Shabdayatra Prakashan

— रामचन्द्र हुमागाईं

शब्दयात्रा प्रकाशन विगत पाँच वर्षअघिदेखि काभ्रे जिल्लालाई केन्द्रभूमि बनाएर विभिन्न राष्ट्रिय गतिविधिहरू गरिरहेको छ । यस संस्थाले (क) सुमन खड्काको सम्पादनमा ‘नेपालभूमि’ विचारप्रधान राष्ट्रिय साप्ताहिक पत्रिकाको प्रकाशन र रश्मि मञ्जुश्री अधिकारीको सम्पादनमा प्रकाशित ‘अक्षरधाम’ साहित्यिक पत्रिकाको व्यवस्थापन गरिरहेको छ । सामाजिक उत्तरदायित्वको निर्वाह गर्दै ‘नेपालभूमि’ र ‘अक्षरधाम’ का हरेक अङ्क ५००÷५०० प्रति निःशुल्क वितरण गर्ने गरिएको छ । (ख) विभिन्न सहयोगीहरूको आर्थिक व्यवस्थापनमा १६ विधाका सम्मानहरूको स्थापना गरेर हरेक वर्ष ३–३ महिनाको फरकमा राष्ट्रिय व्यक्तित्वहरूमा समर्पण गरिरहेको छ । हरेक सम्मानमा ५ हजार रुपियाँ, किरीट, पुस्तक उपहार र अभिवन्दनापत्र समर्पण गरिन्छ । यसपटकदेखि ‘महिला प्रतिभा सम्मान’ थप गरिएको छ । (ग) साहित्यकार, पत्रकार र कलाकारहरूलाई आर्थिक सहयोग गर्न अक्षरसेवी सहयोग कोषको स्थापना गरेको छ । आवश्यकताका आधारमा सहयोग वितरण पनि गर्ने गरेको छ । (घ) विभिन्न साहित्यिक कार्यक्रम र शिविरहरूको आयोजना गरेको छ । (ङ) विभिन्न लेखकहरूले लेखेका विभिन्न विधाका ७५ वटा पुस्तकको प्रकाशन गरिसकेको छ । (च) रेडियो एबीसी ८९.८ मेगाहर्जबाट ‘शब्दसञ्चार’ नामक साप्ताहिक रेडियो कार्यक्रम हरेक बुधबार बेलुका ७ देखि ७ः३० बजेसम्म प्रसारण गर्ने गरेको छ । (छ) शब्दयात्रा घुम्ती पुस्तक पसलको सञ्चालन गरेको छ । (ज) विभिन्न पुस्तकालयलाई पुस्तकहरू निःशुल्क उपलब्ध गराएको छ । कारागारका कैदी–बन्दीहरूमा नैतिक र आध्यात्मिक चेतनाको जागरण गराउन तिनीहरूमा आध्यात्मिक पुस्तकहरू वितरण गरेको छ । (झ) संस्थाका हरेक गतिविधिहरूका विषयमा र संस्थासँग सम्बन्धित लेखक–पत्रकारहरूका विषयमा जानकारी गराउन www.sypublication.com.np नामक वेभसाइट सञ्चालन गरिरहेको छ । त्यही वेभसाइटमा लेखकहरूको छुट्टाछुट्टै पनि राख्न थालिएको छ । यसले संसारभरि सूचना पु¥याउन सकिने भएको छ र लेखकको प्रतिभालाई अन्तर्राष्ट्रियकरण गर्न थालिएको छ ।
अब यो संस्था यी सबै कार्यक्रमलाई निरन्तरता दिँदै यस्ता सबै कार्यक्रमलाई एकीकृत रूपमा सञ्चालन गर्न काभ्रे जिल्लामा पुस्तकालय, सङ्ग्रहालय, वाङ्मयसेवीहरूका लागि विशेष अतिथिशाला आदिसहितको ‘शब्दयात्रा बहुआयामिक अनुसन्धान प्रतिष्ठान’ निर्माण गर्न अग्रसर भएको छ । त्यसका लागि समाजसेवी कृष्णमणि कुइँकेलले यस संस्थालाई बनेपा नगरपालिका वडा नं. ११ मा रहेको केही जग्गा दान दिनुभएको छ । कार्यालय सचालनका लागि काठमाडौँ विश्वविद्यालय, त्रिरत्न रन्जितकार, बुद्ध मानन्धर आदिबाट केही भौतिक सहयोग प्राप्त भएको छ ।
