Shabdayatra Prakashan

शब्दयात्रा प्रकाशनको आयोजनामा हिजो २०८२ वैशाख २९ गते सोमबार सन्त ज्ञानदिलदासको जन्मजयन्ती एवम् सन्त भक्तिदिलद्वारा लिखित तथा शब्दयात्रा प्रकाशनद्वारा प्रकाशित ‘भक्तिसुधा’ पुस्तक सार्वजनिकीकरण र गायक–गायिकामा आभारपत्र समर्पण कार्यक्रमको आयोजना गरियो । स्वामी कल्याणमित्रको प्रमुख आतिथ्य, साहित्यकार तथा पत्रकार कृष्णविनोद लम्साल, त्रिचन्द्र क्याम्पस नेपाली शिक्षण विभागका प्रमुख उषा अधिकारी, कवि तथा पूर्वप्रशासक हरि कोर्काली र साहित्यिक पत्रकार ब्रह्मप्रिय प्रेमस्वरूपको आतिथ्य, संस्थाका अध्यक्ष हरि मञ्जुश्रीको सभापतित्व र आजीवन सदस्य कृष्णमणि कुइकेलको सञ्चालनमा हिजोको कार्यक्रम सम्पन्न भएको थियो । कार्यक्रमको समुद्घाटन ब्रह्मप्रिय प्रेमस्वरूपले गर्नुभएको उक्त कार्यक्रमको समापन अतिथि उषा अधिकारीले र सबै अतिथिहरूलाई शब्दयात्रा प्रकाशनका तर्फबाट उपहार समर्पण कवि पदम दाहालले गर्नुभएको थियो ।

शब्दयात्रा प्रकाशनले २०८२ सालको ‘शब्दयात्रा हंसराज श्रेष्ठ सामाजिक जागरण सम्मान’ समाजसेवी प्रतिभा सुवेदी (काठमाडौँ) मा समर्पण गर्ने भएको छ । शब्दयात्रा प्रकाशनद्वारा गठित सम्मान्य व्यक्तित्व चयन समितिको बैठकले उहाँलाई सम्मान गर्ने निर्णय गरेको हो । उहाँले जनस्तरीय संस्थाहरूको गठन र सञ्चालन, प्रशिक्षण, लेखन र प्रकाशन जस्ता विभिन्न विधाहरूबाट निरन्तर सामाजिक अभियान सञ्चालन गरेर नारी चेतना, जागरण, उत्थान र सबलीकरणका लागि लामो समयदेखि महत्त्वपूर्ण भूमिका निर्वाह गरिरहनुभएको छ । उहाँजस्ती सक्रिय सामाजिक अभियन्तामा सम्मान समर्पण गर्न पाउनु शब्दयात्रा प्रकाशनको सौभाग्य हो । यस सम्मानको कोष व्यवस्थापन काभ्रेपलाञ्चोक जिल्लाका प्रसिद्ध समाजसुधारक हंसराज श्रेष्ठको स्मृतिमा आनन्दराज श्रेष्ठ (काभ्रेपलाञ्चोक) ले गर्नुभएको हो । सम्मान आगामी जेठ महिनामा समर्पण गरिनेछ । सम्मान ग्रहण गर्न स्वीकृति प्रदान गर्नुभएकोमा प्रतिभा सुवेदीप्रति शब्दयात्रा प्रकाशन परिवार हार्दिक आभार प्रकट गर्दछ ।

