शब्दयात्रा प्रकाशनद्वारा प्रकाशित दुई पुस्तक सार्वजनिक गरिएका छन् । आख्यानकार तथा नवीन दर्शनका दार्शनिक भरत जङ्गमको व्यक्तित्वका बारेमा पदम दाहालले लेख्नुभएको ‘वरद नायक भरत जङ्गम’ नामक पुस्तक प्रमुख अतिथि सावित्री थापा, संस्थापक अध्यक्ष हरि मञ्जुश्री र कृतिकार पदम दाहालले संयुक्त रूपमा सार्वजनिक गर्नुभएको थियो भने भरत जङ्गमको कृतित्वका बारेमा चूडाप्रसाद चौलागाईंले लेख्नुभएको ‘भरत जङ्गमको निर्बन्ध बन्धन एक अध्ययन’ नामक पुस्तक सावित्री थापा, हरि मञ्जुश्री र कृतिकार चूडाप्रसाद चौलागाईंले संयुक्त रूपमा सार्वजनिक गर्नुभएको थियो ।
कृतिनायक भरत जङ्गम र कृतिकार पदम दाहाल शब्दयात्रा प्रकाशनका आजीवन सदस्य हुनुहुन्छ भने अर्का कृतिकार चूडाप्रसाद चौलागाईं शब्दयात्रा प्रकाशनद्वारा प्रकाशित राष्ट्रिय साप्ताहिक पत्रिका ‘नेपालभूमि’ का पूर्व कार्यकारी सम्पादक हुनुहुन्छ ।
पुस्तक सार्वजनिक गरिएपछि ‘वरद नायक भरत जङ्गम’ का विषयमा प्रजापति तिमिल्सिनाले र ‘भरत जङ्गमको निर्बन्ध बन्धन एक अध्ययन’ का विषयमा पुण्यवती घलेले टिप्पणी गर्नुभएको थियो । त्यस अवसरमा प्रकाशन संस्थाका तर्फबाट आजीवन सदस्य डा. इन्दुल केसीले ‘वरद नायक भरत जङ्गम’ नामक पुस्तक र अर्का आजीवन सदस्य चन्द्रबहादुर खड्काले ‘भरत जङ्गमको निर्बन्ध बन्धन एक अध्ययन’ नामक पुस्तक कृतिनायक भरत जङ्गमलाई प्रदान गर्नुभएको थियो ।
कार्यक्रम यही मङ्सिर १० गते शब्दयात्रा प्रकाशनको आफ्नै सभाकक्ष बनेपामा भएको थियो ।

हरि मञ्जुश्रीको लेखन तथा सङ्गीतमा तयार भएको अर्को भजन सार्वजनिक गरिएको छ । शब्दयात्रा प्रकाशनको सभाकक्षमा आज २०८२ साल मङ्सिर १० गते बुधबार आयोजित समारोहमा गायक वसन्त कुइकेलले यस भजनको सार्वजनिकीकरण गर्नुभएको हो । यो भजन शब्दयात्रा प्रकाशनद्वारा उत्पादित २२ औँ साङ्गीतिक प्रस्तुति हो । भजनलाई ‘गणेशप्रार्थना’ भनिएको छ । यस भजनमा मच्छेश्वर सापकोटाको सुपरिवेक्षण र बालकृष्ण सेवाचार्यको बाद्यसंयोजन तथा रोशन मञ्जुश्री अधिकारीको सम्पादन र वसन्त कुइकेलको स्वर रहेको छ । वसन्त कुइकेलको मात्र स्वर रहेको यो पहिलो भजन हो । यसअघि उहाँले गायिका रश्मि हुमागाईंसँग ‘फूल हुँ भगवान्’ गाउनुभएको थियो ।

