पूर्वीय वाङ्मयका प्रकाण्ड विद्वान् तथा अद्वैत दर्शनका व्याख्याता डा. स्वामी रामानन्द गिरि विदेह हुनुभएको चौधौँ दिनको पुण्यतिथिको अवसर पारी काभ्रे बनेपास्थित हंसदा योगाश्रमको आयोजनामा गत २०७४ साउन ६ गते शुक्रबार श्रद्धाञ्जली सभाको आयोजना गरियो ।
श्रद्धाञ्जली सभामा प्रमुख अतिथिका रूपबाट काठमाडौँ विश्वविद्यालयका संस्थापक उपकुलपति डा. सुरेशराज शर्माले जटिल विषयलाई पनि सरल तरिकाले बुझाउन सक्ने स्वामीजीमा सरलताभित्र महानता रहेको कुरा बताउनुभएको थियो । शब्दयात्रा प्रकाशनका अध्यक्ष हरि मञ्जुश्रीले कविताबाट र गोसाइँस्थान नैमिषारण्य क्षेत्र विकास समितिका अध्यक्ष मुकुन्दप्रसाद उपाध्याय, स्वामी सत्यानन्द, द्वारिकामानसिंह प्रधान, सानुभाइ विष्ट र गणेशनारायण लिबीले मन्तव्यबाट शब्दश्रद्धा व्यक्त गर्नुभएको उक्त श्रद्धाञ्जली सभाको अध्यक्षता ऋषिकुमार स्वामी पञ्चशीलले र सञ्चालन यादव थापाले गर्नुभएको थियो । श्रद्धाञ्जली सभामा डा. शालिग्राम पोखरेल, आध्यात्मिक लेखक उद्धवप्रसाद भट्टराई, माया बादेलगायतका व्यक्तित्वहरूको उपस्थिति रहेको थियो ।

शब्दयात्रा प्रकाशनको ८६ औँ प्रकाशनपुष्पका रूपमा ‘अभियान’ नामक नाट्यकृति प्रकाशित हुन लागेको छ । युवा साहित्यकर्मी टेकलाल भारती ‘आदर्श’ द्वारा लिखित उक्त पुस्तक कृतिकारको पाँचौँ कृति हो ।
विगत ४ वर्षअघिदेखि हरेक वर्ष टेकलाल भारती ‘आदर्श’ ले लेखेको एउटा पुस्तक शब्दयात्रा प्रकाशनले प्रकाशन गरिदिँदै आएको छ ।

काभ्रे जिल्लाका प्रथम महाकाव्यकार श्रीधर (कविप्रसाद) प्याकु¥यालको एघारौँ काव्यकृतिका रूपमा शब्दयात्रा प्रकाशनबाट ‘मञ्जुश्री’ ज्योतिषकाव्य प्रकाशन हुने भएको छ । उक्त काव्यलाई शब्दयात्रा प्रकाशनबाट आगामी भदौ महिनामा आयोजना गरिने सम्मान समर्पण तथा पुस्तक सार्वजनिकीकरण कार्यक्रममा सार्वजनिक गरिने कार्यक्रम छ ।
काव्यकार श्रीधर प्याकु¥यालका अनुसार कर्कट लग्न लिई वृष राशीमा जन्मिएका व्यक्तिहरूको दशा–अन्तर्दशाको विवरणसहित ग्रहफल र त्यसको उपचारका विषयमा उल्लेख गरिएको यो काव्य नेपाली भाषामा ज्योतिषशास्त्रमा आधारित रहेर लेखिएको यस प्रकारको पहिलो काव्य हो । यो ज्योतिषकाव्य शब्दयात्रा प्रकाशनको ८५ औँ प्रकाशनपुष्पका रूपमा रहेको छ ।

