शब्दयात्रा प्रकाशनले २०८१ सालको ‘शब्दयात्रा काशीनाथ–मायादेवी राष्ट्रझङ्कार सम्मान’ विदुषी डा. कान्ता भट्टराई (खोटाङ) मा समर्पण गर्ने भएको छ । शब्दयात्रा प्रकाशनद्वारा गठित सम्मान्य व्यक्तित्व चयन समितिको बैठकले उहाँलाई सम्मान गर्ने निर्णय गरेको हो । उहाँ आध्यात्मिक क्षेत्रकी विदुषी तथा प्रवाचिका हुनुहुन्छ । नेपाली समाजमा नैतिक चेतना, मानवीय कर्तव्यबोध र आध्यात्मिकताको जागरण गराउने खालका विभिन्न लेखहरू लेखी उहाँले प्रकाशन गराउनुभएको छ । उहाँजस्ती साधिकामा सम्मान समर्पण गर्न पाउनु शब्दयात्रा प्रकाशनको सौभाग्य हो । यस सम्मानको कोष व्यवस्थापन आध्यात्मिक लेखक कृष्णहरि मैनाली (काभ्रेपलाञ्चोक) ले गर्नुभएको हो । सम्मान आगामी चैत महिनामा समर्पण गरिनेछ । सम्मान ग्रहण गर्न स्वीकृति प्रदान गर्नुभएकोमा डा. कान्ता भट्टराईप्रति शब्दयात्रा प्रकाशन परिवार हार्दिक आभार प्रकट गर्दछ ।
नरनाथ लुइटेललाई हास्यव्यङ्ग्य सम्मान समर्पण गरिने
शब्दयात्रा प्रकाशनले २०८१ सालको ‘शब्दयात्रा रुद्रलाल शर्मा हास्यव्यङ्ग्य सम्मान’ हास्यव्यङ्ग्यकार नरनाथ लुइटेल (भोजपुर) मा समर्पण गर्ने भएको छ । शब्दयात्रा प्रकाशनद्वारा गठित सम्मान्य व्यक्तित्व चयन समितिको बैठकले उहाँलाई सम्मान गर्ने निर्णय गरेको हो । उहाँ ‘सिस्नुपानी नेपाल’ नामक संस्थाका संस्थापकमध्येका एक तथा हास्यव्यङ्ग्य पत्रिका ‘फित्कौली डटकम’ का सञ्चालक–सम्पादक हुनुहुन्छ । उहाँले हास्यव्यङ्ग्य विधाका विभिन्न कृतिहरूको लेखन तथा नेपालको हास्यव्यङ्ग्य साहित्यसम्बन्धी अनुसन्धान गर्नुभएको छ । उहाँजस्ता साधकमा सम्मान समर्पण गर्न पाउनु शब्दयात्रा प्रकाशनको सौभाग्य हो । यस सम्मानको कोष व्यवस्थापन हास्यव्यङ्ग्यकार शारदाप्रसाद शर्मा (काभ्रेपलाञ्चोक) ले गर्नुभएको हो । सम्मान आगामी चैत महिनामा समर्पण गरिनेछ । सम्मान ग्रहण गर्न स्वीकृति प्रदान गर्नुभएकोमा नरनाथ लुइटेलप्रति शब्दयात्रा प्रकाशन परिवार हार्दिक आभार प्रकट गर्दछ ।
शब्दयात्रा प्रकाशनमा विद्यार्थीहरूको शैक्षिक भ्रमण
काभ्रेपलाञ्चोक जिल्लाको श्रीखण्डपुरस्थित श्रीखण्डपुर माध्यमिक विद्यालयका विद्यार्थीहरूले शैक्षिक भ्रमण गर्ने क्रममा आज शब्दयात्रा प्रकाशनको भ्रमण गरे र विभिन्न संरचनाहरूको अवलोकन गरे । उनीहरूका साथमा पाँचजना शिक्षकहरू पनि आउनुभएको थियो । विद्यार्थीहरूले त्यहाँका सालिकहरूका विषयमा जिज्ञासा राखे । कस्ता मान्छेको सालिक राखिन्छ, यहाँ सालिक राखिएका मान्छेहरू को–को हुन् र उनीहरूको सालिक राख्नुको कारण के हो भनेर जानकारी गराइयो । उनीहरूले