नेपाल रेडक्रस सोसाइटी काभ्रे सेतीदेवी उपशाखाको सभापति पदमा शब्दयात्रा नारी स्रष्टा समाजका संयोजक पुण्यवती घले र खरिबोट उपशाखाको सभापति पदमा शब्दयात्रा पत्रकार समाजका सदस्य प्रदीप के. सी. निर्वाचित हुनुभएकोमा हार्दिक बधाई !

शब्दयात्रा प्रकाशन परिवार

भानुजयन्तीको सन्दर्भ पारी शब्दयात्रा नारी स्रष्टा समाजले आगामी असार ३० गते शुक्रबार दिउँसो २ बजे शब्दयात्रा प्रकाशनको सभाकक्षमा ‘भानुसाहित्यमा नारीको स्थान’ विषयक विमर्श कार्यक्रम र नारी स्रष्टाहरूको रचना वाचन गर्ने कार्यक्रम राखेको हुँदा आआफ्ना कवितासहित उपस्थितिका लागि नारी स्रष्टाहरूलाई अनुरोध छ ।

संयोजक पुण्यवती घले, तथा
शब्दयात्रा नारी स्रष्टा समाज परिवार
शब्दयात्रा प्रकाशन
अक्षरधाम, बनेपा, काभ्रे

‘नेपालभूमि साप्ताहिक’ ले आगामी अङ्कलाई डा. स्वामी रामानन्द गिरि विशेषाङ्क बनाउने भएकाले उहाँका विषयमा आफ्ना लेख–संस्मरणहरू २०७४ असार मसान्तभित्र उपलब्ध गराइदिन अनुरोध छ ।

— नेपालभूमि साप्ताहिक

पूर्वीय दर्शनका प्रकाण्ड विद्वान् डा. स्वामी रामानन्द गिरि ब्रह्मलीन हुनुभएको छ । केही दिनअघि उहाँलाई काठमाडौँको ग्रान्डी अस्पतालमा उपचारार्थ भर्ना गरिएकोमा गत असार २४ गते शनिबार अपराह्न ५ बजे उहाँ ब्रह्मलीन हुनुभएको हो । उहाँलाई उहाँको कर्मस्थल दवघाटमा समाधिस्थ गरियो ।
धादिङको केवलपुरमा २००५ साल जेठ १० गते रामप्रसाद सुवेदीका रूपमा जन्मनुभएका रामानन्द गिरिले तीनधारा पाकशालामा बसेर पढ्नुभएको थियो । त्यस बेला उहाँलाई गोपालनिधि तिवारीले वेदान्त पढाउनुभएको थियो । उहाँले २०३० सालमा त्रिभुवन विश्वविद्यालयबाट २०३० सालमा शाङ्करवेदान्त विषयमा आचार्य उत्तीर्ण गरी त्रिभुवन विश्वविद्यालयबाटै २०४१ सालमा ‘राजर्षि जनकका विदेह सिद्धान्तहरूको समीक्षात्मक अध्ययन’ विषयमा विद्यावारिधि गर्नुभएको थियो ।
उहाँका संन्यासगुरु श्री १००८ स्वामी महेशानन्द गिरिजी महाराज हुनुहुन्थ्यो । विभिन्न शिक्षण संस्थाहरूमा अध्यापन गर्नुका साथै अद्वैत वेदान्तदर्शन एवं सनातन धर्म र संस्कृतिका विषयमा प्रवचन गर्ने गर्नुभएका उहाँ पाणिनि पुरस्कार, गुणराज पुरस्कार, डा. बलराम जोशी ज्ञानविज्ञान पुरस्कार, राजर्षि जनक स्मृति सम्मान, पृथ्वीबहादुरसिंह कार्की–भक्तकुमारी पुरस्कार, भारती खरेल पुरस्कार, प्रबल गोरखा दक्षिणबाहु, अन्य विविध सम्मान तथा पुरस्कारहरूद्वारा पुरस्कृत तथा सम्मानित हुनुहुन्थ्यो ।
जनकदर्शन (विद्यावारिधि शोधग्रन्थ), माण्डूक्यकारिका (नेपाली अनुवाद तथा व्याख्या), रामगीता (नेपाली अनुवाद तथा व्याख्या), वेदस्तुति (नेपाली अनुवाद तथा व्याख्या), श्रीमद्भागवतमहापुराण (नेपाली अनुवाद–रामानन्दी टीका), देवीगीता (नेपाली अनुवाद तथा व्याख्या), दुर्गासप्तशती (नेपाली अनुवाद एवं व्याख्या) उहाँका प्रकाशित पुस्तकहरू हुन् । उहाँले संन्यासगुरुको नामबाट तनहूँमा महेश संन्यास आश्रम र महेश संस्कृत गुरुकुलको स्थापना गर्नुभएको थियो । उहाँ कास्कीको अम्बरेश्वर संन्यास आश्रमका संस्थापक तथा काठमाडौँको शङ्कराचार्य मठका संरक्षक पनि हुनुहुन्थ्यो । उहाँले स्थापना गर्नुभएको महेश संस्कृत गुरुकुललाई शब्दयात्रा प्रकाशनले शिक्षा सम्मानबाट सम्मानित गरेको थियो ।
शब्दयात्रा प्रकाशन डा. स्वामी रामानन्द गिरिप्रति हार्दिक अक्षरश्रद्धा अर्पण गर्दछ ।

