Shabdayatra Prakashan | Banepa – Akshyardham

सिर्जना खनाललाई सिर्जना सम्मान समर्पण गरिने

admin

-

May 6, 2024

शब्दयात्रा प्रकाशनले २०८१ सालको ‘शब्दयात्रा कल्याण लम्साल सिर्जना सम्मान’ महाकाव्यकार सिर्जना खनाल (रूपन्देही) मा समर्पण गर्ने भएको छ । उहाँद्वारा लिखित महाकाव्य ‘युगपुरुष’ २०८० साल मङ्सिरमा प्रकाशन गरिएको थियो । संस्कृत वाङ्मयका उद्भट विद्वान् भामहले काव्यिक गुणहरूको चर्चा गर्दा राम्रो काव्यमा ‘श्लेषः प्रसादः समता माधुर्य सुकुमारता, अर्थव्यक्तिरुदारत्वमोजः कान्ति समाधयः’ हुनुपर्छ भनेका छन् । सिर्जना खनालले यी विशेषताहरूबाट महाकाव्यलाई यथासम्भव पूर्णता दिने प्रयास गर्नुभएको छ । चार सय पृष्ठको उक्त महाकाव्यमा आरडी प्रभास चटौतको मन्तव्य रहेको छ । यस सम्मानका लागि कवि कल्याण लम्सालले कोष व्यवस्थापन गर्नुभएको हो । यो सम्मान आगामी जेठ महिनाको अन्तिम सातामा समर्पण गरिनेछ । सम्मान्य व्यक्तित्व चयन समितिको बैठकले उहाँलाई यो सम्मान समर्पण गर्ने निर्णय गरेको हो । सम्मान ग्रहण गर्न स्वीकृति प्रदान गर्नुभएकोमा महाकाव्यकार सिर्जना खनालप्रति शब्दयात्रा प्रकाशन परिवार हार्दिक आभार व्यक्त गर्दछ ।

हरि मञ्जुश्री अभिनन्दित

admin

-

May 6, 2024

0

शब्दयात्रा प्रकाशनका संस्थापक तथा अध्यक्ष भाषासेवी हरि मञ्जुश्रीलाई काठमाडौँमा अभिनन्दन गरिएको छ । काभ्रे सेवा समाजले आफ्नो वार्षिकोत्सवको अवसर पारी आयोजना गरेको कार्यक्रममा उहाँलाई अभिनन्दन गरिएको हो । काभ्रेपलान्चोक जिल्लालाई शब्दकर्मको तपस्थल बनाई दशकौँदेखि अनवरत रूपले नेपाली भाषा, साहित्य, संस्कृति र कलाको उन्नयनमा अथक रूपले खट्ने बहुप्रतिभाशाली सर्जकका अलावा एक कुशल साहित्यिक अन्वेषक, सङ्गठक, व्यवस्थापक, प्रकाशक, सम्पादक एवम् संरक्षकको पहिचान बनाउन सफल शब्दयात्रा प्रकाशनका संस्थापक अध्यक्ष भई सेवा गरेबापत उहाँलाई अभिनन्दन गरिएको कुरा अभिनन्दनपत्रको बेहोरामा उल्लेख गरिएको छ । उहाँका साथमा गायक दीपक खरेल, महालेखानिरीक्षक हरिप्रसाद मैनाली र राष्ट्रिय मानव अधिकार आयोगका सचिव मुरलीप्रसाद खरेल पनि सम्मानित हुनुभएको थियो ।

रोशन अधिकारीबाट १२ हजार रुपियाँ आर्थिक सहयोग

Activities

admin

-

May 6, 2024

0

शब्दसाधक तीर्थमा जग्गादान सम्बन्धी शिला–अभिलेखपत्र राख्ने प्रयोजनका लागि शब्दयात्रा प्रकाशनका आजीवन सदस्य तथा सफ्टवेयर इन्जिनियर रोशन मञ्जुश्री अधिकारीले १२ हजार रुपियाँ आर्थिक सहयोग उपलब्ध गराउनुभएको छ । शब्दयात्रा प्रकाशनको उन्नयनका लागि आफ्नो स्वामित्वको जग्गा संस्थालाई हस्तान्तरण गर्नुभएका समाजसेवी तथा आध्यात्मिक व्यक्तित्व कृष्णमणि कुइकेलको योगदान अरूका लागि प्रेरणा बनोस् तथा समाजसेवा गर्न खोज्नेहरूमा त्याग, समर्पण र निःस्वार्थ भावना विकसित र विस्तारित होस् भन्ने ध्येयले शिला–अभिलेखपत्र निर्माण गर्न उहाँले उक्त रकम सहयोग गर्नुभएको हो । यस सहयोगका लागि शब्दयात्रा प्रकाशन परिवार सफ्टवेयर इन्जिनियर रोशन मञ्जुश्री अधिकारीप्रति हार्दिक आभार प्रकट गर्दछ ।