पुस्तकालय हेरे, अनुसन्धान कक्ष हेरे र पुस्तकका बारेमा जिज्ञासा राखे । उनीहरूलाई बताइयो र शब्दयात्रा प्रकाशनका तर्फबाट हरेक विद्यार्थीलाई बालसाहित्यका एक–एकवटा पुस्तक उपहार पनि दिइयो । उनीहरूले मन्दिरका विषयमा जिज्ञासा राखे । सरस्वतीको मन्दिर चिनाएपछि उनीहरूले सरस्वतीको मूर्तिलाई ढोगे । नीलकण्ठेश्वर महादेवको दर्शन गरे । एक सय आठ शिवलिङ्गको परिक्रमा गरे । हाइकुघरका अगाडि उभिएर तस्बिर खिचाउन भने । एकजना विद्यार्थीले ‘मैले यहाँबाट छात्रवृत्ति पाएको छु’ भनेर आफूलाई चिनाए । निकै बेर रमाएपछि उनीहरू फर्किए । यसको संयोजन गरिदिनुभएकोमा संयोजक शिव बन्जाराप्रति शब्दयात्रा प्रकाशन हार्दिक आभार प्रकट गर्दछ ।
भजनमा आधुनिकीकरण सम्बन्धी विचारगोष्ठी
भक्तपुरमा हिजो फागुन ७ गते ‘भजनको लेखन, सङ्गीत तथा गायनमा आधुनिकीकरण’ विषयक विचारगोष्ठीको आयोजना गरियो । कार्यक्रमका आयोजक कला–संस्कृति भजन महागुठी भक्तपुरका संस्थापक अध्यक्ष डा. इन्दुल केसी हुनुहुन्थ्यो । कार्यक्रममा शब्दयात्रा प्रकाशनका संस्थापक अध्यक्ष हरि मञ्जुश्रीलाई भजनलेखक, सङ्गीतकार र गायकका रूपमा प्रमुख वक्ता बनाइएको थियो । जम्मा २ घण्टा लामो त्यस कार्यक्रममा उहाँको मन्तव्यका लागि ४५ मिनेट समय छुट्याइएको थियो । त्यति समयभित्र उहाँले आफ्नो भनाइ प्रस्तुत गर्नुभयो । त्यसपछि रङ्गकर्मी हरिबहादुर थापा, वाराहीपीठका अध्यक्ष अनन्तप्रसाद धौभडेल, कवि विष्णु ओली, भजनलेखक ढुण्डिराज पोखरेल, भजनगायक प्रताप राना, गायिका कमला गौतम आदिले उहाँको मन्तव्यलाई लिएर आआफ्नो दृष्टिकोण प्रस्तुत गर्नुभयो ।
कार्यक्रममा कवि पदम दाहाल र जयनारायण नेपाल, आख्यानकार प्रजापति तिमिल्सिना, गायक सत्यनारायण मानन्धर, शिक्षासेवी पशुपतिमान प्रधान आदिका साथै भक्तपुरका विभिन्न भजन समूहका गायक–गायिका तथा सङ्गीत प्रशिक्षकहरूको उपस्थिति थियो । कार्यक्रमको सभापतित्व डा. इन्दुल केसीले, आतिथ्य रङ्गकर्मी हरिबहादुर थापा र वाराहीपीठका अध्यक्ष अनन्तप्रसाद धौभडेलले तथा सञ्चालन सञ्चारकर्मी शिव बन्जाराले गर्नुभएको थियो ।
एबीसीडी अनलाइन पत्रिकाका सम्पादक कृष्ण किसीका अनुसार भजनको लेखन, सङ्गीत तथा गायनमा आधुनिकीकरण विषयक विचारगोष्ठी भक्तपुरमा पहिलोपटक आयोजना गरिएको हुन सक्छ ।
आरती समाजलाई शब्दयात्रा प्रकाशनबाट आर्थिक सहयोग
शब्दयात्रा प्रकाशनले काठमाडौँ शङ्खमूलको त्रिवेणी गङ्गा आरती समाजलाई ११ हजार २ सय ५० रुपियाँ आर्थिक सहयोग गरेको छ । उक्त रकम शब्दयात्रा प्रकाशनका तर्फबाट आजीवन सदस्य पूर्वप्रशासक तथा कवि चन्द्रबहादुर खड्काले आरती समाजका लागि उपसंयोजक भोगेन्द्र शर्मालाई प्रदान गर्नुभएको छ ।
