Shabdayatra Prakashan | Banepa – Akshyardham

दीपक भेटुवालबाट पुस्तक–पत्रिका उपहार

Activities

admin

-

February 9, 2025

पत्रकार दीपक भेटुवालले शब्दयात्रा प्रकाशन पुस्तकालयका लागि सत्यनारायण गोयन्काको ‘विपस्सना ध्यान’, सपना लामिछानेको कवितासङ्ग्रह ‘जिन्दगी एक यात्रा’, निद्रा देउजा राजवंशीको कवितासङ्ग्रह ‘अदृश्य हावा’ र ‘सम्यक सन्देश’ पत्रिकाको ३७ औँ अङ्क उपहारस्वरूप प्रदान गर्नुभएको छ । पुस्तकालयका तर्फबाट ती उपहारहरू शब्दयात्रा प्रकाशनका सञ्चालक सदस्य कृष्णमणि कुइकेलले ग्रहण गर्नुभएको थियो । पुस्तकालयका लागि पुस्तक–पत्रिका उपहार प्रदान गर्नुभएकोमा शब्दयात्रा प्रकाशन परिवार पत्रकार दीपक भेटुवालप्रति हार्दिक आभार व्यक्त गर्दछ ।

कवितासङ्ग्रह ‘मान्छेभित्रको मान्छे’ सार्वजनिक

admin

-

February 9, 2025

0

कवि प्रकाश खड्काद्वारा लिखित ‘मान्छेभित्रको मान्छे’ नामक कवितासङ्ग्रह यही माघ २६ गते शब्दयात्रा प्रकाशनको सभाकक्षमा आयोजित समारोहमा सार्वजनिक गरिएको छ । कवि प्रकाश खड्का, गायिका सरस्वती सापकोटा र पूूर्वप्रशासक तथा लेखक डा. इन्दुल केसीले संयुक्त रूपमा उक्त कवितासङ्ग्रह सार्वजनिक गर्नुभएको हो ।
शब्दयात्रा प्रकाशनले पुस्तक सार्वजनिक गराउँदा थैलीभित्र राखिएको पुस्तक सुर्केनी तानी थैली खोलेर थैलीबाट झिकी सार्वजनिक गराउने गरेको छ । ‘मान्छेभित्रको मान्छे’ लाई पनि त्यसै गरी सार्वजनिक गरिएको थियो ।
कार्यक्रममा पुस्तकका बारेमा मच्छेश्वर सापकोटाले टिप्पणी गर्नुभएको थियो भने कृतिकारले पुस्तकभित्रको एउटा कविता वाचन गरी कवितासङ्ग्रहसम्बन्धी आफ्नो मन्तव्य राख्नुभएको थियो ।
‘मान्छेभित्रको मान्छे’ शब्दयात्रा प्रकाशनद्वारा प्रकाशित २४४ औँ कृति र प्रकाश खड्काद्वारा लिखित पहिलो कृति हो । कवि प्रकाश खड्का विराटनगरका बासिन्दा हुनुहुन्छ । उहाँको यस सङ्ग्रहमा ४० वटा कविता सङ्कलित छन् ।