महेश संस्कृत गुरुकुलका संस्थापक तथा अद्वैत दर्शनका व्याख्याता डा. स्वामी रामानन्द गिरिका विषयमा आध्यात्मिक लेखक तथा गोसाइँस्थान नैमिषारण्य क्षेत्र विकास समितिका अध्यक्ष मुकुन्दप्रसाद उपाध्यायद्वारा लिखित ‘वेदान्तशिरोमणि ः एक संस्मरण’ नामक पुस्तक शब्दयात्रा प्रकाशनबाट प्रकाशन हुन लागेको छ ।
‘नेपालभूमि साप्ताहिक’ का नियमित स्तम्भकार मुकुन्दप्रसाद उपाध्यायले आफ्नो ‘प्रलेखन’ स्तम्भमा प्रकाशन गराउनुभएका केही लेखहरू, अन्यत्र प्रकाशनार्थ दिइएका केही लेखहरू र स्वामीज्यू ब्रह्मलीन हुनुभएपछि लेखिएको एउटा लेखसहित अन्य सामग्रीहरू सङ्कलित उक्त पुस्तक स्वामीज्यूको १६ औँ दिनको पुण्यतिथिमा आगामी साउन ८ गते आइतबार देवघाटमा सार्वजनिक गरी वितरण गरिने कार्यक्रम रहेको छ ।
‘वेदान्तशिरोमणि ः एक अध्ययन’ मुकुन्दप्रसाद उपाध्यायद्वारा लिखित आठौँ र शब्दयात्रा प्रकाशनद्वारा प्रकाशित चौरासीऔँ पुस्तक हो ।

काभ्रे जिल्लाको बनेपामा प्रथम शिक्षासेवी बालागुरु षडानन्द, प्रथम लोकतान्त्रिक पत्रकार देवीप्रसाद सापकोटा, प्रथम साहित्यिक सहिद कृष्णलाल अधिकारी र स्वराङ्कन गर्ने प्रथम गायिका मेलवादेवी गुरुङको सालिक स्थापना गर्ने कार्यमा सहयोग पुगोस् भन्ने उद्देश्यले शब्दयात्रा प्रकाशनलाई आर्थिक सहयोग गर्ने सहयोगीहरूको सङ्ख्यामा वृद्धि हुँदै गएको छ ।
यसै क्रममा बन्दिपुर सिराहाका भुवानीप्रसाद बरालले एक हजार पचपन्न रुपियाँ र मादी सङ्खुवासभाका चन्द्रप्रसाद ढुङ्गानाले पाँच हजार पाँच सय पचपन्न रुपियाँ आर्थिक सहयोग गर्नुभएको छ । सहयोग गर्नका लागि धेरैजनाबाट आश्वासन पनि प्राप्त भएको छ ।

संसारमा कीर्ति छ धेर ठूलो
कीर्तिविना बन्दछ जीव लुलो
संसार छोडे पनि हेर क्वै दिन
आउनेछ यौटा जनतन्त्रको दिन
— प्रथम साहित्यिक सहिद कृष्णलाल अधिकारी
(शब्दयात्रा प्रकाशनबाट उहाँकै सालिक राख्न लागिएको हो ।)

शब्दयात्रा प्रकाशन नारी स्रष्टा समाजले भानुजयन्तीको सन्दर्भ पारी गत २०७४ साल असार ३० गते शुक्रबार ‘भानुसाहित्यमा नारीको स्थान’ विषयक विमर्श कार्यक्रमको आयोजना ग¥यो । ‘सिर्जनशीलता प्रवद्र्धन कार्यक्रम’ को पहिलो शृङ्लाका रूपमा आयोजित उक्त कार्यक्रममा जातीय कवि भानुभक्त आचार्यको साहित्यमा नारी जातिको स्थानका विषयमा साहित्यकार हरि मञ्जुश्रीले मन्तव्य राख्नुभएको थियो । मन्तव्यका क्रममा उहाँले भानुभक्तलाई सम्झनेहरूले भानुभक्तकै समकालीन काभ्रेली कवि वसन्त शर्मा ढकालले नेपाली भाषाको पहिलो खण्डकाव्य ‘श्रीकृष्णचरित्र’ लेखेकाले उनलाई पनि सम्मान गर्नुपर्ने धारणा राख्नुभएको थियो ।
उक्त कार्यक्रममा शारदाप्रसाद शर्मा, पदमनाथ ढुङ्गाना, ओतबहादुर खड्का, फणीन्द्रराज अधिकारी र शिवप्रसाद बन्जाराले भानुभक्तका केही कवितांशहरू र अम्बिका धिताल, गीता मञ्जुश्री र अक्रुर शाहले आआफ्ना मौलिक कविताहरू वाचन गर्नुभएको थियो ।
शब्दयात्रा प्रकाशनको सभाकक्षमा सम्पन्न उक्त कार्यक्रममा मच्छेश्वर सापकोटा र सरस्वती सापकोटाले जुवारी गीत गाउनुभएको थियो । कार्यक्रम चण्डिका वाग्लेको सभापतित्वमा भएको थियो भने कार्यक्रमको सञ्चालन भवानी पाण्डेले गर्नुभएको थियो ।