टेलिभिजन उपहार

Activities

admin

-

April 29, 2024

0

प्रेरणादायी प्रवाचक तथा नेतृत्व विकास, आत्मिक जागरण र सामाजिक अनुसन्धान सम्बन्धी प्रशिक्षक धीरप्रसाद भण्डारीले शब्दयात्रा प्रकाशनलाई एक थान टेलिभिजन उपहारस्वरूप प्रदान गर्नुभएको छ । शब्दयात्रा प्रकाशनद्वारा निर्मित शब्दसाधक तीर्थमा समुपस्थित भएर उहाँले आज वैशाख १५ गते शनिबार टेलिभिजन हस्तान्तरण गर्नुभएको हो । शब्दयात्रा प्रकाशनका तर्फबाट उक्त टेलिभिजन संस्थापक अध्यक्षका रूपमा हरि मञ्जुश्रीले ग्रहण गर्नुभएको थियो । त्यस बखत संस्थापक सदस्य सकुल थापा र आजीवन सदस्य डा. इन्दुल केसीको पनि उपस्थिति थियो । यो टेलिभिजन शब्दसाधक अतिथिगृहका लागि उपयोग गरिनेछ । टेलिभिजन उपहार दिनुभएकोमा धीरप्रसाद भण्डारीप्रति शब्दयात्रा प्रकाशन परिवार हार्दिक आभार व्यक्त गर्दछ ।

उहाँहरूले चयन गर्नुहुनेछ

Activities

admin

-

April 27, 2024

0

आगामी जेठ महिनामा शब्दयात्रा प्रकाशनबाट सम्मान समर्पण गर्ने व्यक्ति वा संस्थाको चयन गरिदिन पाँचजनालाई अनुरोध गरिएको छ — रमेश पौड्याल, निर्मला श्रेष्ठ, नारायणप्रसाद वैद्य, गीता अधिकारी र आनन्दराज श्रेष्ठ । प्राप्त भएका सिफारिसमध्येबाट उहाँहरूले एक सम्मानका लागि एक व्यक्ति वा संस्थाको चयन गर्नुहुनेछ । उहाँहरूले चयन गर्नुभएको व्यक्ति वा संस्थालाई शब्दयात्रा प्रकाशनले सम्मान समर्पण गर्नेछ ।

पुस्तक १ सय ७३ वटा

Activities

admin

-

April 26, 2024

0

शब्दयात्रा प्रकाशन पुस्तकालयले विभिन्न विधाका १ सय ७३ वटा पुस्तक सहयोगस्वरूप प्राप्त गरेको छ । ती पुस्तकहरू पत्रकार तथा लेखक श्याम अधिकारीबाट प्राप्त भएका हुन् । यस सहयोगका लागि शब्दयात्रा प्रकाशन परिवार श्याम अधिकारीप्रति हार्दिक आभार प्रकट गर्दछ ।

हरि मञ्जुश्री सम्मानित

Activities

admin

-

April 22, 2024

0

शब्दयात्रा प्रकाशनका संस्थापक तथा अध्यक्ष हरि मञ्जुश्री सम्मानित हुनुभएको छ । उहाँलाई ललितपुरको महालक्ष्मी साहित्य समाजले यही वैशाख ८ गते सम्मानपत्र समर्पण गरेको हो । नेपाली भाषा–साहित्यका क्षेत्रमा गरेको अतुलनीय योगदानका लागि उहाँलाई सम्मान गरिएको बेहोरा सम्मानपत्रमा उल्लेख गरिएको छ ।

‘सफल जीवनका लागि योग’ छापिँदै

Activities

admin

-

April 22, 2024

0

शब्दयात्रा प्रकाशन र धुलिखेल योगसाधना केन्द्रको सहकार्यका रूपमा ‘सफल जीवनका लागि योग’ नामक पुस्तक प्रकाशन हुने भएको छ । यसअघि यी दुई संस्थाको पहिलो सहकार्यका रूपमा ‘योगदर्शन’ नामक पुस्तक प्रकाशन गरिएको थियो । सहकार्यको दोस्रो शृङ्खलाका रूपमा प्रकाशन हुन लागेको ‘सफल जीवनका लागि योग’ का लेखक तथा सम्पादक दिवाकर जङ्गम हुनुहुन्छ । शब्दयात्रा प्रकाशनको २ सय २९ औँ प्रकाशनपुष्पका रूपमा यस पुस्तकको मुद्रणकार्य यही वैशाख महिनामा गरिसकिनेछ ।

