पूर्वीय वाङ्मयका प्रकाण्ड विद्वान् तथा वेदान्त दर्शनका आधिकारिक व्याख्याता डा. स्वामी रामानन्द गिरि अस्वस्थ हुनुभएको छ । उहाँलाई काठमाडौँको ग्य्रान्डी अस्पतालको आईसीयूमा राखिएको छ ।
‘नेपालभूमि साप्ताहिक’ परिवार शब्दयात्रा प्रकाशनद्वारा संस्थापित शिक्षा सम्मानबाट सम्मान गरिएको महेश संस्कृत गुरुकुलका संस्थापक डा. स्वामी रामानन्द गिरिको शीघ्र स्वास्थ्यलाभको कामना गर्दछ ।

शब्दयात्रा प्रकाशनद्वारा आफ्नै सभाकक्षमा साप्ताहिक रूपमा सञ्चालित ‘कर्मयोद्धासँग शब्दसंवाद’ कार्यक्रमको एक्काइसौँ शृङ्खलामा समाजसेवी, लेखक तथा शिक्षाकर्मी पूर्णबहादुर कार्कीले प्रमुख वक्ताका रूपमा आफ्नो जीवनका कर्मयात्रा र आफ्ना भावनाहरू प्रस्तुत गर्नुभयो । गत २०७४ असार १६ गते शुक्रबार अपराह्न ४ बजेदेखि प्रारम्भ भएको उक्त कार्यक्रममा ‘नेपालभूमि साप्ताहिक’ का स्तम्भकार जगन्नाथ गिरीलाई सभापति वरण गरिएको थियो भने पदमनाथ ढुङ्गानाले कार्यक्रम सञ्चालन गर्नुभएको थियो ।
कार्यक्रममा शब्दयात्रा प्रकाशनका अध्यक्ष हरि मञ्जुश्री, महाप्रबन्धक शारदाप्रसाद शर्मा, शब्दयात्रा कलाकार समाजबाट मच्छेश्वर सापकोटा, शब्दयात्रा पत्रकार समाजबाट शिव बन्जारा, शब्दयात्रा नारी स्रष्टा समाजबाट पुण्यवती घले र नानुदेवी आचार्य, शब्दयात्रा सहयोगी समाजबाट सोमकाजी शाक्य तथा श्री शर्मा मूर्ख, राजु सिग्देल, दिवाकर जङ्गम, दीक्षा घिमिरे आदिको उपस्थिति रहेको थियो ।
आगामी शुक्रबार गायिका सरस्वती सापकोटा प्रमुख वक्ताका रूपमा रहने र कार्यक्रम पनि उहाँकै निवास बनेपा नयाँबस्तीमा गरिने जानकारी त्यस कार्यक्रममा गराइएको थियो ।

शब्दयात्रा प्रकाशनको ८३ औँ प्रकाशनपुष्पका रूपमा साहित्यकार गणेशबहादुर खत्रीद्वारा लिखित सामाजिक नाटक ‘परिवर्तित पाइला’ प्रकाशन हुन लागेको छ । चौधवटा दृश्य भएको र सुदर्शनप्रसाद दाहालको मन्तव्य रहेको ‘परिवर्तित पाइला’ जम्मा ८० पृष्ठको रहेको छ ।
‘परिवर्तित पाइला’ सहित गणेशबहादुर खत्रीद्वारा लिखित सातवटा पुस्तक शब्दयात्रा प्रकाशनले प्रकाशित गरिसकेको छ ।

शब्दयात्रा प्रकाशनले विगतका वर्षहरूमा झैँ आगामी भदौ महिनामा पनि २०७४ सालका लागि आध्यात्मिक पत्रकारिता सम्मान, साहित्यिक पत्रिका सम्मान, फोटो पत्रकारिता सम्मान र नेपालभूमि स्तम्भकार सम्मान समर्पण गरिने भएकाले कारणसहित उपयुक्त व्यक्ति, संस्था वा पत्रिकाको नाउँ सिफारिस गरी शब्दयात्रा प्रकाशनको ठेगानामा पठाइदिन सम्पूर्ण पाठकवर्गमा अनुरोध गरेको छ ।
सम्मान गर्दा हरेक सम्मानमा ५ हजार रुपियाँ, किरीट, अभिवन्दनापत्र र उपहार समर्पण गर्ने गरिन्छ । गत वर्ष ती सम्मानहरूबाट ‘गौरी’ आध्यात्मिक पत्रिका, ‘गुगुल्डी’ साहित्यिक पत्रिका, मङ्गलमोहन श्रेष्ठ र प्रा. डा. गोपाल शिवाकोटीलाई सम्मान गरिएको थियो ।

आगामी भदौ महिनामा आध्यात्मिक पत्रकारिता सम्मान, साहित्यिक पत्रिका सम्मान, फोटो पत्रकारिता सम्मान र नेपालभूमि स्तम्भकार सम्मान समर्पण गरिने भएकाले कारणसहित उपयुक्त व्यक्ति, संस्था वा पत्रिकाको नाउँ सिफारिस गरी निम्नलिखित ठेगानामा पठाइदिन सम्पूर्ण पाठकवर्गमा अनुरोध छ ।