शब्दयात्रा प्रकाशनको नियमित साप्ताहिक कार्यक्रम ‘कर्मयोद्धासँग शब्दसंवाद’ को बाइसौँ शृङ्खलामा लोकगायिका सरस्वती सापकोटा प्रमुख वक्ता बन्नुभयो । त्यस अवसरमा उहाँले आफ्नो जीवनयात्राका विषयमा जानकारी गराउँदै केही लोकगीतहरू पनि प्रस्तुत गर्नुभयो । गायनमा उहाँलाई उहाँका पति लोकगायक मच्छेश्वर सापकोटाले साथ दिनुभएको थियो ।
गत २०७४ साल असार २३ गते शुक्रबार मच्छेश्वर–सरस्वती निवास नयाँ बस्ती बनेपामा आयोजना गरिएको ‘शब्दसंवाद’ कार्यक्रमको सभापतित्व शब्दयात्रा सहयोगी समाजका संयोजक शिक्षासेवी रामप्रसाद अधिकारीले गर्नुभएको थियो । पदमनाथ ढुङ्गानाले सञ्चालन गर्नुभएको उक्त कार्यक्रममा शारदाप्रसाद शर्माले कार्यक्रमको उद्देश्यबारे जानकारी दिनुभएको थियो ।
उक्त कार्यक्रममा शब्दयात्रा प्रकाशनका अध्यक्ष हरि मञ्जुश्री, कलाकार समाजबाट रामहरि न्यौपाने, नारी स्रष्टा समाजबाट संयोजक पुण्यवती घले र गीता मञ्जुश्री, लेखक समाजबाट संयोजक ओतबहादुर खड्का, पाठक समाजबाट संयोजक दामोदर घिमिरे, सिद्धिबहादुर कर्माचार्य, पूर्णबहादुर कार्की, जगन्नाथ गिरी, विष्णुहरि तिमल्सिना, पूर्णबहादुर कर्माचार्य, हरिश्चन्द्र घिमिरे, शकुन्तला बन्जारा, अक्रुर शाह, कुलप्रसाद तिमल्सिना, श्री शर्मा मूर्ख, सहदीप पलाञ्चोके, बद्रीप्रसाद फुँयाल आदिको उपस्थिति रहेको थियो ।
उक्त कार्यक्रममा ‘शब्दसंवाद’ को तेइसौँ शृङ्खला शब्दयात्रा प्रकाशनको सभाकक्षमा आगामी शुक्रबार अपराह्न ४ बजे प्रारम्भ हुने र त्यसमा शिक्षासेवी रामप्रसाद अधिकारी प्रमुख वक्ताका रूपमा प्रस्तुत हुने जानकारी गराइएको थियो ।

