Shabdayatra Prakashan

शब्दयात्रा प्रकाशनले गत साउन ८ गते शनिबार काभ्रे जिल्लामा सक्रिय रहेका कलाकारहरूलाई आफ्नो कार्यालयमा आमन्त्रण ग¥यो । आमन्त्रित कलाकारहरूमध्ये मच्छेश्वर सापकोटा, सरस्वती सापकोटा, हरि कर्माचार्य, रामहरि न्यौपाने, शर्मिला श्रेष्ठ, दिनेश लामा, सुरेन्द्रकुमार श्रेष्ठ, सुरेन्द्र श्रेष्ठ, मन्दिरा केसी, विनोद बन्जारा, रविन्सन श्रेष्ठ, प्रदीप केसी, मदन विष्ट, रामहरि अधिकारी, अनीश बस्नेत, सन्तोष ताम्राकार आदिको उपस्थिति रहेको थियो ।
शब्दयात्रा प्रकाशनका प्रबन्धक शारदाप्रसाद शर्माले कलाकारहरूलाई स्वागत गरिसकेपछि अध्यक्ष हरि मञ्जुश्रीले शब्दयात्रा प्रकाशनसँग भएको स्रोत–साधनलाई उपयोग गरेर आफ्नो कलालाई राष्ट्रिय र अन्तर्राष्ट्रिय व्याप्ति दिन र काभ्रे जिल्लाबाट मुलुकलाई ‘शब्दयात्रा बहुआयामिक अनुसन्धान प्रतिष्ठान’ नामक अनुसन्धान केन्द्र उपहार दिएर काभ्रेली कलाकारसँग भएको क्षमता नेपालभरि देखाइदिन कलाकार मित्रहरूलाई आग्रह गर्नुभएको थियो ।
कार्यक्रममा मच्छेश्वर सापकोटा, हरि कर्माचार्य, रामहरि न्यौपाने, शर्मिला श्रेष्ठ, दिनेश लामा, विनोद बन्जारा र सुरेन्द्रकुमार श्रेष्ठले आ–आफ्नो धारणा राख्नुभएको थियो ।
कलाकर्मीहरूबीच भएको विचार–विमर्शपछि आगामी भदौ २५ गते शनिबार कला क्षेत्रको विभिन्न विधामा काभ्रे जिल्लासँग सम्बन्धित कलाकारहरूको वृहत् भेला बनेपामा बोलाउने निर्णय गर्दै त्यसका लागि गायक–सङ्गीतकार हरि कर्माचार्यलाई संयोजक तोकिएको थियो ।

शब्दयात्रा प्रकाशनका अध्यक्ष ग्रन्थसम्पादक हरि मञ्जुश्रीको सम्पादनमा कर्मयोगी बद्रीविक्रम थापा स्मृति सेवा गुठीको वार्षिक प्रकाशनका रूपमा यस वर्ष पनि ‘सेवा नेपाल’ प्रकाशन हुने भएको छ । २०७३ सालको ‘सेवा नेपाल’ लाई ‘डा. स्वामी प्रपन्नाचार्य श्रद्धाञ्जली अङ्क’ बनाइएको छ ।
‘डा. स्वामी प्रपन्नाचार्य श्रद्धाञ्जली अङ्क’ मा भद्रकुमारी घले, प्रा. शिवगोपाल रिसाल, रमा शर्मा, भीमबहादुर अधिकारी, हरि मञ्जुश्री, डा. चिन्तामणि योगी, किरण थापा, नित्यराज पाण्डे, पार्थमणि भट्टराई, शीला पन्त आदिले डा. स्वामी प्रपन्नाचार्यको स्मृति र सम्मानमा लेखेका लेख–संस्मरणहरूसहित अन्य विविध सामग्रीहरू राखिएका छन् ।
आगामी साउन ११ गते मङ्गलबार काठमाडौँमा ‘सेवा नेपाल’ लाई सार्वजनिक गरिने भएको छ ।

शब्दयात्रा प्रकाशनले ‘डा. सुरेशराज शर्मा’ नामक लघुकाव्य प्रकाशन गर्ने भएको छ । लघुकाव्य श्रीधर प्याकु¥यालले लेख्नुभएको हो । उक्त काव्यको केही अंश ‘नेपालभूमि साप्ताहिक’ मा धारावाहिक रूपमा दुई वर्षअगाडि प्रकाशित भएको थियो ।
हरि मञ्जुश्रीद्वारा लिखित तथा २०६६ सालमा प्रकाशित ‘शैक्षिक शिरोभूषण डा. सुरेशराज शर्मा’ नामक पुस्तिकालाई आधार बनाएर लेखिएको यो लघुकाव्यको प्रकाशनका लागि लाग्ने खर्च डा. भास्कर हुमागाईं र ‘अक्षरधाम’ (साहित्यिक पत्रिका) का सम्पादक–प्रकाशक रश्मि मञ्जुश्री अधिकारीले शब्दयात्रा प्रकाशनलाई उपलब्ध गराउनुभएको छ ।
उक्त लघुकाव्य आगामी भदौ महिनाको दोस्रो साता बनेपामा आयोजना गरिने कार्यक्रममा सार्वजनिक गर्ने निधो गरिएको छ ।