यस संस्थाबाट हरेक वर्षको जेठ, भदौ, मङ्सिर र फागुन महिनामा ४–४ विधाका सम्मान समर्पण गरिन्छन् । तिनमा सकुल थापाद्वारा आफ्नी आमा शारदा थापाको स्मृतिमा व्यवस्थापित शब्दयात्रा अनुसन्धान सम्मान अनुसन्धाता प्रा. डा. त्रिरत्न मानन्धरलाई, हरिगोपाल प्रधानद्वारा व्यवस्थापित शब्दयात्रा समालोचना सम्मान समालोचक प्रा. डा. गार्गी शर्मालाई, कविप्रसाद प्याकु¥यालद्वारा व्यवस्थापित शब्दयात्रा कविता–काव्य सम्मान काव्यकार रमेश खकुरेललाई र गोपाल पराजुलीद्वारा व्यवस्थापित शब्दयात्रा बालसाहित्य सम्मान देवीप्रसाद वनवासीलाई समर्पण गरिँदैछ । सम्मानित प्रतिभाहरूको चयन काठमाडौँ विश्वविद्यालयसँग आबद्ध डा. पुरुषोत्तम खरेल, डा. सरस्वती आचार्य, सुरेन्द्र के. सी. र शिवनाथ मैनाली सम्मिलित समितिले गरेको हो ।
कवयित्री मीरा पौड्यालद्वारा लिखित ‘अग्निजल’ कवितासङ्ग्रह र द्रोणप्रसाद श्रेष्ठद्वारा सम्पादित ‘रचनापछिका विवेचना’ लाई पनि सार्वजनिक गरिँदैछ । यी दुवै पुस्तक शब्दयात्रा प्रकाशनद्वारा प्रकाशित भएका हुन् । संस्था सञ्चालन गरिएको ६३ महिनाभित्र यस संस्थाले ७५ वटा पुस्तकको प्रकाशन गरेको छ भने त्यसबाहेक हरेक हप्ता नियमित रूपमा ‘नेपालभूमि’ साप्ताहिक पत्रिका र ३ वटा वार्षिक अङ्कको प्रकाशन र ‘अक्षरधाम’ साहित्यिक पत्रिकाको व्यवस्थापन गरिरहेको छ ।
शब्दयात्रा प्रकाशनसँग सम्बन्धित रहेर शब्दयात्रा नारी स्रष्टा समाज, शब्दयात्रा लेखक समाज, शब्दयात्रा सम्मान व्यवस्थापक समाज, शब्दयात्रा पत्रकार समाज, शब्दयात्रा विश्वसम्पर्क समाज, शब्दयात्रा कलाकार समाज, शब्दयात्रा सहयोगी समाज र शब्दयात्रा पाठक समाज सक्रिय रहेका छन् । यी सबै समाजमा आबद्ध महानुभावहरू र उहाँहरूका सिर्जनाहरू विश्वभरि छरिन सकून् भन्ने उद्देश्यले शब्दयात्रा प्रकाशनले हरेक समाजका सदस्यहरू र तिनका सिर्जनाहरू रहने छुट्टाछुट्टै ब्लगको निर्माण गराइरहेको छ । यसबाट नेपाली प्रतिभाहरू विश्वका अन्य प्रतिभाहरूसँग प्रत्यक्ष रूपमा जोडिन सक्नेछन् र नेपाली प्रतिभाको पनि विश्वव्यापी सन्जाल हुनेछ । नेपाली अक्षरसेवीहरूको हितका लागि आधुनिक प्रविधिको उपयोग गर्ने शब्दयात्रा प्रकाशनको यो अभियानमा यहाँहरूको साथ रहने कुरामा हामी विश्वस्त छौँ । (स्वागत मन्तव्यको सम्पादित अंश)

— द्रोणप्रसाद श्रेष्ठ