पुरस्कार समर्पण तथा पुस्तक र गान सार्वजनिकीकरण समारोह सम्पन्न

admin

-

February 9, 2025

0

शब्दयात्रा प्रकाशनको आयोजनामा आज २०८१ साल माघ २६ गते शनिबार पुरस्कार समर्पण तथा पुस्तक र गान सार्वजनिकीकरण समारोहको आयोजना गरेर सातवटा पुरस्कार समर्पण गर्नुका साथै एउटा कवितासङ्ग्रह र एउटा गानलाई सार्वजनिक गरियो । पुरस्कृत व्यक्तित्वका बारेमा कृष्णमणि कुइकेलले जानकारी दिनुभएको थियो भने पुस्तक र गानका बारेमा मच्छेश्वर सापकोटाले टिप्पणी गर्नुभएको थियो । कार्यक्रमको सभापतित्व संस्थापक अध्यक्ष हरि मञ्जुश्रीले तथा सञ्चालन कार्यसम्पादन समितिका सदस्य कालिका त्रिपाठी पन्तले गर्नुभएको थियो । कार्यक्रमको समुद्घाटन शिक्षासेवी रामप्रसाद अधिकारीले, सम्मान सामग्रीको व्यवस्थापन अच्युत अधिकारीले, छायाङ्कन तथा स्वराङ्कन इ. रोशन मञ्जुश्री अधिकारीले, चयन समितिका संयोजक लोकेन्द्र ढकाललाई उपहार समर्पण वेदप्रसाद गौतमले र पुस्तक वितरण अमृत अधिकारीले गर्नुभएको थियो । कार्यक्रमको समीक्षासहित विसर्जन प्रकाश खड्काले गर्नुभएको उक्त समारोहमा आशीर्वचनको पत्रको व्यवस्थापन सङ्गीता केसीले गर्नुभएको थियो । शब्दयात्रा प्रकाशनको सभाकक्षमा दिउँसो १२ः३० बजे प्रारम्भ भएको उक्त कार्यक्रम २ः१५ बजे समापन गरिएको थियो ।

२४४. मान्छेभित्रको मान्छे (कवितासङ्ग्रह)

publications

admin

-

0

२४४. मान्छेभित्रको मान्छे (कवितासङ्ग्रह)

कवि प्रकाश खड्काको ‘मान्छेभित्रको मान्छे’ नामक कवितासङ्ग्रहमा ४० वटा कवितात्मक सिर्जना छन् । यीमध्ये पहिले २९ वटा कविता छन्, त्यसपछि ८ वटा गीत छन् र २ वटा भजन छन् । अन्तिममा चाहिँ कविका सुपुत्र प्रतीक खड्काको कविता छ । सबै कविता गद्यमा छन्, सरल छन्, सजिलै बुझिने खालका छन् । सबै कवितात्मक सिर्जनाले कविको भाव र विचारको प्रतिनिधित्व गरेका छन् । कवितामा सामयिकता, सामाजिक मनोविज्ञान, विकृति र विसङ्गति, विगतको स्मरण आदि आएका छन् । राष्ट्रभक्ति पनि प्रकट भएको छ ।

२४३. मेनका (कवितासङ्ग्रह)

publications

admin

-

0

कवि अच्युत अधिकारीको प्रस्तुत कवितासङ्ग्रह ‘मेनका’ जम्मा ४८ पृष्ठको छ र यसमा ३० वटा गद्यकविता छन् । तीमध्ये व्यक्तिसँग सम्बन्धित दुइटा (बद्रीविक्रम थापा र सुभाष खड्का) र संस्थासँग सम्बन्धित एउटा (शब्दयात्रा प्रकाशन) कविता यसमा परेका छन् । विविध विषयवस्तुमा लेखिएका यी कविताहरूमा कविले सरल शब्दावलीमा आफ्ना भावहरू प्रकट गर्नुभएको छ । सामान्य पाठकले पनि सजिलै बुझ्ने गरी लेखिएका यस सङ्ग्रहभित्रका कविताहरूले कवि अच्युत अधिकारीको विचार, शैली र भाषाको प्रतिनिधित्व गरेका छन् ।