शिक्षालय खोल्ने पहिलो शिक्षासेवी बालागुरु षडानन्द (भोजपुर), स्वराङ्कन गर्ने प्रथम गायिका मेलवादेवी गुरुङ (ओखलढुङ्गा), प्रथम साहित्यिक सहिद कृष्णलाल अधिकारी (रामेछाप) र प्रथम लोकतान्त्रिक पत्रकार देवीप्रसाद सापकोटा (काभ्रेपलाञ्चोक) का चारवटा सालिक शब्दयात्रा प्रकाशनले एकै ठाउँमा स्थापना गर्न लागेको हुनाले त्यसका लागि देवीप्रसाद सापकोटा स्मृति प्रतिष्ठानका अध्यक्ष सुनील सापकोटाले ८० हजार रुपियाँ शब्दयात्रा प्रकाशनका अध्यक्ष हरि मञ्जुश्रीलाई हस्तान्तरण गर्नुभएको छ ।
काभ्रे जिल्लामा देवीप्रसाद सापकोटाको सालिक स्थापना गर्नु गौरवको विषय भएको बताउँदै प्रतिष्ठानका अध्यक्ष सुनील सापकोटाले यो आर्थिक सहयोग पहिलो चरणको भएकाले थप रकम पनि केही समयपछि उपलब्ध गराउने जानकारी दिनुभएको छ । शब्दयात्रा प्रकाशनका अध्यक्ष हरि मञ्जुश्रीले सहयोगप्रति हार्दिक आभार व्यक्त गर्दै शब्दयात्रा बहुआयामिक अनुसन्धान प्रतिष्ठान र सालिकहरूका बारेमा जानकारी गराई यस कार्यमा सबैबाट सहयोग प्राप्त हुने विश्वास व्यक्त गर्नुभएको छ ।
शिक्षा, सङ्गीत, साहित्य र पत्रकारिता क्षेत्रका शीर्ष व्यक्तित्वको सालिक एकै ठाउँमा स्थापना गर्न लागिएको नेपालमै यो पहिलोपटक हो । सालिकहरू बनेपाको ‘कृष्ण–गीता परिसर’ मा स्थापना गरिने भएका छन् ।

जल्ले एक मुठी रश्मि पहिले पूर्वमा छ¥यो
पातलो ज्योति बिछ्याई जल्ले कोसी नदी त¥यो
त्यो बालब्रह्मचारीको पवित्र प्रतिमामनि
यो तीर्थस्थलमा बस्ता गुन्जन्छ भित्रको ध्वनि ।

— राष्ट्रकवि माधवप्रसाद घिमिरे
(नेपालका प्रथम शिक्षासेवी बालागुरु षडानन्दको प्रतिमास्तम्भमा राख्न लेखिएको कविता)

शब्दयात्रा प्रकाशनद्वारा प्रकाशित कवितासङ्ग्रह ‘अग्निजल’ की कवयित्री मीरा पौड्याल अस्वस्थ हुनुहुन्छ । उहाँ भक्तपुर क्यान्सर अस्पतालमा शल्यक्रिया गरी हाल आफ्नै निवासमा उपचाररत हुनुहुन्छ ।
शब्दयात्रा प्रकाशन परिवार उहाँको शीघ्र स्वास्थ्यलाभको कामना गर्दछ ।

शब्दयात्रा प्रकाशनका संस्थापक सदस्य तथा ‘नेपालभूमि साप्ताहिक’ का सम्पादक सुमन खड्काका पिता एवं शब्दयात्रा प्रकाशनद्वारा संस्थापित आध्यात्मिक पत्रकारिता सम्मानका आर्थिक व्यवस्थापक प्रेमबहादुर खड्का अस्वस्थ हुनुभएको छ । उहाँलाई उपचारार्थ काठमाडौँको न्युरो अस्पतालमा राखिएकोमा हाल बनेपास्थित आफ्नै निवासमा उहाँको उपचार गरिँदैछ ।
शब्दयात्रा प्रकाशन परिवार उहाँको शीघ्र स्वास्थ्यलाभको कामना गर्दछ ।