शब्दयात्रा प्रकाशनले २०८० सालको ‘शब्दयात्रा भरत जङ्गम भक्तपुर प्रतिभा पुरस्कार’ लेखक तिलक प्रकाशलाई समर्पण गर्ने भएको छ । पुरस्कार ग्रहण गर्न स्वीकृति प्रदान गर्नुभएकोमा शब्दयात्रा प्रकाशन तिलक प्रकाशप्रति हार्दिक आभार व्यक्त गर्दछ । पुरस्कार यही माघ महिनामा समर्पण गरिनेछ । पुरस्कारको कोष व्यवस्थापन भ्रष्टविरोधी शास्त्रका प्रणेता तथा साहित्यकार भरत जङ्गमले गर्नुभएको हो ।

शब्दयात्रा प्रकाशनले २०८० सालको ‘शब्दयात्रा लीला–मध्यमार्ग काभ्रेपलान्चोक प्रतिभा पुरस्कार’ संस्कृतिकर्मी विश्व उलक (विश्वनाथ उलक, खोपासी) लाई समर्पण गर्ने भएको छ । पुरस्कार ग्रहण गर्न स्वीकृति प्रदान गर्नुभएकोमा शब्दयात्रा प्रकाशन विश्वनाथ उलकप्रति हार्दिक आभार व्यक्त गर्दछ । पुरस्कार यही माघ १३ गते समर्पण गरिनेछ । पुरस्कारको कोष व्यवस्थापन लीला–मध्यमार्ग सम्मानकोषले गरेको छ ।

शब्दयात्रा प्रकाशनले माघ महिनामा समर्पण गर्नुपर्ने ६ वटा पुरस्कारहरू यही माघ १३ गते शनिबार समर्पण गर्ने भएको छ । शब्दयात्रा प्रकाशनको सभाकक्ष बनेपामा आयोजना गरिने पुरस्कार समर्पण समारोहमा शब्दयात्रा सूर्यप्रसाद श्रेष्ठ कर्मशीलता पुरस्कार, शब्दयात्रा भरत जङ्गम भक्तपुर प्रतिभा पुरस्कार, शब्दयात्रा कृष्ण जोशी भोजपुर प्रतिभा पुरस्कार, शब्दयात्रा प्रा. केदारनाथ–लीला श्रेष्ठ सङ्खुवासभा प्रतिभा पुरस्कार, शब्दयात्रा लीला–मध्यमार्ग काभ्रेपलान्चोक प्रतिभा पुरस्कार र शब्दयात्रा नारायणी–शङ्कर राष्ट्रिय योगप्रतिभा पुरस्कार समर्पण गरिनेछन् ।