जन्मदिनको शुभकामना गान तयार

admin

-

February 5, 2025

0

जन्मदिनमा बत्ती निभाउने, केक काट्ने, जुठो खुवाउने र अङ्ग्रेजी भाषाका केही शब्द बोल्दै थपडी बजाउने प्रवृत्ति बढ्दै गएको छ । यसै सन्दर्भमा हाम्रो मौलिक संस्कृति पनि कायम रहोस् र जन्मदिन मनाउने परिपाटीलाई आधुनिक स्वरूप पनि दिन सकियोस् भन्ने उद्देश्यले जन्मदिनको शुभकामना गान तयार पारिएको छ । उक्त गानमा शब्दयात्रा प्रकाशनका आजीवन सदस्य केदारनाथ तिमल्सिनाले गीतकारको, संस्थापक अध्यक्ष हरि मञ्जुश्रीले सङ्गीतकारको, बालकृष्ण सेवाचार्यले बाद्यसंयोजकको र गीतिभास्कर मच्छेश्वर सापकोटाले सुपरिवेक्षकको भूमिका निर्वाह गर्नुभएको छ । मच्छेश्वर सापकोटा, हरि मञ्जुश्री, इ. रोशन मञ्जुश्री अधिकारी, सरस्वती सापकोटा, गीता अधिकारी र केदारनाथ तिमल्सिनाको स्वर त्यस गानमा सुन्न सकिनेछ । यसरी तयार भएको जन्मदिनको शुभकामना गान यही माघ २६ गते शनिबार दिउँसो १२ः३० बजे शब्दयात्रा प्रकाशनको सभाकक्षमा आयोजना गरिने समारोहमा सार्वजनिक हुनेछ । उक्त गान त्यसै दिनदेखि अक्षरधाम यु–ट्युब च्यानलबाट सुन्न–सुनाउन र डाउनलोड गर्न–गराउन सकिनेछ । अरूको सांस्कृतिक र भाषिक दासता अस्वीकार गर्ने र आफ्नै संस्कृति र भाषाको जगेर्ना गर्न खोज्ने नेपालीहरूले आफ्नो, आफ्ना परिवारको र आफन्तको जन्मदिनमा उक्त गानको उपयोग गर्नुहुनेछ भन्ने आशा गरिएको छ ।