शब्दयात्रा प्रकाशनले २०८२ सालको ‘शब्दयात्रा बेलप्रसाद श्रेष्ठ दानशीलता सम्मान’ अङ्गदाता, समाजसेवी तथा साहित्यकार लीलादेवी श्रेष्ठ (सङ्खुवासभा) मा समर्पण गर्ने भएको छ । शब्दयात्रा प्रकाशनद्वारा गठित सम्मान्य व्यक्तित्व चयन समितिको बैठकले उहाँलाई सम्मान गर्ने निर्णय गरेको हो । मृगौलाले काम नगरेर मरणासन्न अवस्थामा पुग्नुभएका आफ्ना श्रीमान् प्रा. केदारनाथ श्रेष्ठलाई उहाँले २७ वर्षअघि २०५५ साल जेठ १५ गते आफ्नो मृगौला दान गरेर आदर्श पत्नी र आदर्श दाताको परिचय कायम गर्नुभएको छ एवम् एउटै मृगौलाको भरमा हालसम्म समाजसेवा र साहित्यसेवामा पतिपत्नी नै सक्रिय हुनुहुन्छ । उहाँले विभिन्न संस्थालाई भौतिक सम्पत्ति पनि दान गर्नुभएको छ । उहाँजस्ती दातामा सम्मान समर्पण गर्न पाउनु शब्दयात्रा प्रकाशनको सौभाग्य हो । यस सम्मानको कोष व्यवस्थापन अविकसित धुलिखेललाई विकसित धुलिखेल बनाउन नेतृत्व गर्ने समाजसेवी बेलप्रसाद श्रेष्ठ (काभ्रेपलाञ्चोक) ले गर्नुभएको हो । सम्मान आगामी जेठ महिनामा समर्पण गरिनेछ । सम्मान ग्रहण गर्न स्वीकृति प्रदान गर्नुभएकोमा लीलादेवी श्रष्ठप्रति शब्दयात्रा प्रकाशन परिवार हार्दिक आभार प्रकट गर्दछ ।

नेपालको पहिलो महिला मुख्यमन्त्री अष्टलक्ष्मी शाक्य हिजो वैशाख २४ गते शब्दसाधक तीर्थको अवलोकन गर्न शब्दयात्रा प्रकाशन बनेपामा आउनुभयो । उहाँका साथमा पूर्वसभासद् शीला कतिला, पूर्वसभासद् ममता गिरी, बनेपा नगरपालिकाका उपप्रमुख विमला सापकोटा दाहाल, प्राज्ञ सुषमा राजभण्डारी, पुस्तकालयविज्ञ इन्दिरा दली र विमला तिमल्सिना हुनुहुन्थ्यो । उहाँहरूलाई हरि मञ्जुश्री, सावित्री जङ्गम थापा र कृष्णमणि कुइकेलले स्वागत गर्नुभयो । शब्दयात्रा प्रकाशनले सालिक, मन्दिर र पुस्तकालय निर्माण, पुस्तक प्रकाशन, सम्मान–पुरस्कार र छात्रवृत्ति समर्पण, अतिथिगृह सञ्चालन जस्ता हालसम्मका गतिविधिका बारेमा हरि मञ्जुश्रीले जानकारी गराउनुभयो । त्यसपछि उहाँहरूले शब्दयात्रा प्रकाशनद्वारा निर्मित संरचनाहरूको अभिरुचिपूर्वक अवलोकन गर्नुभयो । उहाँहरूले शब्दयात्रा सावित्री जङ्गम थापा अध्ययन–अनुसन्धान केन्द्रका बारेमा पनि जानकारी लिनुभयो । नेपाली महिलाहरूले राष्ट्रिय विकासका विभिन्न पक्षहरूमा गरेका योगदानका विषयमा अनुसन्धान गराउन सामग्रीहरू सङ्कलन भइरहेको र अनुसन्धानको काम थालनी भई विद्वतवृत्ति पनि दिने गरेको जानकारी सावित्री जङ्गम थापाले गराउनुभयो । उहाँहरूले पनि अनुसन्धान केन्द्रका लागि यथाशक्य सहयोग गर्ने प्रतिबद्धता व्यक्त गर्नुभयो ।

शब्दयात्रा प्रकाशनले २०८२ सालको ‘शब्दयात्रा कालु वैद्य आयुर्वेद सम्मान’ आयुर्वेदिक चिकित्सक तथा अनुवादक डा. छत्रपति दाहाल (काभ्रेपलाञ्चोक) मा समर्पण गर्ने भएको छ । शब्दयात्रा प्रकाशनद्वारा गठित सम्मान्य व्यक्तित्व चयन समितिको बैठकले उहाँलाई सम्मान गर्ने निर्णय गरेको हो । उहाँले आयुर्वेदिक चिकित्सकका रूपमा लामो समयसम्म सेवा गर्नुका साथै संस्कृत भाषामा लेखिएका आयुर्वेदसम्बन्धी विभिन्न ग्रन्थहरूको नेपाली भाषामा अनुवाद तथा सम्पादन गरी नेपाली वाङ्मयलाई सुम्पनुभएको छ भने अनुसन्धान पनि गर्नुभएको छ । उहाँजस्ता आयुर्वेदिक चिकित्सक, अनुवादक, सम्पादक एवं अनुसन्धातामा सम्मान समर्पण गर्न पाउनु शब्दयात्रा प्रकाशनको सौभाग्य हो । यस सम्मानको कोष व्यवस्थापन भक्तपुरका अग्रज चिकित्सक कालु वैद्यको स्मृतिमा नारायणप्रसाद वैद्य र उहाँका परिवारजन (भक्तपुर) ले गर्नुभएको हो । सम्मान आगामी जेठ महिनामा समर्पण गरिनेछ । सम्मान ग्रहण गर्न स्वीकृति प्रदान गर्नुभएकोमा डा. छत्रपति दाहालप्रति शब्दयात्रा प्रकाशन परिवार हार्दिक आभार प्रकट गर्दछ ।

