Shabdayatra Prakashan

२०७३ साल पुस २७ गते बुधबार ९४ वर्षको उमेरमा अग्रज पत्रकार मणिराज उपाध्यायको निधन भयो । उहाँप्रति हार्दिक भावश्रद्धा !

शब्दयात्रा प्रकाशन
अक्षरधाम, बनेपा — १०, काभ्रे

शब्दयात्रा प्रकाशनले बनेपामा चारजना साधकहरूको सालिक स्थापना गर्न लागेको समाचारबाट हर्षित बनेर त्यसका लागि आर्थिक सहयोग गर्ने दाताहरू जुट्तै हुनुहुन्छ ।
त्यसैअन्तर्गत डा. पुष्पलाल हुमागाईं र लक्ष्मी हुमागाईंबाट ५ हजार १ सय रुपियाँ तथा डा. भास्कर हुमागाईं र रश्मि मञ्जुश्री अधिकारीबाट ५ हजार १ सय रुपियाँ प्राप्त भएको छ ।

शब्दयात्रा प्रकाशनको ७८ औँ प्रकाशनपुष्पका रूपमा ‘राजा वीरेन्द्र, बेलप्रसाद र धुलिखेल’ नामक पुस्तिका प्रकाशन हुने भएको छ । यो पुस्तिका ‘घटना र विचार साप्ताहिक’ का कार्यकारी सम्पादक जयप्रकाश त्रिपाठीले लेख्नुभएको हो ।
‘घटना र विचार साप्ताहिक’ मा छापिई इन्टरनेटबाट झन्डै २ लाख ७६ हजार पाठकले पढिसकेको सामग्रीलाई पुस्तिकाका रूपमा पनि प्रकाशन गरिदिने माग बढेकाले शब्दयात्रा प्रकाशनले यसको प्रकाशनसम्बन्धी व्यवस्था मिलाएको हो ।

शब्दयात्रा प्रकाशनबाट प्रकाशित दुई पुस्तक र गोसाइँस्थान नैमिषारण्य क्षेत्र विकास समितिबाट प्रकाशित एक पुस्तक आगामी माघ महिनाको पहिलो साता सार्वजनिक हुने भएका छन् । तीनैवटा पुस्तक नैमिषारण्य क्षेत्रमा हुने विशेष समारोहमा सार्वजनिक गरिनेछन् ।
सार्वजनिक हुन लागेका पुस्तकमा शब्दयात्रा प्रकाशनको ७६ औँ प्रकाशनपुष्प ‘जागनीबोध’ र ७७ औँ प्रकाशनपुष्प ‘नागा बाबा रमेश गिरि’ एवं गोसाइँस्थान नैमिषारण्य क्षेत्र विकास समितिको प्रथम प्रकाशन ‘नैमिषारण्य नेपाल’ रहेका छन् । ‘नागा बाबा रमेश गिरि’ शान्ति सेवा आश्रम र गोसाइँस्थान नैमिषारण्य क्षेत्र विकास समितिको सहयोगमा शब्दयात्रा प्रकाशनबाट प्रकाशन भएको हो ।
शब्दयात्रा प्रकाशनका अध्यक्ष हरि मञ्जुश्रीको सम्पादनमा ती पुस्तकहरू प्रकापशत भएका हुन् ।

शब्दयात्रा प्रकाशनका अध्यक्ष हरि मञ्जुश्रीको सम्पादनमा ‘देवीप्रसाद सापकोटा स्मृतिग्रन्थ’ प्रकाशन हुने भएको छ । देवीप्रसाद सापकोटा स्मृति प्रतिष्ठानले प्रकाशन गर्ने उक्त स्मृतिग्रन्थलाई आगामी फागुन ७ गते काठमाडौँमा विशेष समारोहको आयोजना गरी सार्वजनिक गरिने जानकारी प्रतिष्ठानका अध्यक्ष सुनील सापकोटाले गराउनुभएको छ ।
देवीप्रसाद सापकोटाको योगदानलाई जनसमक्ष ल्याउने पहिलो प्रयास हरि मञ्जुश्रीबाटै भएको थियो । त्यसपछि शब्दयात्रा प्रकाशनले उहाँको नाउँमा सम्मानको स्थापना गरी पुस्तकको प्रकाशन पनि गरेको थियो । शब्दयात्रा प्रकाशनकै सक्रियतामा बनेपामा देवीप्रसाद सापकोटाको सालिक पनि राखिने भएको छ ।

