Shabdayatra Prakashan

शब्दयात्रा प्रकाशनले काभ्रेमा क्रियाशील दुईजना पत्रकारलाई हरेक वर्षको भदौ महिनामा प्रदान गर्ने गरेको कदरपत्रमध्ये २०७३ सालका लागि ‘काभ्रे टाइम्स साप्ताहिक’ का कार्यकारी सम्पादक रमेशप्रसाद न्यौपाने र ‘कान्तिपुर’ दैनिकका काभ्रे संवाददाता नगेन्द्र अधिकारीलाई प्रदान गर्ने भएको छ ।
पत्रकारद्वय रमेशप्रसाद न्यौपाने र नगेन्द्र अधिकारीलाई उहाँहरूले शब्दयात्रा प्रकाशनका लागि आ–आफ्नो क्षेत्रबाट गर्नुभएको योगदानको कदरस्वरूप कदरपत्र प्रदान गर्न लागिएको हो ।
दुवैजनाको कदरसम्बन्धी आर्थिक व्यवस्थापन शब्दयात्रा प्रकाशन संरक्षण समितिका सदस्य अग्रज पत्रकार हरिगोपाल प्रधानबाट हुने गरेको छ ।
शब्दयात्रा प्रकाशनको स्थापना भएको पाँचौँ वार्षिक दिवसको अवसर पारी आगामी भदौ महिनाको दोस्रो साता बनेपामा आयोजना गरिने विशेष समारोहमा उहाँहरूलाई कदरपत्र प्रदान गरिनेछ ।
शब्दयात्रा प्रकाशनले यसअघि प्रदीप के. सी, रामकृष्ण चापागाईं, विष्णुप्रसाद चौलागाईं, रमा दाहाल, नवराज बजगाईं र युवराज पाण्डेलाई कदरपत्र प्रदान गरिसकेको छ ।

शब्दयात्रा प्रकाशनबाट २०७० साल माघमा हरि मञ्जुश्रीको सम्पादनमा प्रकाशित ‘नेपाली पत्रकारितामा निर्भीक’ नामक अभिनन्दनग्रन्थका नायक तथा यस संस्थाका शुभेच्छुक अग्रज पत्रकार डिल्लीराम निर्भीकको निधनप्रति शोकाकुल बन्दै उहाँको आत्मशान्तिको कामना गरेको छ र उहाँका परिवारजनप्रति हार्दिक समवेदना व्यक्त गरेको छ ।
डिल्लीराम निर्भीक १९९५ साल माघ २ गते इलाममा जन्मनुभएको थियो भने उहाँको निधन २०७३ साल साउन १९ गते काठमाडौँमा भएको थियो ।

शब्दयात्रा प्रकाशनको साधारणसभा आगामी भदौ १४ गते मङ्गलबार बिहान १० बजे प्रकाशनको आफ्नै सभाकक्षमा बस्ने भएको छ ।
शब्दयात्रा प्रकाशनका प्रबन्धक शारदाप्रसाद शर्माका अनुसार सभामा विभिन्न विषयहरू छलफल गरी अनुमोदन गरिनेछन् र पारित गर्नका लागि चारवटा प्रस्तावहरू प्रस्तुत हुनेछन् ।

शब्दयात्रा प्रकाशनद्वारा प्रकाशित ६६ औँ प्रकाशनपुष्प ‘गणेशदास’ को दोस्रो संस्करण गर्न थालिएको छ । शब्दयात्रा पत्रकार समाजसँग आबद्ध सञ्चारकर्मी शिव बन्जाराको सम्पादन रहेको उक्त पुस्तकलाई गत साउन ५ गते सार्वजनिक गरिएको थियो ।
सार्वजनिक गरिएको एक हप्ताभित्रमै उक्त पुस्तक सकिएको र पुस्तकको मागचाहिँ बढिरहेको हुनाले दोस्रो संस्करण गर्नुपरेको हो ।

शब्दयात्रा प्रकाशनका अध्यक्ष हरि मञ्जुश्रीद्वारा सम्पादित ‘सेवा नेपाल’ को ‘डा. स्वामी प्रपन्नाचार्य श्रद्धाञ्जली अङ्क’ गत साउन ११ गते सार्वजनिक गरिएको छ । कर्मयोगी बद्रीविक्रम थापा स्मृति सेवा गुठीद्वारा काठमाडौँमा आयोजित विशेष समारोहमा प्रमुख अतिथिका रूपबाट पूर्वराष्ट्रपति डा. रामवरण यादवले उक्त अङ्कलाई सार्वजनिक गरेका थिए ।
उक्त अवसरमा हरेक दुई वर्षमा प्रदान गरिने ५१ हजार रुपियाँसहितको ‘सेवा पुरस्कार नेपाल’ थाई नेपाली सेवासङ्घलाई र डा. लोकविक्रम थापाद्वारा स्थापित ‘बद्रीविक्रम चरित्र–निर्माण पुरस्कार’ हिन्दू विद्यापीठ नेपालका छात्र निशान ओलीलाई प्रदान गरिएको थियो ।
गुठीका अध्यक्ष डा. सत्यमोहन जोशीको सभापतित्वमा सम्पन्न उक्त समारोहमा प्रा. डा. सुरेन्द्र के. सी., डा. चिन्तामणि योगी, सम्पादक हरि मञ्जुश्री र पुरस्कृत संस्थाका उपाध्यक्ष कुमार कार्कीले मन्तव्य व्यक्त गरेका थिए । स्वागत भाषण किरण थापा र कार्यक्रम सञ्चालन सन्ध्या पहाडीले गरेको उक्त समारोहमा शब्दयात्रा प्रकाशनका तर्फबाट सुमन खड्का, सकुल थापा, रमेश पौड्याल, त्रिरत्न रन्जितकार, कविप्रसाद प्याकु¥याल र डा. विष्णु सापकोटा सहभागी भएका थिए ।