शब्दयात्रा प्रकाशनले सबिना योन्जनलाई २०८२ सालको ‘शब्दयात्रा माधवी अधिकारी छात्रवृत्ति’ समर्पण गर्ने भएको छ । सिन्धुली जिल्लामा घर भएकी सबिना योन्जन हाल बनेपा नालाको शुभचामुण्डा माध्यमिक विद्यालयमा कक्षा ९ मा अध्ययनरत हुनुहुन्छ । उहाँलाई छात्रवृत्तिको रकम र प्रमाणपत्र मङ्सिर महिनामा समर्पण गरिनेछ । यस छात्रवृत्तिको कोष व्यवस्थापन आफ्नी धर्मपत्नी साहित्यकार तथा शिक्षासेवी माधवी अधिकारीको स्मृतिमा लेखक, वैज्ञानिक तथा काठमाडौँ विश्वविद्यालयका संस्थापक रजिस्ट्रार डा. सीताराम अधिकारी (काठमाडौँ) ले गर्नुभएको हो । यो छात्रवृत्ति हरेक वर्ष समर्पण गर्ने गरिन्छ ।

शब्दयात्रा प्रकाशनले लेखिका शारदा घिमिरे भैल (काभ्रेपलाञ्चोक) लाई ‘शब्दयात्रा सावित्री जङ्गम थापा अनुसन्धान विद्वतवृत्ति’ समर्पण गर्ने भएको छ । उहाँको लेखनको विषयवस्तु ‘सहकारी क्षेत्रमा सावित्री जङ्गम थापाको योगदान’ रहेको छ । हरेक वर्ष समर्पण गर्ने गरी संस्थापित यो विद्वतवृत्ति २०८२ सालका लागि आगामी मङ्सिर महिनामा समर्पण गरिनेछ । यस विद्वतवृत्तिका लागि लेखिका तथा समाजसेवी सावित्री जङ्गम थापाले शब्दयात्रा प्रकाशनमा कोषको व्यवस्था गर्नुभएको छ ।

शब्दयात्रा प्रकाशनको आयोजनामा २०८२ कार्तिक २८ गते शुक्रबार पनि दोस्रोपटकको स्वास्थ्यशिविर आयोजना गरियो । शिविरमा १० जनाले सम्पूर्ण स्वास्थ्यपरीक्षण (होलबडी चेकअप) गराउनुभयो । स्वास्थ्यपरीक्षण गराउनेहरूमा चन्द्रबहादुर खड्का, केदारनाथ तिमल्सिना, शारदाप्रसाद शर्मा, पुण्यवती घले, सहदीप पलाञ्चोके, मुरहरि रायमाझी, नवराज तिमल्सिना, हरिप्रसाद तिमल्सिना, रामगोपाल घले र देवकी दाहाल हुनुहुन्थ्यो । स्वास्थ्यशिविरको सञ्चालन प्रकाशबहादुर कायस्थले गर्नुभएको थियो ।

शब्दयात्रा प्रकाशनले प्रभा अधिकारीलाई २०८२ सालको ‘शब्दयात्रा द्रोणपुष्प पत्रकारिता छात्रवृत्ति’ समर्पण गर्ने भएको छ । काभ्रेपलाञ्चोक जिल्लाको बेथानचोक गाउँपालिका निवासी प्रभा अधिकारी बनेपाको काभ्रे बहुमुखी क्याम्पसमा पत्रकारितातर्फ स्नातक चौथो वर्षमा अध्ययनरत हुनुहुन्छ । उहाँलाई छात्रवृत्तिको रकम र प्रमाणपत्र मङ्सिर महिनामा समर्पण गरिनेछ । यस छात्रवृत्तिको कोष व्यवस्थापन आफ्नी धर्मपत्नी मनका श्रेष्ठको स्मृति र सम्मानमा लेखक तथा पूर्वप्रशासक द्रोणप्रसाद श्रेष्ठ (देउराली भोजपुर, हाल पेप्सिकोला काठमाडौँ) ले गर्नुभएको हो । यो छात्रवृत्ति हरेक वर्ष समर्पण गर्ने गरिन्छ ।