शब्दयात्रा प्रकाशनका आजीवन सदस्य कवि अच्युत अधिकारीद्वारा लिखित ‘मेनका’ कवितासङ्ग्रहको सार्वजनिकीकरण समारोह कोटेश्वरको दोभान रेस्टुरेन्टमा हिजो फागुन ४ गते आयोजना गरिएको थियो । शब्दयात्रा प्रकाशनको आयोजनामा भएको उक्त समारोहमा उक्त पुस्तक श्रोता–दर्शकदीर्घामा रहनुभएका महानुभावहरूले स्वेच्छिक मूल्यमा खरिद गर्दा उठेको उक्त रकम आरती समाजलाई सहयोगस्वरूप प्रदान गरिएको हो । पुस्तकको मूल्य २ सय रुपियाँ राखिएको छ ।
विवाहको स्वर्णमहोत्सवमा ‘मेनका’ सार्वजनिक
शब्दयात्रा प्रकाशनका आजीवन सदस्य कवि अच्युत अधिकारी र रुक्मिणी अधिकारीको वैवाहिक स्वर्णमहोत्सव शब्दयात्रा प्रकाशनको आयोजनामा हिजो काठमाडौँमा भव्य रूपमा मनाइयो । त्यस बखत कवि अच्युत अधिकारीद्वारा लिखित तथा शब्दयात्रा प्रकाशनद्वारा २४३ औँ प्रकाशनपुष्पका रूपमा प्रकाशित ‘मेनका’ नामक कवितासङ्ग्रहको सार्वजनिकीकरण गरियो । शब्दयात्रा प्रकाशनले आफ्ना आजीवन सदस्यहरूका विशेष दिनहरूमा यस्तै उत्सवको आयोजना गर्ने गरेको छ ।
हिजो आयोजित वैवाहिक स्वर्णमहोत्सव कार्यक्रममा प्रमुख अतिथि शिक्षासेवी रामप्रसाद अधिकारी, सभापति शब्दयात्रा प्रकाशनका संस्थापक अध्यक्ष हरि मञ्जुश्री र कृतिकार अच्युत अधिकारीले संयुक्त रूपमा ‘मेनका’ लाई सार्वजनिक गर्नुभयो । कार्यक्रममा कवि अच्युत अधिकारीको व्यक्तित्व र ‘मेनका’ को विशेषताका बारेमा कृष्णमुरारि कोइरालाले जानकारी गराउनुभएको थियो भने तारादत्त पनेरूले शुभकामना मन्तव्य व्यक्त गर्नुभएको थियो । ‘मेनका’ भित्रका तीनवटा कविता डा. इन्दुल केसी, केदारनाथ तिमल्सिना र प्रजापति तिमल्सिनाले वाचन गर्नुभएको थियो । प्रकाशन संस्थाका तर्फबाट पुण्यवती घलेले कृतिकारमा ‘मेनका’ समर्पण गर्नुभएको हिजोको कार्यक्रममा शब्दयात्रा प्रकाशनका तर्फबाट तयार पारिएको शुभकामनापत्र कवि ढुण्डिराज पोखरेलले कवि अच्युत अधिकारी र रुक्मिणी अधिकारीमा समर्पण गर्नुभएको थियो । त्यसपछि विभिन्न महानुभावहरूले अच्युत अधिकारीमा उपहार प्रदान गर्नुभएको थियो । कार्यक्रममा ‘मेनका’ स्वेच्छिक रूपमा खरिद गर्ने महानुभावहरूबाट उठेको ११ हजार २ सय ५० रुपियाँ शब्दयात्रा प्रकाशनका तर्फबाट चन्द्रबहादुर खड्काले शङ्खमूल त्रिवेणी गङ्गा आरती समाजका लागि उपसंयोजक भोगेन्द्र शर्मालाई हस्तान्तरण गर्नुभएको थियो ।