योगदानी महिलाको अनुसन्धान सम्बन्धी विचारगोष्ठी सम्पन्न

admin

-

February 1, 2025

0

शब्दयात्रा प्रकाशनले आज माघ १९ गते शनिबार योगदानी महिलाको अनुसन्धान सम्बन्धी पहिलो चरणको विचारगोष्ठी सम्पन्न गरेको छ । राष्ट्रिय विकासका लागि योगदान गर्ने नेपाली महिलाहरूका विषयमा अनुसन्धान गर्ने–गराउने गरी शब्दयात्रा प्रकाशनले ‘सावित्री जङ्गम थापा अध्ययन–अनुसन्धान कक्ष’ बनेपामा स्थापना गरिसकेको छ र त्यसबाट विभिन्न कार्यक्रमहरू सञ्चालन गर्न शुरु गरिसकिएको छ । त्यही अनुसन्धान कक्षका माध्यमबाट काभ्रेपलाञ्चोक जिल्लाका महिलाहरूले गरेको योगदानलाई पनि राष्ट्रिय–अन्तर्राष्ट्रिय स्तरसम्म लैजान सकियोस्, त्यसका लागि विविध क्षेत्रमा योगदान गरेका काभ्रेपलाञ्चोक जिल्लाका महिलाहरूको विस्तृत अभिलेखीकरण गर्न सकियोस् र अनुसन्धान कक्षको सञ्चालनका सम्बन्धमा सुझाव पनि प्राप्त होस् भन्ने उद्देश्यले यस गोष्ठीको आयोजना गरिएको थियो ।
शब्दयात्रा प्रकाशनको कार्यसम्पादन समितिका सदस्य कालिका त्रिपाठी पन्तले संयोजन तथा सञ्चालन गर्नुभएको आजको विचारगोष्ठीको सभापतिका रूपबाट संस्थापक अध्यक्ष हरि मञ्जुश्री अधिकारीले कार्यक्रमको औचित्यका बारेमा प्रष्ट पार्नुभएको थियो । प्रमुख अतिथिका रूपबाट अग्रज समाजसेवी तथा साहित्यकार सावित्री जङ्गम थापाले समाजसेवा क्षेत्रका आफ्ना अनुभवहरू सुनाउनुभएको थियो । माया बादे, कृष्णप्यारी नकर्मी, न्हुच्छेमाया श्रेष्ठ, निर्मला काफ्ले, सुनीता खड्का र कृष्णमणि कुइकेलले आआफ्ना धारणा राख्तै शब्दयात्रा प्रकाशनबाट सञ्चालित अनुसन्धान केन्द्रलाई कसरी गतिशील बनाउने र काभ्रेपलाञ्चोक जिल्लाका योगदानी महिलाको अभिलेखीकरण कसरी गर्ने भन्ने सम्बन्धमा विभिन्न सुझावहरू दिनुभएको थियो । भवानी पाण्डे, शारदा नेपाल, पुण्यवती घले र शारदा घिमिरे भैलले कवितावाचन र अम्बिका धितालले लघुकथावाचन गर्नुभएको थियो ।
सरस्वती सापकोटा, गीता अधिकारी, सुखरलक्ष्मी न्हसिजू, भावना थापा, सङ्गीता बस्नेत, सरिता अधिकारी आदिको पनि उपस्थिति रहेको आजको कार्यक्रमको समुद्घाटन अतिथिका रूपबाट गीतिभास्कर मच्छेश्वर सापकोटाले र कार्यक्रमको समीक्षासहित सभाविसर्जन अतिथिका रूपबाट गैरसरकारी संस्था महासङ्घ काभ्रेपलाञ्चोकका अध्यक्ष गङ्गा दोङले गर्नुभएको थियो ।
पहिलो चरणको यस विचारगोष्ठीमा साहित्य, पत्रकारिता, कला, संस्कृति, शिक्षा, कानुन, सहकारी आदि क्षेत्रका महिलाहरूको उपस्थिति रहेको थियो भने फागुनमा आयोजना गरिने दोस्रो चरणको विचारगोष्ठीमा काभ्रेपलाञ्चोक जिल्लाका राजनीतिक र प्रशासनिक क्षेत्रका महिलाहरूलाई उपस्थितिका लागि आग्रह गरिनेछ ।

प्रकाश खड्काको ‘मान्छेभित्रको मान्छे’ छापिँदै

admin

-

January 31, 2025

0

शब्दयात्रा प्रकाशनको २४३ औँ प्रकाशनपुष्पका रूपमा ‘मान्छेभित्रको मान्छे’ नामक कवितासङ्ग्रह प्रकाशन गरिने भएको छ । यो सङ्ग्रह विराटनगरनिवासी कवि प्रकाश खड्काद्वारा लिखित पहिलो कवितासङ्ग्रह हो । उहाँका कविताहरू फुटकर रूपमा प्रकाशित छन् र उहाँका गीतहरू पनि यु–ट्युबबाट सुन्न सकिन्छ । पुस्तकाकार रूपमा चाहिँ यो नै उहाँको पहिलो कृति हो । यस सङ्ग्रहमा उहाँका ४० वटा कवितात्मक सिर्जना समावेश छन् । यो सङ्ग्रह यही माघ २६ गते शनिबार दिउँसो १२ः३० बजे शब्दयात्रा प्रकाशनको सभाकक्ष बनेपामा सार्वजनिक गरिनेछ ।