शब्दयात्रा प्रकाशनका सहृदयी मित्र अधिवक्ता तथा पत्रकार हरिप्रसाद ढुङ्गेलका पिता, शैक्षिक–सामाजिक सम्बल एवं शब्दाक्षरका साधक भीमप्रसाद ढुङ्गेल (इहलोकागमन १९९४ साल भदौ ९ गते) ले ७९ वर्षको उमेरमा दृश्यमान् स्वरूपको भौतिक विसर्जन (परलोकप्रस्थान २०७३ साल साउन १ गते) गर्नुभएकोमा त्यसबाट व्यथित बनेर यस संस्थाका सदस्यहरूले उहाँलाई सहस्र अश्रुजलबाट मानसिक तर्पण दिएका छन् । उहाँका शोकापन्न पारिवारिक सम्बन्धीहरूसमान सहवेदना अनुभूत गरिरहेका यस संस्थाका सदस्यहरूले उहाँको अदृष्ट स्वरूप ब्रह्मलीन होस् भन्ने कामनाका साथ उहाँले गर्नुभएको योगदानप्रति हृदयतः भावपूर्ण शब्दश्रद्धा समर्पण गरेका छन् ।

शब्दयात्रा प्रकाशनबाट आगामी भदौ महिनामा समर्पण गरिने चार विधाका सम्मानहरूका लागि उपयुक्त व्यक्ति वा संस्थाको चयन गरिदिन चार सदस्यीय चयन समिति निर्माण गरिएको छ ।
समितिमा एकुमाया पुन संयोजक तथा एकप्रसाद दुवाडी, सम्बोजन लिम्बू र भरतकुमार श्रेष्ठ सदस्य रहनुभएको छ । उहाँहरू चारैजना काठमाडौँ विश्वविद्यालयसँग आबद्ध हुनुहुन्छ ।
सम्मानका लागि सिफारिस प्राप्त भएका नाउँहरूमध्ये उहाँहरूबाट उपयुक्त ठानी चयन गरिएका व्यक्ति र संस्थालाई नै शब्दयात्रा प्रकाशनले सम्मान गर्नेछ ।

शब्दयात्रा प्रकाशनको आयोजनामा गत साउन ५ गते बुधबार ‘गणेशदास’ पुस्तकको सार्वजनिकीकरण, ‘जीवनको भोगाइमा गणेशदास उलक’ वृत्तचित्रको प्रदर्शन तथा समाजसेवी गणेशदास उलकको सम्मान कार्यक्रम सम्पन्न भयो । बनेपा नगरपालिकाको सभाकक्षमा सम्पन्न सो कार्यक्रमको सभापतित्व शब्दयात्रा प्रकाशनका अध्यक्ष हरि मञ्जुश्रीले र प्रमुख आतिथ्य साहित्यिक पत्रकार तथा साहित्यकार मोहन दुवालले गर्नुभएको थियो ।
संस्कृतिविद् ज्ञानकाजी मानन्धरले गणेशदास उलकबारे परिचयात्मक मन्तव्य व्यक्त गर्नुभएको सो कार्यक्रमको सञ्चालन ‘नेपालभूमि साप्ताहिक’ का सम्पादक सुमन खड्काले गर्नुभएको थियो ।
कार्यक्रममा शिव बन्जाराद्वारा सम्पादित ‘गणेशदास’ कृतिलाई साहित्यिक पत्रकार मोहन दुवाल, संस्कृतिविद् ज्ञानकाजी मानन्धर र समाजसेवी चन्द्रबहादुर खड्काबाट तथा ‘जीवनको भोगाइमा गणेशदास उलक’ वृत्तचित्रको सार्वजनिकीकरण अग्रज कलाकार तथा साहित्यकार पङ्कज चित्रकार र समाजसेवी तथा शिक्षासेवी रामप्रसाद अधिकारीबाट गरिएको थियो ।
कार्यक्रममा कृतिनायक गणेशदास उलकलाई शब्दयात्रा प्रकाशनका तर्फबाट ७७ औँ जन्मदिवसको अवसरमा सम्मान पनि गरियो । सम्मान गर्ने क्रममा सार्वजनिक गरिएको पुस्तक शिव बन्जाराले, ‘नेपालभूमि साप्ताहिक’ को एक वर्षको सङ्कलन चन्द्रबहादुर खड्काले, उपहार नैमिषारण्य गुरुकुलका गुरु राजन नेपालले र सम्मानपत्र मोहन दुवालले प्रदान गर्नुभयो भने किरीट हरि मञ्जुश्रीले लगाइदिनुभयो । कृतिनायककी अर्धाङ्गिनीलाई शब्दयात्रा प्रकाशनका तर्फबाट सकुल थापाले उपहार प्रदान गर्नुभयो ।
कार्यक्रमको अन्त्यमा गणेशदास उलकका बारेमा तयार पारिएको वृत्तचित्रको प्रदर्शन गरिएको थियो ।