शब्दयात्रा प्रकाशनले आज शोधप्रबन्धकारहरू मीरा चापागाईं पौडेल, इन्द्रप्रसाद गौतम, नारायणी दाहाल तिमल्सिना र रूपा मैनाली, सम्पादकहरू सोमकाजी शाक्य, माधव काभ्रेली र आर. सी. विरही, हरि मञ्जुश्री मोती महोत्सव समारोह समितिका सचिव निर्मला श्रेष्ठ र हरि मञ्जुश्री तथा शब्दयात्रा प्रकाशन विशेषाङ्क प्रकाशित गर्ने पत्रिका ‘मध्यदीप’ मासिकलाई कदर गरेको छ ।
शब्दयात्रा प्रकाशनका संस्थापक तथा अध्यक्ष हरि मञ्जुश्रीका विषयमा स्नातकोत्तर तहमा शोधप्रबन्ध लेख्ने १३ जना शोधप्रबन्धकार, पुस्तक सम्पादन गर्ने ६ जना सम्पादक, मोती महोत्सव समारोह समितिका सचिव र विशेषाङ्क प्रकाशित गर्ने २ पत्रिकालाई दुई चरणमा कार्यक्रम गरी कदर गर्ने क्रममा प्रथम चरणमा आज नौजनालाई कदर गरिएको हो । कदर गर्दा कृष्णमणि कुइकेलले रुद्राक्षमाला, सरस्वती सापकोटाले पुस्तक, प्रदीप केसीले विशेषाङ्क, गीता अधिकारी र प्रह्लाद प्याकुरेलले पदक र डा. बलदेव अधिकारी गाउँलेले कदरपत्र समर्पण गर्नुभएको थियो ।
कार्यक्रम भाषासेवी तथा साहित्यकार डा. बलदेव गाउँले अधिकारीको प्रमुख आतिथ्य तथा साहित्यकारद्वय बैरागी जेठा र डा. विनोद ढकालको आतिथ्यमा शब्दयात्रा प्रकाशनको सभाकक्षमा भएको थियो ।
कदरपत्र ग्रहण गर्नेहरूमध्येबाट मीरा चापागाईं र इन्द्रप्रसाद गौतमले मन्तव्य व्यक्त गर्नुभएको उक्त समारोहको उद्घाटन कवि पदम दाहालले र प्रमुख अतिथिलाई उपहार समर्पण निर्मला केसी बन्जाराले, कार्यक्रमका संयोजकलाई टोपी लगाइदिएर सम्मान अमृत अधिकारीले गर्नुभएको थियो । मच्छेश्वर सापकोटा र सरस्वती सापकोटाले गीत गाएर कार्यक्रममा रौनक थप्नुभएको थियो ।
कालिका त्रिपाठी पन्तबाट उद्घोषित उक्त कार्यक्रममा मञ्चस्थ महानुभावहरूलाई केदारनाथ तिमल्सिनाले रुद्राक्षको माला अर्पण गर्नुभएको थियो भने कदरपत्रको वाचन शारदाप्रसाद शर्मा र साधुराम गिरीले, सामग्री व्यवस्थापन सङ्गीता केसीले, छायाङ्कन इ. रोशन मञ्जुश्री अधिकारीले र स्वागत भाषण रश्मि हुमागाईंले गर्नुभएको थियो ।
कार्यक्रमका संयोजक तथा सभापति शब्दयात्रा प्रकाशनका आजीवन सदस्य तथा ‘मध्यमार्ग’ साप्ताहिक पत्रिकाका सम्पादक–प्रकाशक प्रदीप केसी हुनुहुन्थ्यो । उहाँका अनुसार दोस्रो चरणको कार्यक्रममा अन्य महानुभावहरूलाई कदर गरिनेछ । दोस्रो चरणको कार्यक्रमको मिति पनि पछि नै निर्धारण गरिनेछ ।

शब्दयात्रा प्रकाशनबाट २०८० साल वैशाखदेखि मङ्सिरसम्मको ८ महिनामा छापिएका पुस्तकहरू यी हुन् — (१) चौध भुवन (कथासङ्ग्रह) — सपूत कार्की, (२) एक दिन (बालगीतिनाटक) — वेदकुमारी न्यौपाने, (३) साथीको माया (बालएकाङ्कीसङ्ग्रह) — वेदकुमारी न्यौपाने, (४) ठुले (लघुकाव्य) — डा. गोपाल पौड्याल ‘मन्डने’, (५) कुसुमाक्षर (कवितासङ्ग्रह) — गायत्रीकुमार चापागाईं, (६) कथाकुथुङ्ग्री (कथासङ्ग्रह) — प्रा. रामकुमार पाँडे, (७) अग्रजले कोरेको गोरेटोमा हिँड्दा (निबन्धसङ्ग्रह) — गायत्रीकुमार चापागाईं, (८) उनैको सम्झनामा (स्मृतिकाव्य) —सावित्री जङ्गम थापा, (९) मुक्तक शारदीय (मुक्तकसङ्ग्रह) — शारदा घिमिरे भैल, (१०) कर्मसाधक भोलामानसिंह थापा (स्मृतिग्रन्थ) — सावित्री जङ्गम थापा, (११) कालो सूर्य (उपन्यास, पाँचौँ संस्करण) — भरत जङ्गम, (१२) द ब्ल्याक सन (कालो सूर्यको अङ्ग्रेजी अनुवाद, दोस्रो संस्करण) — भरत जङ्गम, (१३) युगपुरुष (महाकाव्य) — सिर्जना खनाल, (१४) तोपको आवाज (कथासङ्ग्रह) — ज्ञान उदास ।