Shabdayatra Prakashan

डा. इन्दुल केसी र पदम दाहालले संयुक्त रूपमा लेखन तथा सम्पादन गर्नुभएको प्रस्तुत पुस्तक ‘एक–अर्काका दृष्टिमाथि समीक्षकका पुनर्दृष्टि’ त्रिकोणात्मक विषय–संयोजन भएको प्रयोगपरक कृति हो । तीन खण्डमा विभक्त यस पुस्तकको पहिलो खण्डमा डा. इन्दुल केसीको लेखन, दोस्रो खण्डमा पदम दाहालको लेखन तथा तेस्रो खण्डमा ‘एक–अर्काका दृष्टि दुई व्यक्तिका कृति’ पुस्तकमाथि डा. कृष्णप्रसाद दाहाल, डा. यज्ञेश्वर निरौला, प्रजापति तिमिल्सिना, डा. सीता सुवेदी पन्थी र चूडाप्रसाद चौलागाईका दृष्टिकोणहरू सङ्कलित छन् । यसमा जीवनाथ अधिकारीले भूमिका लेख्नुभएको छ । तेस्रो खण्डमा लेखिएका दृष्टिकोणहरू डा. इन्दुल केसी र पदम दाहालको संयुक्त लेखनमा प्रकाशित ‘एक–अर्काका दृष्टि दुई व्यक्तिका कृति’ पुस्तकमाथिका पाठकीय दृष्टिकोणहरू हुन् । यसरी यस पुस्तकले स्रष्टा र स्रष्टाको सृष्टि, द्रष्टा र द्रष्टाको दृष्टि तथा ती चारैवटाको संयोजन प्रस्तुत गरी एकै सन्दर्भका पाँच आयामलाई जोडेर नवीन र विशेष विशेषता पाठकसमक्ष प्रस्तुत गरेको छ । यस्तो मौलिक र सुन्दर सोच र सोचको कार्यान्वयनका लागि लेखक तथा सम्पादक डा. इन्दुल केसी र पदम दाहाल वन्दनीय हुनुहुन्छ ।

डा. इन्दुल केसीले सम्पादन गर्नुभएको प्रस्तुत पुस्तक ‘सावित्री स्मृति’ आफ्नी धर्मपत्नी सावित्री राणा केसीको निधनपछि उहाँले विभिन्न सामग्रीहरू सङ्कलन गरी तयार पार्नुभएको स्मृतिसँगालो हो । धर्मपत्नीलाई अर्धाङ्गिनी भनिन्छ । आधा अङ्ग गएर आधा अङ्ग रहेको अवस्था हरेक मान्छेका लागि दुःखद अवस्था हो । त्यस्तो अवस्था भोगिरहनुभएका डा. इन्दुल केसीले आफ्नो मनोव्यथालाई मुखले प्रकट नगरी अक्षरहरूमा देख्न चाहनुभयो र यो पुस्तक तयार पार्नुभयो । यस पुस्तकमा सावित्री राणा केसीको जीवनवृत्त, स्वास्थ्यसमस्याको विवरण, उहाँसँगका स्मरणहरू, उहाँको निधनसम्बन्धी समाचारहरू, निधनपछि प्राप्त भएका समवेदना सन्देशहरू र केही तस्बिरहरू सङ्कलन गरिएका छन् । त्यसैले यस पुस्तकका अक्षर–अक्षरमा डा. इन्दुल केसीभित्रका पीडाहरू पाउन सकिन्छ ।

संस्कृत भाषामा लेखिएको पतञ्जलि योगदर्शनलाई दिवाकर जङ्गमले सरल नेपाली भाषामा शब्दार्थसहित भावानुवाद गर्नुभएको ‘योगदर्शन’ नामक प्रस्तुत पुस्तक योगविषयक प्रामाणिक पुस्तक हो । शास्त्रसम्मत र विज्ञानसम्मत रूपबाट सम्पूर्ण मानवको चौतर्फी हितका लागि योगसाधना गर्न यसको विज्ञान र दर्शनलाई बुझ्नुपर्ने हुन्छ । त्यसैका लागि यो पुस्तक प्रकाशन गरिएको हो । यस पुस्तकले योगसाधना गर्दा नवयोगाभ्यासीहरूलाई योगदर्शनका सूत्रहरू बुझ्न सघाउनेछ र योगानुरागीहरूको योग–ध्यान–साधनामा थोरै पनि सहयोग गर्नेछ ।

अद्भुत आध्यात्मिक अनुभूतिहरू समेटेर दीपरत्न शाक्यले लेख्नुभएको ‘म को हुँ ?’ नामक यस पुस्तकमा मानव जीवनको सार्थकता केमा छ, जीवन के हो, मनमा आउने अनावश्यक तर्कनालाई कसरी नियन्त्रण गर्ने, जीवनको लक्ष्य कसरी निर्धारण गर्ने, जीवनलाई समाजोपयोगी बनाउने उपाय के हो, आफूलाई कसरी बुझ्ने आदि जिज्ञासाहरूको समाधान गरिएको छ । विभिन्न विकृतिहरूका कारण मानसिक रोगीहरू बढिरहेको र जीवनको लक्ष्य पत्ता लगाउन नसकेर छटपटीमा परिरहेको वर्तमान समयमा यो पुस्तक मार्गदर्शक बन्नेछ र यसले आध्यात्मिक साधनाद्वारा आफूलाई चिन्न र जीवनलाई बुझ्न सहयोग गर्नेछ ।