शब्दयात्रा प्रकाशनले ‘भक्तिचिन्तन’ नामक आध्यात्मिक साहित्य प्रकाशन गर्ने भएको छ । यस पुस्तकको सम्पादन ‘नेपालभूमि साप्ताहिक’ का सम्पादक सुमन खड्का र समाजसेवी जयप्रकाश गुरागाईंबाट भइरहेको छ ।
नवराज धितालको ‘भक्तिपुष्प’ र हरि मञ्जुश्रीको ‘अध्यात्म चिन्तन’ पुस्तकका सामग्रीहरूलाई समेटेर तयार पार्दै गरिएको ‘भक्तिचिन्तन’ को प्रकाशनार्थ लाग्ने सम्पूर्ण खर्च भगवान् गौरीशङ्करका उपासक बाबा विश्वनाथले उपलब्ध गराउनुभएको छ ।

शब्दयात्रा प्रकाशनले काभ्रे जिल्लाका राजनीतिकर्मी तथा समाजसेवी गणेशदास उलकको जीवनी, व्यक्तित्व र योगदान झल्काउने पुस्तक ‘गणेशदास’ प्रकाशन गर्न लागेको छ । शब्दयात्रा प्रकाशनको साप्ताहिक रेडियो कार्यक्रम ‘शब्दसञ्चार’ का सञ्चालक शिव बन्जाराको सम्पादनमा तयार पारिएको उक्त पुस्तकमा गणेशदास उलकका माध्यमबाट काभ्रे जिल्लाको राजनीतिक–सामाजिक आन्दोलनको इतिहासलाई अभिलेखबद्ध गराइएको छ ।
‘गणेशदास’ मा गणेशदास उलकमाथि मोहन दुवाल, पङ्कज चित्रकार आदिले गरेका टिप्पणीहरू पनि समावेश गरिएका छन् । उक्त पुस्तक शब्दयात्रा प्रकाशनको ६६ औँ प्रकाशनपुष्पका रूपमा आगामी साउन महिनाको पहिलो साता बजारमा आउने भएको छ ।

काभ्रे गोसाइँस्थानमा बसी समाधिस्थ हुनुभएका रमेश गिरि बाबाका विषयमा शब्दयात्रा प्रकाशनबाट पुस्तक प्रकाशन हुन लागेकाले बाबामा श्रद्धा अर्पण गर्दै उक्त पुस्तकको प्रकाशनार्थ आर्थिक सहयोग गर्न चाहने व्यक्तिहरूले सुमन खड्का (९७५१०६३९७१) वा पदमनाथ ढुङ्गाना (९८४११०७३१०) वा शिवहरि के. सी. (९८४१६५२७४८) सँग सम्पर्क राख्न शब्दयात्रा प्रकाशनले अनुरोध गरेको छ । रु. ५००।– भन्दा बढी आर्थिक सहयोग गर्नेहरूको नाम र रकम पुस्तकमा प्रकाशन गरिने जानकारी पनि गराइएको छ ।

शब्दयात्रा प्रकाशनले ‘फालिकोटको फाली’ नामक आत्मकथात्मक कृति प्रकाशन गर्न लागेको छ । यो कृति भोजपुर जिल्लाको फालिकोटमा जन्मेर शिक्षणसेवाबाट निवृत्त भएका ज्ञानेन्द्रराज भट्टराईले लेख्नुभएको हो ।
यस कृतिमा नेपाल कम्युनिस्ट पार्टीका संस्थापक पुष्पलाल श्रेष्ठ, जननेता मदन भण्डारी, वामनेता केशरमणि पोखरेल, वामनेता तथा साहित्यकार मोदनाथ प्रश्रित, पूर्वप्रधानसेनापति रुक्माङ्गद कटुवाल, माओवादी नेता राम कार्की, काङ्ग्रेस नेता बलबहादुर के. सी., पूर्वअञ्चलाधीश जियाउल हक, कवि युद्धप्रसाद मिश्र आदिसँग सम्बन्धित अन्तरङ्ग संस्मरणहरू समेटिएको छ ।

शब्दयात्रा प्रकाशनले आगामी भदौ महिनामा सम्मान गर्ने विभिन्न चार विधाका सम्मानहरूका लागि उपयुक्त व्यक्ति वा संस्थाको नाउँ सिफारिस गरी आगामी साउन १५ गतेभित्र पठाउन सबैमा अनुरोध गरेको छ ।
भदौ महिनामा गरिने सम्मानहरू योगेन्द्र खत्रीद्वारा व्यवस्थापित साहित्यिक पत्रिका सम्मान, हरिगोपाल प्रधानद्वारा व्यवस्थापित फोटो पत्रकारिता सम्मान, प्रेमबहादुर खड्काद्वारा व्यवस्थापित आध्यात्मिक पत्रकारिता सम्मान र नेपालभूमि साप्ताहिकद्वारा व्यवस्थापित नेपालभूमि स्तम्भकार सम्मान रहेका छन् ।
ती सम्मानहरूबाट गत वर्ष क्रमशः उन्नयन साहित्यिक पत्रिका, फोटो पत्रकार श्याम चित्रकार, शारदा उपाध्याय र तीर्थ कोइराला सम्मानित भएका थिए ।