जेठमा सात सम्मान

admin

-

April 20, 2024

0

शब्दयात्रा प्रकाशनबाट आगामी जेठ महिनामा निम्नलिखित सम्मानहरू समर्पण गरिनेछन् । सम्मानका लागि उपयुुक्त व्यक्ति वा संस्थाको नाउँ र योगदानबारे [email protected] मा वैशाख २० गतेभित्र जानकारी पठाइदिन अनुरोध छ । प्राप्त भएका नाउँहरूमध्येबाट तीन सदस्यीय चयन समितिले सिफारिस गरेका व्यक्ति वा संस्थालाई अभिवन्दनापत्र, किरीट, भेटी, रुद्राक्षमाला र उपहारसहित सम्मान समर्पण गरिनेछ । (१) अङ्गुरबाबा जोशी शिक्षक सम्मान, (२) नन्दिकेश्वर अधिकारी शोध सम्मान, (३) हंसराज श्रेष्ठ सामाजिक जागरण सम्मान, (४) होमतोत्र शिक्षा सम्मान, (५) रामकृष्ण श्रेष्ठ विज्ञान–प्रविधि सम्मान, (६) कल्याण लम्साल सिर्जना सम्मान, (७) कालु वैद्य आयुर्वेद सम्मान ।

नयाँ वर्षको पहिलो दिन चार पुस्तक सार्वजनिक

admin

-

April 19, 2024

0

शब्दयात्रा प्रकाशनको आयोजनामा आज २०८१ सालको पहिलो दिन चारवटा पुस्तकलाई सार्वजनिक गरियो । आफ्नै सभाकक्षमा आयोजित आजको कार्यक्रममा कल्पना खरेल प्रमुख अतिथि तथा ममता मृदुल र मन्दिरा मधुश्री विशेष अतिथि हुनुहुन्थ्यो । कार्यक्रममा डा. इन्दुल केसीद्वारा सम्पादित ‘सावित्री स्मृति’ लाई मन्दिरा मधुश्री र डा. इन्दुल केसीले तथा डा. इन्दुल केसी र पदम दाहालद्वारा लिखित तथा सम्पादित ‘एक–अर्काका दृष्टिमाथि समीक्षकका पुनर्दृष्टि’ लाई मन्दिरा मधुश्री र पदम दाहालले सार्वजनिक गर्नुभयो । यसै गरी दिलहरि श्रेष्ठद्वारा लिखित ‘दिलहरि श्रेष्ठका कविता’ लाई ममता मृदुल र डा. भूषण श्रेष्ठले तथा शङ्करप्रसाद मानन्धरद्वारा लिखित ‘अध्यात्म र चिन्तन’ लाई ममता मृदुल र शङ्करप्रसाद मानन्धरले सार्वजनिक गर्नुभयो । तीनजना कृतिकार र जीवनाथ अधिकारीले पुस्तकका विषयमा आआफ्ना धारणा राख्नुभएको उक्त कार्यक्रममा ममता मृदुलले कविता वाचन र मन्दिरा मधुश्रीले कार्यक्रम समापन गर्नुभएको थियो भने डा. भूषण श्रेष्ठले कृतिकार दिलहरि श्रेष्ठका विषयमा जानकारी गराउनुभएको थियो । कल्पना खरेलले प्रमुख अतिथिका रूपमा मन्तव्य व्यक्त गर्नुभएको थियो । विष्णु ओलीले उद्घाटन गर्नुभएको आजको कार्यक्रमको सभापतित्व हरि मञ्जुश्रीले, सञ्चालन शिव बन्जाराले, स्वागत भाषण कृष्णमणि कुइकेलले, सामग्री व्यवस्थापन कालिका त्रिपाठी पन्त र केदारनाथ तिमल्सिनाले, स्वराङ्कन तथा छायाङ्कन इ. रोशन मञ्जुश्री अधिकारीले, रुद्राक्षमाला समर्पण नवराज पराजुलीले, अतिथित्रयलाई शब्दयात्रा प्रकाशनका तर्फबाट उपहार समर्पण साधुराम गिरीले गर्नुभएको थियो । कृतिकार दिलहरि श्रेष्ठ र कृतिनायक सावित्री राणा केसीको आत्मशान्तिको कामना गर्दै मानधारण गरिएको आजको कार्यक्रममा स्वस्तिवाचन, नीलकण्ठेश्वर महादेवको जयगान, राष्ट्रिय गान, शब्दयात्रा प्रकाशनको स्वागत गान र कार्यक्रम समापन गान श्रवण गराइएको थियो । कार्यक्रममा मच्छेश्वर सापकोटा, जयनारायण नेपाल, केशव रूपाखेती, डा. सीता सुवेदी पन्थी, प्रजापति तिमिल्सिना, दामोदर घिमिरे, चूडाप्रसाद चौलागाईं, प्रकाशबहादुर कायस्थ आदिसमेत विभिन्न अक्षरकर्मी तथा शब्दशिल्पीहरूको समुपस्थिति थियो ।