाका सम्पादक–प्रकाशक प्रदीप केसीले गरिरहनुभएको छ । हरि मञ्जुश्रीका विषयमा ८ वटा पुस्तक सम्पादन गरिएका, २ वटा पत्रिकाले विशेषाङ्क प्रकाशन गरेका र स्नातकोत्तर तहमा १३ वटा शोधप्रबन्ध लेखिएका छन् ।

शब्दयात्रा प्रकाशनबाट आगामी माघमा समर्पण गरिने छवटा पुरस्कारका लागि पुरस्कृत व्यक्ति वा संस्था चयन गर्ने कार्य डा. छत्रपति दाहाल संयोजक तथा भवानी पाण्डे र सोमकाजी शाक्य सदस्य रहेको पुरस्करणीय व्यक्तित्व चयन समितिले गर्ने भएको छ ।

शब्दयात्रा प्रकाशनबाट सम्मानित अनुवादक, लेखक तथा शिक्षासेवी तिलक लुइटेलको उपचारमा थोरै भए पनि सहयोग पुगोस् भन्ने उद्देश्यले शब्दयात्रा प्रकाशनले १० हजार रुपियाँ पठाएको छ । सामाजिक सन्जालमा आएको सूचना बमोजिम लक्ष्मी सनराइज बैङ्कमा उहाँका छोरा विभव लुइटेलको नाउँमा रहेको ०३१४०००२८१३ नम्बरको खातामा उक्त रकम पठाइएको हो । शब्दयात्रा प्रकाशनमा रहेको अक्षरसेवी सहयोग कोषबाट ६ हजार रुपियाँ र धुलिखेल निवासी डा. केशव खुलाल छेत्रीले आफ्ना पिता टीकाबहादुर खुलाल छेत्री र माता रमाकुमारी खुलाल छेत्रीको स्मृति र सम्मानमा राख्नुभएको अक्षयकोषको ब्याजबाट प्राप्त ४ हजार रुपियाँ गरी जम्मा १० हजार रुपियाँ उहाँलाई पठाइएको हो । शब्दयात्रा प्रकाशन परिवार उहाँको स्वास्थ्यलाभका लागि शब्दसाधक तीर्थ नीलकण्ठेश्वर धाममा विराजित सम्पूर्ण देवीदेवता र पितृहरूसँग प्रार्थना गर्दछ ।