समारोहको सभापतित्व ग्रहण गरिदिन यस संस्थाका अध्यक्ष हरि मञ्जुश्रीले मलाई आग्रह गर्नुभएको थियो । उहाँको आग्रह स्वीकार गरेकाले सभापतिका रूपमा मलाई वरण गरिएको छ । यसबाट म गौरवान्वित बनेको छु ।
हरि मञ्जुश्री मेरा प्रिय भाइ हुनुहुन्छ । उहाँलाई म धेरै वर्षअघिदेखि चिन्छु । उहाँको क्षमता मलाई अद्भुत लाग्छ । उहाँको परिश्रम देखेर म आश्चर्यचकित हुन्छु । उहाँको योजना सुन्दा म दङ्ग पर्छु । हामी दुवैजना भोजपुर जिल्लामा जन्मेका हौँ । उहाँकै नेतृत्वमा शब्दयात्रा प्रकाशनको स्थापना भएकाले सुरुदेखि नै यसका हरेक गतिविधिसँग म परिचित छु । यस संस्थाका केही कार्यक्रममा म पनि उपस्थित भएको छु । यस संस्थाका सञ्चालकहरू खटेका देख्ता मलाई प्रशंसा गर्न मन लाग्छ । यस संस्थाबाट प्रकाशित ‘नेपालभूमि साप्ताहिक’ मा मेरा पनि केही लेखहरू छापिएका छन् । यो संस्था प्रकाशक बनेर छापिएका थुप्रै पुस्तकहरूको पाठक म पनि हुँ । यस संस्थाले ठूलो उद्देश्य राखेको छ । हामी सबैको सहयोग भयो भने यस संस्थाले राखेको उद्देश्य पूरा हुने कुरामा म विश्वस्त छु । यस संस्थाका अहिलेसम्मका क्रियाकलाप हेर्दा यो संस्था नेपालकै उदाहरणीय सामुदायिक संस्था हुन सक्ला कि भन्ने मलाई आशा लागेको छ ।
शब्दयात्रा प्रकाशनले मुलुकका लागि आफ्नो क्षेत्रबाट राम्रो काम गर्ने शिक्षासेवी, साहित्यकार, पत्रकार, अन्वेषक, इतिहासकार, समालोचक जस्ता महान् व्यक्तिहरूलाई सम्मान गर्ने गरेको सर्वविदितै छ । त्यस्ता सम्मानहरूमध्ये मेरै भाइबुहारी उर्मिला श्रेष्ठले ‘प्रशासनिक महिला प्रतिभा सम्मान’ का लागि आर्थिक व्यवस्थापन गरिदिएकी छन् । मेरा भाइ हिरण्य भोजपुरेबाट पनि यस संस्थाले सहयोग पाइरहेकै छ ।
मलाई पनि हरि मञ्जुश्रीले शब्दयात्रा प्रकाशनको सम्मान कोषमा सहयोग गरिदिन आग्रह गर्नुभएको थियो । मैले सहयोग गर्ने वचन दिएको थिएँ । दुर्भाग्यवश मेरी धर्मपत्नी मनका श्रेष्ठ क्यान्सर रोगका कारण थला परिन् । उनको उपचार सफल हुन सकेन र उनी २०७२ साल माघ १४ गते दिवङ्गत भइन् । अहिले एक वर्ष पुगेकै छैन । उनको जन्म २००३ साल मङ्सिर २८ गते भएको थियो । यो उनको जन्ममहिना हो । उनी धनकुटामा जन्मेकी थिइन् । उनका बुबा चन्द्रलाल श्रेष्ठ गायक, सङ्गीतकार र अभिनेता भएकाले उनी पनि कलाकारिता गर्थिन् । पहिले–पहिले नाटकहरूमा केटीको भूमिका केटाले नै गर्थे । धनकुटामा पनि त्यस्तै थियो । त्यस बेला धनकुटामा खेलाइने नाटकहरूमा पहिलोपटक केटीको भूमिकामा उनैले अभिनय गरेकी थिइन् । उनी त्यस बखत विद्यार्थी थिइन् । नाटककार विजय मल्लले लेखेको ‘कोही किन बर्बाद होस्’ नाटक प्रसिद्ध साहित्यकार