शब्दयात्रा प्रकाशन
अक्षरधाम, बनेपा, काभ्रे
दूरभाषाङ्क ः ०११–६६३१६१ ÷ इमेल : www.sypublication.com.np

काठमाडौं विश्वविद्यालयको रजिस्ट्रार पदमा पुनः नियुक्त हुनुभएकोमा प्रा. डा. भोला थापालाई हार्दिक बधाई ज्ञापन गर्दछौं ।

शब्दयात्रा प्रकाशन परिवार

शब्दयात्रा प्रकाशनका पथदर्शकद्वय काठमाडौँ विश्वविद्यालयका संस्थापक उपकुलपति डा. सुरेशराज शर्मा र नेपाल संस्कृत विश्वविद्यालयका उपकुलपति डा. कुलप्रसाद कोइराला एसिया प्यासिफिक एक्सिलेन्स अवार्डद्वारा सम्मानित हुनुभएकोमा हार्दिक बधाई ज्ञापन गर्दछौं ।
शब्दयात्रा प्रकाशन परिवार

शब्दयात्रा प्रकाशनले नेपालका चारजना अग्रज शब्दसाधकहरूको सालिक बनेपाको ‘कृष्ण–गीता परिसरमा’ स्थापना गर्न लागेकोमा त्यसका लागि आर्थिक सहयोग गर्ने दाताहरूको सङ्ख्या बढ्दै गएको छ ।
सालिकको स्थापना गर्नका लागि काभ्रे बनेपाका समाजसेवी हरिभक्त भोछिभोयाले पाँच हजार एक सय रुपियाँ, काठमाडौँ पेप्सिकोलाकी शेषा श्रेष्ठ कर्माचार्यले पाँच हजार एक सय पाँच रुपियाँ, काठमाडौँ महाराजगञ्जका विक्रम श्रेष्ठले पाँच हजार एक सय पाँच रुपियाँ, काठमाडौँ महाराजगञ्जकै सफू श्रेष्ठले पाँच हजार एक सय पाँच रुपियाँ, भक्तपुर ठिमीका समाजसेवी नारायणप्रसाद वैद्यले पाँच हजार पाँच सय पाँच रुपियाँ र काठमाडौँ गोकर्णेश्वरका तीर्थराज अधिकारीले एक हजार एक सय एघार रुपियाँ आर्थिक सहयोग गर्नुभएको छ । यसै गरी भोजपुर देउरालीका लेखक द्रोणप्रसाद श्रेष्ठले पहिले एघार हजार एक सय एघार रुपियाँ सहयोग गर्नुभएकोमा पछि नौ हजार चार सय चौध रुपियाँ थप गरेर बीस हजार पाँच सय पच्चीस रुपियाँ सहयोग गर्नुभएको छ ।
सालिकका लागि अन्य थुप्रै महानुभावहरूबाट आर्थिक सहयोगका लागि आश्वासन प्राप्त भएको छ ।
स्मरणीय छ — नेपालका प्रथम शिक्षासेवी बालागुरु षडानन्द, स्वराङ्कन गर्ने प्रथम गायिका मेलवादेवी गुरुङ, प्रथम साहित्यिक सहिद कृष्णलाल अधिकारी र प्रथम लोकतान्त्रिक पत्रकार देवीप्रसाद सापकोटाको सालिक शब्दयात्रा प्रकाशनले काभ्रे जिल्लाको बनेपामा स्थापना गर्न लागेको हो । यी चारै विधाका शीर्ष व्यक्तित्वको सालिक एकै ठाउँमा स्थापना गर्न लागिएको यो पहिलोपटक हो ।

शब्दयात्रा नारीस्रष्टा समाजले साहित्यका विभिन्न विधाहरूका विषयमा प्रशिक्षण कार्यक्रम सञ्चालन गर्ने भएको छ । समाजका सभापति पुण्यवती घलेको अध्यक्षतामा शब्दयात्रा प्रकाशनको कार्यालयमा गत २०७४ साल असार ९ गते शुक्रबार बसेको बैठकले उक्त निर्णय गरेको हो ।
बैठकले विभिन्न व्यक्तिहरूको जन्मजयन्तीमा तत्सम्बन्धी विशेष कार्यक्रमहरू गर्ने र ‘अक्षरधाम’ साहित्यिक पत्रिकाको व्यवस्थापन नारीस्रष्टा समाजबाट गर्ने गरी शब्दयात्रा प्रकाशनसँग आग्रह गर्ने निर्णय पनि गरेको जानकारी चण्डिका वाग्लेले दिनुभएको छ ।
शब्दयात्रा नारीस्रष्टा समाजमा हाल पुण्यवती घले, भवानी पाण्डे, चण्डिका वाग्ले, गीता अधिकारी, सजना आचार्य आदि नारीस्रष्टाहरू सक्रिय हुनुहुन्छ ।