शिक्षासेवी लोकेन्द्र ढकालले समुद्घाटन गर्नुभएको हिजोको कार्यक्रमको सञ्चालन आजीवन सदस्य कृष्णमणि कुइकेलले गर्नुभएको थियो । मञ्चस्थ महानुभावहरूलाई रुद्राक्षमाला अर्पण शङ्कर मानन्धरले गर्नुभएको हिजोको कार्यक्रममा प्रा. केदारनाथ श्रेष्ठले शब्दयात्रा प्रकाशनले यस्ता कार्यक्रमलाई निरन्तरता दिने अपेक्षा गर्दै कार्यक्रमको समीक्षासहित विसर्जन गर्नुभएको थियो । कार्यक्रममा कृतिकार अच्युत अधिकारीले मन्तव्यका क्रममा आफ्नो वैवाहिक स्वर्णमहोत्सवको अवसरमा कृति सार्वजनिक गर्ने कार्यक्रमको आयोजना गरिदिएकोमा शब्दयात्रा प्रकाशनलाई धन्यवाद दिनुभएको थियो । कार्यक्रमको व्यवस्थापन सहयोग सङ्गीता केसीले गर्नुभएको थियो ।
डा. तीर्थबहादुर श्रेष्ठमा पुरस्कार समर्पण
शब्दयात्रा प्रकाशनको टोलीले आज वनस्पतिविज्ञ डा. तीर्थबहादुर श्रेष्ठको घरैमा पुगेर ‘शब्दयात्रा टीकाराम–रामेश्वरी चालिसे ललितपुर प्रतिभा पुरस्कार’ समर्पण गरेको छ । माघ २६ गते शब्दयात्रा प्रकाशनको सभाकक्षमा आयोजना गरिएको पुरस्कार समर्पण समारोहमा उहाँ शारीरिक अस्वस्थताका कारणले उपस्थित हुन सक्नुभएको थिएन । पुरस्कार समर्पण गर्न उहाँको निवासमा गएको टोलीमा हरि मञ्जुश्री, रामप्रसाद अधिकारी, केदारनाथ तिमल्सिना, पुण्यवती घले, नवीना श्रेष्ठ र सङ्गीता केसी हुनुहुन्थ्यो । पुरस्कारका कोष व्यवस्थापक डा. मुकेशकुमार चालिसे र जनककुमारी चालिसे पनि उपस्थित हुनुहुन्थ्यो । पुरस्कार समर्पण गर्ने क्रममा केदारनाथ तिमल्सिनाले रुद्राक्षमाला, नवीना श्रेष्ठले उपहार, हरि मञ्जुश्रीले शब्दयात्रा पट्ट, डा. मुकेशकुमार चालिसेले भेटी र रामप्रसाद अधिकारीले अभिवन्दनापत्र समर्पण गर्नुभएको थियो । सामग्री व्यवस्थापन पुण्यवती घले र सङ्गीता केसीले गर्नुभएको थियो ।
जयनारायण नेपालबाट आर्थिक सहयोग
पूर्वप्रशासक तथा कवि जयनारायण नेपालले शब्दयात्रा प्रकाशनलाई २ हजार ५ सय रुपियाँ आर्थिक सहयोग गर्नुभएको छ । उहाँले सो रकम शब्दयात्रा प्रकाशनका संस्थापक अध्यक्ष हरि मञ्जुश्रीलाई हस्तान्तरण गर्नुभएको हो । यस सहयोगका लागि शब्दयात्रा प्रकाशन परिवार पूर्वप्रशासक तथा कवि जयनारायण नेपालप्रति हार्दिक आभार व्यक्त गर्दछ ।
शब्दयात्रा प्रकाशनबाट विभिन्न पुरस्कारहरू समर्पण
शब्दयात्रा प्रकाशनले २०८१ सालको दोस्रो चरणमा समर्पण गर्ने पुरस्कारहरू हिजो २०८१ माघ २६ गते शनिबार शब्दयात्रा प्रकाशनको सभाकक्षमा आयोजित समारोहमा समर्पण गरेको छ । समारोहमा गीतकार तथा सङ्गीतकार श्याम तमोट, साहित्यकार अनन्त कोइराला, आध्यात्मिक लेखक टहलदास शिवाकोटी ‘यात्री’, प्रशासक हुमकला पाण्डे, इन्जिनियर दिनेश चौधरी, शिक्षासेवी तथा कवयित्री निर्मलाकुमारी यगोल श्रेष्ठ र लोकसङ्गीतका अन्वेषक एवं मौलिक लोकभाकाका सङ्कलक तथा गायक नवीन खड्का र गायिका पुस्तका खड्कालाई पुरस्कृत गरिएको थियो । पुरस्कृत व्यक्तित्व सबैलाई हरि मञ्जुश्रीले शब्दयात्रा पट्ट लगाइदिनुभएको थियो ।
