शब्दयात्रा प्रकाशनले २०७५ सालदेखि वर्षमा तीनपटक सम्मान कार्यक्रमको आयोजना गर्ने निर्णय गरेको छ । संस्थाबाट हरेक वर्ष समर्पण गरिने सम्मानहरूको सङ्ख्या १८ भएकाले जेठ, असोज र माघ महिनामा ६–६ वटा सम्मान समर्पण गर्ने निर्णय गरिएको हो ।
अबदेखि जेठ महिनामा शोध सम्मान, राष्ट्रझङ्कार सम्मान, सिर्जना सम्मान, शिक्षक सम्मान, प्रशासनिक महिला प्रतिभा सम्मान र सामाजिक जागरण सम्मान समर्पण गरिनेछन् भने असोज महिनामा आमसञ्चार सम्मान, फोटो पत्रकारिता सम्मान, आध्यात्मिक पत्रकारिता सम्मान, साहित्यिक पत्रिका सम्मान, नेपालभूमि स्तम्भकार सम्मान र शिक्षा सम्मान समर्पण गरिनेछन् । यसै गरी माघ महिनामा कविता–काव्य सम्मान, बालसाहित्य सम्मान, समालोचना सम्मान, अनुसन्धान सम्मान, महिला प्रतिभा सम्मान र विज्ञान–प्रविधि सम्मान समर्पण गरिनेछन् ।

शब्दयात्रा प्रकाशनले नेपालमा पहिलोपटक नेपालका स्वनामधन्य पाँचजना प्रथम शब्दसाधकहरूको सालिक स्थापना गर्दै गरेकोमा त्यसलाई सहयोग गर्न उत्सव कुइँकेल (बनेपा — ६, काभ्रेपलाञ्चोक) ले ५ हजार १ सय रुपियाँ र दामोदर अधिकारी (काँडाघारी, काठमाडौँ) ले ५ हजार ५ सय ५ रुपियाँ आर्थिक सहयोग गर्नुभएको छ ।
आर्थिक सहयोग गर्न अन्य महानुभावहरूले पनि वचनबद्धता प्रकट गर्नुभएको छ ।

यस संस्थाका शुभचिन्तक तथा सहयोगी मित्र साहित्यकार तथा चिकित्सक डा. बालकृष्ण थापा विमान दुर्घटनामा परी अल्पायुमा नै हामीबाट बिदा हुनुभएकोमा हामी व्यथित बनेका छौँ । उहाँको निधनप्रति हार्दिक श्रद्धापुष्प अर्पण गर्दछौँ ।

शब्दयात्रा प्रकाशन परिवार

लामो समयसम्म पत्रकारिता गरेर पत्रकारिता क्षेत्रभित्रको मर्मलाई आत्मसात गरिसकेका युवा नेता गोकुल बाँस्कोटा नेपाल सरकारको सूचना तथा सञ्चार राज्यमन्त्री हुनुभएकोमा हार्दिक बधाई ज्ञापन गर्दै उहाँको सफल कार्यकालका लागि शुभकामना व्यक्त गर्दछौँ ।

नेपालभूमि साप्ताहिक परिवार

शब्दयात्रा प्रकाशनले २०७५ सालका लागि ‘विद्यार्थीसँग शब्दयात्रा’ नामक कार्यक्रम सुरु गर्ने भएको छ ।
विभिन्न विद्यालयमा अध्ययन गर्ने विद्यार्थीहरूलाई भाषा–व्याकरण, साहित्यिक सिर्जना, लेखनकला, अभिव्यक्ति–कौशल आदि विषयमा जानकार बनाई उनीहरूमा निहित प्रतिभालाई प्रस्फुटित गराएर उनीहरूको व्यक्तित्व विकास गराउन उक्त कार्यक्रम सुरु गर्न लागिएको हो ।
यसअघि शब्दयात्रा प्रकाशनले २०७४ सालका लागि ‘कर्मयोद्धासँग शब्दसंवाद’ कार्यक्रम सञ्चालन गरेको थियो ।