तथा संस्कृतिविद् तुलसी दिवसको निर्देशनमा मञ्चन हुँदा ‘मनका श्रेष्ठले अभिनय नगर्ने भए म यो नाटकै देखाउँदिनँ’ भनेर तुलसी दिवसले भनेको कुरा म अझै सम्झिन्छु । उनी प्रभावशाली अभिनय गर्थिन् । उनमा गीत गाउने कला थियो । समाजसेवामा उनको उत्तिकै रुचि थियो । धेरैवटा सामाजिक संस्थाहरूमा उनी बाँधिएकी थिइन् । व्यावहारिक कारणले गर्दा उनले आफूभित्रको कला–प्रतिभा चम्काउन पाइनन् । आखिर उनले मलाई एक्लो बनाएर यो धर्ती छाडिदिइन् ।
उनको निधनपछि मलाई लाग्यो हरि मञ्जुश्रीले सम्मान कोषका लागि मसँग सहायता माग्नुभएकै छ भने किन म आफ्नी धर्मपत्नीको स्मृति र सम्मानमा अलिकति भए पनि केही रकम शब्दयात्रा प्रकाशनलाई नदिऊँ ? त्यसैले मैले १ लाख ११ हजार १ सय ११ रुपियाँ शब्दयात्रा प्रकाशनको सम्मान कोषका लागि प्रदान गर्ने निर्णय गरेको छु । मैले यो कुरा हरि मञ्जुश्रीलाई भनिसकेको छु, अहिले सार्वजनिक गरेको हुँ । मैले प्रदान गर्ने रकम कलाकारिता क्षेत्रका महिला प्रतिभालाई सम्मान गर्नका लागि उपयोग होस् भन्ने आफ्नो चाहना मैले उहाँलाई भनिसकेको छु । संयोगवश अहिले मेरी धर्मपत्नीको जन्ममहिना परेको छ र उनको स्मृतिमा सम्मानका लागि मैले वचनबद्धता व्यक्त गरेको कोषबाट यसै महिनादेखि कलाकारिता क्षेत्रकै महिला प्रतिभालाई सम्मान गर्ने व्यवस्था मिलाइएको छ । यो सम्मान ग्रहण गर्न प्रसिद्ध चलचित्र अभिनेत्री लक्ष्मी गिरीज्यूले स्वीकृति दिनुभएको छ । यो मेरा लागि खुसीको कुरा हो ।
शब्दयात्रा प्रकाशनबाट सम्मानित हुन लाग्नुभएका प्रा. डा. त्रिरत्न मानन्धर, प्रा. डा. गार्गी शर्मा, रमेश खकुरेल र देवीप्रसाद वनवासीमा बधाई ज्ञापन गर्न चाहन्छु । यी सम्मानहरूको आर्थिक व्यवस्थापन गरिदिने गोपाल पराजुली, कविप्रसाद प्याकु¥याल, हरिगोपाल प्रधान र सकुल थापालाई धन्यवाद दिन चाहन्छु । उपयुक्त प्रतिभाहरूको चयन गरिदिने डा. पुरुषोत्तम खरेल, डा. सरस्वती आचार्य, सुरेन्द्र के. सी. र शिवनाथ मैनालीलाई धन्यवाद छ ।
सार्वजनिक हुन लागेका दुई कृतिमध्ये एउटा कृति मैले सम्पादन गरेको कृति ‘रचनापछिका विवेचना’ हो । यो कुन प्रकारको कृति हो भनेर मैले सम्पादकीयमा लेखिसकेको छु । त्यसैले अहिले म दोहो¥याउँदिनँ । पुस्तकमा पढ्न पाउनुहुने नै छ । यो कृति कस्तो छ र यसको कति महàव छ, मूल्याङ्कन सुन्न र पढ्न पाउने आशामा छु ।
मेरो पुस्तकसँगै सार्वजनिक हुने अर्को कृति ‘अग्निजल’ की कवयित्री भोजपुर जिल्लामै जन्मेकी प्रतिभा हुनुहुन्छ भन्ने सुनेँ । यसले मलाई खुसी तुल्यायो । उहाँलाई बधाई छ । उहाँबाट अरू पुस्तकहरू पनि लेखिऊन्, त्यसबाट भोजपुर र काभ्रे जिल्लाको गौरव बढोस्, मेरो शुभकामना छ ।