कवि कृष्ण जोशीले कोष व्यवस्थापन गर्नुभएको ‘शब्दयात्रा कृष्ण जोशी भोजपुर प्रतिभा पुरस्कार, २०८१’ गीतकार तथा सङ्गीतकार श्याम तमोटमा समर्पण गरियो । उहाँलाई पूर्वप्रशासक तथा कवि जयनारायण नेपालले रुद्राक्षमाला र उपहार तथा कवि कृष्ण जोशीकी अर्धाङ्गिनी सरस्वती जोशीले रकम र अभिवन्दनापत्र समर्पण गर्नुभएको थियो ।
राम–रेवती प्रतिष्ठानले कोष व्यवस्थापन गरेको ‘शब्दयात्रा डा. शालिग्राम शर्मा रौतहट प्रतिभा पुरस्कार, २०८१’ साहित्यकार अनन्त कोइरालामा समर्पण गरियो । उहाँलाई चिकित्सक तथा कवि डा. छत्रपति दाहालले रुद्राक्षमाला र उपहार तथा शिक्षासेवी रामप्रसाद अधिकारीले रकम र अभिवन्दनापत्र समर्पण गर्नुभएको थियो ।
बनेपा प्रकाशन प्रा. लि. का तर्फबाट गीता मञ्जुश्री अधिकारीले कोष व्यवस्थापन गर्नुभएको ‘शब्दयात्रा दुर्गाप्रसाद–युगला अधिकारी आध्यात्मिक साहित्य पुरस्कार, २०८१’ आध्यात्मिक लेखक टहलदास शिवाकोटी ‘यात्री’ मा समर्पण गरियो । उहाँलाई महाकाव्यकार दुर्गाप्रसाद अधिकारीका भाइ दण्डपाणि अधिकारीले रुद्राक्षमाला, उपहार, रकम र अभिवन्दनापत्र समर्पण गर्नुभएको थियो ।
पूर्वप्रशासक तथा गायिका उर्मिला श्रेष्ठले कोष व्यवस्थापन गर्नुभएको ‘शब्दयात्रा उर्मिला श्रेष्ठ प्रशासनिक महिला प्रतिभा पुरस्कार, २०८१’ प्रशासक हुमकला पाण्डेमा समर्पण गरियो । उहाँलाई कवि विष्णु ओलीले रुद्राक्षमाला र उपहार तथा प्रा. केदारनाथ श्रेष्ठले रकम र अभिवन्दनापत्र समर्पण गर्नुभएको थियो ।
पूर्वप्रशासक तथा कूटनीतिज्ञ सूर्यप्रसाद श्रेष्ठले कोष व्यवस्थापन गर्नुभएको ‘शब्दयात्रा सूर्यप्रसाद श्रेष्ठ कर्मशीलता पुरस्कार, २०८१’ इन्जिनियर दिनेश चौधरीमा समर्पण गरियो । उहाँलाई पूर्वप्रशासक तथा लेखक द्रोणप्रसाद श्रेष्ठले रुद्राक्षमाला र उपहार तथा पूर्वप्रशासक तथा लेखक शङ्कर मानन्धरले रकम र अभिवन्दनापत्र समर्पण गर्नुभएको थियो ।
समाजसेवी लीलाबहादुर केसीको स्मृतिमा निरोज थापाले कोष व्यवस्थापन गर्नुभएको ‘शब्दयात्रा लीला–मध्यमार्ग काभ्रेपलाञ्चोक प्रतिभा पुरस्कार, २०८१’ इन्जिनियर दिनेश चौधरीमा समर्पण गरियो । उहाँलाई हरि मञ्जुश्री र पत्रकार प्रदीप केसीले रुद्राक्षमाला, उपहार, रकम र अभिवन्दनापत्र संयुक्त रूपमा समर्पण गर्नुभएको थियो ।