धुलिखेलका समाजसेवी बेलप्रसाद श्रेष्ठका पूज्य पिता मोहनप्रसाद माकजूको देहावसानबाट हामी व्यथित बनेका छौं । दिवङ्गत आत्माको मोक्षप्राप्तिको कामना गर्दै शोकसन्तप्त परिवारजनप्रति हार्दिक समवेदना व्यक्त गर्दछौं ।

शब्दयात्रा प्रकाशन परिवार

शब्दयात्रा प्रकाशनद्वारा संस्थापित ‘शब्दयात्रा नन्दिकेश्वर अधिकारी शोध सम्मान’ बाट २०७२ सालमा सम्मानित बालसाहित्यकार तथा ‘शब्दयात्रा गोपाल पराजुली बालसाहित्य सम्मान’ का आर्थिक व्यवस्थापक गोपाल पराजुली २५ हजार रुपियाँ नगदसहित ‘नेपाल बालसाहित्य समाज — मनोरमा जफा बालसाहित्य अवार्ड, २०१८’ बाट सम्मानित हुनुभएको छ । गत २०७४ फागुन २३ गते आयोजित विशेष समारोहमा उहाँलाई प्रमुख अतिथिका रूपबाट लोकसंस्कृतिविद् डा. सत्यमोहन जोशीले सम्मानपत्र प्रदान गर्नुभएको थियो ।
शब्दयात्रा प्रकाशन परिवार बालसाहित्यकार गोपाल पराजुलीलाई यस सम्मानका लागि हार्दिक बधाई ज्ञापन गर्दछ ।

शब्दयात्रा प्रकाशनमार्फत बनेपामा बालागुरु षडानन्द, देवीप्रसाद सापकोटा, कृष्णलाल अधिकारी, मेलवादेवी गुरुङ र नरबहादुर भारतीको सालिक स्थापना गर्नका लागि शुभेच्छुकहरूले आआफ्नो गच्छेअनुसार आर्थिक सहयोग गरिरहनुभएको छ ।
त्यसै क्रममा छविलाल कुइँकेल (बनेपा, काभ्रेपलाञ्चोक) ले ५ हजार ५ सय ५५ रुपियाँ, पदमनाथ ढुङ्गाना (धुलिखेल, काभ्रेपलाञ्चोक) ले आफ्नी आमा चन्द्रकुमारी ढुङ्गानाको नाउँमा ११ हजार रुपियाँ, घनश्याम राजकर्णिकार (कमलपोखरी, काठमाडौँ) ले १० हजार २ सय रुपियाँ र प्रा. डा. विष्णु सापकोटाले ५ हजार १ सय रुपियाँ आर्थिक सहयोग उपलब्ध गराउनुभएको छ ।

शब्दयात्रा प्रकाशनले पूर्वघोषणाअनुसार ‘कर्मयोद्धासँग शब्दसंवाद’ नामक नियमित साप्ताहिक प्रवचन कार्यक्रमको एक वर्ष पूरा भएको हुनाले हालका लागि यो कार्यक्रम स्थगित गरेको छ । यस कार्यक्रमले बाउन्न शृङ्ला पूरा गरिसकेपछि स्थगित गरिएको हो ।
यस कार्यक्रमका सञ्चालक पदमनाथ ढुङ्गानाका अनुसार दुई शृङ्खलामा प्रवचनइतरका अन्य कार्यक्रम गरिएर अन्य पचासवटा कार्यक्रममा पचासजनाले प्रमुख वक्ताका रूपमा उपस्थित भई प्रवचन गर्नुभएको छ । ती प्रवचनहरू ‘नेपालभूमि साप्ताहिक’ मा प्रकाशित र शब्दयात्रा प्रकाशनको वेभसाइटबाट प्रसारित भएका छन् ।
कार्यक्रममा प्रस्तुत गरिएका प्रवचनहरू र ती प्रवचनका प्रवाचकहरूको व्यक्तित्वलाई समेटेर पुस्तकको तयारी गर्दै गरेको जानकारी पनि पदमनाथ ढुङ्गानाले गराउनुभएको छ ।