शब्दयात्रा प्रकाशनको ७७ औँ प्रकाशनपुष्पका रूपमा ‘नागा बाबा रमेश गिरि’ नामक पुस्तक प्रकाशन हुने भएको छ । शब्दयात्रा प्रकाशनका अध्यक्ष ग्रन्थसम्पादक हरि मञ्जुश्रीको सम्पादनमा उक्त पुस्तक प्रकाशन हुन लागेको हो । पुस्तकमा काभ्रे जिल्लाको बनेपा बुडोलस्थित गोसाइँस्थानमा २०४२ सालमा आई त्यहीँ समाधिस्थ हुनुभएका प्रसिद्ध नागा बाबा रमेश गिरिका बारेमा जानकारी गराउने सामग्रीहरू रहेका छन् । यस पुस्तकका लागि शान्ति सेवा आश्रमले आर्थिक सहयोग गरेको छ ।
पुस्तकमा उद्धवप्रसाद नेपाल, कृष्णप्रसाद कोइराला, कृष्णमणि कुइँकेल, गुणबहादुर पाण्डे, जयकृष्ण भण्डारी, डिल्लीप्रसाद कोइराला, भैरव के. सी., मुकुन्दप्रसाद उपाध्याय, योगानन्द गिरी, राधाकृष्ण प्रधान, रामप्रसाद तिमल्सिना, शम्भु दाहाल, शिवलाल पाण्डे, शारदाप्रसाद शर्मा, शिवहरि के. सी., सुदर्शन आचार्य, सुमन खड्का आदिका लेखहरू रहेका छन् ।

शब्दयात्रा प्रकाशनले आगामी फागुन महिनामा सम्मान गरिने शिक्षा, आमसञ्चार, सामाजिक जागरण र विज्ञान–प्रविधि गरी चार विधाका सम्मानयोग्य व्यक्ति अथवा संस्थाको नाउँ र योगदानको विवरण आगामी माघ १५ गतेभित्र शब्दयात्रा प्रकाशनमा प्राप्त हुने गरी उपलब्ध गराइदिन सबैमा अनुरोध गरेको छ । त्यसरी सिफारिस प्राप्त भएका व्यक्ति अथवा संस्थाहरूमध्येबाट नै चयन समितिले सम्मान गर्नुपर्ने व्यक्ति अथवा संस्थाको नाउँ चयन गर्ने गर्दछ ।
शब्दयात्रा प्रकाशनले हरेक वर्षको फागुन महिनामा शिक्षा, आमसञ्चार, सामाजिक जागरण र विज्ञान–प्रविधि विधामा सम्मान समर्पण गर्ने गरेको छ । गत वर्षको फागुन महिनामा शिक्षा सम्मानबाट तनहूँको महेश संस्कृत गुरुकुल, आमसञ्चार सम्मानबाट विराटनगरका कोशराज रेग्मी, सामाजिक जागरण सम्मानबाट तनहूँका भीमबहादुर अधिकारी र विज्ञान–प्रविधि सम्मानबाट अर्घाखाँचीका प्रा. डा. होमनाथ भट्टराई सम्मानित भएका थिए ।

हाम्रा आत्मीय मित्र, ‘कौशिकी’ का सम्पादक तथा शब्दयात्रा प्रकाशनका शुभेच्छुक चेतनाथ धमला प्रेस काउन्सिल नेपालको बोर्ड सदस्य पदमा चारवर्षे कार्यकालका लागि नियुक्त हुनुभएकोमा हार्दिक बधाई ज्ञापन गर्दै उहाँको ज्ञान र अनुभवले नेपाली प्रेस जगत्लाई निरन्तर लाभान्वित गराइरहन सकोस् भन्ने कामना गर्दछौं ।

अध्यक्ष हरि मञ्जुश्री, तथा
शब्दयात्रा प्रकाशन परिवार
अक्षरधाम, बनेपा — १०, काभ्रे