शब्दयात्रा प्रकाशनले जग्गा दानमा पायो भन्ने खबर भाइ हरि मञ्जुश्रीले मलाई फोनबाट सुनाउनुभएको थियो । मैले फोनबाटै जग्गादाताको नाम सोधेँ र अहिलेको जमानामा बनेपामा जग्गा दान गर्ने आधुनिक कर्ण कृष्णमणि कुइँकेललाई धेरै धन्यवाद दिएँ । हरि मञ्जुश्रीको भावना बुझेको मान्छेले मात्रै उहाँको समूह र शब्दयात्रा प्रकाशनलाई सहयोग गर्न सक्छ । उहाँले बुझ्नुभएको रहेछ र सहयोग गर्नुभयो । धेरै खुसी लाग्यो । त्यो जग्गा कहिले हेर्न पाइएला भन्ने लागिरहेको थियो । केही दिनअघि भाइ हिरण्य भोजपुरे, भाइबुहारी उर्मिला श्रेष्ठ र म बनेपा आयौँ । हरि मञ्जुश्रीले खुसी भएर जग्गा देखाउनुभयो । त्यही जग्गामा बनाइने भवनमा लेखक, पत्रकार र कलाकारहरूका लागि आरामदायी कक्ष र भोजन उपलब्ध गराएर सिर्जना र साधनामा सघाउने योजना छ भन्नुभयो । वाङ्मयसेवीहरूको सालिक राख्न पाए हुन्थ्यो भन्नुभयो । शब्दयात्रा प्रकाशनको यो योजना सफल होस्, शुभकामना छ । (सभापतिका रूपबाट अभिव्यक्त मन्तव्यको सम्पादित अंश)

शब्दयात्रा प्रकाशनले मङ्सिर १४ गते काभ्रेको बनेपामा विशेष समारोहको आयोजना गरी विभिन्न चार विधाका सम्मान समर्पण गरी दुई पुस्तकलाई सार्वजनिक ग¥यो ।
समारोहमा नेपालको संस्कृति र इतिहाससम्बन्धी लोपोन्मुख तथ्यहरूलाई प्रकाशमा ल्याई विविध अन्वेषणात्मक कृतिहरूका माध्यमबाट नेपालको सांस्कृतिक र ऐतिहासिक अध्ययनमा महàवपूर्ण योगदान दिएकोमा अनुसन्धाता प्रा. डा. त्रिरत्न मानन्धरलाई शब्दयात्रा अनुसन्धान सम्मानबाट र काव्यिक क्षेत्रमा आजीवन समर्पित रहेर लोकभावनालाई काव्यात्मक वाणी दिई विभिन्न काव्यकृतिहरूको सिर्जना तथा प्रकाशनका माध्यमबाट नेपाली काव्यसाहित्यमा अत्युच्च योगदान दिएकोमा काव्यकार रमेश खकुरेललाई शब्दयात्रा कविता–काव्य सम्मानबाट सम्मानित गरियो । यसै गरी नेपाली समालोचना विधामा निरन्तर सक्रिय रही नेपाली भाषा–साहित्यसँग सम्बन्धित शोधार्थीका लागि प्रेरक र आदर्शका रूपमा सुपरिचित समालोचक प्रा. डा. गार्गी शर्मालाई शब्दयात्रा समालोचना सम्मानबाट र बालसाहित्यका क्षेत्रमा ऐतिहासिक भूमिका निर्वाह गरेर बालसाहित्यको मूल मर्म र कर्मको उदाहरण नेपाली वाङ्मयमा प्रस्तुत गरेकोमा बालसाहित्यकार देवीप्रसाद वनवासीलाई शब्दयात्रा बालसाहित्य सम्मानबाट सम्मानित गरियो ।