शब्दयात्रा प्रकाशनले २०८२ सालको ‘शब्दयात्रा होम–तोत्र शिक्षा सम्मान’ शिक्षासेवी तथा शैक्षिक चिन्तक प्रा. डा. मीनबहादुर विष्ट (प्युठान) मा समर्पण गर्ने भएको छ । शब्दयात्रा प्रकाशनद्वारा गठित सम्मान्य व्यक्तित्व चयन समितिको बैठकले उहाँलाई सम्मान गर्ने निर्णय गरेको हो । उहाँले लामो समयसम्म विश्वविद्यालयमा शिक्षा विषयक प्राध्यापन र विद्यावारिधि उपाधिको शोधनिर्देशन गर्नुका साथै आफ्ना उत्कृष्ट शैक्षिक चिन्तनहरू पुस्तकाकार रूपमा नेपाली वाङ्मयमा प्रस्तुत गर्नुभएको छ । उहाँजस्ता शिक्षासेवी तथा शैक्षिक चिन्तकमा सम्मान समर्पण गर्न पाउनु शब्दयात्रा प्रकाशनको सौभाग्य हो । यस सम्मानको कोष व्यवस्थापन शिक्षासेवी रमेश पौड्याल (काभ्रेपलाञ्चोक) ले गर्नुभएको हो । सम्मान आगामी जेठ महिनामा समर्पण गरिनेछ । सम्मान ग्रहण गर्न स्वीकृति प्रदान गर्नुभएकोमा प्रा. डा. मीनबहादुर विष्टप्रति शब्दयात्रा प्रकाशन परिवार हार्दिक आभार प्रकट गर्दछ ।

शब्दयात्रा प्रकाशनले २०८२ सालको ‘शब्दयात्रा रामकृष्ण श्रेष्ठ विज्ञान–प्रविधि सम्मान’ वैज्ञानिक प्रा. डा. राजेन्द्र ज्ञवाली (कपिलवस्तु) मा समर्पण गर्ने भएको छ । शब्दयात्रा प्रकाशनद्वारा गठित सम्मान्य व्यक्तित्व चयन समितिको बैठकले उहाँलाई सम्मान गर्ने निर्णय गरेको हो । उहाँले नेपालमा पाइने जडिबुटीहरूको वैज्ञानिक परीक्षण गरी अर्बुद रोग (क्यान्सर) का कोशिकाहरू नष्ट गर्ने जडिबुटीजन्य वनस्पतिहरूको पहिचान गरेर नेपालको विज्ञान–प्रविधि विधामा हुने अनुसन्धानका क्षेत्रमा महत्त्वपूर्ण योगदान गर्नुभएको छ । उहाँजस्ता सक्रिय वैज्ञानिक तथा अनुसन्धातामा सम्मान समर्पण गर्न पाउनु शब्दयात्रा प्रकाशनको सौभाग्य हो । यस सम्मानको कोष व्यवस्थापन रामकृष्ण स्मृति प्रतिष्ठानका तर्फबाट निर्मला श्रेष्ठ (काभ्रेपलाञ्चोक) ले गर्नुभएको हो । सम्मान आगामी जेठ महिनामा समर्पण गरिनेछ । सम्मान ग्रहण गर्न स्वीकृति प्रदान गर्नुभएकोमा प्रा. डा. राजेन्द्र ज्ञवालीप्रति शब्दयात्रा प्रकाशन परिवार हार्दिक आभार प्रकट गर्दछ ।