पुरस्कार समर्पण समारोह माघ २६ गते

admin

-

January 24, 2025

0

शब्दयात्रा प्रकाशनले २०८१ सालको दोस्रो चरणको पुरस्कार समर्पण समारोह यही माघ २६ गते शनिबार गर्ने भएको छ । उक्त समारोहमा शब्दयात्रा क्याप्टेन टीकाराम–रामेश्वरी चालिसे ललितपुर प्रतिभा पुरस्कार वनस्पतिविज्ञ डा. तीर्थबहादुर श्रेष्ठ (ललितपुर) लाई, शब्दयात्रा कृष्ण जोशी भोजपुर प्रतिभा पुरस्कार गीतकार श्याम तमोट (भोजपुर) लाई, शब्दयात्रा उर्मिला श्रेष्ठ प्रशासनिक महिला प्रतिभा पुरस्कार हुमकला पाण्डे (अर्घाखाँची) लाई र शब्दयात्रा दुर्गाप्रसाद–युगला अधिकारी आध्यात्मिक साहित्य पुरस्कार आध्यात्मिक लेखक टहलदास शिवाकोटी ‘यात्री’ (झापा) लाई समर्पण गरिनेछ । उक्त कार्यक्रममा शब्दयात्रा डा. शालिग्राम शर्मा रौतहट प्रतिभा पुरस्कार साहित्यकार अनन्त कोइराला (रौतहट) लाई, शब्दयात्रा सूर्यप्रसाद श्रेष्ठ कर्मशीलता पुरस्कार इन्जिनियर तथा अधिवक्ता दिनेश चौधरी (महोत्तरी) लाई, शब्दयात्रा लीला–मध्यमार्ग काभ्रेपलाञ्चोक प्रतिभा पुरस्कार निर्मलाकुमारी यगोल श्रेष्ठ (काभ्रेपलाञ्चोक) लाई र शब्दयात्रा प्रा. केदारनाथ–लीला श्रेष्ठ सङ्खुवासभा प्रतिभा पुरस्कार संयुक्त रूपमा नवीन खड्का र पुस्तका खड्का (सङ्खुवासभा) लाई समर्पण गरिनेछ । कार्यक्रम शब्दयात्रा प्रकाशनको सभाकक्ष बनेपामा दिउँसो १२ः३० बजे प्रारम्भ गरिनेछ । समारोहमा ठीक समयमै समुपस्थित भइदिन सबैमा हार्दिक अनुरोध छ ।

योगदानी महिला सम्बन्धी विचारगोष्ठी गरिने

Activities

admin

-

January 24, 2025

0

शब्दयात्रा प्रकाशनले यही माघ १९ गते शनिबार ‘योगदानी महिला’ सम्बन्धी पहिलो चरणको विचारगोष्ठी गर्ने भएको छ । विविध क्षेत्रमा योगदान गरेका काभ्रेपलाञ्चोक जिल्लाका महिलाहरूको विस्तृत अभिलेखीकरण गर्ने सन्दर्भमा यस गोष्ठीको आयोजना गर्न लागिएको हो । राष्ट्रिय विकासका लागि योगदान गर्ने नेपाली महिलाहरूका विषयमा अनुसन्धान गर्ने–गराउने गरी शब्दयात्रा प्रकाशनले ‘सावित्री जङ्गम थापा अध्ययन–अनुसन्धान केन्द्र’ बनेपामा स्थापना गरिसकेको छ र त्यसबाट विभिन्न कार्यक्रमहरू सञ्चालन गर्न शुरु गरिसकिएको छ । त्यही अनुसन्धान केन्द्रका माध्यमबाट काभ्रेपलाञ्चोक जिल्लाका महिलाहरूले गरेको योगदानलाई पनि राष्ट्रिय–अन्तर्राष्ट्रिय स्तरसम्म लैजान यस गोष्ठीले सहयोग गर्ने अपेक्षा राखिएको छ । कार्यक्रम संयोजक तथा कार्यसम्पादन समितिका सदस्य कालिका त्रिपाठी पन्तका अनुसार पहिलो चरणको यस विचारगोष्ठीमा साहित्य, पत्रकारिता, कला, संस्कृति, शिक्षा, कानुन, चिकित्सा, सहकारी आदि क्षेत्रका महिलाहरूको उपस्थिति रहनेछ भने फागुनमा आयोजना गरिने दोस्रो चरणको विचारगोष्ठीमा राजनीतिक र प्रशासनिक क्षेत्रका महिलाहरूलाई उपस्थितिका लागि आग्रह गरिनेछ ।