उहाँहरूलाई प्रमुख अतिथिका रूपमा लुम्बिनी बौद्ध विश्वविद्यालयका प्रथम उपकुलपति तथा अग्रज अन्वेषक प्रा. डा. तुलसीराम वैद्यले अभिवन्दनापत्र प्रदान गरेर एवं विशिष्ट अतिथि नेपाल संस्कृत विश्वविद्यालयका उपकुलपति तथा समालोचक प्रा. डा. कुलप्रसाद कोइरालाले किरीट लगाइदिएर सम्मान गर्नुभएको थियो । सम्मानित व्यक्तित्वहरूलाई चयन समितिका सदस्यहरूले पुस्तक उपहार तथा ती सम्मानहरूका आर्थिक व्यवस्थापक सकुल थापा, कविप्रसाद प्याकु¥याल, हरिगोपाल प्रधानका तर्फबाट कृष्णमणि कुइँकेल र गोपाल पराजुलील जनही ५–५ हजार रुपियाँ प्रदान गर्नुभएको थियो । सम्मानित व्यक्तित्वहरूको चयनसम्बन्धी जानकारी चयन समितिका संयोजक डा. पुरुषोत्तम खरेलले गराउनुभएको थियो । सम्मान सामग्रीको व्यवस्थापन ‘नेपालभूमि साप्ताहिक’ का सम्पादक सुमन खड्का र शब्दयात्रा प्रकाशनका सदस्य श्यामकृष्ण लम्सालले गर्नुभएको थियो ।
उक्त समारोहमा शब्दयात्रा प्रकाशनद्वारा प्रकाशित ७४ औँ कृति मीरा पौड्यालद्वारा लिखित कवितासङ्ग्रह ‘अग्निजल’ लाई प्रा. डा. तुलसीराम वैद्यले र ७५ औँ कृति द्रोणप्रसाद श्रेष्ठद्वारा सम्पादित ‘रचनापछिका विवेचना’ लाई प्रा. डा. कुलप्रसाद कोइरालाले सार्वजनिक गर्नुभयो । सार्वजनिक गरिएका कृतिहरूका विषयमा शारदाप्रसाद शर्माले परिचयात्मक टिप्पणी गर्नुभएको थियो भने कृति–प्रकाशनका बारेमा मीरा पौडेलले मन्तव्य राख्नुभएको थियो ।
समारोहमा सभापतिका रूपबाट द्रोणप्रसाद श्रेष्ठ ‘मुन्डाघरे’ ले क्यान्सर रोगबाट निधन भएकी आफ्नी धर्मपत्नी मनका श्रेष्ठको स्मृतिमा राष्ट्रिय स्तरको महिला प्रतिभा सम्मानको आर्थिक व्यवस्थापन गरिदिन शब्दयात्रा प्रकाशनलाई १ लाख ११ हजार १ सय ११ रुपियाँ प्रदान गर्ने घोषणा गर्नुभयो । शब्दयात्रा प्रकाशनका अध्यक्ष तथा ग्रन्थसम्पादक हरि मञ्जुश्रीले सञ्चालन गर्नुभएको उक्त कार्यक्रमको समीक्षा लोकसेवा आयोगका पूर्वसदस्य तथा गायिका उर्मिला श्रेष्ठले गर्नुभएको थियो ।
गोसाइँस्थान नैमिषारण्य क्षेत्र विकास समितिका वटुकहरूबाट स्वस्तिवाचन गरिएको उक्त समारोहमा वटुकहरूलाई शब्दयात्रा कलाकार समाजका तर्फबाट मच्छेश्वर सापकोटाले टीका लगाइदिनुभयो भने शब्दयात्रा लेखक समाजका तर्फबाट उद्धवप्रसाद नेपालले हरि मञ्जुश्रीद्वारा लिखित ‘धनेश्वर वन्दना’ नामक पुस्तिका प्रदान गर्नुभयो ।
समारोहमा शब्दयात्रा पत्रकार समाजका संयोजक रामचन्द्र हुमागाईंले स्वागत मन्तव्य व्यक्त गर्नुभएको थियो भने चयन समितिका सदस्यहरूलाई शब्दयात्रा पाठक समाजका सदस्य सुदर्शन आचार्य र सहयोगी जगन्नाथ गिरीले उपहार समर्पण गर्नुभएको थियो ।