समाजसेवी तथा साहित्यकार लीलादेवी श्रेष्ठले कोष व्यवस्थापन गर्नुभएको ‘शब्दयात्रा प्रा. केदारनाथ–लीला श्रेष्ठ सङ्खुवासभा प्रतिभा पुरस्कार, २०८१’ लोकसङ्गीतका अन्वेषक एवं मौलिक लोकभाकाका सङ्कलक तथा गायक नवीन खड्का र गायिका पुस्तका खड्कालाई संयुक्त रूपमा समर्पण गरियो । उहाँहरू हाल अमेरिकामा रहनुभएकाले उहाँहरूका तर्फबाट बहिनी लक्ष्मी खड्काले पुरस्कार ग्रहण गर्नुभएको थियो । उहाँलाई कोष व्यवस्थापक लीलादेवी श्रेष्ठले रुद्राक्षमाला, उपहार, रकम र अभिवन्दनापत्र समर्पण गर्नुभएको थियो ।
वैज्ञानिक डा. मुकेशकुमार चालिसे र जनककुमारी चालिसेले कोष व्यवस्थापन गर्नुभएको ‘क्याप्टेन टीकाराम — रामेश्वरी चालिसे ललितपुर प्रतिभा पुरस्कार, २०८१’ ग्रहण गर्न शारीरिक अस्वस्थताले गर्दा उपस्थित हुन नसक्नुभएका वनस्पतिविज्ञ डा. तीर्थबहादुर श्रेष्ठलाई आगामी फागुन ४ गते आइतबार उहाँको निवासमै गई पुरस्कार समर्पण गर्ने जानकारी समारोहमा गराइएको थियो ।
ह्याप्पी बर्थडे नभनौँ भन्ने सन्देश दिइएको जन्मदिनको शुभकामना गान सार्वजनिक
शब्दयात्रा प्रकाशनका आजीवन सदस्य तथा आध्यात्मिक लेखक केदारनाथ तिमल्सिनाले लेख्नुभएको जन्मदिनको शुभकामना गान यही माघ २६ गते शब्दयात्रा प्रकाशनको सभाकक्षमा आयोजित समारोहमा सार्वजनिक गरिएको छ । यस गानमा उहाँले पनि स्वर दिनुभएको छ र गानलाई उहाँले नै सार्वजनिक गर्नुभएको हो । उहाँ ८१ वर्षका हुनुहुन्छ ।
जन्मदिनमा बत्ती निभाउने, केक काट्ने, जुठो खुवाउने र अङ्ग्रेजी भाषाका केही शब्द बोल्दै थपडी बजाउने प्रवृत्ति बढ्दै गएको सन्दर्भमा हाम्रो मौलिक संस्कृति पनि कायम रहोस् र जन्मदिन मनाउने परिपाटीलाई आधुनिक स्वरूप पनि दिन सकियोस् भन्ने उद्देश्यले जन्मदिनको शुभकामना गान तयार पारिएको हो । अरूको सांस्कृतिक र भाषिक दासता अस्वीकार गर्ने र आफ्नै संस्कृति र भाषाको जगेर्ना गर्न खोज्ने नेपालीहरूले आफ्नो, आफ्ना परिवारको र आफन्तको जन्मदिनमा उक्त गानको उपयोग गर्नुहुनेछ भन्ने आशा गरिएको छ । गानमा हाम्रो …… को र हाम्री …… को भनिएको छ । जन्मोत्सवमा योे गान गाउँदा जुन व्यक्तिको जन्मोत्सव हो, त्यही व्यक्तिको नाउँ या नाता भन्नुपर्ने हुन्छ । यस गानले ‘ह्याप्पी बर्थडे टु यु’ भन्नुको सट्टा ‘दीर्घ जीवन रहोस् सुख–शान्ति सहितको’ भन्नु वेश हुन्छ भन्ने सन्देश दिएको छ ।
यस गानका सङ्गीतकार हरि मञ्जुश्री, सुपरिवेक्षक मच्छेश्वर सापकोटा र बाद्यसंयोजक बालकृष्ण सेवाचार्य हुनुहुन्छ । यो गान इ. रोशन मञ्जुश्री अधिकारी, सरस्वती सापकोटा, गीता अधिकारी, केदारनाथ तिमल्सिना र रिभब सेवाचार्यले गाउनुभएको हो । यो गान अक्षरधाम यु–ट्युब च्यानलबाट सुन्न र डाउनलोड गर्न सकिन्छ ।