शब्दयात्रा प्रकाशनका कार्यक्रमहरूमा स्वस्तिवाचन गर्ने व्यवस्था मिलाइदिएकोमा नैमिषारण्य गुरुकुलम्का लागि मोहनविनोद बजगाईंलाई ‘अक्षरधाम’ साहित्यिक पत्रिकाका तर्फबाट गीता अधिकारीले आभारपत्र प्रदान गर्नुभएको उक्त समारोहमा शब्दयात्रा प्रकाशनका तर्फबाट विशिष्ट अतिथिलाई शब्दयात्रा पाठक समाजका सदस्य पदमनाथ ढुङ्गानाले र प्रमुख अतिथिलाई शब्दयात्रा पाठक समाजका संयोजक दामोदर घिमिरेले उपहार समर्पण गर्नुभएको थियो ।
अतिथिहरूलाई शब्दयात्रा सम्मान व्यवस्थापक समाजका तर्फबाट रमेश पौड्याल र शब्दयात्रा पाठक समाजका तर्फबाट सिना ढकालले ब्याच तथा शब्दयात्रा सहयोगी समाजका तर्फबाट त्रिरत्न रन्जितकार र शब्दयात्रा नारी स्रष्टा समाजका तर्फबाट सरस्वती शर्मा सुवेदीले माला अर्पण गर्नुभएको थियो ।

शब्दयात्रा प्रकाशनले यही मङ्सिर महिनामा गरिने सम्मान समर्पण समारोहमा नेपाली चलचित्रहरूमा चरित्र अभिनेत्रीका रूपमा सशक्त अभिनय गर्ने महिला प्रतिभा लक्ष्मी गिरीलाई पनि सम्मान गर्ने भएको छ ।
यसैपटकदेखि राष्ट्रिय स्तरमा योगदान गर्ने महिला प्रतिभालाई सम्मान गर्ने गरी ‘मनका श्रेष्ठ महिला प्रतिभा सम्मान’ को स्थापना गरिएकाले अभिनय क्षेत्रमा सक्रिय लक्ष्मी गिरीलाई सम्मान गर्न लागिएको हो ।
सम्मान गर्दा उपहार, किरीट र अभिवन्दनापत्रका साथमा ५ हजार रुपियाँ समर्पण गर्ने गरिन्छ ।
यस सम्मानको आर्थिक व्यवस्थापन आफ्नी धर्मपत्नी स्वर्गीय मनका श्रेष्ठको स्मृतिमा लेखक द्रोणप्रसाद श्रेष्ठले गर्ने व्यवस्था मिलाइएको छ ।

शब्दयात्रा प्रकाशनले आगामी मङ्सिर महिनामा सम्मान गर्ने चार व्यक्तित्वको नाम चयन गरेको छ । गत कार्तिक २६ गते शुक्रबार सम्मानित व्यक्तित्व चयन समितिको बैठकले सिफारिस गरेबमोजिम सम्मान गरिने व्यक्तित्वको चयन गरिएको हो ।
चयन समितिको सिफारिसअनुसार २०७३ सालको शब्दयात्रा अनुसन्धान सम्मानबाट डा. त्रिरत्न मानन्धर, शब्दयात्रा समालोचना सम्मानबाट डा. गार्गी शर्मा, शब्दयात्रा बालसाहित्य सम्मानबाट देवीप्रसाद वनवासी र शब्दयात्रा कविता–काव्य सम्मानबाट रमेश खकुरेललाई सम्मान गरिनेछ ।
गत वर्ष यी सम्मानहरूबाट रमा शर्मा, डा. कुमारबहादुर जोशी, कृष्णप्रसाद दुवाल र कृष्ण जोशी सम्मानित हुनुभएको थियो ।
सम्मानित व्यक्तित्व चयन समितिमा डा. पुरुषोत्तम खरेल संयोजक तथा डा. सरस्वती आचार्य, सुरेन्द्र के. सी. र शिवनाथ मैनाली हुनुहुन्छ । उहाँहरू चारैजना काठमाडौँ विश्वविद्यालयसँग आबद्ध हुनुहुन्छ ।
उल्लिखित सम्मानहरूको आर्थिक व्यवस्थापन सकुल थापा, हरिगोपाल प्रधान, गोपाल पराजुली र कविप्रसाद प्याकु¥याल हुनुहुन्छ ।